កញ្ញា ឈឹម ស៊ីថរ៖មានតែនាយករដ្ឋមន្ត្រីទេ ដោះវិវាទបុគ្គលិកនិងក្រុមហ៊ុនណាហ្គាវើលដ៍បាន

កម្ពុជា-សង្គម
20/06/2022 – 08:28
ដោយ៖ អេង គីមហុង
RFI

វិវាទកម្មករណាហ្គាវើលដ៍ © FB


បុគ្គលិកណាហ្គាវើលដ៍​ដែល​កំពុង​មាន​វិវាទ​ជាមួយ​ក្រុមហ៊ុន​បាន​ឈាន​មួយ​ជំហ៊ាន​ទៀត ក្នុង​ការ​ដាក់លិខិត​អន្តរាគមន៍​ទៅ​កាន់​រដ្ឋសភា និង​ខុទ្ទកាល័យ​លោកនាយករដ្ឋមន្ត្រី ហ៊ុន សែន នៅ​ថ្ងៃ​ទី​២០​មិថុនានេះ​ដើម្បី​ឲ្យ​ស្ថាប័ន​ទាំង​ពីរ ជាពិសេស​ប្រមុខរដ្ឋាភិបាល​ដោះស្រាយ​បញ្ហា​ដែល​កំពុង​ជាប់​គាំង​រយៈ​ពេល៦​ខែ​មក​នេះ។ ថ្លែងពី​ខាង​ក្រៅ​ខុទ្ទកាល័យ​លោកនាយករដ្ឋមន្ត្រី ម្ដុំ​វត្តបទុមវត្តី តំណាង​បុគ្គលិក​ណាហ្គាវើលដ៍​បង្ហាញ​ក្ដី​សង្ឃឹម​ថា មាន​តែ​ប្រមុខ​រដ្ឋាភិបាល​លោក ហ៊ុន សែន ទេ ដោះស្រាយ​បញ្ហា​របសពួកគេបាបន្ទាប់ពី​ការ​ចរចា​ចំនួន​១១​លើក​គ្មាន​ផ្លែផ្កា។

បន្ទាប់ពីញត្តិបានទៅដល់ដៃមន្ត្រីខុទ្ទកាល័យលោកនាយករដ្ឋមន្ត្រី កញ្ញា ឈឹម ស៊ីថរ ដែលនាំដឹកនាំការដាក់ញត្តិនៅថ្ងៃទី២០មិថុនានិយាយថា ប្រមុខរដ្ឋាភិបាលជាក្ដីសង្ឃឹមតែមួយគត់ដែលអាចដោះស្រាយវិវាទរវាងកម្មករណាហ្គាវើលដ៍ប្រមាណ២០០នាក់ជាមួយក្រុមហ៊ុនល្បែងដ៏ធំនេះបាន។ បើតាមប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករប្រចាំនៅក្រុមហ៊ុនណាហ្គាវើលដ៍រូបនេះ អន្តរាគមន៍ដល់ថ្នាក់ដឹកនាំកំពូលធ្វើឡើងបន្ទាប់ពីការចរចាចំនួន១១លើកជាលក្ខណៈត្រីភាគី ភាគីអាជ្ញាកណ្ដាលលំអៀងទៅរកនយោជកដែលជាក្រុមហ៊ុន។

តាមរយៈខ្លឹមសារញត្តិដាក់ទៅកាន់ខុទ្ទកាល័យលោកនាយករដ្ឋមន្ត្រីក្រុមកម្មករ រក្សាគោលបំណងចាស់ឲ្យនៅដដែលគឺចង់បានដំណោះស្រាយបីចំណុចរួមមាន៖ក្រុមហ៊ុនទទួលយកបុគ្គលិកដែលនៅសេសសល់ជិត២០០នាក់ចូលធ្វើការវិញ  ហើយអ្នកដែលយល់ព្រមទទួលយកសំណង់សុំក្រុមហ៊ុនទូទាត់ឲ្យបានត្រឹមត្រូវតាមផ្លូវច្បាប់ និងទម្លាក់ចោលបទចោទលើថ្នាក់ដឹកនាំសហជីពនិងសកម្មជន១៥នាក់ដែលចោទប្រកាន់ និងឃុំខ្លួននាពេលកន្លងមក។

