មន្ត្រី​សង្គម​ស៊ីវិល​ និង​យុវជន​ទទូច​ឱ្យ​អាជ្ញាធរ​ស្វែង​រក​យុត្តិធម៌​ជូន​អតីត​សកម្មជន​បក្ស​សង្រ្គោះជាតិ​លោក​ ស៊ិន ខុន

ដោយ នៅ វណ្ណារិន
2022.11.21
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

មន្ត្រី​សង្គម​ស៊ីវិល​ និង​យុវជន​ទទូច​ឱ្យ​អាជ្ញាធរ​ស្វែង​រក​យុត្តិធម៌​ជូន​អតីត​សកម្មជន​បក្ស​សង្រ្គោះជាតិ​លោក​ ស៊ិន ខុន

សព​របស់​លោក ស៊ិន ខុន គ្របក្រណាត់​សរ​តម្កល់​នៅ​វត្តចាស់ ស្ថិតនៅ​សង្កាត់ជ្រោយចង្វារ មុនពេល​ដឹកតាម​រថយន្តពេទ្យ​យក​ទៅ​ធ្វើបុណ្យនៅ​ឯ​ស្រុកកំណើត​ ស្ថិតនៅក្នុង​ស្រុកព្រៃ​កប្បាស ខេត្តតាកែវ កាលពី​ថ្ងៃ​​ទី​​២១ ខែវិច្ឆិកា ឆ្នាំ២០២១។ រូប៖ ពលរដ្ឋ​ផ្ដល់​ឲ្យ


អង្គការសង្គមស៊ីវិល ​និង​យុវជន​ទទូច​ដល់​អាជ្ញាធរ​ពាក់ព័ន្ធ​ឱ្យស្វែង​រក​យុត្តិធម៌​ជូន​អតីត​សកម្មជន​បក្ស​សង្រ្គោះជាតិ​ដែល​បាន​ស្លាប់​អស់​រយៈ​ពេល​១ឆ្នាំ​ ខណៈ​ដែល​ពេល​នេះ​នៅ​មិន​ទាន់​រក​ឃើញ​មុខ​ឃាត់​ករ​ពិត​ប្រាកដ​នៅ​ឡើយ។​ ពួក​គេ​ថា ​បើសិន​ជា​អាជ្ញាធរ​មិន​ស្រាវជ្រាវ​រក​ឃាតករ​ពិតមក​ផ្ដន្ទាទោស​តាម​ច្បាប់​ទេ​នោះ​ ​កាន់​តែ​បង្ហាញ​ថា​ ឃាត់​កម្ម​នេះ​ជា​រឿង​នយោបាយ​ជា​ជាង​គំ​នុំ​បុគ្គល។​

សកម្មជន​បក្ស​សង្គ្រោះ​ជាតិ​លោក​ ស៊ិន ខុន ​ត្រូវ​បាន​ជន​មិន​ស្គាល់​មុខ​កាប់​ត្រូវ​ជា​ច្រើន​កាំបិត​នៅ​លើ​ដងខ្លួន ​និង​ដាច់ជើង​មួយ​ចំហៀង​ត្រឹម​ភ្លៅ​រហូត​ដល់​ស្លាប់​ នៅ​មាត់​ទន្លេ​ក្បែរ​វត្ត​ចាស់​ សង្កាត់​ជ្រោយ​ចង្វា​ ខណ្ឌ​ជ្រោយចង្វា ​រាជធានី​ភ្នំពេញ​ កាល​ពី​វេលា​ម៉ោង១​យប់​ ឈាន​ចូលថ្ងៃទី២១​ ខែ​វិច្ឆិកា​ឆ្នាំ​២០២១។​

ការ​ទទូច​របស់​សង្គម​ស៊ីវិល​ និង​យុវជន​ឱ្យ​អាជ្ញាធរ​ពាក់ព័ន្ធ​ស្វែង​រក​យុត្តិធម៌​ជូន​ដល់​អតីត​សកម្មជន​នយោបាយ​រូប​នេះ​ ធ្វើ​ឡើង​គម្រប់​ខូប​១ឆ្នាំ​នៃ​ការ​ស្លាប់​របស់​លោក​ ស៊ិន ខុន។ ​មកដល់​ពេល​នេះ ​អាជ្ញាធរ​បាន​ហៅ​មនុស្ស​តែ​ម្នាក់ប៉ុណ្ណោះ មកសាក​សួរ​ពាក់ព័ន្ធ​ឃាត់​កម្ម​នេះ​ គឺ​ឈ្មោះ​សៀង ឆរ័ត្ន ​ដែល​អះអាង​ថា​រូប​គេ​កាប់​លោក​ ស៊ិន ខុន​ មកពី​បញ្ហា​គំនុំ​ផ្ទាល់ខ្លួន។​

