កម្ពុជា-នយោបាយ
24/11/2022 – 07:01
ដោយ៖ ជួប នរក្សា
RFI

កំពង់ផែរាម AP – Heng Sinith

លោក ទៀ បាញ់ ​រដ្ឋមន្ត្រី​ក្រសួង​ការពារជាតិ​កម្ពុជា​ បាន​ចេញ​មុខ​មក​គូស​បញ្ជាក់​បញ្ហា​កំពង់ផែរាម​ ជាថ្មី​ប្រាប់​ដល់​ភាគីសហរដ្ឋអាមេរិក​ ថា ​អាមេរិក​កុំខ្វល់​រឿង​កំពង់ផែរាម​ពេក​ តែសុំ​ទៅខ្វល់រឿង​ផ្សេងចុះ។ ​ការ​ចេញ​មក​បញ្ជាក់ ​ម្តងនេះ ​ធ្វើឡើង​នៅចំពោះ​រដ្ឋមន្ត្រី​ក្រសួង​ការពារជាតិ​អាមេរិក​ នាអំឡុង​ពេលភាគី​អាមេរិក​ បាន​មក​ចូល​រួម​កិច្ច​ប្រជុំ​រដ្ឋមន្ត្រី​ការពារ​ជាតិ​អាស៊ាន ​ជាមួយ​បណ្តា​ប្រទេស​ជាដៃគូ​ កាលពី​ថ្ងៃទី២៣វិច្ឆិកា។​

នៅចំពោះមុខលោក Lloyd Austin រដ្ឋមន្ត្រីការពារជាតិអាមេរិក ក្នុងជំនួបទ្វេភាគីរវាងកម្ពុជា-អាមេរិក លោក ទៀ បាញ់ រដ្ឋមន្ត្រីក្រសួងការពារជាតិកម្ពុជា បានទទូចឲ្យអាមេរិកកុំខ្វល់ខ្វាយពីការអភិវឌ្ឍកំពង់ផែរាមខ្លាំងពេក។ ផ្ទុយមកវិញ អាមេរិកគួរមានកង្វល់របស់ខ្លួនទៅលើបញ្ហាផ្សេងៗទៀត ព្រោះកំពង់ផែរាមមានទំហំតូចមួយ ប្រហែលនឹងផែនេសាទប៉ុណ្ណោះ។ នេះបើតាមការបញ្ជាក់ពីលោក ទៀ បាញ់ នៅអំឡុងពេលធ្វើសន្និសីទព័ត៌មានស្តីពីលទ្ធផលនៃកិច្ចប្រជុំរដ្ឋមន្រ្តីការពារជាតិអាស៊ាន ដែលធ្វើឡើងនៅខេត្តសៀមរាប។

ការបញ្ជាក់របស់លោក ទៀ បាញ់ ជាការឆ្លើយតបទៅនឹងកង្វល់របស់រដ្ឋមន្ត្រីការពារជាតិអាមេរិក ដែលបានលើកយកបញ្ហាកំពង់ផែរាម ថាជាក្តីបារម្ភនៃសន្តិសុខក្នុងតំបន់។ បើតាមសេចក្តីប្រកាសរបស់ក្រសួងការពារជាតិអាមេរិក គឺលោក Lloyd Austin បានជំរុញឲ្យកម្ពុជាមានចំណាត់ការក្នុងការការពារអធិបតេយ្យខ្លួនឲ្យបានម៉ត់ចត់។ តែ លោក ទៀ បាញ់ បញ្ជាក់ថា គ្មាននោះឡើយនូវមូលដ្ឋានទ័ពបរទេសតាំងទីនៅកម្ពុជា ដែលផ្ទុយពីរដ្ឋធម្មនុញ្ញកម្ពុជា និងអធិបតេយ្យកម្ពុជាសុទ្ធសាធ។

