ប្រេសិត​​ពិសេស អ.ស.ប ទទួល​បន្ទុក​​កិច្ចការ​ភូមារំឮក​​លោក ហ៊ុន សែន ឱ្យ​​ដោះស្រាយ​​វិបត្តិ​ភូមា​​ស្រប​តាម​ឆន្ទៈ​ពលរដ្ឋ​​នៃ​​ប្រទេស​នេះ​

ដោយ សុជីវី
2022-01-13
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

ប្រេសិត​​ពិសេស អ.ស.ប ទទួល​បន្ទុក​​កិច្ចការ​ភូមារំឮក​​លោក ហ៊ុន សែន ឱ្យ​​ដោះស្រាយ​​វិបត្តិ​ភូមា​​ស្រប​តាម​ឆន្ទៈ​ពលរដ្ឋ​​នៃ​​ប្រទេស​នេះ​

លោក ហ៊ុន សែន ជួបប្រជុំតាមអនឡាញ (Online) ជាមួយអ្នកស្រី ណូលីន ហេយហ្សឺ (Noeleen Hayzer) ប្រេសិត​ពិសេស​អង្គការ​សហប្រជាជាតិ​ទទួលបន្ទុក​កិច្ចការ​មីយ៉ាន់ម៉ា (Myanmar) ឬភូមា (Burma) កាលពីថ្ងៃទី១៣ ខែមករា ឆ្នាំ២០២២។ រូប៖ ហ្វេសប៊ុក SMP


ប្រេសិត​ពិសេស​អង្គការ​សហប្រជាជាតិ​ទទួលបន្ទុក​កិច្ចការ​មីយ៉ាន់ម៉ា (Myanmar) ឬភូមា (Burma) អ្នកស្រី ណូលីន ហេយហ្សឺ (Noeleen Hayzer) រំឮក​លោក ហ៊ុន សែន ឱ្យ​ដោះស្រាយ​វិបត្តិភូមា​ស្របតាម​ឆន្ទៈ និង​ការចង់បាន​របស់​ពលរដ្ឋ​នៃ​ប្រទេសនេះ។

ថ្លែងក្នុង​កិច្ចសន្ទនា​តាម​ប្រព័ន្ធ​វីដេអូ​ជាមួយ​ប្រធាន​ថ្មីប្តូរវេន​របស់​អាស៊ាន គឺ​លោកនាយករដ្ឋមន្ត្រី ហ៊ុន សែន នៅថ្ងៃទី១៣ ខែមករា ប្រេសិត​ពិសេស​អង្គការ​សហប្រជាជាតិ​ទទួលបន្ទុក​កិច្ចការ​ភូមា​ គូសបញ្ជាក់ថា ដំណោះស្រាយ​ចំពោះ​វិបត្តិភូមា ចាំបាច់​ត្រូវតែ​កើតចេញ​ពី​កិច្ចពិគ្រោះយោបល់​ដោយផ្ទាល់ និង​ការស្តាប់​ដោយ​យក​ចិត្តទុកដាក់​ចំពោះ​គ្រប់ភាគី​ដែល​រងគ្រោះ​ដោយសារ​វិបត្តិនេះ។ អ្នកស្រី ក៏បាន​សង្កត់ធ្ងន់​អំពីសារសំខាន់​នៃ​ការធ្វើឱ្យ​ប្រសើរឡើង​នៃ​ការអនុវត្ត «កិច្ចព្រមព្រៀង​រួម ៥ ចំណុច» ដែល​អាស៊ាន​បាន​ព្រមព្រៀងគ្នា​កាលពីពេល​កន្លងមក ក្នុងនោះ​ក៏រួមមាន​ការបញ្ឈប់​​ជាបន្ទាន់​នូវ​អំពើហិង្សា និង​ការតម្រូវ​ឱ្យ​គ្រប់ភាគី​ក្នុង​ជម្លោះ​នៅ​ភូមា​ត្រូវ​អត់ធ្មត់​ជាទីបំផុត។ អ្នកស្រី ណូលីន ហេយហ្សឺ ប្រាប់​លោក ហ៊ុន សែន ថា ដំណើរការ​ដោះស្រាយ​បញ្ហាភូមា​ដែល​ធ្វើឡើង​ស្របតាម​ឆន្ទៈ​របស់​ពលរដ្ឋ​ភូមា ដើម្បី​ទទួលបាន​នូវ​សន្តិភាព ប្រជាធិបតេយ្យ និង​អនាគត​ដែល​មាន​គ្រប់ភាគី​ពាក់ព័ន្ធ ចាំបាច់​ត្រូវតែ​មាន​ការគាំទ្រ​ដោយ​វិធីសាស្ត្រ​ដោះស្រាយ​ជាអន្តរជាតិ​ផ្អែកតាម​ស្មារតី​នៃ​ការឯកភាពគ្នា​ក្នុងតំបន់។

