ការងារ ព័ត៌មានជាតិ
កញ្ញា ប៉ា សុខេង | ០១ កក្កដា ២០២២ | ម៉ោង ១៨:៣២
VOD
កូដករណាហ្គាវើលដ៍ប្រមាណ១០០នាក់ ទៅតាមដានញត្តិរបស់ពួកគេនៅរដ្ឋសភា ដែលបានស្នើដល់ប្រមុខរដ្ឋាភិបាលនិងស្ថាប័នរដ្ឋសភា ព្រមទាំងស្នើជាថ្មីឱ្យពន្លឿនការរកដំណោះស្រាយវិវាទការងារនៅក្រុមហ៊ុនណាហ្គាវើលដ៍ ថ្ងៃទី០១ ខែកក្កដា ឆ្នាំ២០២២។ (ហ៊ាន រង្សី)
ក្រុមកូដករណាហ្គាវើលដ៍ បង្ហាញការខកចិត្តដែលខុទ្ទកាល័យនាយករដ្ឋមន្ត្រី និងរដ្ឋសភា ពុំទាន់មានការឆ្លើយតបជាវិជ្ជមានលើញត្តិដែលពួកគេបានដាក់កាលពី១០ថ្ងៃមុន ខណៈញត្តិនោះមានខ្លឹមសារស្នើលោកនាយករដ្ឋមន្ត្រី ហ៊ុន សែន និងរដ្ឋសភា ជួយអន្តរាគមន៍ដោះស្រាយវិវាទការងារជាមួយថៅកែកាស៊ីណូណាហ្គាតាមផ្លូវច្បាប់។
ការលើកឡើងនេះធ្វើឡើងក្នុងពេលកូដករណាហ្គាវើលដ៍ប្រមាណ១០០នាក់ នៅព្រឹកថ្ងៃសុក្រនេះ បានទៅប្រមូលផ្ដុំគ្នានៅខុទ្ទកាល័យនាយករដ្ឋមន្ត្រី និងរដ្ឋសភា ដើម្បីតាមដានញត្តិរបស់ពួកគេដែលបានដាក់ទៅស្ថាប័នទាំង២នេះ ព្រមទាំងស្នើជាថ្មីឱ្យពន្លឿនការរកដំណោះស្រាយវិវាទការងារនៅក្រុមហ៊ុនណាហ្គាវើលដ៍។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានលើកឡើងថា កាលពីថ្ងៃទី២០ ខែមិថុនា ឆ្នាំ២០២២ ក្រុមកូដករណាហ្គាវើលដ៍បានទៅដាក់ញត្តិនៅស្ថាប័នទាំង២នេះ ដើម្បីសុំអន្តរាគមន៍ដោះស្រាយវិវាទការងារឱ្យបានឆាប់ ប៉ុន្តែគិតមកដល់ព្រឹកថ្ងៃទី១ ខែកក្កដានេះ ពួកគាត់នៅមិនទាន់ទទួលបានការឆ្លើយតបណាមួយនៅឡើយ ទើបពួកគាត់នាំគ្នាទៅតាមដានញត្តិដែលបានដាក់។
កញ្ញាថា៖ «តាមរយៈសមាសភាពអ្នកដែលចុះមកទទួល វាអាចបង្ហាញដែរថា រឿងរបស់បុគ្គលិកណាហ្គាជាង១ឆ្នាំនេះ វាទទួលបានការយកចិត្តទុកដាក់ពីប្រមុខរាជរដ្ឋាភិបាលកម្រិតណា! អ៊ីចឹងយើងឃើញថា មិនជាមានទទួលការយកចិត្តទុកដាក់អីប៉ុន្មានទេ។ ហើយបើសិនជាខ្ញុំប្រៀបធៀបទៅការដោះស្រាយជាមួយរឿងសត្វតោមួយក្បាលទៀតហ្នឹង គឺថាខ្ញុំអាចប្រៀបធៀបមើលឃើញថា មនុស្សរាប់ពាន់នាក់ហ្នឹង គឺថាទទួលបានការចាប់អារម្មណ៍តិចជាងតោ។ [ខកចិត្តទេដែលទាំងខុទ្ទកាល័យនាយករដ្ឋមន្ត្រី និងរដ្ឋសភា នៅមិនទាន់មានការឆ្លើយតបជាវិជ្ជមាន?] យើងខកចិត្តដែរ ព្រោះរឿងនេះវាជាងមួយឆ្នាំហើយមកដល់ម៉ោងនេះ គឺអត់ទាន់មានការឆ្លើយតប ឬក៏សូម្បីតែសួរព័ត៌មាន»។