មន្ទិលសង្ស័យរបស់អាមេរិកពីវត្តមាននៃកងទ័ពចិនលើទឹកដីមូលដ្ឋានទ័ពជើងទឹករាម កើតមានឡើងតាំងពីពេលដែលកម្ពុជាបានវាយកម្ទេចអាគារពីរខ្នង ដែលជាជំនួយរបស់អាមេរិក និងបានកសាងអាគារថ្មីៗជាបន្តបន្ទាប់ ក្រោមជំនួយរបស់ភាគីចិន។ តែយ៉ាងណា ប្រមុខមេទ័ពកម្ពុជា ថាការអភិវឌ្ឍនៅរាម មិនមានជាការគំរាមកំហែងសន្តិសុខអ្នកដទៃនោះទេ។ លោក ទៀ បាញ់ នៅតែចាត់ទុកថា ការចោទប្រកាន់របស់អាមេរិក ជារឿងមិនសមហេតុផល។

គួរកត់សម្គាល់ថា នេះមិនមែនជាលើកទី១នោះទេ ដែលបណ្តាថ្នាក់ដឹកនាំកម្ពុជាតែងតែឆ្លើយតប និងរុញច្រានការចោទប្រកាន់របស់អាមេរិក ទាក់ទងទៅនឹងការធ្វើទំនើបកម្មកំពង់ផែរាម។ យ៉ាងណានេះក្តី អ្នកតាមដានបញ្ហាភូមិសាស្ត្រនយោបាយ យល់ថា ការបញ្ជាក់របស់កម្ពុជារាល់ដងមកនោះ ហាក់មិនមានភាពច្បាស់លាស់។ មិនច្បាស់លាស់ ព្រោះដំណើរទស្សនកិច្ចទៅកំពង់រាមកន្លងមក ភាគីអាមេរិកត្រូវបានហាមឃាត់មិនឲ្យចូលទៅតំបន់មួយចំនួន។ បើតាមអ្នកវិភាគ គឺកម្ពុជាគួរតែបើកដំណើរទស្សនកិច្ចឲ្យទូលាយ ដើម្បីជម្រះមន្ទិលរបស់អាមេរិក។

សូមជម្រាបថា កម្ពុជាបានអនុញ្ញាតឲ្យអនុព័ន្ធយោធាអាមេរិក បានធ្វើដំណើរទស្សនកិច្ចខ្លីមួយនៅកំពង់ផែរាម កាលពីថ្ងៃទី១១មិថុនាឆ្នាំ២០២១។ ជាដំណើរទស្សនកិច្ច ដែលលោកនាយករដ្ឋមន្ត្រី ហ៊ុន សែន បានបើកភ្លើងខៀវ ក្រោយមានការទទូចដោយផ្ទាល់ពីអនុរដ្ឋមន្ត្រីការបរទេសអាមេរិក លោកស្រី Wendy Sherman។ ក៏ប៉ុន្តែភាគីអាមេរិក បានចាត់ទុកដំណើរទស្សនកិច្ចនោះ ថាមិនពេញលេញ ដ្បិតខ្លួនមិនអាចដើរមើលគ្រប់កន្លែង ហើយទាមទារការបំពេញទស្សនកិច្ចជាថ្មី។

តែមកដល់បច្ចុប្បន្ន សំណើនេះនៅតែគ្មានចម្លើយ ហើយប្រមុខរដ្ឋាភិបាល លោក ហ៊ុន សែន កាលពីថ្ងៃទី២ធ្នូ២០២១ បានប្រតិកម្មធ្ងន់ៗថា លោកនឹងបិទចោលលែងឲ្យមានការបំពេញទស្សនកិច្ចណាមួយនៅកំពង់ផែរាមទៀតឡើយ។ បើតាមលោក ហ៊ុន សែន កំពង់រាមមិនមានជាកន្លែងចោរលួចចោរប្លន់ ដែលចង់ឆែកឆេរស្រេចតែចិត្តនោះទេ៕