ហេង រស្មី
2021-02-26
RFA
សម្ដេចក្រុមព្រះនរោត្តមរណឫទ្ធិប្រធានគណបក្សហ៊្វិន ស៊ិនប៉ិច។ រូបថត៖ អាស៊ីសេរី
អ្នកនាំពាក្យគណបក្សហ៊្វុនស៊ិនប៉ិច លោក ផាន់ សិទ្ធី មានប្រសាសន៍ថា កិច្ចប្រជុំដែលដឹកនាំដោយមន្ត្រីជាន់ខ្ពស់គណបក្សហ៊្វុនស៊ិនប៉ិចមួយចំនួនគឺមានចេតនាបណ្ដេញព្រះអង្គម្ចាស់ នរោត្តម រណឫទ្ធិ ចេញពីប្រធានគណបក្ស។
លោកបន្តថា មន្ត្រីជាន់ខ្ពស់ទាំងនោះ បានសម្រេចធ្វើប្រធានសក្ដិសម្ដេចក្រុមព្រះ នរោត្តម រណឫទ្ធិ ដោយអះអាងថា ព្រះអង្គមានជំងឺមិនអាចមកដឹកនាំគណបក្សបានតទៅទៀត។ លោកថា ទង្វើនេះមានចេតនាមិនល្អទៅលើសម្ដេចក្រុមព្រះ ក្នុងពេលដែលព្រះអង្គកំពុងសម្រាកព្យាបាលជំងឺនៅក្នុងប្រទេសបារាំង៖ «គណបក្សហ្វ៊ុនស៊ិនប៉ិច ក្រោមការដឹកនាំរបស់សម្ដេចក្រុមព្រះ នៅតែធ្វើសកម្មភាពដឹកនាំនយោបាយជាធម្មតាអត់មាន ដូចការចោទប្រកាន់របស់លោក យូ ហុកគ្រី ហើយនិងបក្សពួកគាត់ ដែលបានចោទប្រកាន់ទេ។ រឿងទីពីរ ខ្ញុំសូមថ្កោលទោស ចំពោះគំនិតទុច្ចរិត ដែលក្រុមរបស់លោក យូ ហុកគ្រី បានរៀបចំកិច្ចប្រជុំ ហើយប្រកាសថា សម្ដេចក្រុមព្រះលោកគ្មានសមត្ថភាពមិនល្អក្លាយទៅជាអ្នកដឹកនាំ ហើយក្លាយទៅជាប្រធានសក្ដិ ហើយគាត់រៀបចំជ្រើសរើសគណៈកម្មាធិការនាយកនេះ គឺជាទង្វើរមួយ ដែលខុសច្បាប់ផង និងខុសពីបទបញ្ជាផ្ទៃក្នុងរបស់គណបក្សហ៊្វុនស៊ិនប៉ិច»។
ប្រតិកម្មរបស់មន្ត្រីនាំពាក្យនេះ គឺក្រោយពេលមានមន្ត្រីជាន់ខ្ពស់គណបក្សហ៊្វុនស៊ិនប៉ិចមួយចំនួនដែលរួមមានលោក យូ ហុកគ្រី លោក ប៉ោ ប៊ុនស្រ៊ឺ លោក ញ៉េប ប៊ុនជិន និងលោក យឹម សាវី កាលពីថ្ងៃទី២២ កុម្ភៈ កន្លងទៅនេះ បានបើកកិច្ចប្រជុំគណៈកម្មាធិការនាយករបស់គណបក្ស នៅក្នុងសណ្ឋាគារមួយកន្លែងនៅក្នុងទីក្រុងភ្នំពេញ។
អនុប្រធានគណបក្សហ៊្វុនស៊ិនប៉ិច លោក យូ ហុកគ្រី ប្រាប់អាស៊ីសេរីយ៉ាងខ្លីថា ខ្លឹមសារនៃកិច្ចប្រជុំនោះ មានបំណងតែមួយគត់ គឺចង់ស្រោចស្រង់សម្ដេចក្រុមព្រះ និងគណបក្សហ្វ៊ុនស៊ិនប៉ិច ក្នុងពេលព្រះអង្គកំពុងព្យាបាលព្រះរោគនៅប្រទេសបារាំង។ លោក យូ ហុកគ្រី មិនបានបញ្ជាក់អ្វីផ្សេងទៀតទេ ដោយលោកបានបង្វែរសំណួរនេះឱ្យទៅសួរលោក ញ៉េប ប៊ុនជិន វិញ។ អតីតរដ្ឋមន្ត្រីក្រសួងការងារខាងកូតាគណបក្សហ៊ុនស៊ិនប៉ិច ក្នុងអំឡុងឆ្នាំ១៩៩៨ លោក ញ៉េប ប៊ុនជិន និងជាអនុប្រធានគណបក្សហ៊ុនស៊ិនប៉ិច មានប្រសាសន៍ថា ពួកលោកជាអ្នកស្រឡាញ់គណបក្សពិតប្រាកដ ហើយគ្មានបំណងធ្វើបក្សប្រហារ ដើម្បីទម្លាក់ព្រះអង្គម្ចាស់ នរោត្តម រណឫទ្ធិ ពីមុខតំណែងទេ។
