បរិស្ថាន, ព័ត៌មានជាតិ
កញ្ញា ឆន រស្មី and លោក មេង គ្រុយពន្លក | ១៤ មករា ២០២២ | ម៉ោង ១១:៤៨
VOD
ព្រះសង្ឃនៃសហគមន៍សង្ឃរុក្ខាវ័ន ទ្រង់មើលដើមឈើមួយដើមដែលត្រូវបានកាប់ដោយជនខិលខូច អំឡុងពេលចុះល្បាតថ្ងៃទី០៧ ខែមករា ឆ្នាំ២០២២។ (ហ្វេសប៊ុក៖ Bun Saluth – ប៊ុន សាលួត)
ព្រះសង្ឃសហគមន៍រុក្ខាវ័ន នៅខេត្តឧត្ដរមានជ័យ កំពុងធ្វើយុទ្ធនាការ «បរិច្ចាគប្រាក់១ដុល្លារ» ដើម្បីចូលរួមជួយការពារនិងអភិរក្សធនធានធម្មជាតិនៅក្នុងព្រៃសហគមន៍សង្ឃរុក្ខាវ័ន ខណៈបទល្មើសព្រៃឈើនិងការដាក់អន្ទាក់យកសត្វព្រៃនៅតែបន្តកើតមាន។
ប្រធានសហគមន៍សង្ឃរុក្ខាវ័ន ព្រះតេជគុណ ថូ ធូរស់ មានសង្ឃដីកាថា ដើម្បីការពារព្រៃនេះ គួរតែមានថវិកាបន្ថែមជាងបច្ចុប្បន្ន ហើយព្រះតេជគុណសង្ឃឹមថា យុទ្ធនាការនេះនឹងបញ្ចប់ទៅវិញនៅចុងខែកុម្ភៈ ឆ្នាំ២០២២ ដោយទទួលបានថវិកាដើម្បីយកមកគាំទ្រសកម្មភាពសម្រាប់ការល្បាតព្រៃឈើ ហើយអត្ថប្រយោជន៍នៃការប្រមូលថវិកានេះ វាពិតជាសំខាន់ក្នុងការផ្គត់ផ្គង់ក្នុងការចំណាយលើការដើរយាមល្បាត ជាពិសេសដើម្បីផ្សារភ្ជាប់យុទ្ធនាការនេះនៅក្នុងកម្មវិធីបំបួសនាគនៅថ្ងៃខាងមុខ។
ព្រះអង្គមានសង្ឃដីកាថា៖ «ចម្រើនពរ! អត្ថប្រយោជន៍ដែលទទួលបានពីការឧបត្ថម្ភនេះ ទីមួយ យើងបង្កើនសកម្មភាពល្បាតព្រៃកាន់តែច្រើន ហើយផលប្រយោជន៍ដែលយើងទទួលបានមកវិញ យើងបានថែរក្សាការពារសត្វព្រៃឱ្យបានគង់វង្សបន្តទៅទៀត នេះជាអ្វីដែលអាត្មាចង់បាន»។
ដែនជម្រកសង្ឃសហគមន៍រុក្ខាវ័នដែលស្ថិតនៅខេត្តបន្ទាយមានជ័យ កំពុងតែរងគ្រោះពីការកាប់បំផ្លាញនិងប្រមាញ់សត្វព្រៃ ខណៈធនធានការពារព្រៃឈើនេះទាំងស្រុង គឺពឹងលើការដឹកនាំរបស់ព្រះសង្ឃ។
ព្រៃសហគមន៍ដែលនៅសល់ចុងក្រោយនៃខេត្តនេះកំពុងតែខ្វះធនធានសម្រាប់ដើរល្បាត ដែលតម្រូវឱ្យព្រះសង្ឃនិងគណៈកម្មាធិការសម្រេចចិត្តធ្វើយុទ្ធនាការ«ប្រាក់១ដុល្លារ»សម្រាប់ការពារព្រៃសហគមន៍។ ការធ្វើយុទ្ធនាការនេះដោយសង្ឃឹមថា សាធារណជនអាចចូលរួមចំណែកជួយការពារធនធានធម្មជាតិ និងដើម្បីការពារព្រៃឈើនិងសត្វព្រៃផងដែរ។
យុទ្ធនាការនេះបានចាប់ផ្ដើមកាលពីថ្ងៃទី១ ខែមករា រហូតដល់ចុងខែកុម្ភៈ ឆ្នាំ២០២២។ ហើយគិតមកដល់ថ្ងៃទី១៣ ខែមករា ម្សិលមិញនេះ យុទ្ធនាការនេះទទួលបានទឹកប្រាក់ពីសប្បុរសជនចំនួន៨៤ដុល្លារ (ចំនួន១៤នាក់)។
