តុលាការពន្យល់ផ្លូវច្បាប់អំពីការចាប់ខ្លួនកញ្ញា ឈឹម ស៊ីថរ ខណៈប្រតិកម្មធ្លាក់មកជាបន្តបន្ទាប់

កម្ពុជា-សង្គម
30/11/2022 – 06:50
ដោយ៖ សេង​ បារាំង
RFI

កញ្ញា ឈឹម ស៊ីថរ ប្រធានសហជីពកម្មករណាហ្គាវើលដ៏ © FB


អ្នកនាំពាក្យ​អយ្យការ​អមសាលា​ដំបូង​រាជធានីភ្នំពេញ ​បាន​ចេញ​សេចក្ដី​ថ្លែងការណ៍​នៅថ្ងៃទី២៩​វិច្ឆិកា​ដោយ​បញ្ជាក់ថា​ មូល​ហេតុ​នាំឲ្យមាន​ការចាប់​ខ្លួនជាថ្មី​ កញ្ញា ឈឹម ស៊ីថរ​ ប្រធាន​សហជីព​កម្មករ​ណាហ្គាវើលដ៏ ​ដោយសារ​តែចាកចេញ​ពីប្រទេស​កម្ពុជា ​ដោយគ្មាន​ការ​អនុញ្ញាត​ពីចៅក្រម​ស៊ើបសួរ​ ដែល​អំពើនេះ​ គឺបាន​បំពាន​លើកាតព្វកិច្ច​នៃការ​ត្រួតពិនិត្យ​តាម​ផ្លូវតុលាការ​។ ប៉ុន្តែ​សម្រាប់​សង្គមស៊ីវិល​ និង​បណ្ដាប្រទេស​មួយចំនួន​ បាន​ចាត់​ទុកការ​ចាប់ខ្លួននេះ ​គឺជាការ​គំរាមគំហែង​ និង​ធ្វើទុក្ខ​បុកម្នេញ ​ក៏ដូចជា​ការ​បំភិត​បំភ័យ​លើ​មេ​ដឹកនាំ​សហជីព​ និង​អតីត​បុគ្គលិក​ណាហ្គាវើលដ៍​ដែល​កំពុង​ធ្វើការ​តវ៉ាទាមទារ​រកដំណោះស្រាយ​វិវាទការងារ។

អ្នកនាំពាក្យអយ្យការអមសាលាដំបូងរាជធានីភ្នំពេញ បានពន្យល់ថា ការចាប់ខ្លួនសារជាថ្មី កញ្ញា ឈឹម ស៊ីថរ បន្ទាប់ពីចៅ​ក្រមស៊ើបសួរសម្រេចដោះលែងឲ្យនៅក្រៅឃុំ កន្លងមក គឺចៅក្រមស៊ើបសួរបានប្រើប្រាស់វិធានការជំនួសមកវិញនូវដីកាសម្រេចដាក់ជនត្រូវចោទឲ្យស្ថិតនៅក្រោមកាតព្វកិច្ចនៃការត្រួតពិនិត្យតាមផ្លូវតុលាការ ដែលដីកាសម្រេចនេះ ជនត្រូវចោទត្រូវតែគោរពតាម និងអនុវត្តឲ្យបានម៉ឺងម៉ាត់។ បើយោងតាមមាត្រា ២៣០ នៃក្រមនីតិវិធីព្រហ្មទណ្ឌ បានចែងថា ប្រសិនបើជនត្រូវចោទបានគេចវេះដោយចេតនាពីកាតព្វ​ត្រួតពិនិត្យតាមផ្លូវតុលាការ ចៅក្រមស៊ើបសួរអាចសម្រេចឲ្យឃុំខ្លួនជនត្រូវចោទបណ្ដោះអាសន្នបាន។ នេះបើតាមអ្នកនាំពាក្យសាលាដំបូងភ្នំពេញ។

តែយ៉ាងណាការចាប់ខ្លួននេះ អ្នកខ្លះបានដាក់ជាចម្ងល់ថា ហេតុអ្វីបានជាអាជ្ញាធរមានសមត្ថកិច្ចមិនចាប់ខ្លួនកញ្ញា ឈឹម ស៊ីថរ នៅពេលដែលកំពុងចាកចេញពីកម្ពុជា បែរជាមកចាប់ខ្លួនបន្ទាប់ពីកញ្ញា ត្រឡប់មកពីក្រៅប្រទេសទៅវិញ?