បន្ទាប់ពីដាក់ញត្តិនៅខុទ្ទកាល័យរួចរាល់ក្រុមកម្មករដឹកនាំដោយកញ្ញា ឈឹម ស៊ីថរ ដដែលបានបន្តដាក់ញត្តិនៅរដ្ឋសភា តែដំណើរឆ្ពោះទៅកាន់ស្ថាប័នជាតិមួយនេះ ជួបភាពរអាក់រអួលព្រោះអាជ្ញាធរ​តម្រូវឲ្យក្រុមកម្មករចាត់តំណាង១០នាក់យកញត្តិទៅដាក់ តែក្រុមកម្មករមិនយល់ស្របដោយចង់ដង្ហែជាក្រុមឈរចាំនៅមុខរដ្ឋសភាហើយឲ្យតំណាងពួកគេចូលទៅ។

សូមជម្រាបជូនថា រាប់ចាប់តាំងពីការកកើតឡើងដំបូងវិវាទរវាងបុគ្គលិកណាហ្គាវើលដ៍ និងក្រុមហ៊ុននៅចុងឆ្នាំ២០២១មកដល់ពាក់កណ្ដាលឆ្នាំ២០២២ ក្រសួងការងារ និងរដ្ឋមន្ត្រីក្រសួងមហាផ្ទៃចេញមុខដោះស្រាយបញ្ហានេះជាបន្តបន្ទាប់ ហើយជាលទ្ធផលមានបុគ្គលិក១៩៦នាក់  ក្នុងចំណោមអ្នកតវ៉ាសរុប៣៧៣យល់ព្រមទូទាត់សំណងដើម្បីបញ្ចប់រឿងគិតត្រឹមថ្ងៃទី២មិថុនា។

សម្រាប់ក្រសួងការងារនៅសល់តែកម្មករប្រមាណ១៧៧នាក់ទៀតទេដែលនៅតវ៉ា ខណៈភាគីសហជីពដឹកនាំដោយកញ្ញា ឈឹម ស៊ីថរ ថា នៅសល់កម្មករប្រមាណ២០០នាក់ទៀតកំពុងតវ៉ា។

ពីខាងក្រុមហ៊ុនណាហ្គាវើលដ៍បានបង្ហាញជំហររបស់ខ្លួនរំលេចលើសេចក្ដីជូនដំណឹងរបស់ក្រសួងការងារចុះថ្ងៃទី៨មិថុនាស្ដីពីវឌ្ឍនភាពនៃការដោះស្រាយវិវាទរួមគ្នាថា ការស្នើសុំទាំងអំបាលមាណរបស់តំណាងកម្មករគឺក្រុមហ៊ុនមិនអាចធ្វើទៅបានទេ ហើយផ្ទុយទៅវិញក្រុមហ៊ុនសុំចិត្តកម្មករដែលនៅសេសល់ប្រមាណ១៥៧នាក់ទទួលយកកញ្ចប់បញ្ចប់កិច្ចសន្យាដោយការទទួលបានថវិកាបន្ថែម និងមានឱកាសស្វែងកន្លែងការងារផ្សេង។ ដោយឡែកកម្មករដែលអវត្តមានដោយគ្មានច្បាប់រយៈពេល៦ខែគួរតែត្រឡប់ចូលធ្វើការ ដើម្បីទទួលបានចំណូលមកវិញ ប្រសើរជាងការបន្តការទាមទារ៕

What Next?

Recent Articles

One Response to "កញ្ញា ឈឹម ស៊ីថរ៖មានតែនាយករដ្ឋមន្ត្រីទេ ដោះវិវាទបុគ្គលិកនិងក្រុមហ៊ុនណាហ្គាវើលដ៍បាន"

  1. Anonymous says:

    I think you can not depending on your SAMDAACH PUK>> HUN SEN

Leave a Reply

Submit Comment