ប្រធានសហគមន៍សង្ឃរុក្ខាវ័ន ព្រះតេជគុណ ថូ ធូរស់ មានសង្ឃដីកាថា ក្នុងរយៈពេលមួយឆ្នាំកន្លងមកនេះ មានការកាប់ឈើធ្នង់សុទ្ធប្រមាណមួយពាន់ដើម ការដាក់អន្ទាក់សត្វ និងការឆក់សត្វព្រៃ ជាដើម។ ព្រះអង្គបន្ថែមថា មូលហេតុនៃការបាត់បង់ឈើនេះមានកត្តាច្រើនយ៉ាង តែក្នុងនោះក៏អាចមានការជាប់ពាក់ព័ន្ធជាមួយអាជ្ញាធរជាអ្នកការពារនិងជាអ្នកកាប់ផងដែរ។
ព្រះអង្គមានសង្ឃដីកាថា៖ «ទាក់ទងទៅនឹងការប្រព្រឹត្តបទល្មើសគ្រប់រូបភាពនៅព្រៃសហគមន៍ក្នុងតំបន់ការពារពីសំណាក់ប្រជាពលរដ្ឋដែលរស់នៅជុំវិញភូមិនេះ តាមអាត្មា ទី១ គាត់អាង ក៏ដូចថាគាត់អាងខ្នង ថាគាត់នៅក្នុងភូមិហ្នឹង ហើយគាត់ជាអ្នកទទួលផលប្រយោជន៍ពីកន្លែងហ្នឹង ទី១។ ទី២ គាត់អាងខ្នង ថាគាត់ហ្នឹងមានបងប្អូនជាមន្ត្រី សមត្ថកិច្ច មានប៉ូលិស មានមន្ត្រីឧទ្យានុរក្សអីទៅអ៊ីចឹង។ ទី៣ គាត់មានមេភូមិដែលនៅពីក្រោយ មេភូមិដែលនៅពីក្រោយគាត់ហ្នឹង គឺមេភូមិអាចថាជាអ្នកបំបះបំបោរពួកគាត់»។
អតីតព្រះមេគណខេត្តឧត្ដរមានជ័យដែលការពារព្រៃឈើជាង២០ឆ្នាំ និងបច្ចុប្បន្នជាអ្នកជួយការពារព្រៃឈើរុក្ខាវ័ន លោក ប៊ុន សាលួត មានប្រសាសន៍ថា បច្ចុប្បន្នមានបទល្មើសកាប់ឈើដែលភាគច្រើនជាប្រភេទឈើធ្នង់ និងការប្រមាញ់សត្វព្រៃ រួមមាន ទន្សោង ប្រើស នៅតែបន្តកើតឡើង។ លោកសម្ដែងក្ដីព្រួយបារម្ភអំពីកង្វះធនធានថវិកា ព្រមទាំងកម្លាំងចុះល្បាត ព្រោះទំហំការពារព្រៃធំរហូតដល់៣០ ២៥៤ហិកតា គ្របដណ្ដប់លើឃុំ-សង្កាត់ចំនួន៥ និង២៤ភូមិ។
លោកថា៖ «មិនទៀងទេ ជួនកាលខ្វះស្បៀង ខ្វះអីក៏អត់ទៅ! ខាងទាហាន ខាងឧទ្យានុរក្ស ហ្នឹងទីមួយ។ បើលោកចុះនាំកម្លាំងទាហាន នាំមន្រ្តីដែនអនុរក្ស ជួនកាលមន្រ្តីដែនអនុរក្សកម្លាំងតិចទៅក៏បានទៅ តែយើងនិងទាហាន ជួនកាលមន្រ្តីគេដើរគ្នាគេទៅ»។
លោកបន្ថែមថា ចំពោះកម្លាំងចុះល្បាតបច្ចុប្បន្នមានបីក្រុមធំ រួមមាន ព្រះសង្ឃ និងគណៈកម្មាធិការវត្តប្រមាណ៤០នាក់ ទាហានដែលបានស្នើសុំមាន២០នាក់ ព្រមទាំងមន្រ្តីឧទ្យានុរក្ស៦នាក់ និងមន្រ្តីកិច្ចសន្យា១០នាក់។ លោកថា ការចំណាយជាមធ្យមប្រមាណ២លានទៅ៣លានរៀលក្នុងមួយខែ សម្រាប់ការឧបត្ថម្ភ ដែលក្នុងនោះរួមទាំងទាហានផងដែរ ដែលជាហេតុធ្វើឱ្យខ្វះខាតធនធានថវិកា ក៏ដូចជាកម្លាំងផងដែរ ហើយមន្រ្តីឧទ្យានុរក្សក៏មិនសូវសកម្មនោះទេ។
