លោក ទៀ បាញ់ ប្រើប្រាស់​ស្ថាប័ន​ការពារ​ជាតិ​ឃោសនា​រក​សំឡេង​ឆ្នោត​ឱ្យ​បក្ស​កាន់​អំណាច

ដោយ សុជីវី
2023.01.19
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

លោក ទៀ បាញ់ ប្រើប្រាស់​ស្ថាប័ន​ការពារ​ជាតិ​ឃោសនា​រក​សំឡេង​ឆ្នោត​ឱ្យ​បក្ស​កាន់​អំណាច

រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ (រូប​កណ្ដាល​កាត់ខ្សែបូរ) ជា​អធិបតី​ក្នុង​ពិធី​ខួប​លើក​ទី​៤៤ នៃ​ទិវា​ជ័យ​ជម្នះ ៧មករា នៅ​ខេត្ត​កោះកុង កាលពី​ថ្ងៃទី១៧ មករា ២០២៣។ រូប៖ ហ្វេសប៊ុក​លោក ទៀ បាញ់


ស្រប​ពេល​ដែល​ការបោះឆ្នោត​ជ្រើសរើស​តំណាងរាស្ត្រ​កាន់តែ​ខិតចូល​មកដល់ ហើយ​ការប្រកួតប្រជែង​នយោបាយ​កំពុងតែ​ឡើង​កម្ដៅ​នោះ ថ្នាក់​ដឹកនាំ​កំពូលៗ របស់​គណបក្ស​កាន់អំណាច ទំនង​បារម្ភ​ពី​ការ​ធ្លាក់​ចុះ​នៃ​សំឡេង​គាំទ្រ ទើប​មន្ត្រី​យោធា​ជាន់ខ្ពស់​ម្នាក់ បាន​ប្រើប្រាស់​ស្ថាប័ន​ការពារ​ជាតិ​ឃោសនា​រក​សំឡេង​គាំទ្រ​មុន​កាល​កំណត់។ មន្ត្រី​សង្គម​ស៊ីវិល លើកឡើង​ថា ការប្រើប្រាស់​ស្ថាប័ន​កងទ័ព​មក​បម្រើ​ឱ្យ​គណបក្ស​នយោបាយ​ណាមួយ​ជា​ទង្វើ​ខុសច្បាប់ និង​ជា​ការ​យក​ប្រៀប​ទៅ​ដៃគូ​ប្រកួតប្រជែង។

មិន​ខុស​ពី​លោក ហ៊ុន សែន ឡើយ រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ បាន​ប្រើប្រាស់​វេទិកា​សាធារណៈ អំពាវនាវ​ប្រជាពលរដ្ឋ​បោះឆ្នោត​ឱ្យ​គណបក្សប្រជាជន​កម្ពុជា ដើម្បី​ប្ដូរ​យក​សន្តិភាព ដែល​ជា​យីហោ​ឈាន​មុខ​គេ ប្រចាំ​គណបក្ស​កាន់អំណាច។

រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ ថ្លែង​នៅចំពោះមុខ​នាយទាហាន និង​ពល​ទាហាន​ជាច្រើន ក្នុង​ពិធី​ខួប​លើក​ទី​៤៤ នៃ​ទិវា​ជ័យ​ជម្នះ ៧មករា នៅ​ខេត្ត​កោះកុង​ថ្ងៃទី១៧ មករា ដោយ​ប្រើប្រាស់​វេទិកា​នេះ​រម្លឹក​គុណ​គណបក្ស​ប្រជាជន​កម្ពុជា ដែល​បាន​រំដោះ​កម្ពុជា​ឱ្យ​រួចផុត​ពី​របប​ខ្មែរក្រហម និង​លើក​សរសើរ​ថា ក្រោម​ការ​​​ដឹកនាំ​របស់​លោក ហ៊ុន សែន ទើប​កម្ពុជា​មាន​សន្តិភាព។ លោក​ថា ប្រជាពលរដ្ឋ​ត្រូវ​ថែរក្សា​សន្តិភាព​នេះ តាមរយៈ​ការបោះឆ្នោត​ឱ្យ​គណបក្សប្រជាជន​កម្ពុជា​នៅ​ថ្ងៃ​បោះឆ្នោត​ថ្នាក់​ជាតិ ខែ​កក្កដា ខាងមុខនេះ។