ជុំវិញ​ចម្លើយ​សារភាព​ បូករួម​ទាំង​ទឹក​មុខ​គ្មាន​ការ​តក់ស្លុត​របស់​ជន​សង្ស័យ​និង​ការ​សួរ​ចម្លើយ​ជនសង្ស័យ​នៅ​បន្ទប់​ដែល​មាន​ការ​រៀបចំ​យ៉ាង​ស្អាតបាត​នោះ​ ពលរដ្ឋ​និង​សង្គម​ស៊ីវិល​ នៅ​មានមន្ទិល​សង្ស័យ​ថា​ នេះ​គ្រាន់តែ​ជា​ឆាក​ល្ខោន ​ព្រោះ​ពួក​គាត់​យល់​ថា​ ករណី​នេះ​ពាក់ព័ន្ធ​នឹង​រឿង​នយោបាយ​ច្រើន​ជាង។​

ប្រធាន​សមាគម​ការពារ​សិទ្ធិ​មនុស្ស​ ​និង​អភិវឌ្ឍន៍​នៅ​កម្ពុជា​ ហៅ​កាត់​ថា អាដហុក​ (ADHOC)​ លោក​ ​នី សុខា​ ​ប្រាប់​វិទ្យុ​អាស៊ីសេរី​នៅ​ថ្ងៃទី២១​ ខែ​វិច្ឆិកា​នេះ​ថា ករណី​នេះ​ជា​រឿង​មួយ​ដែល​មាន​ការ​សង្ស័យ​ច្រើន​ដូច្នេះ ​លោក​ថា​តុលាការ​គួរ​តែ​មាន​ភស្តុតាង​ ឱ្យ​បាន​គ្រប់​ជ្រុង​ដើម្បី​ឈាន​ទៅ​ដល់​ការ​បើក​សវនាការ។ ​លោក​បន្ត​ថា​បើ​សិន​ជា​តុលាការ​នៅ​តែ​បង្ហាញ​ភស្តុតាង​មិន​គ្រប់​​ជ្រុងជ្រោយ​បែប​នេះ​ធ្វើ​ឱ្យ​សាធារណៈ​ជន​រិះ​កាន់​កាន់​តែ​ខ្លាំង៖

«ដើម្បី​ឱ្យ​មាន​ការ​ជឿជាក់​ពី​មហាជន​ គឺ​មាន​តែ​តុលាការ​ទេ​ ដែល​ត្រូវតែ​ធ្វើ​សវនាការ​ដែល​មាន​ការ​បង្ហាញ​ភស្តុតាង​ឱ្យ​បាន​គ្រប់​គ្រាន់​សព្វ​ជ្រុងជ្រោយ​ ដើម្បី​ឱ្យ​គេ​មាន​ការ​ជឿ​ជាក់។​ ហើយ​បើ​មិន​អ៊ីចឹង​ទេ​គឺ​ថា​មន្ទិល​សង្ស័យ​គឺ​នៅ​តែ​មាន​រហូត​ មិន​ខុស​ពី​រឿង​ផ្សេងៗ​​មួយ​ចំនួន​ទៀត​ ​ទាក់ទង​ទៅ​នឹង​ការ​សម្លាប់​ទៅលើ​សកម្មជន​សង្គម​ ទៅ​លើ​អ្នក​ការពារ​បរិស្ថាន​ ​ការពារ​អី​កន្លងៗ​មក​នោះ​ទេ។​ ប្រសិន​ជា​តុលាការ​មិន​មាន​ជា​ភស្តុតាង​អី​ជា​ការ​បញ្ជាក់​នៅ​ក្នុង​សវនាការ​ឱ្យ​បាន​ត្រឹមត្រូវ​ ​នឹង​មាន​ការ​ជឿជាក់​ពី​មហា​ជន​នោះ»