លោកថា៖ «អត់អាចឱ្យទាហានដើរចល័តបានរាល់ម៉ោងរាល់ថ្ងៃនោះទេ អត់មានថវិកាទិញសាំង ទិញអីឱ្យគាត់។ ពីរទៅបីថ្ងៃ យើងដើរល្បាតម្ដង ដោយទៅដេកមួយយប់ឬពីរយប់ទៅ។ ការចុះល្បាត មានទាំងជើងទឹក ជើងគោក។ ហើយបើចុះជើងទឹក ឱ្យ៦លីត្រទៅ១០លីត្រសម្រាប់កាណូតមួយ ជួនកាលទៅកាណូតពីរ។ សម្រាប់ម៉ូតូមួយ ខ្ញុំឱ្យសាំងតែពីរលីត្រ»។
សកម្មជនការពារបរិស្ថាននៃចលនាមាតាធម្មជាតិ លោក សាន ម៉ាឡា យល់ឃើញថា រដ្ឋាភិបាលគួរតែមានការលើកទឹកចិត្តដល់ព្រៃសហគមន៍រុក្ខាវ័ន ដោយសារតែជាទូទៅមានតែការសហការពីព្រះសង្ឃនិងប្រជាជនតែប៉ុណ្ណោះ។ បន្ថែមពីនេះ លោកចង់ឃើញខាងក្រសួងបរិស្ថានយកចិត្តទុកដាក់និងសកម្មនៅក្នុងការចូលរួមការការពារព្រៃឈើ ជាពិសេសក្រសួងគួរតែមានជាកញ្ចប់ថវិកាសម្រាប់ចូលរួមផ្ដល់ជាជំនួយដល់ព្រៃសហគមន៍រុក្ខាវ័ន និងមានការផ្ដល់ឱកាសសម្រាប់យុវជនក្នុងការចូលរួមការពារ។
លោកថា៖ «ក្រសួងគួរតែធ្វើការសម្របសម្រួលនិងពិចារណាឡើងវិញនៅក្នុងការបើកទូលាយឱ្យមហាជន អង្គការសង្គមស៊ីវិល ឬក៏ក្រុមយុវជនហ្នឹង មានលទ្ធភាពចូលរួមក្នុងការងារដើរល្បាត ទាំងការការពារព្រៃឈើ ត្បិតក្រុមអង្គការសង្គមស៊ីវិល យុវជន អាចមានទស្សនៈឬរបៀបធ្វើការខុសពីមន្រ្តីរដ្ឋាភិបាលក៏ដោយ»។
លោកបន្តថា៖ «ប៉ុន្តែយ៉ាងណា ក៏ទាំងអស់គ្នាមានគោលដៅតែមួយគត់ក្នុងការការពារព្រៃឈើមរតកធនធានរបស់យើង។ ដូច្នោះ បើសិនក្រសួងមិនមានការជាប់ពាក់ព័ន្ធជាមួយអ្នកដែលនៅពីក្រោយខ្នងនៃការកាប់បំផ្លាញព្រៃឈើ ឬមិនមែនជាអ្នកដែលទទួលប្រយោជន៍ពីការកាប់បំផ្លាញព្រៃឈើទេ ក្រសួងមិនគួរមានហេតុផលអីមករារាំងដល់ការចូលរួមរបស់យើងទេ»។
អភិបាលរងខេត្តឧត្ដរមានជ័យ លោក ឌី រ៉ាជូ បានលើកឡើងថា ការការពារព្រៃសហគមន៍រុក្ខាវ័នត្រូវតែមានការចូលរួមពីមន្រ្តីបរិស្ថានឧទ្យានុរក្ស ហើយដើម្បីកាត់បន្ថយបទល្មើសគឺមានតែការចូលរួមទាំងអស់គ្នាគ្រប់លំដាប់ថ្នាក់។ លោកថា បើមានការសហការគ្នាពីគ្រប់ភាគីពាក់ព័ន្ធ ការបញ្ជ្រាបនូវការយល់ដឹងទៅកាន់ប្រជាពលរដ្ឋឱ្យរៀនស្រឡាញ់ ការពារព្រៃឈើ នោះបទល្មើសនឹងត្រូវបានកាត់បន្ថយ និងអាចឈានដល់ការបញ្ចប់ទាំងស្រុង។
