លោក ហ៊ុន សែន ផ្ញើ​សារ​ជូន​ពរ​ចូល​ឆ្នាំ​ខ្មែរ ដោយ​រំលេច​រឿង​នយោបាយ​បង្ក្រាប​ក្រុម​បក្ស​ប្រឆាំង

ដោយ សុជីវី
2021-04-08
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

លោក ហ៊ុន សែន ផ្ញើ​សារ​ជូន​ពរ​ចូល​ឆ្នាំ​ខ្មែរ ដោយ​រំលេច​រឿង​នយោបាយ​បង្ក្រាប​ក្រុម​បក្ស​ប្រឆាំង

(ឆ្វេង) អ្នក​ដឹកនាំ​គណបក្ស​សង្គ្រោះ​ជាតិ ដែល​ត្រូវ​លោក ហ៊ុន សែន បង្ក្រាប​ចាប់​តាំង​ពី​ឆ្នាំ២០១៧ មក។ រូប៖ ហ្វេសប៊ុកលោក ហ៊ុន សែន និង​ប័ណ្ណប្រកាស​របស់​អាជ្ញាធរភ្នំពេញ


មេ​ដឹក​នាំ​របប​ក្រុង​ភ្នំពេញ លោក ហ៊ុន សែន ផ្ញើ​ជូន​ពរ​ប្រជាពលរដ្ឋ​នៅ​ក្នុង​ឱកាស​បុណ្យ​ចូល​ឆ្នាំ​ប្រពៃណី​ខ្មែរ​ឆ្នាំ​នេះ ដោយ​បង្ហាញ​មោទនភាព​ជុំវិញ​ការ​បង្ក្រាប​ក្រុម​អ្នក​នយោបាយ​បក្ស​ប្រឆាំង។ លោក​នៅ​តែ​ចាត់​ទុក​ក្រុម​បក្ស​ប្រឆាំង​និង​ប្រជាពលរដ្ឋ ដែល​មាន​និន្នាការ​ផ្ទុយ​ពី​គណបក្ស​កាន់​អំណាច​របស់​លោក​ថា ជា​ក្រុម​ចង់​បំផ្លាញ​សន្តិភាព​ដែល​លោក​ត្រូវ​តែ​បង្ក្រាប។ មន្ត្រី​បក្ស​ប្រឆាំង​ចាត់​ទុក​សារ​នេះ​ថា ជា​ការ​ធ្វើ​ឱ្យ​បែកបាក់​សាមគ្គី​ជាតិ​កាន់​តែ​ខ្លាំង។

ស្រប​ពេល​ដែល​ពិធី​បុណ្យ​ចូល​ឆ្នាំ​ប្រពៃណី​ជាតិ​កាន់​តែ​ខិត​ជិត​មក​ដល់ លោក​នាយក​រដ្ឋមន្ត្រី ហ៊ុន សែន បាន​ចេញ​សារ​លិខិត​​ជូនពរ​ព្រះមហាក្សត្រ មន្ត្រី​រាជការ កង​កម្លាំង​ប្រដាប់​អាវុធ និង​ប្រជាពលរដ្ឋ​ទូទៅ។ ប៉ុន្តែ​សារ​លិខិត​នោះ​ពោរពេញ​ទៅ​ដោយ​ការ​លើក​សរសើរ​នូវ​អ្វី​ដែល​លោក​ហៅ​ថា ជា​ជោគជ័យ​ផ្នែក​សេដ្ឋកិច្ច និង​ការ​អភិវឌ្ឍ ​ដែល​រដ្ឋាភិបាល​លោក​សម្រេច​បាន ហើយ​ក៏​មាន​ដែរ​នូវ​ការ​កម្ចាត់​ក្រុម​អ្នក​នយោបាយ​បក្ស​ប្រឆាំង។

