លោក សម រង្ស៊ី ថា ការ​ពន្យារពេល​ប្រកាស​សាលក្រម​ប្រឆាំង​រូប​លោក ជា​ចេតនា​នយោបាយ​

ដោយ យ៉ង ចាន់តារា
2022.09.14
RFA

លោក សម រង្ស៊ី ថា ការ​ពន្យារពេល​ប្រកាស​សាលក្រម​ប្រឆាំង​រូប​លោក ជា​ចេតនា​នយោបាយ​

លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ។ Photo: RFA


លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ​លើកឡើង​ថា ការ​ពន្យារ​ពេល​ប្រកាស​សាលក្រម​សំណុំ​រឿង​របស់​លោក​នៅ​តុលាការ​ក្រុង​ភ្នំពេញ​នោះ គឺ​ជា​ចេតនា​នយោបាយ​របស់​លោក​នាយក​រដ្ឋមន្ត្រី ហ៊ុន សែន។

លោក សម រង្ស៊ី ប្រាប់​វិទ្យុ​អាស៊ី​សេរី​កាល​ពី​យប់​ថ្ងៃ​ទី១៣ កញ្ញា​ថា តុលាការ​ប្រទេស​បារាំង​កំពុង​ដំណើរ​ក្ដី​រវាង​លោក និង​លោក ហ៊ុន សែន ដូច្នេះ​លោក ហ៊ុន សែន បញ្ជា​ឱ្យ​តុលាការ​ក្រុង​ភ្នំពេញ​ពន្យារពេល​សំណុំ​រឿង​របស់​លោក ដើម្បី​កុំ​ឱ្យ​តុលាការ​បារាំង​មើល​ឃើញ​ថា លោក​ជា​ជនរងគ្រោះ​នៃ​ការ​ធ្វើ​ទុក្ខបុកម្នេញ​ផ្នែក​នយោបាយ​នៅ​កម្ពុជា។

ប្រតិកម្ម​របស់​ប្រធាន​ស្ដីទី​បក្ស​ប្រឆាំង​រូប​នេះ កើត​មាន​ឡើង​ក្រោយ​ពី​តុលាការ​ក្រុង​ភ្នំពេញ​បាន​លើក​ពេល​ប្រកាស​សាលក្រម​សំណុំរឿង​ពាក់ព័ន្ធ​នឹង​បទ​ចោទ «ប៉ុនប៉ង​ប្រគល់​ឱ្យ​រដ្ឋ​បរទេស​នូវ​ដែនដី​ជាតិ​មួយ​ផ្នែក»។ អាជ្ញាធរ​បាន​ចោទ​លោក សម រង្ស៊ី ​ថា បាន​ចុះ​កិច្ចព្រមព្រៀង​ជាមួយ​មេដឹកនាំ​ជនជាតិ​ដើម​ភាគ​តិច​ម៉ុងតាញ៉ា​វៀតណាម​លោក កុក ស កាល​ពី​ឆ្នាំ២០១៣ កាត់​ដី​ខ្មែរ​ចំនួន ៤ខេត្ត​នៅ​ភាគ​ឦសាន​ឱ្យ​ទៅ​ក្រុម​ជនជាតិ​ដើម​ភាគតិច​ម៉ុងតាញ៉ា ប្រសិនបើ​លោក​ឈ្នះ​ឆ្នោត​ដឹកនាំ​ប្រទេស​នៅ​ឆ្នាំ២០១៣។

ទោះជាយ៉ាងណា លោក សម រង្ស៊ី បាន​ច្រានចោល​ការ​ចោទ​ប្រកាន់​របស់​អាជ្ញាធរ និង​តុលាការ និង​ចាត់​ទុក​ថា នេះ​ជា​ការ​បំភ្លៃ​សាច់រឿង។ លោក សម រង្ស៊ី បកស្រាយ​ថា កិច្ច​ព្រមព្រៀង​នេះ​មិន​មែន​ជា​ការ​កាត់​ទឹកដី​ខ្មែរ​ទៅ​ឱ្យ​ក្រុម​ជនជាតិ​ដើម​ភាគតិច​ម៉ុងតាញ៉ា​នោះ​ទេ ប៉ុន្តែ​គ្រាន់​តែ​ជា​ការ​ទទួល​ស្គាល់ និង​គោរព​សិទ្ធិ​ជនជាតិ​ដើម​ភាគតិច​មួយ​ចំនួន​រស់នៅ​ភាគ​ឦសាន ស្រប​ទៅ​តាម​រដ្ឋធម្មនុញ្ញ និង​ច្បាប់​អន្តរជាតិ​នានា​ដែល​កម្ពុជា​បាន​ផ្ដល់​សច្ចាប័ន​តែ​ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment