ការងារ, តុលាការ និងច្បាប់, ព័ត៌មានជាតិ, សិទ្ធិមនុស្ស
លោក ឃុត សុគន្ធ | ១៨ មករា ២០២២ | ម៉ោង ១៨:២៩
VOD
សមាជិកខ្មែរថាវរៈ ចំនួន៣នាក់ បានកោរសក់រក្សាសីលប្រាំចំនួន១សប្ដាហ៍ ដើម្បីបួងសួងសុំសេចក្ដីសុខជូនពលរដ្ឋខ្មែរគ្រប់រូប ពិសេសសកម្មជនសហជីពក្រុមហ៊ុនណាហ្គាវើលដ៍ ថ្ងៃទី១៨ ខែមករា ឆ្នាំ២០២២។ (ខ្មែរថាវរៈ)
“យុវជន៣នាក់កោសក់ដើម្បីជំរុញឱ្យដោះលែងថ្នាក់ដឹកនាំសហជីពណាហ្គាវើលដ៍ ៨នាក់”
យុវជន៣នាក់ដែលជាសមាជិកខ្មែរថាវរៈបាននាំគ្នាកោរសក់និងធ្វើពិធីបែបសាសនា នៅថ្ងៃអង្គារនេះ ដើម្បីជំរុញឱ្យមានការដោះលែងតំណាងសហជីព៨នាក់របស់ក្រុមហ៊ុនណាហ្គាវើលដ៍ និងទាមទារដោះស្រាយបញ្ចប់វិវាទការងារនៅក្រុមហ៊ុនល្បែងមួយនេះ។
សមាជិកខ្មែរថាវរៈទាំង៣នាក់នោះ រួមមាន កញ្ញា អេង ម៉ាឡៃ លោក ហ៊ុន វណ្ណៈ និងលោក ស្វ័យ សំណាង បានកោរសក់នៅមុខប្រាសាទអង្គរវត្ត និងធ្វើដំណើរដោយថ្មើរជើងប្រហែល៦គីឡូម៉ែត្រទៅបួងសួងបែបសាសនានៅមុខព្រះអង្គចេកព្រះអង្គចម ខេត្តសៀមរាប។
កញ្ញា អេង ម៉ាឡៃ ដែលទើបចេញពីពន្ធនាគារ និងកំពុងស្ថិតក្រោមការត្រួតពិនិត្យតាមផ្លូវតុលាការដោយសារសកម្មការពារសិទ្ធិមនុស្សផងនោះ បានប្រាប់ វីអូឌី ថាពួកគាត់កោរសក់រក្សាសីល៥ រយៈពេល១សប្ដាហ៍ និងធ្វើពិធីបួងសួងបែបសាសនានេះ ដើម្បីជំរុញឱ្យមានការដោះលែងតំណាងសហជីពណាហ្គាវើលដ៍៨នាក់ និងចង់ផ្សព្វផ្សាយទៅសាធារណៈថា បញ្ហានៅក្រុមហ៊ុនណាហ្គាវើលដ៍ គឺជាវិវាទការងារសុទ្ធសាធ មិនមែនបដិវត្តពណ៌ដូចការចោទប្រកាន់របស់អាជ្ញាធរនោះឡើយ។
មួយទៀតនោះ កញ្ញា អេង ម៉ាឡៃ បន្តថា ការកោរសក់និងធ្វើពិធីបែបសាសនានេះ ជាសារមួយដាស់តឿនដល់ពលរដ្ឋកម្ពុជាឱ្យហ៊ានចេញជួយគ្នា និងក្រោកឈរតវ៉ាប្រឆាំងការរំលោភសិទ្ធិមនុស្ស សិទ្ធិការងារ និងភាពអយុត្តិធម៌ផ្សេងៗនៅក្នុងសង្គម។
កញ្ញាបន្ថែមថា៖ «យើងមើលទៅ វាអត់មានអ្វីដែលត្រូវចាប់ខ្លួនពួកគាត់ទេ ពួកគាត់ជាសហជីពការពារសិទ្ធិកម្មករដែលក្រុមហ៊ុនបានរំលោភលើសិទ្ធិពួកគាត់ វាអត់មានអីខុសច្បាប់ទេ។ ដោយមើលឃើញពីភាពអយុត្តិធម៌នេះ ពួកខ្ញុំចាប់ផ្ដើមធ្វើយុទ្ធនាការនេះ ដើម្បីបង្ហាញទៅដល់យុវជនហ៊ានលះបង់ដូចយើងហ៊ានក្រោកឈរ ហ៊ានតវ៉ាតស៊ូមតិដូចយើង។ បើយើងក្រោកឈរទាំងគ្នានឹងមានយុត្តិធម៌ឆាប់សម្រាប់សហជីពទាំង៨នាក់ហ្នឹង»។
អ្នកនាំពាក្យក្រសួងយុត្តិធម៌ លោក ជិន ម៉ាលីន ប្រាប់ វីអូឌី កាលពីថ្ងៃទី១០ ខែមករានេះថា សកម្មភាពណាមួយដើម្បីទាមទារឱ្យមានការដោះលែងថ្នាក់ដឹកនាំសហជីព៨នាក់នោះ គឺមិនមានប្រយោជន៍ឡើយ ពីព្រោះវាមិនមែនជាផ្លូវច្បាប់។ លោកបានចាត់ទុកការធ្វើសកម្មភាពតវ៉ាណាមួយនោះថា ជាសកម្មភាពដើម្បីកេងចំណេញផ្នែកនយោបាយតែប៉ុណ្ណោះ។