លោក​ ហ៊ុន សែន​ បាន​​រៀបរាប់​នៅ​​ក្នុង​សារ​នោះ​ថា​ នៅ​ឆ្នាំ​​ឆ្លូវ​ខាង​មុខ​នេះ​ ​ របប​​របស់​លោក​នឹង​ប្រឹងប្រែង​កសាងជាតិ​ឱ្យ​រីក​ចំរើន​គ្រប់​វិស័យ​បន្ថែម​ទៀត ​ហើយ​បន្ត​ការពារ​សន្តិភាព​ អធិបតេយ្យ​ជាតិ​ និង​បូរណភាព​ទឹក​ដី ការពារ​សមិទ្ធផល​សង្គម​ជាតិ និង​ទប់​ស្កាត់​ការ​ជ្រៀត​ជ្រែក​កិច្ច​ផ្ទៃ​ក្នុង​របស់​កម្ពុជា។ ប៉ុន្តែ​មេ​ដឹក​នាំ​របប​ឯក​បក្ស​រូប​នេះ នៅ​តែ​ចាត់​ទុក​ប្រជាពលរដ្ឋ​ដែល​មាន​និន្នាការ​ផ្ទុយ​ពី​គណបក្ស​កាន់​អំណាច និង​ក្រុម​បក្ស​សកម្មជន​ប្រឆាំង​ថា ជា​ក្រុម​បដិវត្តន៍​ពណ៌​ ក្រុម​ញុះញង់ ធ្វើ​ឱ្យ​មាន​ចលាចល​នៅ​ក្នុង​សង្គម។ លោក​ ហ៊ុន សែន បាន​ព្រមាន​នៅ​ក្នុង​លិខិត​ទៀត​ថា របប​របស់​លោក​នឹង​ទប់​ស្កាត់​គ្រប់​បែប​យ៉ាង​មិន​ឱ្យ​ក្រុម​ទាំង​នេះ​ធ្វើ​សកម្មភាព​បាន​ឡើយ ក្រោម​ពាក្យ​ថា រក្សា​សន្តិភាព និង​ឯករាជ្យ​ជាតិ កុំ​ឱ្យ​ប្រជាពលរដ្ឋ​ជួប​គ្រោះ​មហន្តរាយ។

ទោះ​ជា​យ៉ាងណា ​សារ​នយោបាយ​បែប​នេះ​របស់​លោក ហ៊ុន សែន មិន​ទទួល​បាន​ការ​ស្វាគមន៍​ពី​អង្គការ​សង្គម​ស៊ីវិល និង​ពលរដ្ឋ​ដែល​មាន​ទស្សនៈ​ផ្ទុយ​នោះ​ឡើយ។

ប្រធាន​គណបក្ស​សង្គ្រោះ​ជាតិ​ប្រចាំ​ទីក្រុង​បាងកក លោក ឃ្លាំង ប៊ុនឡាយ ប្រាប់​អាស៊ី​សេរី​ថា សារ​នេះ​ស​បញ្ជាក់​ថា លោក​ហ៊ុន សែន​ មាន​ចេតនា​បំបែកបំបាក់​សាមគ្គី​ជាតិ​ ដោយសារ​ខ្លាច​ស្រមោល​គណបក្ស​សង្គ្រោះ​ជាតិ​​រស់​ឡើង​វិញ​ ហើយ​ធ្វើ​ឱ្យ​រង្គោះរង្គើ​ដល់​ការ​គ្រប់គ្រង​អំណាច​របស់​គាត់។ មន្ត្រី​បក្ស​ប្រឆាំង​រូប​នេះ​​បញ្ជាក់​ថា សកម្មភាព​របស់​ក្រុម​ប្រជាពលរដ្ឋ​ដែល​មាន​និន្នាការ​ផ្ទុយ​ពី​គណបក្ស​កាន់​អំណាច​នោះ ជា​ការ​ចូល​រួម​ ដើម្បី​យុត្តិធម៌​សង្គម​ប៉ុណ្ណោះ៖ «លោក ហ៊ុន សែន ដែល​ចង់​ឱ្យ​ប្រជាពលរដ្ឋ​មាន​សេចក្ដី​ប្រទេស​ជាតិ​រួច​ផុត​ពី​ការ​ជ្រៀតជ្រែក​ពី​ប្រទេស​ដទៃ​អី​ហ្នឹង គឺ​មិន​មែន​ជា​សារ​ចេញ​ពី​បេះ​ដូង​ពិត​របស់​លោក​ហ៊ុន សែន​ទេ ។ យើង​ឃើញ​ជាក់​ស្ដែង អ្វី​ដែល​ជា​តម្រូវ​ការ​របស់​ប្រជាពលរដ្ឋ អ្វី​ដែល​ប្រជាពលរដ្ឋ​ចង់​បាន គឺ​របប​លោក ហ៊ុន សែន តែងតែ​ធ្វើ​មិន​ដឹង​ធ្វើ​មិន​លឺ​ ហើយ​ខិត​ខំ​បង្ក្រាប សម្លុត​កម្ចាត់​គ្រប់សព្វ​បែប​យ៉ាង។ ទង្វើ​ទាំង​អស់​នេះ​ហ្នឹង​ធ្វើ​ឱ្យ​ប្រជាពលរដ្ឋ មាន​ការ​ការ​ឈឺ​ចាប់​កាន់​តែ​ខ្លាំង»

ចំណែក​អ្នក​នាំ​ពាក្យ​សមាគម​ការពារ​សិទ្ធិមនុស្ស លោក ស៊ឹង សែន​ករុណា វិញ លោក​យល់​ថា ក្នុង​ឱកាស​ឆ្នាំ​ចូល​ឆ្នាំ​ថ្មី​នេះ មេ​ដឹក​នាំ​គណបក្ស​កាន់​អំណាច និង​គណបក្ស​ប្រឆាំង​គួរតែ​ផ្ញើ​សារ​ជូន​ដល់​គ្នា​ទៅ​វិញ​ទៅ​មក ដើម្បី​ឱ្យ​មាន​បរិយាកាស​សង្គម និង​នយោបាយ បាន​ល្អ​ប្រសើរ​ជាង​ឆ្នាំ​ចាស់។ មន្ត្រី​សង្គម​ស៊ីវិល​រូប​នេះ ព្រួយ​បារម្ភ​ថា សារ​របស់​លោក ហ៊ុន សែន នេះ នឹង​ធ្វើ​ឱ្យ​សំពាធ​ផ្សេងៗ កើត​មាន​ក្នុង​ឆ្នាំ​ថ្មី​នេះ​បន្ត​ទៀត​មក​លើ​កម្ពុជា ដែល​អាច​ធ្វើ​ឱ្យ​ប៉ះពាល់​ដល់​ប្រជាពលរដ្ឋ សេដ្ឋកិច្ច និង​ការ​រីក​ចម្រើន​របស់​ជាតិ៖ «មិន​ថា​ចូល​ឆ្នាំ​នេះ ឬ​ឆ្នាំ​ខាង​មុខ​ក៏​ដោយ គឺ​យើង​មិន​ចង់​ឃើញ​រូប​ភាព​កើត​ឡើង​ដដែល ចំពោះ​សង្គម​កម្ពុជា​ទេ។ យើង​ចង់​ឃើញ​កម្ពុជា​មាន​ប្រព័ន្ធ​ប្រជាធិបតេយ្យ​មួយ​ត្រឹម​ត្រូវ ប្រកួត​ប្រជែង​គ្នា​ដោយ​មាន​ការ​យោគយល់​គ្នា គឺ​អ្នក​ឈ្នះៗ ដោយ​ភាព​ថ្លៃ​ថ្នូរ អ្នក​ចាញ់ៗ ដោយ​អស់​ចិត្ត​អីចឹង​ទៅ ហើយ​ពលរដ្ឋ​រស់​នៅ​ក្នុង​សង្គម គាត់​អាច​ប្រើប្រាស់​សិទ្ធិ​របស់​គាត់​ដោយ​សេរី​ទៅ​តាម​រដ្ឋធម្មនុញ្ញ ហើយ​និង​កតិកាសញ្ញា​អន្តរជាតិ​ទាំង​អស់​ហ្នឹង ហើយ​រដ្ឋ​បាន​ធានា​ទៅ​លើ​សិទ្ធិ​ទាំង​អស់​ហ្នឹង»

រីឯ​អ្នកវិភាគ​នយោបាយ​ដែល​កំពុង​ភៀស​ខ្លួន​នៅ​ប្រទេស​ហ្វាំងឡង់ (Finland) លោក កឹម សុខ វិញ លោក​មាន​ប្រសាសន៍​ថា សារ​ជូន​ពរ​របស់​លោក ហ៊ុន សែន នេះ គឺ​ជា​ការ​លួង​ចិត្ត​ប្រជា​ពលរដ្ឋ ដែល​កំពុង​រស់​ក្នុង​ស្ថានភាព​តោកយ៉ាក ដោយសារ​បាត់បង់​ប្រាក់​ចំណូល​បណ្ដាល​មក​ពី​ការ​រាល​ដាល​ជំងឺ​កូវីដ១៩ ហើយ​រដ្ឋាភិបាល​គ្មាន​ដំណោះស្រាយ​អ្វី​ជូន​ដល់​ពលរដ្ឋ​នោះ​ទេ។ លោក​បញ្ជាក់​ថា ​បុណ្យ​ចូល​ឆ្នាំ​ខ្មែរ​ជា​ឱកាស​ល្អ ដែល​លោក ហ៊ុន សែន គួរតែ​ផ្ញើ​សារ​បែប​ផ្សះផ្សា​ជាតិ ដើម្បី​បម្រើ​ផល​ប្រយោជន៍​របស់​ប្រជាពលរដ្ឋ និង​ស្ដារ​សេដ្ឋកិច្ច​ជាតិ​ឡើង​វិញ នៅ​ពេល​បញ្ចប់​វិបត្តិ​ជំងឺ​កូវីដ១៩។

កម្ពុជា​បាន​ស្ថិត​ក្នុង​ស្ថានភាព​ប្រេះឆា​ខាង​នយោបាយ ចាប់​តាំងពី​ចុង​ឆ្នាំ​២០១៧ បន្ទាប់​ពី​លោក ហ៊ុន សែន បាន​បញ្ជា​ឱ្យ​ចាប់​ខ្លួន​មេ​បក្ស​ប្រឆាំង​ដាក់​ពន្ធនាគារ និង​រំលាយ​គណបក្ស​សង្គ្រោះ​ជាតិ ដើម្បី​ឈាន​ទៅ​ក្រសោប​យក​អំណាច​រដ្ឋ​ទាំងអស់​មក​កាន់​កាប់​ផ្ដាច់​មុខ​តែ​ម្នាក់​ឯង។ ក្រុម​អ្នក​សង្កេត​ការណ៍​វាយ​តម្លៃ​ថា នយោបាយ​បែប​នេះ​ចំណេញ​ដល់​ការ​ក្រាញ​អំណាច​របស់​លោក ហ៊ុន សែន ក៏​ប៉ុន្តែ​កំពុង​នាំ​ជាតិ​ខ្មែរ​ឱ្យ​ធ្លាក់​ទៅ​ក្នុង​វិបត្តិសេដ្ឋកិច្ច សង្គម និង​វិបត្តិ​នយោបាយ​ធ្ងន់ធ្ងរ​នៅ​ពេល​ខាង​មុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

2 Responses to "លោក ហ៊ុន សែន ផ្ញើ​សារ​ជូន​ពរ​ចូល​ឆ្នាំ​ខ្មែរ ដោយ​រំលេច​រឿង​នយោបាយ​បង្ក្រាប​ក្រុម​បក្ស​ប្រឆាំង"

  1. Anonymous says:

    this guy is not just evil of Cambodian but he also the evil of the world. my warning to all Cambodian the world situation is getting un certainty as the old Cambodian word said (( PLEING CHHESSKAL )) for example >> the pandemic COVID19 , the shout CHINA sea, soon it will be ASIAN revolution , CHINA rising star, RASSIA rising star , and climate changing become a destroy human health every day.

  2. Anonymous says:

    SAMDACH EY . HUN SEN talking none cent

Leave a Reply

Submit Comment