គណបក្សនយោបាយ, បោះឆ្នោត
លោក ណាត សុភាព | ២០ មករា ២០២២ | ម៉ោង ១៨:២៧
VOD

ព្រះអង្គម្ចាស់ នរោត្ដម ចក្រាវុធ ព្រះប្រធានស្ដីទីគណបក្សហ៊្វុនស៊ិនប៉ិច បានយាងចុះជួបសួរសុខទុក្ខ និងសំណេះសំណាលជាមួយថ្នាក់ដឹកនាំដែលជារចនាសម្ព័ន្ធថ្នាក់ខេត្តនិងស្រុក នៃខេត្តកំពង់ធំ នាព្រឹកថ្ងៃទី១៩ ខែធ្នូ ឆ្នាំ២០២១។ (ហ្វេសប៊ុក៖ គណបក្ស ហ៊្វុនស៊ិនប៉ិច)

ប្រធានស្ដីទីគណបក្សហ្វ៊ុនស៊ិនប៉ិច ព្រះអង្គម្ចាស់ នរោត្ដម ចក្រាវុធ មានព្រះរាជបន្ទូលប្រកាស​ស្វាគមន៍​​ចំពោះអតីត​ថ្នាក់​ដឹក​នាំ​បក្ស ឬអ្ន​កនយោបាយគណបក្សផ្សេងដែលចង់មករួមរស់ក្រោមដំបូលគណបក្សហ្វ៊ុនស៊ិនប៉ិច ដើម្បីនាំមក​នូវសុខសន្តិភាពនិងស្ថិរភាពនយោបាយនៅកម្ពុជា។

ក្នុងឱកាសដែលទ្រង់បានយាងក្នុង ពិធីសំណេះសំណាលជួបជុំជាមួយថ្នាក់ដឹកនាំ ខេត្ត ស្រុក ឃុំ និងរចនាសម្ព័ន្ធ​គណបក្ស​ក្នុងខេត្តបន្ទាយមានជ័យ និងខេត្តបាត់ដំបង នាព្រឹកថ្ងៃព្រហស្បតិ៍នេះ ព្រះអង្គម្ចាស់ នរោត្ដម ចក្រា​វុធ មាន​ព្រះរាជបន្ទូល​ណែនាំដល់​សមាជិកសមាជិកាគណបក្សហ្វ៊ុនស៊ិនប៉ិច ត្រៀមលក្ខណៈចូលរួមក្នុងការ​បោះ​ឆ្នោត​ជ្រើសរើស​សមាជិកក្រុមប្រឹក្សាឃ្មុំ-សង្កាត់ អាណត្តិទី៥ ឆ្នាំ២០២២ ព្រមទាំងគោលនយាយរបស់គណបក្ សជាដើម។

បន្ថែមពីនេះ ព្រះអង្គម្ចាស់បាន​ប្រកាស​​​ស្វាមគមន៍អតីតថ្នាក់ដឹកនាំបក្សដែលធ្លាប់ខ្វែងគំនិតគ្នា ឬអ្នកនយោ​បាយ​គណបក្សផ្សេងដែល​ចង់ចូលរួមជាមួយ​គណបក្សហ្វ៊ុនស៊ិនប៉ិច​ ដើម្បីនាំមកនូវសុខសន្តិភាព ស្ថិរភាពនយោបាយ និងការអភិវឌ្ឍ​ប្រកបដោយចីរភាពផងដែរ។

អ្នកនាំពាក្យគណបក្សហ្វ៊ុនស៊ិនប៉ិច លោក ញឿន រ៉ាដែន មានប្រសាសន៍បន្ថែមថា ការប្រកាសរបស់​ព្រះអង្គម្ចាស់ នរោត្ដម ចក្រាវុធ ធ្វើឡើង​​ដើម្បីឱ្យគណបក្សនេះកាន់តែមានភាពរឹងមាំ សាមគ្គីភាពគ្នាជាធ្លុងមួយ ក្នុងការជួយដោះស្រាយបញ្ហាវិបត្តិនយោបាយដែលកើតមានឡើងឬដែលនៅសេសល់ ឱ្យទទួលបានផលវិជ្ជមានខ្ពស់ជាដើម។

លោកបន្ថែមថា បើសិនជាអ្នកនយោបាយដែលមកពីគណបក្សផ្សេងៗទៀត ហើយមករួមរស់ក្រោមដំបូលគណបក្សហ្វ៊ុនស៊ិនប៉ិច មុនការបោះឆ្នោតជ្រើសរើសក្រុមប្រឹក្សាឃុំ-សង្កាត់នោះ លោក​មានជំនឿថា គណបក្សនេះនឹងទទួលបានអាសនៈ រួមទាំងសំឡេងគាំទ្រពីប្រជាពលរដ្ឋម្ចាស់ឆ្នោតភ្លូកទឹកភ្លូកដី ហើយអាចឈ្នះឆ្នោតដូចកាលពីឆ្នាំ១៩៩៣ផងដែរ។

បើតាមសេចក្ដីប្រកាសព័ត៌មានរបស់ គ.ជ.ប កាលពីថ្ងៃទី​១៥ ខែ​មីនា ឆ្នាំ២០២១ កាល​បរិច្ឆេទ​នៃ​ការ​​បោះ​ឆ្នោត​ជ្រើស​រើសសមាជិក​ក្រុម​ប្រឹក្សាឃុំ-ស​ង្កាត់ សម្រាប់​អាណត្តិទី៥ នឹង​ប្រ​ព្រឹត្ត​ទៅ​នៅថ្ងៃ​អាទិត្យ ទី៥ ខែ​មិថុនា ឆ្នាំ២០២២ខាងមុខនេះ៕

គណៈកម្មាធិការជាតិរៀបចំការបោះឆ្នោត, គណបក្សហ្វ៊ុនស៊ិនប៉ិច

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។