ដោយ សុជីវី
2021-03-02
RFA
រូបជនសង្ស័យជាមេខ្លោងក្នុងអំពើចាប់ជំរិតយកប្រាក់ ១លានដុល្លារ ដែលត្រូវកងរាជអាវុធហត្ថបាញ់ស្លាប់ក្នុងបុរីអង្គរភ្នំពេញ ខណ្ឌសែនសុខ រាជធានីភ្នំពេញ នៅថ្ងៃទី១ ខែមីនា ឆ្នាំ២០២១ ត្រូវបានសាធារជនជឿថា ជាសមាជិកកងអង្គរក្សលោក ហ៊ុន សែន តាមរយៈរូបថតនេះ និងរូបច្រើនទៀត នៅក្នុងហ្វេសប៊ុក Sovanna Rith ប៉ុន្តែទីបញ្ជាការដ្ឋានអង្គរក្សចេញលិខិតបដិសេធ។ រូប៖ ពីហ្វេសប៊ុក Sovanna Rith
ស្នងការដ្ឋានបុគ្គលិក-បណ្ដុះបណ្ដាលនៃបញ្ជការដ្ឋានអង្គរក្សច្រានចោលព័ត៌មានដែលថា បុរសឈ្មោះ អ៊ឹម សុវណ្ណារិទ្ធិ ជាជនសង្ស័យម្នាក់ក្នុងចំណោម ៤នាក់ ដែលត្រូវកងរាជអាវុធហត្ថរាជធានីភ្នំពេញបាញ់សម្លាប់ក្នុងហេតុការណ៍ប្លន់ប្រដាប់អាវុធកាលពីថ្ងៃទី១ ខែមីនានោះ ជាមន្រ្តីកងអង្គរក្ស។
លិខិតបដិសេធរបស់ស្ថាប័ននេះបញ្ជាក់ថា ឈ្មោះនេះបានប្រើប្រាស់បណ្ណសម្គាល់ខ្លួនក្លែងក្លាយ។
កម្លាំងកងរាជអាវុធហត្ថបានបាញ់សម្លាប់បុរស ៤នាក់នៅហ្នឹងកន្លែងក្នុងបុរីអង្គរភ្នំពេញ ខណ្ឌសែនសុខ ដោយចោទប្រកាន់ថា បានបាញ់តដៃជាមួយសមត្ថកិច្ចករណីប្លន់ប្រដាប់អាវុធ ដែលមិនបានសម្រេច។
ទំព័រហ្វេសប៊ុករបស់កងរាជអាវុធហត្ថរាជធានីភ្នំពេញអោយដឹងថាបុរសទាំង ៤នាក់ ដោយមានឈ្មោះ អ៊ឹម សុណ្ណារិទ្ធិ ជាមេគំនិតបានរៀបផែនការជំរិតយកប្រាក់ ១លានដុល្លារម្ចាស់ផ្ទះ ដែលខ្លួនធ្លាប់ធ្វើជាអ្នកបើកឡានឱ្យ។ តាមគម្រោងគេនឹងសម្លាប់ម្ចាស់ផ្ទះ ប្រពន្ធ កូន និងអ្នកធ្វើការក្នុងផ្ទះនោះសរុប ១០នាក់ ដើម្បីប្លន់យកទ្រព្យផ្សេងទៀត ប៉ុន្តែកងរាជអាវុធហត្ថបានដឹងផែនការនេះមុន ដែលនាំអោយបង្រ្កាបរារាំងផែនការនេះ។ មន្ត្រីកងរាជអាវុធហត្ថរាជធានីភ្នំពេញអះអាងទៀតថា ជនសង្ស័យទាំង ៤នាក់ បានប្រើកាំភ្លើងវែងអាកា (AK) ១ដើម និងកាំភ្លើងខ្លី ២ដើម បាញ់ស្រោចទៅលើកម្លាំងសមត្ថកិច្ចទើបមានការបាញ់តបត្រឡប់ទៅវិញ។ ទោះជាយ៉ាងណា កងរាជអាវុធហត្ថមិនទាន់បានបញ្ជាក់លម្អិតថា តើពួកគេបានព័ត៌មានទាំងនោះដោយរបៀបណានោះទេ។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ប្រាប់អាស៊ីសេរីយ៉ាងខ្លីថា សមត្ថកិច្ច និងតុលាការ កំពុងសហការគ្នាស៊ើបអង្កេតករណីនេះបន្តទៀត ដូច្នេះលោកមិនទាន់អាចបញ្ជាក់អត្តសញ្ញាណជនសង្ស័យទាំង ៤នាក់ដែលស្លាប់នោះ និងអ្នកពាក់ព័ន្ធបានទេ។
ហ្វេសប៊ុករបស់បុរសឈ្មោះ អ៊ឹម សុវណ្ណារិទ្ធិ មានរូបថតជាច្រើន ដែលបង្ហាញពីការសម្ញែងទ្រព្យសម្បត្តិ ឡានទំនើបៗ និងភាពហ៊ឺហា ព្រមទាំងតួនាទីជាកងអង្គរក្សឋានៈវរសេនីយ៍ត្រី។ រូបថតមួយចំនួនទៀតបង្ហាញបុរសរូបនេះបានទៅដល់ និងថតរូបរបៀបសិស្សជាមួយគ្រូបង្វឹកនៅមណ្ឌលហ្វឹកហ្វឺនអង្គរក្សនៅភ្នំស្រង់ និងនៅក្រាំងចេកខេត្តកំពង់ស្ពឺជាដើម។
ករណីបង្ក្រាបបទល្មើសមានបាញ់សម្លាប់មនុស្សបែបនេះ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ថ្លែងថា លោកមិនបានដឹងហេតុការណ៍បាញ់ប្រហារនេះលម្អិតនោះទេ ប៉ុន្តែលោកថា តាមគោលការណ៍ច្បាប់ សមត្ថកិច្ចមិនអាចចេះតែប្រើអាវុធបាញ់សម្លាប់មនុស្ស ហើយបកស្រាយថា ការពារខ្លួននោះទេ។ លោកបញ្ជាក់ថា វិធានការបង្ក្រាប ដោយ ប្រើអាវុធបាញ់បណ្ដាលឲ្យមនុស្ស ឬជនសង្ស័យណាម្នាក់ស្លាប់ លុះត្រាតែភាគីទាំងសងខាង មានកម្លាំងសមាមាត្រគ្នា ហើយគំរាមកំហែងដល់ការស្លាប់រស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
I knew also every one knew they can turn black to white but whatever it still be not true
So so cheat knew the story