កញ្ញាបន្តថា រយៈពេលជាង៦ខែមកហើយដែលកូដករណាហ្គាវើលដ៍បានធ្វើកូដកម្មតវ៉ាទាមទាររកដំណោះស្រាយ ក្រោយថៅកែបានបញ្ឈប់ពួកគេទាំងអយុត្តិធម៌ និងមិនអនុលោមតាមច្បាប់។ កញ្ញាបន្ថែមថា ការជួបចរចាចំនួន១២ដងរវាងតំណាងកូដករ តំណាងសហជីព និងតំណាងក្រុមហ៊ុន ក្រោមការសម្របសម្រួលរបស់ក្រសួងការងារ ក៏នៅតែពុំទាន់មានលទ្ធផលជាវិជ្ជមាននៅឡើយ ដែលករណីនេះ ពួកគេនៅតែទទូចសុំឱ្យរដ្ឋាភិបាល និងរដ្ឋសភា ជួយពន្លឿនការដោះស្រាយឱ្យបានឆាប់។
លោក គង់ ចំរើន មន្ត្រីនៅខុទ្ទកាល័យនាយករដ្ឋមន្ត្រី បានទទួលលិខិតស្នើឱ្យតាមដានញត្តិរបស់ក្រុមកូដករ និងសន្យាផ្តល់ព័ត៌មាននៅពេលមានការឆ្លើយតបណាមួយពីថ្នាក់ដឹកនាំ។
លោកថា៖ «យើងអត់ដឹង [ថារយៈពេលយូរប៉ុនណាទើបរឿងហ្នឹងដល់ដៃថ្នាក់ដឹកនាំ] ទេ ព្រោះការងារថ្នាក់ដឹកនាំ លោករវល់! ឃើញស្រាប់ហើយ ថ្ងៃនេះអត់នៅផង ទៅព្រលែងត្រីព្រលែងអី ការងារច្រើន! ប៉ុន្តែពេលដែលបានដំណឹង ខ្ញុំទូរសព្ទប្រាប់ ព្រោះមានលេខទូរសព្ទហើយ ហើយអាចនឹងទូរសព្ទសួរខ្ញុំបានពេលម៉ោងធ្វើការ។ ហ្នឹងហើយ ជាក់ស្តែង វាទៅតាមជាក់ស្តែងសិនទៅ បើអត់ទាន់បានការសម្រេចយ៉ាងម៉េចៗ យើងម៉េចដឹង! ខ្ញុំគ្រាន់តែទទួលតើ! ហើយតែទទួលហើយ រៀបចំជូនហើយ គ្រាន់តែការសម្រេច [អាស្រ័យ]លើថ្នាក់ដឹកនាំ»។
ចំណែកប្រធានផ្នែកជំនួយការនៃគណៈកម្មការទី១ នៃរដ្ឋសភា លោក ផាត់ សុផាន់ណា មានប្រសាសន៍ថា ក្រោយរដ្ឋសភាបានទទួលញត្តិរបស់ក្រុមកូដករកាលពីថ្ងៃទី២០ ខែមិថុនានោះ គណៈកម្មការទី១ បានប្រជុំ និងផ្ញើលិខិតទៅស្ថាប័នជំនាញ និងក្រសួងការងារ ដើម្បីឱ្យពិនិត្យលើសំណើរបស់កូដករហើយ ដោយមិនបានទុកចោលទេ។