អ្នកនាំពាក្យរូបនេះបន្តថា ជនជាប់ចោទត្រូវការពារខ្លួនតាមផ្លូវច្បាប់ ដោយបង្ហាញនូវភស្តុតាងឬសក្ខីកម្ម ដើម្បីដោះបន្ទុកទៅនឹងបទចោទនោះវិញ។
លោកបន្ថែមថា៖ «ប្រសិនយើងមិនមានមូលដ្ឋាន[ភស្តុតាង]ហ្នឹងរឹងមាំទេ មិនអាចធ្វើការការពារខ្លួនបានទេ។ ការធ្វើបាតុកម្ម ការធ្វើសន្និសីទកាសែត រិះគន់ទិតៀននេះ ជារូបភាពសកម្មភាពនយោបាយទេ។ ជាទិដ្ឋភាពផ្លូវច្បាប់ វាអត់មានឥទ្ធិពលផ្នែកច្បាប់ណាមួយក្នុងការការពារខ្លួនបានទេ»។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ មានប្រសាសន៍ថា ទាំងអង្គការសង្គមស៊ីវិល និងសកម្មជនសិទ្ធិមនុស្សផ្សេងទៀត ជ្រើសរើសការធ្វើយុទ្ធនាការនានា ដើម្បីទាមទារដោះលែងថ្នាក់ដឹកនាំសហជីពទាំងនោះ ដោយសារពួកគេអស់ជំនឿលើប្រព័ន្ធតុលាការនៅកម្ពុជា។
លោកបន្តថា ប្រព័ន្ធតុលាការនៅកម្ពុជា គឺមិនទាន់មានការធានាទៅដល់ការផ្ដល់នូវសេវាយុត្តិធម៌សង្គមក្នុងការដោះស្រាយវិវាទការងារនៅឡើយ។ លោកថា កន្លងមក និយោជកតែងប្រើប្រាស់ប្រព័ន្ធតុលាការនេះ ដើម្បីប្រឆាំងសហជីពដែលបានការពារសិទ្ធិកម្មករ។
លោកបន្ថែមថា៖ «យើងមើលឃើញថា ការប្រើប្រាស់ប្រព័ន្ធតុលាការនេះ វាជាឧបករណ៍មួយកន្លងមកក្នុងការគំរាមកំហែងប្រឆាំងថ្នាក់ដឹកនាំសហជីពឯករាជ្យ ដែលគាត់បានប្រើប្រាស់សិទ្ធិជាតំណាងក្នុងការការពារសិទ្ធិស្របច្បាប់ទៅដល់បងប្អូនកម្មករក្នុងវិស័យការងារ។ ហើយករណីនៅក្រុមហ៊ុនណាហ្គាវើលដ៍នេះ វាមិនមែនជាករណីទីមួយទេ វាមានករណីជាច្រើនផ្សេងៗទៀតដែលតុលាការបានប្រើប្រាស់នូវដីការក្សាការពារផ្អែកទៅតាមការស្នើសុំរបស់និយោជក»។
គិតមកដល់ថ្ងៃទី១៨ ខែមករានេះ ថ្នាក់ដឹកនាំនិងសមាជិកសហជីព៨នាក់ត្រូវបានឃុំខ្លួនរយៈពេល១៩ថ្ងៃហើយ ខណៈក្រុមកូដករប្រមាណ១ ០០០នាក់បានបន្តធ្វើកូដកម្មដដែល បើទោះបីជាចំណុចដែលពួកគេទាមទារនៅមិនទាន់មានការដោះស្រាយចំណុចណាមួយក៏ដោយ។
កាលពីថ្ងៃទី៥ ខែមករានេះ ថ្នាក់ដឹកនាំនិងសកម្មជនសហជីពចំនួន៨នាក់ ក្នុងនោះមានប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ផង ត្រូវបានតុលាការសម្រេចឃុំខ្លួនបណ្ដោះអាសន្នក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌ ក្រោយពីពួកគេធ្វើកូដកម្មអហិង្សាទាមទារសិទ្ធិនិងលក្ខខណ្ឌការងារប្រសើរនៅក្នុងក្រុមហ៊ុនល្បែងមួយនេះ៕
ក្រសួងការងារ, ណាហ្គាវើលដ៍, សិទ្ធិការងារ
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។