ស្រដៀង​គ្នា​នេះ​ សកម្មជន​សិទ្ធិ​មនុស្ស​នៃ​សមាគម​និស្សិត​បញ្ញវន្ត​ខ្មែរ​ ​កញ្ញា​ សូរ មេត្តា​ មើល​ឃើញ​ថា​ឃាតកម្ម​មក​លើ ​អតីត​សកម្មជន​បក្ស​សង្រ្គោះ​ជាតិ​នេះ​ ​មិនមែន​ជា​រឿង​ថ្មី​នោះ​ទេ​ ហើយ​កន្លង​មក​មាន​សកម្មជន​ជា​ច្រើន​ត្រូវ​បាន​ធ្វើ​ឃាត​ ប៉ុន្តែ​មិន​ទាន់​ទទួល​បាន​យុត្តិធម៌​ជូន​ពួក​គេ​នៅ​ឡើយ។​ ​​កញ្ញា​ ទទូច​ឱ្យ​អាជ្ញាធរ​បង្ហាញ​ការ​ស៊ើប​អង្កេត​មួយ​ដែល​​មាន​ភាព​យុត្តិធម៌​ជូន​ដល់​សាច់ញាតិ​ជន​រង​គ្រោះ​ឱ្យ​បាន​ឆាប់ៗ៖

«បញ្ឈប់​រាល់​អំពើ​និទណ្ឌភាព​ កុំ​បន្តទៀត!​ ហើយ​មាន​បញ្ហា​អី​យើង​​ជជែក​ យើង​ដោះស្រាយ​ទៅ​ បញ្ឈប់​រាល់​ការ​គំរាម​កំហែង​ ធ្វើ​ទុក្ខ​បុកម្និញ​ ប៉ុនប៉ង​សម្លាប់​ទៀត។​ ព្រោះ​យើង​ជាខ្មែរ​ដូចគ្នា​ យើង​មាន​រឿង​អី​យើង​ត្រូវ​ជជែក​តទល់​នឹង​គ្នា ​ដោះ​ស្រាយ​នឹង​គ្នា។​ យើង​មិន​អាច​ទៅ​ប្រើ​អំពើ​ហិង្សា​ដាក់​លើ​ប្រជា​ពលរដ្ឋ​ដែល​ហ៊ាន​ចេញ​សម្ដែង​មតិ​​​ដែល​ហ៊ាន​ចេញ​ការពារ​ពល​រដ្ឋ​ ការពារ​ប្រយោជន៍​ពលរដ្ឋ​ទេ!​ វា​ជា​រឿង​ដ៏​អាក្រក់​មួយ​ បើ​យើង​មិន​លប់​បំបាត់​វា​ចោល​វា​នឹង​នៅ​តែ​កើត​ឡើង​បន្ត​បន្ទាប់​ទៀត»

វិទ្យុ​អាស៊ីសេរី​មិនអាច​ទាក់​ទង​អ្នក​នាំពាក្យ​កង​រាជ​អាវុធហត្ថ​លើ​ផ្ទៃ​ប្រទេស​លោក ​អេង ហ៊ី​ ​អ្នក​នាំពាក្យ​ស្នង​ការ​ដ្ឋាន​នគរបាល​រាជធានី​ភ្នំពេញ​លោក​ សាន សុខសីហា ​និង​អ្នក​នាំពាក្យ​ក្រសួង​យុត្តិធម៌​ លោក​ ជិន ម៉ាលីន​ ​ដើម្បី​សាក​សួរ​រឿង​នេះ​បាន​ទេ ​នៅ​ថ្ងៃ​ទី​២១​ ខែវិច្ឆិកា។​

លោក​ ស៊ិន ខុន​ មាន​អាយុ ​៣១ឆ្នាំ ​គឺ​ជា​យុវជន​បក្ស​សង្គ្រោះជាតិ​ខណ្ឌ​ជ្រោយ​ចង្វា រាជធានី​ភ្នំពេញ។​ កាល​នៅ​មានជីវិត​ លោក​តែង​បញ្ចេញ​មតិ​រិះគន់​រដ្ឋាភិបាល​ និង​ភាព​អយុត្តិធម៌​សង្គម​លើ​បណ្ដាញ​សង្គម​ហ្វេស​ប៊ុក​ជា​ហូរហែ​ ​រហូត​ដល់​ត្រូវ​បាន​គេ​គំរាម​កំហែង​ និង​វាយ​ឱ្យ​របួស​ធ្ងន់ធ្ងរ​រួច​ម្ដង​រួច​ទៅ​ហើយ។​ ទោះ​ជា​រង​ការវាយ​ដំ​យ៉ាង​ណា​ក៏​ដោយ​ លោក​នៅ​តែ​រក្សា​ជំហរ​នយោបាយ​គាំទ្រ​គណបក្ស​សង្គ្រោះ​ជាតិ​ បញ្ចេញ​មតិ​រិះគន់​បញ្ហា​នា​នា​ និង​ចូលរួម​ទាមទារ​ឱ្យ​មាន​យុត្តិធម៌​សង្គម​ដដែល​ រហូត​ដល់​ថ្ងៃ​ឃាត​ក​កាប់​សម្លាប់​លោក​រហូត​ដល់​ស្លាប់​ក្នុង​ថ្លុក​ឈាម។​