លោកថា៖ «តាមពិតទៅ រាល់សំណូមពរ រាល់អ្វីដែលបងប្អូនបានលើកឡើងនៅក្នុងលិខិតនេះ គឺយើងបានពិនិត្យ ហើយយើងបានបញ្ជូនទៅតាមសំណូមពរហ្នឹងហើយ ទៅក្រសួងស្ថាប័នហើយ។ អ៊ីចឹងសំណើនេះ ខ្ញុំនឹងដាក់ជូនឯកឧត្តមប្រធានគណៈកម្មាធិការ គាត់ពិនិត្យមួយលើកទៀត អំពីអ្វីដែលបងប្អូនកម្មករបានស្នើឡើងនៅក្នុងហ្នឹង។ ហ្នឹងហើយ! អ៊ីចឹងខ្ញុំសុំតែប៉ុណ្ណឹងទេ ព្រោះខ្ញុំជាជំនួយការទេ»។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ មានប្រសាសន៍ថា ការអូសបន្លាយនៃការរកដំណោះស្រាយវិវាទការងារ នឹងបង្កផលប៉ះពាល់កាន់តែខ្លាំងដល់ជីវភាពរបស់កូដករ ខណៈការសម្របសម្រួលរកដំណោះស្រាយរបស់ក្រសួងការងារ ហាក់ពុំមានការវិវត្តទៅមុខ។
លោកគូសបញ្ជាក់ថា៖ «មានតែនាយករដ្ឋមន្ត្រីទេ ដែលអាចដោះស្រាយវិវាទការងារនេះបាន ពីព្រោះក្រសួងការងារបានបរាជ័យនៅក្នុងការសម្របសម្រួលឱ្យមាននូវដំណោះស្រាយ នូវចំណុចទាមទារអទិភាព គឺការទទួលយកមេដឹកនាំសហជីពចូលធ្វើការវិញ ការទូទាត់សំណងឱ្យបានត្រឹមត្រូវតាមផ្លូវច្បាប់។ ខ្ញុំគិតថា វិវាទការងារនេះនឹងមិនអាចបិទបញ្ចប់បានទេ បើសិនជាមិនមាននូវគោលការណ៍ក្នុងការសម្របសម្រួលណាមួយដែលអាចទទួលយកបានទាំងសងខាង»។
បើតាមក្រុមកូដករ ញត្តិដែលពួកគេបានដាក់កាលពីថ្ងៃទី២០ ខែមិថុនា មានខ្លឹមសារស្នើលោកនាយករដ្ឋមន្ត្រី ហ៊ុន សែន និងរដ្ឋសភា ជួយអន្តរាគមន៍ដោះស្រាយវិវាទការងារចំនួន៣ចំណុច ក្នុងនោះ ស្នើឱ្យជួយជំរុញទៅក្រុមហ៊ុនទទួលយកកូដករដែលនៅសេសសល់ប្រមាណ២០០នាក់ចូលធ្វើការវិញ និងទូទាត់សំណងឱ្យបានត្រឹមត្រូវតាមផ្លូវច្បាប់ ព្រមទាំងស្នើសុំឱ្យមានការទម្លាក់បទចោទទៅលើថ្នាក់ដឹកនាំនិងសមាជិកសហជីពទាំង១៥នាក់វិញ។
បើតាមក្រុមកូដករ ប្រសិនបើមិនមានដំណោះស្រាយណាមួយទេ ពួកគាត់នឹងបន្តការតស៊ូមតិនិងតវ៉ារហូតដល់មានដំណោះស្រាយសមរម្យសម្រាប់ពួកគាត់។
វិវាទការងារក្រុមហ៊ុនណាហ្គាវើលដ៍នេះបានកើតឡើងអស់រយៈពេលជាង១ឆ្នាំមកហើយ ក្រោយពេលដែលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។