លោកបន្តថា ក្រុមមន្ត្រីជាន់ខ្ពស់សម្រេចកោះប្រជុំនេះ គឺចង់ជួយគណបក្សឱ្យរឹងមាំ ដើម្បីចូលរួមការបោះឆ្នោតនាពេលខាងមុខ៖ «យើងអត់មានទៅធ្វើបក្សប្រហារអី ទៅដណ្ដើមអីអត់ទេ ដើម្បីរៀបចំឱ្យស្រួលទៅ ដើម្បីឱ្យព្រះអង្គសព្វព្រះទ័យថា ព្រះអង្គម្ចាស់ ចក្រា វុទ្ធ ក្លាយជាអ្នកដឹកនាំ យើងនឹងរៀបចំទៅហ្នឹង។ ប៉ុន្តែជើងក្រោម វាអត់ធ្វើអាហ្នឹង វាដើរតែដកគេ។ យើងមិនមែនធ្វើបក្សប្រហារទេ ខ្ញុំជម្រាបជូនទៅលោកអ្នកនាំពាក្យលោក ផាន់ សិទ្ធី។ លោក មុននឹងមានប្រសាសន៍ថា យើងធ្វើបក្សប្រហារ លោកពិនិត្យមើលឱ្យមែនទែនថា ហ៊្វុនស៊ិនប៉ិច មានអ្វីឱ្យយើងធ្វើបក្សប្រហារ។ យើងចំណាយលុយខ្លួនយើង ញើសឈាម បទពិសោធន៍យើង ហើយសុទ្ធតែជាមន្ត្រីជាន់ខ្ពស់ មនុស្សមានយសមានកេរ្តិ៍ឈ្មោះ»។
សម្ដេចក្រុមព្រះ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច បច្ចុប្បន្ននេះកំពុងសម្រាកព្យាបាលព្រះរោគ ក្រោយពីព្រះអង្គបានជួបគ្រោះថ្នាក់ចរាចរណ៍នៅតាមបណ្ដោយផ្លូវជាតិលេខ៤ ក្នុងស្រុកព្រៃនប់ ខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៨។ ហេតុការណ៍គ្រោះថ្នាក់ចរាចរណ៍លើកនោះ បានបណ្ដាលឱ្យអ្នកម្នាង អ៊ុក ផល្លា ភរិយារបស់ព្រះអង្គទទួលមរណភាព ចំណែកឯព្រះអង្គរងរបួសរហូតមកដល់សព្វថ្ងៃនេះ។
អ្នកវិភាគនយោបាយ និងសង្គមបណ្ឌិត មាស នី បញ្ជាក់ថា គណបក្សហ៊្វុនស៊ិនប៉ិច គួរតែជជែកផ្ទៃក្នុងគ្នាជាមុនសិន មុននឹងមានវិធានការផ្សេងៗ នៅក្នុងបក្ស ដើម្បីកុំឱ្យបែកគ្នាទៅជាបំណែកតូចៗ។
លោកថា មិនសម្រាប់តែគណបក្សហ៊្វុនស៊ិនប៉ិច ទេ គណបក្សដ៏ទៃផ្សេងទៀតមិនគួរគិតអំពីការដណ្ដើមតំណែងគ្នាក្នុងការរៀបចំរចនាសម្ព័ន្ធនោះទេ។ គណបក្សគូរតែគិតគូរដល់អ្នកគាំទ្រល្អជាង ដោយសារតែអ្នកដែលអាចជួយឱ្យគណបក្សឈ្នះឆ្នោតបាន គឺអ្នកគាំទ្រវិញទេ៖ «បើប្រៀបធៀបពីមុន ហ៊្វុនស៊ិនប៉ិច គាត់ធ្លាក់នូវទឹកដៃនៃប្រជាប្រិយភាពទទួលនូវការគាំទ្រពីពលរដ្ឋហ្នឹង ធ្លាក់ធ្ងន់មែនទែន ហើយខ្ញុំជឿថា អ្នកដឹកនាំ ក៏គាត់ទទួលស្គាល់ ហើយមើលឃើញរឿងហ្នឹងដែរ។ ប៉ុន្តែការរៀបចំរចនាសម្ព័ន្ធរបស់បក្សវាជាកាតព្វកិច្ច ដែលត្រូវគិត។ ប៉ុន្តែ បើសិនជាគិតមិនត្រូវ ជួនកាលវាអាចឈានទៅរកការបាក់បែកម្ដងបន្តិចៗ រហូតដល់ការចុះខ្សោយ អាចពិបាកក្នុងការងើបឡើងវិញ»។
គណបក្សហ៊្វុនស៊ិនប៉ិច ក្រោយពីសម្ដេចក្រុមព្រះជួបគ្រោះថ្នាក់ចរាចរណ៍មក បានផ្លាស់ប្តូរសមាសភាពមន្ត្រីជាន់ខ្ពស់ជាច្រើនលើក។ គណបក្សប្រកាន់របបរាជានិយមមួយនេះធ្លាប់បានទទួលបានការគាំទ្រ ៥៨អាសនៈ នៅក្នុងការបោះឆ្នោតឆ្នាំ១៩៩៣ ហើយបាត់បង់ការគាំទ្រទាំងស្រុងកាលពីការបោះឆ្នាំ២០១៨៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។