ជុំវិញការចាប់ខ្លួនកញ្ញា ឈឹម ស៊ីថរនេះ ក្រុមអង្គការ សមាគម សហជីពនិង​សហគមន៍​ចំនួន ៦៩ស្ថាប័ន បាន​ចេញ​សេចក្ដីថ្លែងការណ៍​រួម​មួយ​ស្នើ​ដល់​តុលាការដោះលែង​ និងអំពាវនាវ​ដល់​រដ្ឋាភិបាល ឈប់​ភ័យខ្លាច​ និង​ស្នើ​ឲ្យ​បញ្ឈប់​ការប្រើប្រាស់​ប្រព័ន្ធ​តុលាការ បំភិតបំភ័យ​ប្រធាន និង​សមាជិក​សហជីព​តទៅ​​​​ទៀត​​​។ ជាមួយគ្នា គណបក្សភ្លើងទៀន កាលពីថ្ងៃទី២៧ ខែវិច្ឆិកា ក៏បានអំពាវនាវឲ្យមានការដោះលែង និងចាត់ទុកការចាប់ខ្លួនប្រធានសហជីពកម្មករណាហ្គាវើលដ៏ជាថ្មី គឺជាការគំរាមគំហែង និងធ្វើទុក្ខបុកម្នេញមកលើក្រុមកម្មករក្រុមហ៊ុនល្បែងកាស៊ីណូណាហ្គាវើលដ៏ផងដែរ។

ក្រៅពីសង្គមស៊ីវិល និងគណបក្សភ្លើងទៀន ក៏មានបណ្ដាប្រទេសមួយចំនួន បានចេញសេចក្ដីថ្លែការណ៍ព្រួយបារម្ភជុំវិញការចាប់ខ្លួនមេដឹកនាំសហជីពកម្មករណាហ្គាវើលដ៏ដែរ ក្នុងនោះមាន សហរដ្ឋអាមេរិក ប្រទេសអូស្រ្តាលីជាដើម។ ពួកគេបានស្នើឲ្យមានការដោះលែង និងបានអំពាវនាវឲ្យរដ្ឋាភិបាលកម្ពុជារក្សាកាតព្វកិច្ច និងការប្តេជ្ញាចិត្តលើសិទ្ធិការងាររបស់ខ្លួន និងសម្របសម្រួលដំណោះស្រាយរវាងណាហ្គាវើលដ៍ និងសហជីពកម្មករតំណាងឲ្យនិយោជិតដែលត្រូវបានបញ្ឈប់។

សូមបញ្ជាក់ថា សមត្ថកិច្ច​បាន​ឃាត់ខ្លួន​កញ្ញា ឈឹម ស៊ីថរ នៅ​ព្រលាន​យន្តហោះ​អន្តរជាតិ​ភ្នំពេញ​កាលពី​ថ្ងៃទី​២៦ ខែវិច្ឆិកា ​ក្រោយពេល​កញ្ញា​ត្រឡប់​ពី​ប្រទេស​អូស្ត្រាលី។ ការចាប់ខ្លួននេះ ជាលើកទី២ហើយ ដោយកាលពី​ខែ​មករា ប្រធាន​សហជីពរូបនេះ ត្រូវបានចាប់ខ្លួនដាក់ពន្ធនាគារ ខណៈ​ទៅមើល​ការ​តវ៉ា​ក្រុម​បុគ្គលិក​ដែល​ក្រុម​ហ៊ុន​ណាហ្គា​វើល​ដ៍​បញ្ឈប់ពីការងារ​​៕

What Next?

Recent Articles