លោក ទៀ បាញ់៖ «ងាយ​បំផុត ការចូលរួម​ដោយ​ប្រសិទ្ធ​ភាព​បំផុត​នោះ​គឺ ដឹង​ហើយ​ថា​ថ្ងៃទី២៣ កក្កដា ខាងមុខនេះ​មាន​ការបោះឆ្នោត បើ​យើង​ថា​សុខកាយ​សុខចិត្ត​ទាំងអស់​គ្នា ទៅ​ចូលរួម​បោះឆ្នោត​ឱ្យ​គណបក្សប្រជាជន នោះ​ហើយ​ជា​ការ​រួមចំណែក​ថែរក្សា​នូវ​សុខ​សន្តិភាព​របស់​យើង​យ៉ាង​ពេញលេញ»។

កាល​ពី​ខែ​ធ្នូ ឆ្នាំ​២០១៧ ​លោក ហ៊ុន សែន បាន​ប្រកាស​ឱ្យ​កងទ័ព​ត្រូវតែ​អព្យាក្រឹត្យ តែ​ចំពោះ​គណបក្ស​នយោបាយ​តែប៉ុណ្ណោះ ប៉ុន្តែ​មិន​អាច​អព្យាក្រឹត្យ​ចំពោះ​រដ្ឋាភិបាល​ឡើយ ពីព្រោះ​កងទ័ព​បង្កើត​ឡើង​សម្រាប់​ការពារ​រាជរដ្ឋាភិបាល​ស្រប​ច្បាប់។ ទោះ​យ៉ាង​នេះ​ក្ដី ក៏​ក្នុង​ជួរ​កងទ័ព នាយទាហាន​ជាន់ខ្ពស់ ភាគច្រើន​សុទ្ធតែ​មាន​តួនាទី​ក្នុង​ជួរ​គណបក្សប្រជាជន​កម្ពុជា និង​ខ្លះ​ទៀត​ជា​កូនចៅ​របស់​លោក ហ៊ុន សែន រួម​មាន​លោក ហ៊ុន ម៉ាណែត ជាដើម។ ទន្ទឹមគ្នា​នេះ ក្រុម​នាយ​ទាហាន​ខ្លះ​ទៀត​ដែល​មាន​ភក្ដីភាព​ជាមួយ​គ្រួសារ​លោក ហ៊ុន សែន បាន​ធ្វើ​សច្ចាប្រណិធាន​ប្ដូរផ្ដាច់​ការពារ​គ្រួសារ​លោក ហ៊ុន សែន ផង​ដែរ។
ជុំវិញ​រឿង​នេះ អតីត​តំណាងរាស្ត្រ​គណបក្ស​សង្គ្រោះ​ជាតិ លោក អ៊ុំ សំអាន ប្រាប់​វិទ្យុ​អាស៊ីសេរី​នៅ​ថ្ងៃទី​១៨ មករា ថា ទោះបី​គណបក្ស​កាន់អំណាច​ចាញ់​ឆ្នោត កម្ពុជា​នៅតែ​មាន​សុខ​សន្តិភាព​ដែរ ព្រោះ​គណបក្ស​ដទៃ​ទៀត គ្មាន​គ្រឿង​សព្វាវុធ ឬ​គម្រោង​ធ្វើសង្គ្រាម​បង្ក​ចលាចល​នោះ​ឡើយ។ លោក​បន្ត​ថា ការ​យក​ស្ថាប័ន និង​ថវិកា​ជាតិ មក​បម្រើ​ឱ្យ​គណបក្ស​នយោបាយ​ឃោសនា​រក​សន្លឹកឆ្នោត ជា​ទង្វើ​ប្រាសចាក​ពី​ច្បាប់រដ្ឋធម្មនុញ្ញ និង​គោលការណ៍​អព្យាក្រឹត្យ។ លោក​ចាត់​ទុក​ទង្វើ​របស់​លោក ទៀ បាញ់ ថា ជា​ការ​យក​សង្គ្រាម​មក​គំរាម​ឱ្យ​ពលរដ្ឋ​បោះឆ្នោត​ឱ្យ​គណបក្ស​ប្រជាជន។

លោក អ៊ុំ សំអាន៖ «កាលណា​ស្ថាប័ន​ការពារ​ជាតិ លំអៀង​ទៅ​កាន់​គណបក្ស​នយោបាយ​ណាមួយ ឬ​លំអៀង​ទៅ​គណបក្ស​ប្រជាជន វា​ធ្វើ​ឱ្យ​បរិយាកាស​នៃ​ការ​បោះឆ្នោត​ហ្នឹង​មាន​ភាព​អាប់អួ អាច​បំភិតបំភ័យ​ប្រជាពលរដ្ឋ ប្រើ​កងទ័ព​ហ្នឹង​បំភិតបំភ័យ​ប្រជាពលរដ្ឋ​ឱ្យ​បោះឆ្នោត​ឱ្យ​គណបក្ស​ប្រជាជន​ជាដើម។ ដូច្នេះ​ធ្វើ​ឱ្យ​បរិយាកាស​នៃ​ការ​បោះឆ្នោត​ហ្នឹង មិន​អាច​ប្រព្រឹត្ត​ទៅ​ដោយ​សេរី និង​យុត្តិធម៌​បានទេ»។

នៅមុន​ការ​បោះឆ្នោត​ជ្រើសរើស​តំណាងរាស្ត្រ​នីតិកាល​ទី៧ ដែល​នឹង​ចូល​មកដល់ នៅ​ថ្ងៃទី២៣ ខែ​កក្កដា ខាងមុខ មន្ត្រី​ក្នុង​ស្ថាប័ន​ជាតិ ព្រមទាំង​លោក ហ៊ុន សែន ខ្លួន​ឯង​ផ្ទាល់ តែង​យក​វេទិកា​សាធារណៈ​និយាយ​រម្លឹក​ពី​សន្តិភាព ដែល​បាន​មកពី​កងទ័ព​វៀតណាម​ជួយ​រំដោះ​កម្ពុជា​ពី​របប​ខ្មែរក្រហម និង​ថ្លែង​សារ​ព្រមាន​ថា កម្ពុជា​នឹង​បាត់បង់​សន្តិភាព ឬ​មាន​សង្គ្រាម ប្រសិនបើ​គណ​ប្រជាជន​កម្ពុជា​ចាញ់​ឆ្នោត។ ទន្ទឹមគ្នា​នឹង​ការ​គំរាម​ដោយ​ពាក្យ​សម្ដី​ហើយ នៅ​ថ្ងៃ​បោះឆ្នោត​ម្ដងៗ ក៏​មានការ​ចល័ត​កងទ័ព​នៅ​ក្នុង​ថ្ងៃ​បោះឆ្នោត​ដែរ ហើយ​ព្រឹត្តិការណ៍​នេះ បាន​ដាស់​ស្មារតី​ប្រជាពលរដ្ឋ​ ឱ្យ​នឹកដល់​ពាក្យ​គំរាម​ពី​សង្គ្រាម​នេះ។
វិទ្យុ​អាស៊ីសេរី មិន​ទាន់​អាច​ទាក់ទង​អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត លោក ហង្ស ពុទ្ធា និង​អ្នកនាំពាក្យ​ក្រសួង​ការពារ​ជាតិ លោក ឈុំ សុជាត ដើម្បី​សុំ​ការ​អត្ថាធិប្បាយ​បញ្ហា​នេះ​បាន​ទេ នៅ​ថ្ងៃទី១៨ មករា។

ជុំវិញ​រឿង​នេះ នាយក​ប្រតិបត្តិ​អង្គការ​និចហ្វិក (NICFEC) លោក សំ គន្ធាមី មាន​ប្រសាសន៍​ថា ការ​ជ្រៀតជ្រែក​ចូល​ទៅ​ក្នុង​កិច្ចការ​ឃោសនា​ការបោះឆ្នោត​របស់​មន្ត្រី​ជាន់ខ្ពស់​មកពី​ស្ថាប័ន​ការពារ​ជាតិ ជា​ការ​យក​ប្រៀប និង​កេង​ចំណេញ​លើ​គូ​ប្រកួត។ លោក​បន្ត​ថា ស្ថាប័ន​ការពារ​ជាតិ​គួរ​រក្សា​គោលជំហរ​អព្យាក្រឹត្យ និង​គោរព​តាម​ច្បាប់រដ្ឋធម្មនុញ្ញ ដើម្បី​ឱ្យ​ការបោះឆ្នោត​ថ្នាក់​ជាតិ​ខាងមុខ ប្រកបដោយ សេរី ត្រឹមត្រូវ និង​យុត្តិធម៌។

លោក សំ គន្ធាមី៖ «ច្បាប់​មាន។ សូម្បីតែ​សម្ដេច​ក្រឡាហោម ស ខេង ក៏បាន​អំពាវនាវ​ដែរ ធ្វើ​ម៉េច​ឱ្យ​ទៅ​តាមច្បាប់ ទាំង​មន្ត្រី​រាជការ​ស៊ីវិល​អ្វី​ក៏ដោយ។ បើសិនជា​លោក​ចង់​ទៅ​ឃោសនា​ចូលរួម​នយោបាយ ទាល់តែ​យើង​សុំច្បាប់​ព្យួរ​ពី​មន្ត្រី​រាជការ​សិន។ ច្បាប់​គេ​តម្រូវ​អ៊ីចឹង»។

គ.ជ.ប​កំណត់​យក​ថ្ងៃអាទិត្យ ទី២៣ ខែ​កក្កដា ​ឆ្នាំ២០២៣ នេះ ជា​កាលបរិច្ឆេទ​បោះឆ្នោត​ជ្រើសតាំង​តំណាងរាស្ត្រ​សម្រាប់​នីតិកាល​ទី៧។
ក្នុង​មាត្រា១០ ស្ដីពី​លក្ខន្តិកៈ​ទូទៅ​ចំពោះ​យោធិន​នៃ​កងយោធពលខេមរភូមិន្ទ​ចែង​ថា យោធា​ម្នាក់ៗ អាច​មាន​គំនិត និង​ជំនឿ ដែល​មាន​លក្ខណៈ​ជា​ទស្សនវិជ្ជា ឬ​នយោបាយ​ផ្ទាល់ខ្លួន​បាន ប៉ុន្តែ​ពុំ​អាច​សម្ដែង​ជា​សាធារណៈ​បាន​ឡើយ។

ទោះ​ជា​បែប​នេះ​ក្ដី កន្លង​មក​រដ្ឋមន្ត្រី​ក្រសួង​ក្រសួង​ការពារ​ជាតិ លោក ទៀ បាញ់ តែងតែ​ចេញមុខ​ការពារ និង​ឃោសនា​ឱ្យ​គណបក្ស​កាន់អំណាច នៅមុន​ការបោះឆ្នោត​ម្ដងៗ។ ជាឧទាហរណ៍ កាលពី​ឆ្នាំ​២០១៧ ក្នុង​ការ​បោះឆ្នោត​ឃុំ សង្កាត់ ​លោក ទៀ បាញ់ បាន​ព្រមាន​ប្រើ​អំពើ​ហិង្សា ការ​បង្ហូរ​ឈាម​ ​និង «វាយ​បំបែក​ធ្មេញ» ចំពោះ​អ្នក​តវ៉ា​ប្រឆាំង​លទ្ធផល​នៃ​ការ​បោះឆ្នោត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment