នយោបាយ, ព័ត៌មានជាតិ
លោក ណាត សុភាព | ២១ វិច្ឆិកា ២០២១ | ម៉ោង ១៩:០០
VOD
អ្នកស្រី ឡាញ់ ថាវរី ជាអតីតមេឃុំជាប់ឆ្នោតគណបក្សសង្រ្គោះជាតិឃុំឬស្សីក្រោក ស្រុកមង្គលបុរី ខេត្តបន្ទាយមានជ័យ។(ហ្វេសប៊ុក ទូរទស្សន៍ព្រះអាទិត្យកម្ពុជា)
អង្គការឃ្លាំមើលសិទ្ធិមនុស្ស (Human Rights Watch -HRW) ស្នើឱ្យបញ្ឈប់ជាបន្ទាន់នូវការចាប់បញ្ជូនជនភៀសខ្លួននៅប្រទេសថៃ ត្រឡប់មកកម្ពុជាវិញ ដោយចាត់ទុកករណីនេះថា ជាការរំលោភសិទ្ធិមនុស្សធ្ងន់ធ្ងរ។
ការស្នើនេះ ធ្វើឡើងបន្ទាប់ពីអតីតមេឃុំជាប់ឆ្នោតគណបក្សប្រឆាំងនៅឃុំឬស្សីក្រោក ស្រុកមង្គលបុរី ខេត្តបន្ទាយមានជ័យ អ្នកស្រី ឡាញ់ ថាវរី ត្រូវបានសមត្ថកិច្ចថៃចាប់ខ្លួនកាលពីថ្ងៃទី១៩ខែវិច្ឆិកា និងបញ្ជូនមកឱ្យអាជ្ញាធរកម្ពុជា កាលពីថ្ងៃទី២០ ខែវិច្ឆិកា។
ការចាប់ខ្លួនអ្នកស្រី ឡាញ់ ថាវរី បន្ទាប់ពីអតីតសកម្មជនបក្សប្រឆាំងរូបនេះ បានភៀសខ្លួនទៅរស់នៅប្រទេសថៃមួយរយៈ និងភ្លាមៗ ក្រោយពេលអ្នកស្រីបានដើរប្រមូលស្នាមមេដៃពលករនៅម្ដុំផ្ទះជួលរបស់គាត់ក្នុងប្រទេសថៃ ដើម្បីប្រឆាំងនឹងការលក់ឡៃឡុងទីស្នាក់ការគណបក្សសង្គ្រោះជាតិកាលពីពេលថ្មីៗនេះ។
នាយករងអង្គការឃ្លាំមើលសិទ្ធិមនុស្ស (Human Rights Watch) ប្រចាំតំបន់អាស៊ី លោក Phil Robertson បានសរសេរសារនៅលើបណ្តាញសង្គមធ្វីតធ័ររបស់លោកនៅចុងសប្តាហ៍នេះថា ជនភៀសខ្លួនខ្មែរ អ្នកស្រី ឡាញ់ ថាវរី ដែលទទួស្គាល់ដោយអង្គការ UNHCR ត្រូវប្រឈមនឹងជាប់ពន្ធនាគារ ដោយសារតែអាជ្ញាធរអន្តោប្រវេសន៍ថៃចាប់បញ្ជូនខ្លួនអ្នកស្រីត្រឡប់មកកម្ពុជាវិញ។
ករណីនេះលោក Phil Robertson ស្នើទៅអាជ្ញាធរកម្ពុជានិងថៃបញ្ឈប់ជាបន្ទាន់នូវការចាប់បញ្ជូនជនភៀសខ្លួនពីថៃឱ្យត្រឡប់មកកម្ពុជាវិញ ដោយថាជាការរំលោភសិទ្ធិមនុស្សធ្ងន់ធ្ងរ ។
វីអូឌីមិនអាចសុំការបំភ្លឺពីអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន និងលោក ផាតសុផានិត អ្នកនាំពាក្យក្រសួងមហាផ្ទៃបានទេនៅរសៀលថ្ងៃអាទិត្យនេះ ។
មន្ត្រីស៊ើបអង្កេតជាន់ខ្ពស់នៅសមាគមការពារសិទ្ធិមនុស្សអាដហុក លោក សឹង សែនករុណា មានប្រសាសន៍ថា អង្គការសហប្រជាជាតិត្រូវពិនិត្យឡើងវិញចំពោះប្រទេសពាក់ព័ន្ធ ដែលបានចុះហត្ថលេខីលើកិច្ចព្រមព្រៀងស្តីពីសិទ្ធិជនភៀសខ្លួន ដើម្បីការពារកុំឱ្យមានការរំលោភសិទ្ធិពួកគេ និងធ្វើឱ្យជនភៀសខ្លួនដទៃទៀតមានការភ័យខ្លាចនឹងសុវត្ថិភាពរបស់ខ្លួនជាដើម ។
លោកមានប្រសាសន៍ថា៖ «អង្គការសហប្រជាជនគួរតែចាត់វិធានការ និងរកដំណោះស្រាយជូនពលរដ្ឋខ្មែរ ឬ សកម្មជននានា សកម្មជននយោបាយដែលភៀសខ្លួនមានទំនុកចិត្តឡើងវិញ។ បើមិនអញ្ចឹងទេ ពួកគេពិបាកក្នុងការរស់នៅក្នុងប្រទេសថៃបន្តទៀត ដោយសារតែមានបញ្ហាកើតឡើងលើពួកគេជាបន្តបន្ទាប់បែបនេះ»។
អ្នកស្រី ឡាញ់ ថាវរី ជាមេឃុំជាប់ឆ្នោតមកពីអតីតគណបក្សសង្រ្គោះជាតិ ឃុំឬស្សីក្រោក ស្រុកមង្គលបុរី ខេត្តបន្ទាយមានជ័យ និងជាជនភៀសខ្លួននយោបាយនៅប្រទេសថៃ បន្ទាប់ពីតុលាការកំពូលរំលាយគណបក្សសង្គ្រោះជាតិកាលពីឆ្នាំ២០១៧។
ការចាប់ខ្លួនអតីតមន្ត្រី និងសកម្មជនបក្សសង្រ្គោះជាតិពីប្រទេសថៃបញ្ជូនមកកម្ពុជា កើតឡើងជាលើកទី២ហើយ នៅក្នុងខែវិច្ឆិកាឆ្នាំ២០២១នេះ បន្ទាប់ពីការចាប់ខ្លួនអតីតសកម្មជនគណបក្សប្រឆាំងនេះពីរនាក់ គឺលោក វឿន វាសនា និងលោក វឿង សំណាង កាលពីថ្ងៃទី៨ ខែវិច្ឆិកា ឆ្នាំ២០២១៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។