លោក ហ៊ុន សែន ព្រមាន​ប្ដឹង​គណបក្ស​ភ្លើងទៀន

ដោយ ទីន ហ្សាការីយ៉ា
2023.01.19
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

លោក ហ៊ុន សែន ព្រមាន​ប្ដឹង​គណបក្ស​ភ្លើងទៀន

លោក​នាយករដ្ឋមន្ត្រី ហ៊ុន សែន ថ្លែងនៅថ្ងៃទី១៩ ខែ​មករា ឆ្នាំ​២០២៣។ រូប៖ ហ្វេសប៊ុក​លោក ហ៊ុន សែន


លោក​នាយករដ្ឋមន្ត្រី ហាក់​មិន​ដក​ដៃ​ ក្នុង​ការ​ចោទ​ចាត់​វិធានការ​ទៅ​លើ​គណបក្ស​ភ្លើងទៀន​ឡើយ។​ បន្ទាប់​ពី​ចាត់​វិធានការ​ចាប់​ដាក់​គុក​ និង​រឹបអូស​ទ្រព្យ​សម្បត្តិ​របស់​ថ្នាក់​ដឹកនាំ​សំខាន់ៗ​គណបក្ស​ភ្លើងទៀន​ជា​បន្តបន្ទាប់​នោះ ពេល​នេះ​លោក ហ៊ុន សែន ព្រមាន​ប្ដឹង​គណបក្ស​ភ្លើងទៀន​ទាំង​មូល​ រឿង​​រិះគន់​ថា បក្ស​កាន់​អំណាច​ធ្វើ​ទុក្ខបុកម្នេញ​លើ​គណបក្ស​ភ្លើងទៀន។ ទោះ​យ៉ាងណា មន្ត្រី​សង្គម​ស៊ីវិល ចង់​ឃើញ​បក្ស​កាន់​អំណាច គួរ​បង្ក​បរិយាកាស​ល្អ ដើម្បី​អាច​ឱ្យ​ពលរដ្ឋ ​និង​គណបក្ស​នយោបាយ​នានា ​ចូលរួម​ការ​បោះឆ្នោត​ដោយ​គ្មាន​ការ​ភ័យ​ខ្លាច។

មេដឹកនាំ​គណបក្ស​កាន់អំណាច មិន​បាន​បង្ក​បរិយាកាស​ល្អ​សម្រាប់​ឆ្នាំ​បោះឆ្នោត២០២៣ នេះ​ទេ​ ដោយ​លោក ហ៊ុន សែន ​នៅ​តែ​បន្ត​ប្រើ​សារ​គំរាមកំហែង ​សំឡុត​បំភិតបំភ័យ និង​ព្រមាន​ប្រើ​ប្រព័ន្ធ​តុលាការ​លើ​គណបក្ស​គូ​ប្រកួតប្រជែង។

លោក​នាយករដ្ឋមន្ត្រី ហ៊ុន សែន ប្រដូច​គណបក្ស​ភ្លើងទៀន ជា​ត្រី​ក្នុង​កន្ត្រក​លោក​ចាប់​ច្របាច់​ក ​ពេល​ណា​ក៏​បាន។ លោក ហ៊ុន សែន ថា ជា​សំណាង​របស់​គណបក្ស​ភ្លើងទៀន​ហើយ ដែល​លោក​មិន​បញ្ជាឱ្យ​ក្រុម​មនុស្ស ទៅ​វាយ​មេដឹកនាំ​គណបក្ស​នេះ​ដល់​ទីស្នាក់ការ​បក្ស​ ឬ​​ទៅ​វាយ​ដល់​ផ្ទះ​របស់​ពួកគេ។ លោក ហ៊ុន សែន និយាយ​ខាំ​ធ្មេញ​​​ថា លោក​មាន​អំណាច​ហិង្សា​ពេញ​ដៃ។

លោក ហ៊ុន សែន៖ «ជម្រើស​មានតែ​ពីរ​ទី១ ប្រើ​ផ្លូវ​តុលាការ​ ទី២ ទៅ​ដល់​ផ្ទះ​វាយ​ឯងហ្មង​ មានតែ​អ៊ីចឹង ព្រោះ​ឯងនិយាយ​អត់​ស្ដាប់​ បើ​ផ្លូវ​មួយ​ណាពីរ​ហ្នឹងកុំ​ព្រហើន​ពេក​មើល​ពី​ថ្ងៃ​នេះ​អត់​មាន​អត់​ឱន មិន​លើកលែង​មិន​អត់ឱន​តាំង​ពី​ក្រោម​ដល់​លើ បើ​ត្រូវ​វាយ​ខ្នោះ​គឺ​វាយ​ខ្នោះ​ភ្លាម»

