កម្ពុជា-សិទ្ធិមនុស្ស
25/11/2021 – 07:02
ដោយ៖ អ៊ឹង ប៊ុនថន
RFI
អង្គការឃ្លាំមើលសិទ្ធិមនុស្សអន្តរជាតិ (Human Rights Watch) © Internet
អង្គការឃ្លាំមើលសិទ្ធិមនុស្សអន្តរជាតិ (Human Rights Watch) អំពាវនាវដល់សហភាពអឺរ៉ុប និងរដ្ឋសមាជិកនៃតំបន់នេះ ធ្វើការស្តីបន្ទោសឲ្យខ្លាំងក្លាទៅលើរដ្ឋាភិបាលកម្ពុជា ចំពោះអ្វីដែលអង្គការនេះលើកឡើងថា កម្ពុជាមិនព្រមអើពើដោះស្រាយបញ្ហាសិទ្ធិមនុស្ស ស្របតាមកាតព្វកិច្ចរបស់ខ្លួនក្រោមច្បាប់អន្តរជាតិ។ ការអំពាវនាវបែបនេះ កាលពីម្សិលមិញ គឺធ្វើឡើងតែនៅ១ថ្ងៃប៉ុណ្ណោះ មុនពេលដែលកម្ពុជាធ្វើជាម្ចាស់ផ្ទះដឹកនាំកិច្ចប្រជុំកំពូល អាស៊ី-អឺរ៉ុប ឬ (ASEM) លើកទី១៣ ចាប់ពីថ្ងៃទី២៥ ដល់ថ្ងៃទី២៦ ខែវិច្ឆិកានេះ។
តាមរយៈសេចក្តីថ្លែងការណ៍នៅថ្ងៃទី២៤ ខែវិច្ឆិកា អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បាននិយាយថា សហភាពអឺរ៉ុប និងរដ្ឋសមាជិក គួរលើកយកបញ្ហាសិទ្ធិមនុស្ស និងលទ្ធិប្រជាធិបតេយ្យធ្វើជារបៀបវារៈស្នូលនៅក្នុងកិច្ចសន្ទនារវាងសហភាពអឺរ៉ុប និងតំបន់អាស៊ីអាគ្នេយ៍ ដែលកម្ពុជាខ្លួនឯងធ្វើជាម្ចាស់ផ្ទះ។
បើតាមអង្គការដដែលនេះ សហភាពអឺរ៉ុបមិនគួរលើកយកតែបញ្ហាវិបត្តិនៅភូមាប៉ុណ្ណោះទេ ក៏ប៉ុន្តែគួរផ្តោតលើបញ្ហារំលោភសិទ្ធិមនុស្សជាប្រព័ន្ធដែលកំពុងកើតមានឡើងនៅគ្រប់ទីកន្លែងទាំងអស់ ពោលក្រុមមេដឹកនាំសហភាពអឺរ៉ុប និងរដ្ឋសមាជិក ក៏មិនគួរអនុញ្ញាតឱ្យកម្ពុជារួចខ្លួនពីរឿងរ៉ាវរំលោភបំពានសិទ្ធិមនុស្សនោះឡើយ។
ករណីរំលោភសិទ្ធិមនុស្សនៅកម្ពុជាដែល Human Rights Watch ធ្វើការបរិហារ្ត៍ រួមមាន ៖ការចាប់ឃុំខ្លួននិងកាត់ទោសក្មេងប្រុស កាក់ សុវណ្ណឆ័យ ជាកូនសកម្មជនបក្សប្រឆាំង ដែលឳពុករបស់គេកំពុងជាប់ពន្ធនាគារ។ ការកាត់ទោសមេដឹនាំសហជីពឯករជ្យ និងសកម្មជនសង្គម រួមទាំងការបន្តឃុំខ្លួនសកម្មជននយោបាយជាង៦០នាក់ទៀត។
ក៏ប៉ុន្តែ លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា បានប្រតិកម្មថា អ្វីដែលអង្គការមាននិន្នាប្រឆាំងមួយនេះបានជំរុញទៅសហភាពអឺរ៉ុប គឺមិនអាចទៅរួចឡើយ ពីព្រោះគ្មានឡើយ ក្នុងរបៀបវារៈនៃកិច្ចប្រជុំកំពូលអាស៊ី-អឺរ៉ុប ដែលកម្ពុជាជាម្ចាស់ផ្ទះ។
ទោះជាយ៉ាងណា Human Rights Watch បានរំឮកឡើងវិញពីការណ៍ដែលសហភាពអឺរ៉ុបបានដកហូតប្រព័ន្ធអនុគ្រោះពន្ធ EBA ២០ភាគរយ ពីកម្ពុជា ដោយសារតែរកឃើញថា មានការរំលោភបំពានសិទ្ធិមនុស្សធ្ងន់ធ្ងរជាប្រព័ន្ធ ក្រោយការរំលាយគណបក្សសង្គ្រោះជាតិកាលពីចុងឆ្នាំ២០១៧៕
as I used to say if you are not trying to use regular human word this beast regime will never understanding you. diplomacy word wont never work for this kind of uneducated evil monster like HUN SEN . we Cambodian seem to lost confident in fighting for our freedom because for so long that international community let this kind of regime growing to be a monster