លោកនាយករដ្ឋមន្ត្រី ហ៊ុន សែន បាន​សរសេរ​នៅលើ​ទំព័រ​ហ្វេសប៊ុក (Facebook) ​របស់​លោក​ក្រោយ​ជំនួប​នេះ​ដោយបញ្ជាក់​ជាថ្មីថា គោលដៅ​សំខាន់​របស់​កម្ពុជា គឺចង់​រក​មធ្យោបាយ​ដើម្បី​បញ្ចប់​ភាពហិង្សា និង​បទឈប់បាញ់​នៅ​ភូមា និង​ធ្វើយ៉ាងណា​ដើម្បី​ផ្តល់​ជំនួយ​មនុស្សធម៌​ដល់​ប្រទេសនេះ។ លោក ហ៊ុន សែន ថ្លែងការពារ​ដំណើរទស្សនកិច្ច​របស់លោក​ថា អាស៊ាន​មិនអាច​នៅជាប់​គាំង​បែបនេះ​នោះទេ ដូច្នេះ​ចាំបាច់​ត្រូវ​ចាប់យក​ឱកាស​ក្នុងការ​ចរចា។

យ៉ាងណាក៏ដោយ ការថ្លែង​រំឮក​របស់​មន្ត្រី​អង្គការ​សហប្រជាជាតិ​ប្រាប់​ទៅ​ប្រធានថ្មី​ទើបនឹង​ចូលកាន់តំណែង​របស់​អាស៊ាន​បែបនេះ ទំនងជា​ចង់សម្តៅ​ទៅដល់​វិធីសាស្ត្រ​ការទូត​ដែល​កម្ពុជា​បាន​ព្យាយាម​ដោះស្រាយ​បញ្ហាភូមា​ទៅជួប​មេដឹកនាំ​រដ្ឋប្រហារ​យោធា​ភូមា​ជា​ឯកតោភាគី ដោយ​គ្មានការ​យល់ព្រមជាមុន​ពី​រដ្ឋសមាជិក​របស់​អាស៊ាន។ ដំណើរទស្សនកិច្ច និង​ការព្យាយាម​បញ្ចុះបញ្ចូល​ឱ្យ​មេដឹកនាំ​រដ្ឋប្រហារ​យោធា​ភូមាអាច​វិលមក​ចូលរួម​កិច្ចប្រជុំ​របស់​អាស៊ាន​ឡើងវិញ​បាន​របស់​លោកនាយករដ្ឋមន្ត្រី ហ៊ុន សែន នេះ រងនូវការរិះគន់ និង​ថ្កោលទោស​យ៉ាងខ្លាំង​ពី​ពលរដ្ឋភូមា និង​សហគមន៍​អន្តរជាតិ។ ពួកគេថា ទង្វើនេះ គឺជា​ការប្រមាថ​ដល់​ពលរដ្ឋភូមា និង​ធ្វើឱ្យ​សមាគម​អាស៊ាន​បែកបាក់។

ភ្លាមៗ​ក្រោយ​ដំណើរ​ទស្សនកិច្ច​របស់​លោក ហ៊ុន សែន ទៅភូមា កម្ពុជា​បាន​បរាជ័យ​មិនអាច​រៀបចំ​កិច្ចប្រជុំ​ចង្អៀត​ថ្នាក់រដ្ឋមន្ត្រី​ការបរទេស​អាស៊ាន ដែល​គ្រោង​ប្រព្រឹត្តទៅ​នៅថ្ងៃទី១៨ ដល់ថ្ងៃ​ទី១៩ ខែមករា ខាងមុខនេះ​បាន ដោយ​ត្រូវ​សម្រេច​លើកពេល​កិច្ចប្រជុំ​ដោយគ្មាន​កាលកំណត់។ កម្ពុជា​អះអាងថា ការសម្រេច​លើកពេល​កិច្ចប្រជុំ​នេះ គឺដោយសារ​រដ្ឋមន្ត្រី​ការបរទេស​អាស៊ាន​ភាគច្រើន​ «លំបាក» ក្នុងការ​ធ្វើដំណើរ​មកចូលរួម​កិច្ចប្រជុំ​ដោយផ្ទាល់។ ក៏ប៉ុន្តែ ក្រុមអ្នកឃ្លាំមើល​ថា នេះគឺជា​សញ្ញា​ណ​បង្ហាញ​ឱ្យ​ឃើញ​ពី​ការមិនពេញ​ចិត្ត​ក្នុងចំណោម​រដ្ឋមន្ត្រី​ការបរទេស​អាស៊ាន ចំពោះ​ការព្យាយាម​ដោះស្រាយ​បញ្ហា​នៅ​ភូមា​របស់​កម្ពុជា៕ 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

2 Responses to "ប្រេសិត​​ពិសេស អ.ស.ប ទទួល​បន្ទុក​​កិច្ចការ​ភូមារំឮក​​លោក ហ៊ុន សែន ឱ្យ​​ដោះស្រាយ​​វិបត្តិ​ភូមា​​ស្រប​តាម​ឆន្ទៈ​ពលរដ្ឋ​​នៃ​​ប្រទេស​នេះ​"

  1. Anonymous says:

    Don’t we all knew that Mr Hun Sen always ignored UN regardless, just look at Cambodia crisis and we all wonder does UN really know who’s Hun Sen? After 30 plus years plus in his power ???

  2. Anonymous says:

    WELL …all I knew that ugly evil monster dictator can only ignoring to the other people excepting Cambodian . the reason why??? this evil already made himself as Cambodian GOD under VIETCONG secret bloody policy. I admiring VIETCONG was having the best experience of being a good thief to enlarge their country. I’m felling so sad to the poor VIETCONG’s predator like CAMBODIA and LAO. VIETCONG put their invading policy to these nation made those people killing each other at last they come to rescue than they become their good GOD took their land and treasury also . please weaking up Cambodian

Leave a Reply

Submit Comment