អ្នក​រាយការណ៍​ពិសេស​របស់​អង្គកា​រសហ​ប្រជាជាតិ​ទទួល​បន្ទុក​ផ្នែក​សិទ្ធិ​មនុស្ស​ប្រចាំ​កម្ពុជា​លោក​ វិទិត មុនតាប៊ន (Vitit Muntarbhorn) កាល​ពី​ថ្ងៃទី​១០​ ខែ​កុម្ភៈ​ បាន​ស្នើ​ដល់​រដ្ឋា​ភិបាល​កម្ពុជា​បំភ្លឺ​ ​និង​ផ្តល់​ព័ត៌មាន​បន្ថែម​ជុំវិញ​ករណី​ឃាតកម្ម​ដ៏​ព្រៃផ្សៃ​នេះ។​  លោក​បន្ត​ថា​ហេតុផល​របស់​ជន​សង្ស័យ​ម្នាក់​ដែល​ត្រូវ​បាន​ចោទ​ប្រកាន់​ ហាក់​មិន​មាន​ភាព​ស្របគ្នា​ទៅ​នឹង​ជន​រង​គ្រោះ​ ដូច្នេះ​តុលាការ​គួរ​តែ​ស៊ើប​អង្កេត​ឱ្យ​មាន​តម្លា​ និង​ឯករាជ្យ​ពិត​ប្រាកដ។​

បច្ចុប្បន្ន​គេ​សង្កេត​ឃើញ​ថា​សកម្មភាព​ប្រើ​អំពើ​ហិង្សា​បាន​កើត​ឡើង​ខ្លាំង​ ​ហើយ​ថ្មីៗ​នេះ​ ​អនុប្រធាន​ក្រុម​ការងារ​គណ​បក្ស​ភ្លើង​ទៀន​ ខណ្ឌ​ពោធិ៍​សែន​ជ័យ​ លោក​ ​លន់ ពង្សធិរិទ្ធ​ ត្រូវ​បាន​ក្រុម​ជន​ល្មើស​ជិះ​ម៉ូតូ​វាយ​ត្រង់​ក្បាល​ឱ្យ​របួស​ធ្ងន់​ ​នៅ​ក្បែរ​ទី​ស្នាក់​ការ​គណបក្ស​ភ្លើងទៀន​ ពេល​លោក​ជិះ​ម៉ូតូ​ទៅ​ចូល​រួម​ប្រជុំ​គណ​បក្ស។​ គិត​​មក​​ដល់​​ពេល​​នេះ​ ​យ៉ាង​ហោច​ណាស់​មាន​​សកម្មជន​​សង្គម​​និង​​គណបក្ស​នយោបាយ​​ប្រមាណ​ ៤០​នាក់​​ហើយ​ ដែល​​ត្រូវ​​ជន​​មិន​​ស្គាល់​​មុខ​​បង្ក​​ហិង្សា​​បណ្តាល​​ឲ្យ​​របួស​​ធ្ងន់ធ្ងរ ​ហើយ​​ជន​រង​គ្រោះ​​ខ្លះ​​បាន​​ស្លាប់​ និង​​ធ្លាក់​ខ្លួន​​ពិការ​​អស់​​មួយ​​ជីវិត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

One Response to "មន្ត្រី​សង្គម​ស៊ីវិល​ និង​យុវជន​ទទូច​ឱ្យ​អាជ្ញាធរ​ស្វែង​រក​យុត្តិធម៌​ជូន​អតីត​សកម្មជន​បក្ស​សង្រ្គោះជាតិ​លោក​ ស៊ិន ខុន"

  1. Anonymous says:

    in HUN SEN regime you will never can find the real killer come to face justice

Leave a Reply

Submit Comment