វៀតណាមស្នើកម្ពុជាបង្កើនការផ្តល់បណ្ណស្របច្បាប់ដល់ពលរដ្ឋខ្លួន ខណៈភាគីកម្ពុជាធានាថាមិនមានការរើសអើង

កម្ពុជា-នយោបាយ
20/11/2022 – 08:30
ដោយ៖ ជួប នរក្សា
RFI

ជំនួបរវាងប្រធានរដ្ឋសភាប្រទេសកម្ពុជា និងវៀតណាម Sor Sovann


ជា​ថ្មី​ម្តង​ទៀត​ វៀត​ណាម​បាន​ស្នើ​កម្ពុជា​ឲ្យ​បង្កើន​ការ​ផ្តល់​បណ្ណ​ស្នាក់​នៅ​ស្រប​ច្បាប់​ដល់​ប្រជាពលរដ្ឋ​ខ្លួន​ ដែល​កំពុង​រស់​នៅ​កម្ពុជា។​ ជា​ការ​ស្នើ ​ដែល​ធ្វើ​ឡើង​តាម​រយៈ​ប្រធាន​រដ្ឋសភា​វៀតណាម ​នៅ​ក្នុង​ជំនួប​ទ្វេ​ភាគី​ជា​មួយ​កម្ពុជា ​មុន​ពេល​កិច្ច​ប្រជុំ​អន្តរសភា​អាស៊ាន​ ដែល​ត្រូវ​រៀប​ចំ​ឡើង​នៅ​ទី​ក្រុង​ភ្នំពេញ។​ ជា​ការ​ឆ្លើយ​តប​ ភាគី​កម្ពុជា​បាន​អះអាង​ពី​ការ​ធានា​ការ​សិទ្ធិ​ និង​មិន​មាន​ការ​រើស​អើង​ចំពោះ​ប្រជាពលរដ្ឋ​វៀតណាម។​

មិនខុសពីរាល់ដងឡើយ សម្រាប់ជំនួបទ្វេភាគីនៃថ្នាក់ដឹកនាំវៀតណាមនិងកម្ពុជា។ ជាក់ស្តែងនៅក្នុងជំនួបរវាងប្រធានរដ្ឋសភាប្រទេសទាំងពីរ កាលពីថ្ងៃទី១៩វិច្ឆិកា គឺលោក Vuong Dinh Hue ប្រធានរដ្ឋសភាវៀតណាម បានស្នើនៅចំពោះមុខលោក ហេង សំរិន ប្រធានរដ្ឋសភាកម្ពុជា ក្នុងការបង្កើតលក្ខខណ្ឌអំណោយផលបន្ថែមទៀត សម្រាប់ប្រជាពលរដ្ឋវៀតណាម ដែលកំពុងរស់នៅលើទឹកដីកម្ពុជា។ ការធ្វើបែបនេះ គឺដើម្បីផ្តល់ភាពងាយស្រួល ដល់ពលរដ្ឋវៀតណាមឲ្យរស់នៅដោយភាពស្របច្បាប់ និងសម្រួលដល់បញ្ហាជីវភាព។

យ៉ាងណា ភាគីវៀតណាមក៏បានអរគុណកម្ពុជា នៅចំពោះមុខនៃការជួយសង្រ្គោះពលរដ្ឋរបស់ខ្លួន ពីការឆបោក ដែលជាករណីកំពុងកើតមាននៅក្នុងប្រទេសកម្ពុជា។ បើតាមលោក Vuong Dinh Hue គឺវៀតណាមសង្ឃឹមថា ភាគីកម្ពុជានឹងប្រឹងប្រែងបង្រ្កាបបទល្មើសនេះបន្តទៀត ដើម្បីអាចឲ្យប្រជាពលរដ្ឋវៀតណាមត្រលប់ទៅប្រទេសរបស់ខ្លួនវិញ។

នៅចំពោះមុខនៃបញ្ហាទាំងនេះ លោក ហេង សំរិន ប្រធានរដ្ឋសភា គូសបញ្ជាក់ថា កម្ពុជានឹងធានាការពារសិទ្ធិ និងមិនមានការរើសអើងណាមួយឡើយ ចំពោះប្រជាពលរដ្ឋវៀតណាម រួមទាំងអ្នកវិនិយោគដែលកំពុងធ្វើការនៅកម្ពុជា។

គួររំលឹកថា ក្រសួងមហាផ្ទៃកម្ពុជា កាលពីចុងខែសីហាកន្លងទៅនេះ បានរំលឹកជាថ្មីអំពីការទទួលស្គាល់បណ្ណស្នាក់នៅស្របច្បាប់នៃជនអន្តោប្រវេសន៍នៅកម្ពុជា។ ជាការរំលឹកឡើងវិញ ដ្បិតក្រសួងមហាផ្ទៃសង្កេតឃើញថា ស្ថាប័នរដ្ឋមួយចំនួន មិនអើពើអំពីការផ្តល់សេវារដ្ឋបាលនានា ដល់ជនអន្តោប្រវេសន៍ ដែលផ្ទុយពីច្បាប់អន្តោប្រវេសន៍កម្ពុជា ឆ្នាំ១៩៩៤។

តែយ៉ាងណា ការធ្វើបែបនេះ ត្រូវបានក្រុមមន្រ្តីបក្សប្រឆាំងចាត់ទុកថា ជាការធ្វើឲ្យអន្តរាយដល់សង្គមខ្មែរ ជាពិសេសគឺការផ្តល់ភាពស្របច្បាប់ក្នុងការរស់នៅដល់ប្រជាពលរដ្ឋវៀតណាម។

សូមបញ្ជាក់ថា គិត​មក​ដល់​ពេល​នេះ អាជ្ញាធរ​កម្ពុជា​បាន​សម្រួល​ផ្តល់​បណ្ណស្នាក់​នៅ​ដល់​ជន​អន្តោប្រវេសន៍​ យ៉ាង​តិច​៦ម៉ឺន​នាក់ ដែល​មាន​អាយុ១៨​ឡើង​ទៅ ខណៈ​ដែល​មាន​ជន​អន្តោប្រវេសន៍​ប្រមាណ​ជាង​១ម៉ឺននាក់​ កំពុងស្នាក់​នៅ​ក្នុងប្រទេស​កម្ពុជា ដោយ​ខុស​ច្បាប់ មិន​បាន​ធ្វើ​លិខិត​សុំ​បណ្ណ​ស្នាក់​នៅ​៕

What Next?

Recent Articles

2 Responses to "វៀតណាមស្នើកម្ពុជាបង្កើនការផ្តល់បណ្ណស្របច្បាប់ដល់ពលរដ្ឋខ្លួន ខណៈភាគីកម្ពុជាធានាថាមិនមានការរើសអើង"

  1. Anonymous says:

    the century of SDACH PEAL this nation can be over on the UNITED ENDOCHEN of Vietcong

  2. Anonymous says:

    the highest educated HENG SAMRIN will fulfill VIETCONG dream in UNITED ENDOCHEN . Cambodian have to win the election in2023 if not the CPP of VEITCONG will take over after election .

Leave a Reply

Submit Comment