ព័ត៌មានជាតិ
លោក សូត សុខប្រាថ្នា | ០៨ តុលា ២០២២ | ម៉ោង ២១:០៨
VOD

នៅទីស្តីការក្រសួងកសិកម្ម រុក្ខាប្រមាញ់ និងនេសាទ ថ្ងៃទី២០ ខែកញ្ញា ឆ្នាំ២០២១ លោក វេង សាខុន រដ្ឋមន្ត្រីក្រសួងកសិកម្ម ដឹកនាំកិច្ចប្រជុំដើម្បីពិភាក្សាពាក់ព័ន្ធការអនុវត្តច្បាប់ស្តីពី “សុខភាពសត្វ និងផលិតកម្មសត្វ” និងលិខិតបទដ្ឋានគតិយុត្តក្រោមច្បាប់ និងជាពិសេសធ្វើការពិនិត្យពិចារណាលើខ្លឹមសារនៃច្បាប់ បើចាំបាច់ត្រូវធ្វើវិសោធនកម្មលើមាត្រាមួយចំនួននៃច្បាប់ទៀតផង។ (ហ្វេសប៊ុក៖ Sakhon Veng)

ព្រះមហាក្សត្រខ្មែរ បានបញ្ចប់មុខតំណែងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ហើយរដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុនីរ័ត្ន ត្រូវបានតែងតាំងជារដ្ឋមន្ត្រីស្តីទីនៃក្រសួងកសិកម្ម​រហូតដល់មានការតែងតាំងរដ្ឋមន្ត្រីក្រសួងនេះជាផ្លូវការ។

​ព្រះមហាក្សត្រខ្មែរ ​  ព្រះករុណា សម្តេច ព្រះបាទ ព្រះបរមនាថ នរោត្តម សីហមុនី ​នៅថ្ងៃទី៨ ខែតុលា ឆ្នាំ២០២២នេះ បានចេញព្រះរាជក្រឹត្យបញ្ចប់មុខតំណែង លោក​ វេង សាខុន ពីរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ហើយនាយករដ្ឋមន្ត្រី ហ៊ុន សែន ត្រូវទទួលបន្ទុកអនុវត្តព្រះរាជក្រឹត្យនេះចាប់ពីពេលឡាយព្រះហស្ថលេខាតទៅ។ ​

ក្រោយបញ្ចប់តំណែងរដ្ឋមន្ត្រីក្រសួងកសិម្មភ្លាម លោកនាយករដ្ឋមន្ត្រី ហ៊ុន សែន បានចេញសេចក្តីសម្រេចមួយនៅថ្ងៃសៅរ៍នេះដែរ  ដោយចាត់តាំងឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ជារដ្ឋមន្ត្រីស្តីទីនៃក្រសួងកសិកម្ម រុក្ខាប្រមាញ់ និងនេសាទ បន្ថែមលើមុខងារបច្ចុប្បន្ន រហូតដល់មានការតែងតាំងរដ្ឋមន្ត្រីក្រសួងកសិកម្មថ្មីជាផ្លូវការ។

សេចក្តីសម្រេច​បន្ថែមថា រដ្ឋមន្ត្រីស្តីទីនៃក្រសួងកសិកម្ម រុក្ខាប្រមាញ់ និងនេសាទ ដែលទទួលបានការចាត់តាំងនេះ ត្រូវប្រើប្រាស់សិទ្ធិអំណាចទាំងអស់ស្របតាមច្បាប់ និងលិខិតបទដ្ឋានគតិយុត្តជាធរមាន ដើម្បីដឹកនាំ និងគ្រប់គ្រង ការងាររបស់ក្រសួង អង្គភាពចំណុះរបស់ក្រសួង ព្រមទាំងមន្ដ្រីរាជការ និងបុគ្គលិកដែលជាភ្នាក់ងាររដ្ឋបាល នៅក្រោមឱវាទរបស់ខ្លួន។

