អាមេរិក៖ ការបាត់បង់ព្រៃឈើនៅព្រៃឡង់ មកពីការពង្រឹងការអនុវត្តច្បាប់នៅខ្សោយ និងប្រព័ន្ធអភិបាលកិច្ចគ្មានភាពច្បាស់លាស់

កម្ពុជា-សង្គម
08/03/2021 – 11:58
ដោយ៖ ជួប នរក្សា
RFI

ព្រៃឡង់ប្រទេសកម្ពុជា
ព្រៃឡង់ប្រទេសកម្ពុជា © FB

សហរដ្ឋ​អាមេរិក​ នៅ​ថ្ងៃចន្ទ​ទី៨​មីនា​នេះ ​បានសម្តែង​នូវ​កង្វល់​យ៉ាងជ្រាលជ្រៅ ​ចំពោះ​ការ​បំផ្លាញ​ព្រៃឈើ ​ដែលចេះ​តែបន្តមាន​ នៅតំបន់ការពារ​នៃ​ប្រទេស​កម្ពុជា​។ ​ការលើកឡើង​របស់​ស្ថានទូត​អាមេរិក​ពេលនេះ ​គឺដោយសារ​ ប្រទេស​មួយនេះ ​គាំទ្រ​ការធ្វើ​សហប្រតិបត្តិការ​ជាមួយ​សហគមន៍​ សង្គម​ស៊ីវិល ​និង​រដ្ឋាភិបាល​កម្ពុជា ​ដើម្បី​ធ្វើយ៉ាងណា​ឲ្យ​ជីវសាស្រ្ត​ចម្រុះ​ដ៏សម្បូរបែប​ នៅ​ដែនជម្រក​សត្វព្រៃ​នៅព្រៃឡង់​ និង​បេតិកភណ្ឌ​ធម្មជាតិ​នៃ​ប្រទេស​កម្ពុជា ​ត្រូវបាន​អភិរក្ស​។

នៅក្នុងគេហទំព័រ និងបណ្តាញសង្គមរបស់ខ្លួន ស្ថានទូតអាមេរិក បានលើកឡើងថា ការបាត់បង់ព្រៃឈើ​នៅព្រៃឡង់ និង​នៅទូទាំងប្រទេស មានការទាក់ទងនឹងកត្តាមួយចំនួន ដែលរួមមានការពង្រឹងការអនុវត្តច្បាប់​នៅខ្សោយ និងប្រព័ន្ធអភិបាលកិច្ចគ្មានភាពច្បាស់លាស់។ ដើម្បីដោះស្រាយបញ្ហាប្រឈមទាំង​នេះ អ្នកពាក់ព័ន្ធនៅថ្នាក់អាជ្ញាធរមូលដ្ឋាន អាជ្ញាធរខេត្ត និងជាតិ ទូទាំងក្រសួងស្ថាប័នពាក់ព័ន្ធទាំងអស់ ​ត្រូវតែដើរស្របគ្នា ក្នុងការងារអភិរក្សតំបន់ការពារ ដូចជាព្រៃឡង់។ 

សេចក្តីថ្លែងការណ៍បន្តថា ទីភ្នាក់ងារផ្តល់ជំនួយសហរដ្ឋអាមេរិក USAID ធ្វើការដើម្បីដោះស្រាយបញ្ហាប្រឈមទាំង​នេះ ដោយលើកកម្ពស់សមត្ថភាពបច្ចេកទេសនៅគ្រប់លំដាប់ថ្នាក់ ជំរុញអោយមានតម្លាភាព និងគណនេយ្យភាព គាំទ្រការចូលរួមយ៉ាងសកម្ម​របស់សហគមន៍ ហើយផ្តល់ជម្រើសផ្សេង​ក្នុងការប្រកបជីវភាពរស់នៅ។ តាមរយៈគម្រោងព្រៃឡង់បៃតង (GPL) របស់ទីភ្នាក់ងារ USAID អាមេរិក បានជួយដល់សហគមន៍មូលដ្ឋាន ដូចជាសមាជិក​នៃបណ្តាញសហគមន៍ព្រៃឡង់ (PLCN) នៅក្នុងការងារល្បាតរួមគ្នានៅព្រៃឡង់ ជាមួយក្រសួងបរិស្ថាន។ 