លោកថា៖ «យើងនឹងរៀបចំ ការពិត! ការផ្សព្វផ្សាយធ្វើជារៀងរាល់ឆ្នាំហើយ យើងជំរុញការផ្សព្វផ្សាយឱ្យបានខ្លាំងក្លាបន្ថែមទៀត។ ទី២ ខាងអាជ្ញាធរខេត្ត រួមទាំងមន្ទីរជំនាញ [មន្ទីរបរិស្ថាន] វាមានឧទ្យានុរក្ស រួមទាំងសហគមន៍ គឺថាយើងនឹងខិតខំរៀបចំផែនការធ្វើយ៉ាងណា គឺថាយើងល្បាតផ្សំនឹងការបញ្ជ្រាបការយល់ដឹងដល់ប្រជាពលរដ្ឋ គឺថាយើងធ្វើការល្បាត យើងមានជាផែនការជាមួយគ្នា ជាមួយសហគមន៍មន្រ្តីឧទ្យានុរក្សធ្វើការទប់ស្កាត់បទល្មើសនៅទីនោះ»។
អ្នកនាំពាក្យក្រសួងបរិស្ថាន លោក នេត ភក្រ្តា បានបញ្ជាក់ថា មកដល់ពេលនេះ លោកមិនទាន់បានទទួលរបាយការណ៍ទាក់ទងនឹងការកាប់បំផ្លាញព្រៃនៅក្នុងព្រៃសហគមន៍រុក្ខាវ័នជាបទល្មើសទ្រង់ទ្រាយធំនោះនៅឡើយទេ។ លោកថា មានត្រឹមតែទ្រង់ទ្រាយតូចៗប៉ុណ្ណោះ ហើយលោកក៏បានបន្តថា ការបង្រ្កាបនិងទប់ស្កាត់បន្ថែមទៀត ដោយលោកបានសហការជាមួយកម្លាំងមន្រ្តីឧទ្យានុរក្សនិងសហគមន៍ ដើម្បីធ្វើកិច្ចការការពារនៅទីនោះបន្ថែម។ លោកបានបន្ថែមថា សម្រាប់កង្វះឧទ្យានុរក្សនៅតាមតំបន់ការពារ អ្វីដែលជាមធ្យោបាយក្នុងការដោះស្រាយនោះ គឺត្រូវមានការសហការជាមួយសហគមន៍ទៅតាមលទ្ធភាព។
លោកមានប្រសាសន៍ថា៖ «ខាងក្រសួងបានដាក់ចុះនូវយន្តការមួយចំនួន ដើម្បីពង្រឹងសេដ្ឋកិច្ចនៅមូលដ្ឋាន មានន័យថា ប្រជាពលរដ្ឋដែលរស់នៅជុំវិញតំបន់ទាំងអស់ហ្នឹង គឺយើងបង្កើតជាសហគមន៍តំបន់ការពារធម្មជាតិ ផ្ដល់នូវប្រភេទពូជសត្វ ពូជឈើហូបផ្លែ រួមទាំងការរៀបចំឱ្យទៅជាតំបន់ទេសចរណ៍ធម្មជាតិ ដើម្បីទាក់ទាញភ្ញៀវទេសចរ បង្កើតចំណូល និងបង្កើតការងារដល់ប្រជាពលរដ្ឋ ដែលជាយន្តការដោះស្រាយទៅលើបញ្ហាទាំងអស់ហ្នឹង។ ការអនុវត្តច្បាប់តែមួយមុខ មិនទទួលជោគជ័យ អ៊ីចឹងត្រូវរកដំណោះស្រាយបន្ថែមទៀត»។
គួរបញ្ជាក់ផងដែរថា ព្រៃសហគមន៍សង្ឃរុក្ខាវ័ន មានទំហំសរុប៣០ ២៥៦ហិកតា លាតសន្ធឹងក្នុងស្រុកចំនួន៣ រួមមាន ក្រុងសំរោង ស្រុកចុងកាល់ និងស្រុកអន្លង់វែង ខេត្តឧត្ដរមានជ័យ។ ព្រៃនេះត្រូវបានចាត់ចូលជាព្រៃដែលទទួលបានការការពារតាមរយៈអនុក្រឹត្យរបស់រាជរដ្ឋាភិបាលកម្ពុជា៕
ក្រសួងបរិស្ថាន, ខេត្តឧត្ដរមានជ័យ, បទល្មើសព្រៃឈើ, សង្ឃរុក្ខាវ័ន
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។