លោក ហ៊ុន សែន ថ្លែង​ដូច្នេះ ក្នុង​ពិធី​ជួប​សំណេះសំណាល​ជាមួយ​កម្មករ​សំណង់​ជិត ១.២០០​នាក់​ នៅ​ក្នុង​ការដ្ឋាន​ «មន្ទីរពេទ្យ​ជាតិ​តេជោ​សន្តិភាព» ថ្ងៃ​ទី​១៩ ខែ​មករា។

នេះ​មិនមែន​ជា​ទី១​ទេ ដែល​លោក ហ៊ុន សែន​ ព្រមាន​គណបក្ស​ភ្លើងទៀន។ លោក ហ៊ុន សែន ប្រតិកម្ម​ដូច្នេះ ក្រោយ​ពេល​គណបក្ស​ភ្លើងទៀន ​កាល​ពី​ថ្ងៃ​ទី​១៨​ ខែ​មករា បាន​ចេញ​សេចក្ដីថ្លែងការណ៍​លើកឡើង​ថា គណបក្ស​កាន់​អំណាច​​ធ្វើ​ទុក្ខបុកម្នេញ​លើ​គណបក្ស​ភ្លើងទៀន ប៉ុន្តែ លោក ហ៊ុន សែន ថា​ រឿង​មិន​ពិត​ទេ។ លោក​ក៏​បញ្ជា​ទៅ​មេធាវី​គណបក្ស​ប្រជាជន​កម្ពុជា លោក គី តិច ពិនិត្យ​មើល​រឿង​ ដើម្បី​រៀបចំ​ដាក់​ពាក្យ​ប្ដឹង​គណបក្ស​ភ្លើងទៀន ទៅ​តុលាការ។ លោក​ថា បើ​គណបក្ស​ភ្លើងទៀន ចង់​រួច​ខ្លួន ​ត្រូវ​ចេញ​មុខ​សូមទោស ​គណបក្ស​ប្រជាជន​កម្ពុជា។

លោក ហ៊ុន សែន៖ «គំរាម​​ឯង​ពី​អង្កាល់​គំរាម​នៅ​ឯណា​និយាយ​គ្នា​ឱ្យ​ច្បាស់ បើ​ឯង​មិន​ដក​ពាក្យ​ហ្នឹង​ទេ ប្ដឹង​មួយ​ទៀត​ មាន​សេចក្ដី​ថ្លែងការណ៍​មួយ​ចេញ​ពី​ម្សិល​ថា គណបក្ស​ប្រជាជន​គឺ​គំរាម​កំហែង​គាបសង្កត់​ឥឡូវ​ឯណា​ឯង​ចង្អុល​មុខ​មក​នៅ​កន្លែង​ណា​និយាយ​ឱ្យ​ច្បាស់​មក បើ​ឯង​មិន​សូមទោស​អញ​ប្ដឹង​ ប៉ុន្តែ​វប្បធម៌​ល្មម​ឈប់​ហើយ​អាង​អី​សូមទោសៗ អត់​ទេ ទាល់តែ​លេង​បានៗ។»

សារ​ព្រមាន​របស់​លោក ហ៊ុន សែន ពេល​នេះ ក្រោយ​ពេល​តុលាការ​នៃ​រដ្ឋាភិបាល​របស់​លោក​ បាន​ចោទ​ប្រកាន់​មេដឹកនាំ​កំពូល​គណបក្ស​ភ្លើងទៀន​បី​រូប ជា​បន្តបន្ទាប់​ ក្នុង​នោះ​ អនុប្រធាន​គណបក្ស​នេះ​គឺ​លោក ថាច់ សេដ្ឋា កំពុង​ជាប់​ពន្ធនាគារ ក្នុង​សំណុំរឿង​ មិន​បំពេញ​កាតព្វកិច្ច​ចំពោះ​ឧបករណ៍​អាច​ជួញ​ដូរ​បាន» ឬ​ចេញ​សែក​ស្អុយ។

ទោះ​តុលាការ​មិន​កាត់​ក្ដី​ថា លោក ថាច់ សេដ្ឋា មាន​ទោស​ ក្ដី ប៉ុន្តែ លោក ហ៊ុន សែន បាន​និយាយ​មុន​តុលាការ​រួច​ហើយ​ថា លោក ថាច់ សេដ្ឋា ចេញ​សែក​អត់​លុយ។