សកម្មភាព​ភាគច្រើន​របស់ (GPL) ផ្តល់ប្រយោជន៍​ដោយផ្ទាល់​ដល់សហគមន៍ និងអង្គការមិនមែនរដ្ឋាភិបាល នៅក្នុងការងារអភិរក្ស ហើយគ្មានថវិកាណា ត្រូវបានផ្តល់ឲ្យតាមរយៈប្រព័ន្ធរដ្ឋាភិបាលឡើយ។

ទីភ្នាក់ងារ USAID បានផ្តល់ដល់ក្រសួងបរិស្ថាន​នូវព័ត៌មាន ជាច្រើនលើកមកហើយ ទាក់ទងនឹងសកម្មភាពកាប់ឈើខុសច្បាប់ នៅដែនជម្រកសត្វព្រៃឡង់ ដែលបាននាំឲ្យអាជ្ញាធរពាក់ព័ន្ធធ្វើការស៊ើបអង្កេត។ ជាមួយគ្នានេះ រដ្ឋាភិបាលសហរដ្ឋអាមេរិកអះអាងថា ប្រទេសមហាអំណាចមួយនេះ នឹងបន្តអំពាវនាវឲ្យមានចំណាត់ការ ដើម្បីបញ្ឈប់ការកាប់ឈើខុសច្បាប់ ហើយអភិរក្សជីវសាស្រ្តចម្រុះដ៏ល្អ​នៅព្រៃឡង់ និងនៅដែនជម្រកដទៃទៀត។

ដោយឡែក លោក នេត ភក្ត្រា អ្នកនាំពាក្យក្រសួងបរិស្ថាន បានស្វាគមន៍ចំពោះក្តីកង្វល់របស់សហរដ្ឋអាមេរិកនៅពេលនេះ ក៏ប៉ុន្តែលោកថា គេមិនគួរយកចំណុចបទល្មើសតូចមួយ ទៅពង្រីកឲ្យធំនោះទេ។ លោកថា ក្រសួងបរិស្ថានក៏បានខិតខំការពារ និងអភិរក្សព្រៃឡង់ដែរ ដែលប្រឹងប្រែងនេះទទួលបានលទ្ធផលជាវិជ្ជមានជាច្រើន។

សូមរំលឹកថា ភ្នាក់ងារ​សហរដ្ឋអាមេរិក​សម្រាប់​ការ​អភិវឌ្ឍ​អន្តរជាតិ​ (USAID) និងក្រសួងបរិស្ថាន កាលពី​ ខែមេសា ឆ្នាំ២០១៩​ បាន​ប្រកាសចាប់ផ្តើម​អនុវត្ត​គម្រោង​ព្រៃ​ឡង់​បៃតង​ ដែល​មាន​ទឹកប្រាក់​ជាង​២១​លាន​ដុល្លារ​ សម្រាប់​ការ​អភិរក្ស​ធនធានធម្មជាតិ​ និង​ដោះស្រាយ​បញ្ហា​ប្រឈម​ដែល​កើត​មាននៅ​តំបន់​ព្រៃ​ឡង់​ រួម​និង​លើកកម្ពស់​ជីវភាព​សហគមន៍​ប្រកបដោយ​ចីរ​ភាព​៕

What Next?

Recent Articles

One Response to "អាមេរិក៖ ការបាត់បង់ព្រៃឈើនៅព្រៃឡង់ មកពីការពង្រឹងការអនុវត្តច្បាប់នៅខ្សោយ និងប្រព័ន្ធអភិបាលកិច្ចគ្មានភាពច្បាស់លាស់"

  1. Anonymous says:

    if we talking about law and order HUN SEN own it, if we talking about constitution it always in the book. HUN SEN will change constitution if he want to kill some one or he will translated in his way . SOK ESAN and PAI SIPHAN was every good at doing this job we love these two guy so much just about to swallow them keep in our ass