ដោយ អាស៊ីសេរី
2021-04-06
RFA
(រូបថតពាក់អាវស) លោក មាស មុត អតីតជាសមាជិកគណៈមជ្ឈិមបក្ស ជាលេខាធិការរង ជាលេខាកងពល១៦៤ (រាប់បញ្ចូលទាំងកងទ័ពជើងទឹក) និងជាលេខាស្វយ័តនៅកំពង់សោមផង។ រូប៖ ECCC
រឿងក្ដីដ៏ចម្រូងចម្រាសពាក់ព័ន្ធនឹងការខ្វែងយោបល់គ្នារវាងភាគីជាតិ និងភាគីអន្តរជាតិនៅសាលាក្ដីខ្មែរក្រហមរឿងបញ្ជូន ឬមិនបញ្ជូនសំណុំរឿងលោក មាស មុត ទៅជំនុំជម្រះនោះ នឹងឃើញសខ្មៅនៅថ្ងៃទី៧ ខែមេសានេះ។
តាមសេចក្តីប្រកាសព័ត៌មានរបស់សាលាក្ដីខ្មែរក្រហមនៅថ្ងៃទី៥ ខែមេសា អង្គបុរេជំនុំជម្រះនៃសាលាក្ដីខ្មែរក្រហម នឹងសម្រេចលើបណ្តឹងនេះ។
កាលពីចុងឆ្នាំ ២០១៨ សហចៅក្រមស៊ើបអង្កេតអន្តរជាតិ បានសម្រេចបញ្ជូនសំណុំរឿងអតីតកម្មាភិបាលខ្មែរក្រហមលោក មាស មុត ទៅជំនុំជម្រះដោយលើកជាសម្អាងថា មានភ័ស្តុតាងគ្រប់គ្រាន់បញ្ជាក់ថា លោក មាស មុត ស្ថិតក្នុងចំណោមជនដែលទទួលខុសត្រូវខ្ពស់បំផុត ក្នុងរបបខ្មែរក្រហម។ ប៉ុន្តែ សហសហចៅក្រមស៊ើបអង្កេតជាតិយល់ផ្សេងពីនេះ។ ខាងភាគីជាតិថា លោក មាស មុត មិនមែនស្ថិតក្នុងចំណោមមេដឹកនាំជាន់ខ្ពស់ ឬ ជាជនម្នាក់ដែលទទួលខុសត្រូវបំផុត ចំពោះបទឧក្រិដ្ឋដែលកើតឡើងនៅក្នុងសម័យខ្មែរក្រហមនោះឡើយ។
ការខ្វែងយោបល់គ្នានេះ ធ្វើឲ្យសហចៅក្រមស៊ើបអង្កេតអន្តរជាតិនិងជាតិ មិនអាចចេញដីកាដំណោះស្រាយរួមគ្នាបាន ទើបចេញដីកាម្នាក់មួយតែរៀងៗខ្លួន។
លោក មាស មុត ឆ្នាំនេះអាយុ ៨៣ ឆ្នាំ មានស្រុកកំណើតនៅស្រុកឈូក ខេត្តកំពត។ បច្ចុប្បន្នមានទីលំនៅ នៅខេត្តបាត់ដំបង។ លោកត្រូវបានចោទប្រកាន់ថា ធ្លាប់ជាកម្មាភិបាលជាន់ខ្ពស់ក្នុងរបបខ្មែរក្រហម ដោយមានតួនាទីជាសមាជិកគណៈមជ្ឈិមបក្ស ជាលេខាធិការរង ជាលេខាកងពល១៦៤ (រាប់បញ្ចូលទាំងកងទ័ពជើងទឹក) និងជាលេខាស្វយ័តនៅកំពង់សោមផង។
ក្រោយសហចៅក្រមស៊ើបអង្កេតអន្តរជាតិចេញដីកាឲ្យបញ្ជូនរឿងលោក មាស មុត ទៅកាត់សេចក្ដីនេះ ខាងសហព្រះរាជអាជ្ញាជាតិជំទាស់ភ្លាម ហើយសហមេធាវីការពារក្តីលោក មាស មុត ក៏ជំទាស់។ ពួកគាត់ដាក់ពាក្យប្តឹងទៅអង្គបុរេជំនុំជម្រះ ប្រឆាំងនឹងដីកាដំណោះស្រាយរបស់សហចៅក្រមស៊ើបអង្កេតអន្តរជាតិនេះ។ បណ្តឹងឧទ្ធរណ៍នេះ ពួកគាត់ដាក់កាលពីដើមខែមេសា ឆ្នាំ២០១៩។
នៅចុងខែវិច្ឆិកា ឆ្នាំ២០១៩ អង្គបុរេជំនុំជម្រះ បើកសវនាការបីថ្ងៃជាប់គ្នា ដើម្បីស្ដាប់អំណះអំណាងរបស់ភាគីពាក់ព័ន្ធ។ សេចក្តីសម្រេចជុំវិញរឿងនេះ តុលាការនេះនឹងប្រកាសនៅថ្ងៃទី៧ ខែមេសា នោះ។
អង្គបុរេជំនុំជម្រះ មានចៅក្រមសម្រេចក្ដីចំនួន ៧ រូប ក្នុងនោះ ៤ រូបជាចៅក្រមខ្មែរ និង ៣ រូបជាចៅក្រមអន្តរជាតិ។ មាត្រា ៧២ នៃវិធានផ្ទៃក្នុងរបស់សាលាក្ដីខ្មែរក្រហម ចែងថា សេចក្តីសម្រេចរបស់អង្គបុរេជំនុំជម្រះ តម្រូវឲ្យមានសំឡេងគាំទ្រពីចៅក្រម ៤(បួន)រូបយ៉ាងតិច។ សេចក្តីសម្រេចនេះ បិទផ្លូវតវ៉ា។ ប្រសិនបើអង្គបុរេជំនុំជម្រះ មិនអាចរកសំឡេងគាំទ្រភាគច្រើនតាមតម្រូវការមានន័យថាដីកា ឬកិច្ចស៊ើបសួរ ដែលបម្រុងនឹងធ្វើដោយសហចៅក្រមស៊ើបអង្កេតណាម្នាក់ ត្រូវតែយកមកអនុវត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។