ការបញ្ចប់មុខតំណែង​ លោក វេង សាខុន ធ្វើឡើង ប្រមាណ៨ខែក្រោយពេលដែលលោកធ្លាប់ត្រូវបានលោក​ ហ៊ុន សែន ស្តីបន្ទោសខ្លាំងៗ ថាជារដ្ឋមន្ត្រីដែលមិនចេះសហការជាមួយ​មន្ត្រីដទៃ។ បន្ថែមពីនេះ លោក ហ៊ុន សែន ក៏ធ្លាប់ព្រលយម្តងរួចមកហើយនៅមុខ លោក វេង សាខុន ចំពោះការដករដ្ឋមន្ត្រីណាមួយចេញពីតំណែង ដោយថាលោកត្រូវការពេលត្រឹមតែ ២៤ម៉ោងប៉ុណ្ណោះ។

ថ្លែងក្នុងពិធីបិទសន្និបាតបូកសរុបការងារឆ្នាំចាស់ និងលើកទិសដៅការងារឆ្នាំថ្មីរបស់ក្រសួងមហាផ្ទៃកាលពី ​ថ្ងៃទី២៣ ខែកុម្ភៈ​ ឆ្នាំ២០២២ លោកនាយករដ្ឋមន្ត្រី ហ៊ុន​ សែន បានស្ដីបន្ទោសរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ថាជារដ្ឋមន្ត្រីដែលធ្វើការងារមិនចេះសហការជាមួយមន្ត្រី​ដទៃ។

លោក​លើកឡើងថា កាលមិនព្រមទៅចូលរួមកិច្ចប្រជុំរបស់រដ្ឋមន្រ្តីកសិកម្ម​តាមការអញ្ជើញរបស់ក្រសួងសេដ្ឋកិច្ច និងហិរញ្ញវត្ថុពាក់ព័ន្ធបញ្ហាតម្លៃជ្រូកពេលនោះ ជាហេតុធ្វើឱ្យសាច់ជ្រូកឡើងថ្លៃ ដោយសាររដ្ឋមន្ត្រីកសិកម្មរូបនេះបានផ្អាកការនាំសាច់​កនិងជ្រូករស់ចូលពីប្រទេសជិតខាង ធ្វើឱ្យជ្រូករបស់កសិករក្នុងស្រុកមានតម្លៃ។

ក្រៅពីស្តីបន្ទោស លោក ហ៊ុន សែន បានហៅលោក វេង សាខុន ថាជារដ្ឋមន្ត្រី ជិះសេះគយគន់ផ្កា ថែមទៀតផង។ ​

យ៉ាងណា ក្នុងពេលស្តីបន្ទោសនោះ ក៏ឃើញមានការឆ្លងតបពីលោក វេង សាខុន ទៅកាន់នាយករដ្ឋមន្ត្រីវិញ ដោយលោកបានប្រាប់ថា ការផ្អាកនាំសាច់ និងជ្រូករស់ចូលពីប្រទេសជិតខាងនោះ ដោយសារកម្ពុជាមានលទ្ធភាពគ្រប់គ្រាន់ក្នុងការផ្គត់ផ្គង់សាច់នៅលើទីផ្សារ។  

ការបញ្ចប់តំណែងពេលនេះ ស្របពេលលោក វេង សាខុន ទើបត្រឡប់ពី​បំពេញបេសកកម្មការងារនៅអឺរ៉ុបមួយសប្តាហ៍ ទាក់ទងទៅនឹងការពង្រឹងសុវត្ថិភាពស្បៀងជាសកល និងការស្វះស្វែងរកការគាំទ្រគម្រោងពង្រឹង ការផលិតផលកសិកម្មប្រកបដោយសុវត្ថិភាពស្របតា​មស្តង់ដាអឺរ៉ុបនៅកម្ពុជា។

ហ្វេសប៊ុក លោក វេង សាខុន (Sakhon Veng) នៅរសៀលថ្ងៃសៅរ៍នេះ បានបង្ហោះរូបលោកនិងភរិយា ដោយសរសេរថា លោកនិងសហការីបានវិលត្រឡប់មកដល់ប្រទេសថៃនៅវេលាម៉ោង ២និង៣០នាទី ហើយកំពុងរង់ចាំចេញដំណើរត្រឡប់មកកម្ពុជា នៅវេលាម៉ោង ៤និង៣០នាទី៕  ​

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។