ក្រោយ​ប្រធាន​របស់​គណបក្ស​កាន់អំណាច​ព្រមាន​ដូច្នេះ​ គណបក្ស​ប្រជាជន​កម្ពុជា បាន​ចេញ​សេចក្ដី​ថ្លែងការណ៍​នៅ​ថ្ងៃ​ដដែល​នេះ ព្រមាន​ថា នឹង​ធ្វើ​អ្វី​គ្រប់​យ៉ាង​តាម​ច្បាប់​ ដើម្បី​ការពារ​​មិន​ឱ្យ​គណបក្ស​ភ្លើងទៀន​ រំលោភ​បំពាន​គណបក្ស​នេះ​បាន​ឡើយ។

ទាក់ទង​ការ​ព្រមាន​របស់​គណបក្ស​កាន់​អំណាច​ពេល​នេះ វិទ្យុ​អាស៊ីសេរី​មិន​អាច​សុំ​ការ​ឆ្លើយតប ​ពី​អនុប្រធាន​គណបក្ស​ភ្លើងទៀន លោក សុន ឆ័យ និង​ថ្នាក់​ដឹកនាំ​គណបក្ស​នេះ​បាន​ទេ នៅ​ថ្ងៃ​ទី១៩ ខែ​មករា។

ទោះ​យ៉ាងណា គណបក្ស​ភ្លើងទៀន កាល​ពី​ថ្ងៃ​ទី១៨ ខែ​មករា បាន​ចេញ​សេចក្ដី​ថ្លែងការណ៍ ប្រកាស​ប្រឆាំង​ដាច់ខាត​លើ​ការ​គាបសង្កត់ ការ​គំរាមកំហែង និង​ការ​ធ្វើទុក្ខបុកម្នេញ ផ្នែក​នយោបាយ​គ្រប់​រូបភាព​ពី​គណបក្ស​កាន់​អំណាច និង​ទាមទារ​ឱ្យ​បញ្ឈប់​សកម្មភាព​ទាំង​នេះ​ជាបន្ទាន់។

ការ​ចេញ​សេចក្ដី​ថ្លែងការណ៍​បែប​នេះ ក្រោយ​​ពេល​ដែល​គណបក្ស​កាន់​អំណាច​ ប្ដឹង​ថ្នាក់​ដឹកនាំ​គណបក្ស​ភ្លើងទៀន ទៅ​តុលាការ​ ដូច​ជា លោក សុន ឆ័យ លោក គង់ គាំ និង​រឹបអូស​ទ្រព្យ​សម្បត្តិ​របស់​ពួក​គាត់​ថែម​ទៀត​ផង។ ករណី​ចុង​ក្រោយ​​នេះ តុលាការ​បាន​ចាប់​ឃុំ​ខ្លួន​ លោក ថាច់ សេដ្ឋា ទាំង​តក់​ក្រហល់​ថែម​ទៀត​ ដែល​​​អ្នក​ឃ្លាំមើល​ ចាត់​ទុក​ថា ករណី​ទាំង​នេះ​ ជា​ការ​ធ្វើ​ទុក្ខបុកម្នេញ​នយោបាយ​។ លើស​ពី​នេះ ថ្វីត្បិត​លោក ហ៊ុន សែន ខំ​ការពារ​ថា គណបក្ស​របស់​លោក​ មិន​បាន​ធ្វើ​ទុក្ខបុកម្នេញ​ក្ដី ក៏​គ្មានអ្វី​លាក់បាំង​ឡើយ​ ព្រោះ​ករណី​ទាំង​សុទ្ធតែ​កើតឡើង​ក្រោយ​ការ​​គំរាមកំហែង​ជា​សាធារណៈ​របស់​បុរស​ខ្លាំង​រូប​នេះ​ទាំង​អស់។

ទោះ​បែប​នេះ​ក្ដី ប្រធាន​សហភាព​​សហជីព​កម្ពុជា និង​ជា​ទីប្រឹក្សា​សមាគម​គ្រូ​បង្រៀន​កម្ពុជា​ឯករាជ្យ លោក រ៉ុង ឈុន យល់​ថា ប្រសិនបើ​គណបក្ស​ភ្លើងទៀន និយាយ​ខុស​ពី​ការពិត ​គួរ​ទុក​ឱ្យ​ពលរដ្ឋ​​ជា​អ្នក​វិនិច្ឆ័យ​ តាមរយៈ​ការ​បោះឆ្នោត​នា​ពេល​ខាងមុខ។ លោក​បន្ត​ទៀត​ថា ការ​ព្រមាន​របស់​បក្ស​កាន់​អំណាច​ពេល​នេះ​ ហាក់​បង្ហាញ​ថា គណបក្ស​នេះ​កំពុង​ដឹកនាំ​ប្រទេស​ពោរពេញ​ដោយ​កំហុស​ ទើប​បាន​​ខ្លាច​​ការ​រិះគន់ របស់​គណបក្ស​ភ្លើងទៀន​។ លោក រ៉ុង ឈុន លើកឡើង​ថា លោក ហ៊ុន សែន ជា​​អ្នក​ដឹកនាំ​ប្រទេស និង​ជា​អ្នក​នយោបាយ​ជើង​ចាស់​ផង​នោះ​ គួរ​បើក​ចិត្ត​ឱ្យ​ទូលាយ​ ដោយ​មិន​គួរ​អាង​ខ្លួន​មាន​អំណាច​ ហើយ​​យក​អំណាច​នោះ ​ទៅ​ព្រមាន​គណបក្ស​គូ​ប្រកួត​ប្រជែង​ ដែល​គ្មាន​អំណាច​​បែប​នេះ​ទេ។ អតីត​សមាជិក​គ.ជ.ប លោក រ៉ុង ឈុន បារម្ភ​ថា បើ​បក្ស​កាន់​អំណាច​បន្ត​ព្រមាន និង​មាន​វិធានការ​លើ​គណបក្ស​ភ្លើងទៀន​តទៅ​ទៀត នឹង​ជះ​ឥទ្ធិពល​មិន​ល្អ ដល់​ការបោះឆ្នោត​ថ្ងៃ​ទី២៣ ខែ​កក្កដា ខាង​មុខ។

លោក រ៉ុង ឈុន៖ «ម្ដង​គំរាម​នេះ​ម្ដង​គំរាម​នោះ​ធ្វើ​ឱ្យ​ការបោះឆ្នោត​ខាង​មុខ​នោះ​​ពិបាក​នឹង​គេ​ទទួល​យក ពីព្រោះ​យើង​ដឹង​ហើយ​បើសិន​ជា​យើង​មិន​កែលំអ​ស្ថានភាព​នយោបាយ​ក៏​ដូច​ការ​គោរព​សិទ្ធិមនុស្ស​ប្រជាធិបតេយ្យ​ទេ បន្ទាប់​ពី​ការ​បោះឆ្នោត​ថ្ងៃ​២៣​ទៅ​ កម្ពុជា​យើង​នឹង​ប្រឈម​ទៅ​នឹង​បញ្ហា​គេ​ដក EBA​ទាំង​ស្រុង​ហើយ​GSP​ក៏​មិន​បាន​ត្រឡប់​មក»

នៅ​សល់​តែ​រយៈ​ពេល​ជាង ៧​ខែ​ទៀត​ទេ ពលរដ្ឋ​នឹង​មាន​ឱកាស​ជ្រើសរើស​មេដឹកនាំ​ថ្មី​របស់​ខ្លួន ​តាម​រយៈ​ការបោះឆ្នោត​ថ្នាក់​ជាតិ​ថ្ងៃ​ទី២៣ ខែ​កក្កដា​ខាង​មុខ។  ទន្ទឹម​គ្នា​នេះ​ដែរ គេ​សង្កេត​ឃើញ​ថា​ គណបក្ស​ភ្លើងទៀន កំពុង​រង​ការ​ធ្វើ​ទុក្ខបុកម្នេញ​ ពី​តុលាការ និង​ពី​ក្រុម​ជន​ជន​អន្ធពាល​ ដែល​បាន​វាយ​ធ្វើ​បាប​លើ​សកម្មជន​គណបក្ស​នេះ​ជា​បន្តបន្ទាប់។

កន្លង​ទៅ​ លោក​នាយក​រដ្ឋមន្ត្រី ហ៊ុន សែន ធ្លាប់​ព្រមាន​រំលាយ​គណបក្ស​ភ្លើង​ទៀន ដោយ​ចោទ​ប្រកាន់​ថា គណបក្ស​នេះ​មាន​ទំនាក់ទំនង​ជាមួយ​ក្រុម​មេ​ដឹកនាំ​គណបក្ស​សង្គ្រោះ​ជាតិ នៅ​ក្រៅ​ប្រទេស។ ទោះ​យ៉ាង​ណា​ សហគមន៍​អន្តរជាតិ បាន​រំលឹក​​ទៅ​រដ្ឋាភិបាល​លោក ហ៊ុន សែន ជា​ញឹកញាប់​ ឱ្យ​បើក​លំហ ​ប្រជាធិបតេយ្យ​សម្រាប់​ការ​បោះឆ្នោត​ថ្នាក់​ជាតិ​នា​ពេល​ខាង​មុខ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

One Response to "លោក ហ៊ុន សែន ព្រមាន​ប្ដឹង​គណបក្ស​ភ្លើងទៀន"

  1. Anonymous says:

    I knew HUN SEN’s lower officers are start to worry . the reason they got so much money but they can not go any where . YES ….when people rising up all those officers will be just like in 1975 . I think this time is a bit deference because of the US and EU got their list of corrupt person among HUN SEN leadership

Leave a Reply

Submit Comment