មន្រ្តី​គណបក្ស​ភ្លើងទៀន​ចោទថា​អាជ្ញាធរ​ប៉ុនប៉ង​សម្លាប់​ តែ​ត្រូវ​អាជ្ញាធរ​ខេត្ត​ឧត្តរមានជ័យ​បដិសេធ

កម្ពុជា-នយោបាយ
20/01/2023 – 07:01
ដោយ៖ សេង​ បារាំង
RFI

អ្នកស្រី ហុង អាន អនុប្រធានប្រតិបត្តិខេត្តឧត្តរមានជ័យរបស់គណបក្សភ្លើងទៀន © FB


អាជ្ញាធរ​ខេត្ត​ឧត្តរមានជ័យ​បាន​បដិសេធ​ថា​គ្មាន​ករណី​គំរាមកំហែង​សម្លាប់​លើមន្រ្តី​គណបក្សភ្លើងទៀន​ប្រចាំ​ខេត្តឧត្តរមានជ័យ​ឡើយ។ ​ការ​បដិសេធ​នេះធ្វើ​ឡើង​ក្រោយ​ពី​អនុប្រធាន​ប្រតិបត្តិ​ខេត្ត​ឧត្តរមានជ័យ​មួយរូប​ គឺអ្នកស្រី ​ហុង អាន​ បាន​បញ្ជាក់ថា ​អាជ្ញាធរ​ក្រុងភ្នំពេញ​ បាន​បើក​ឡាន​ព្យាយាម​ប៉ុនប៉ង​សម្លាប់​នៅពេល​ធ្វើដំណើរ​តាម​ផ្លូវ​ក្នុង​កំឡុង​ពេល​ធ្វើការងារ​បំពេញតួនាទីទៅទីស្នាក់ការ​បក្សភ្លើងទៀន។​

អ្នកស្រី ហុង អាន បានគូសបញ្ជាក់ថា ការប៉ុនប៉ងសម្លាប់នេះ បានធ្វើឡើងក្រោយពីអ្នកស្រីបានបន្តធ្វើសកម្មភាពចូលរួមក្នុងឆាកនយោបាយនៅក្នុងគណបក្សភ្លើងទៀន មានតួនាទីជាអនុប្រធានប្រតិបត្តិខេត្តឧត្តរមានជ័យ បន្ទាប់ពីចេញពីពន្ធនាគារ។ មិនតែប៉ុណ្ណោះ អ្នកស្រីបន្ថែមថា ក្នុងនោះក៏មានការព្យាយាមអុកឡុកយាយីកូនរបស់អ្នកស្រី គំរាមសម្លាប់ស្រែកជេរប្រមាថមើលងាយផងដែរ ធ្វើឲ្យអ្នកស្រីមានការព្រួយបារម្ភពីសុវត្ថិភាពមែនទែន។

អនុប្រធានប្រតិបត្តិខេត្តឧត្តរមានជ័យរបស់គណបក្សភ្លើងទៀនរូបនេះ បានអះអាងថាការប៉ុនប៉ងសម្លាប់ និងគំរាមកំហែងនេះ បានចាប់ផ្ដើមពេលធ្វើឃោសនាបោះឆ្នោត និងពេលបោះឆ្នោត និងក្រោយការបោះឆ្នោតរួច។ បើតាមអ្នកស្រី ហុង អាន គេព្យាយាមប៉ុនប៉ងសម្លាប់នៅពេលអ្នកស្រីបានធ្វើដំណើរតាមផ្លូវក្នុងកំឡុង​ពេលធ្វើការងារបំពេញតួនាទៅទីស្នាក់ការគណបក្សភ្លើងទាន។

តែយ៉ាងណាការចោទប្រកាន់នេះ ត្រូវបានលោក ឌី រ៉ាដូ អ្នកនាំពាក្យសាលាខេត្តឧត្តរមានជ័យ ប្រកាសបដិសេធថាគ្មានករណីនេះកើតឡើងឡើយ។ ថ្លែងបញ្ជាក់ប្រាប់វិទ្យុបារាំង RFI នៅថ្ងៃសុក្រទី២០ ខែមករានេះ លោក ឌី រ៉ាដូ ថាអាជ្ញាធរខេត្តឧត្តរមានជ័យ រួមទាំងអភិបាលខេត្ត គឺប្រកាន់ជាប់នូវគោលការ​ណ៍ច្បាប់ និងការណែនាំរបស់ក្រសួងមហាផ្ទៃ ដោយអនុញ្ញាតឲ្យអង្គការសង្គមស៊ីវិល និងគណបក្សនយោ​បាយ ​គាត់មានសេរីភាពក្នុងការធ្វើសកម្មភាពរបស់ខ្លួន។

អ្នកនាំពាក្យសាលាខេត្តឧត្តរមានជ័យរូបនេះ បានបញ្ជាក់ផងដែរ ប្រសិនអង្គការសង្គមស៊ីវិល និងគណបក្សនយោបាយ ធ្វើសកម្មភាពគោរពទៅតាមគោលការណ៍ច្បាប់ គ្មានការរារាំងឡើយ។

ទាក់ទិនទៅនឹងការធ្វើទុកបុកម្នេញមកលើថ្នាក់ដឹកនាំ និងសកម្មជនរបស់គណបក្សភ្លើងទៀននេះ គណបក្សភ្លើងទៀន ចាត់ទុកថាជាការគំរាមកំហែងមុនការបោះឆ្នោត និងស្នើសុំការពិភាក្សាដោះស្រាយបញ្ហានេះជាមួយគណបក្សកាន់អំណាច បើមិនដូច្នោះទេពួកគេនឹងពិចារណាជុំវិញការចូលរួមការបោះឆ្នោតថ្នាក់ជាតិនាពេលខាងមុខ៕

What Next?

Recent Articles

One Response to "មន្រ្តី​គណបក្ស​ភ្លើងទៀន​ចោទថា​អាជ្ញាធរ​ប៉ុនប៉ង​សម្លាប់​ តែ​ត្រូវ​អាជ្ញាធរ​ខេត្ត​ឧត្តរមានជ័យ​បដិសេធ"

  1. Anonymous says:

    that what was happen during the killing field . ANGKA LIER order and the lower ANGKA will please him by kill them. HUN SEN was that ANGKA from the killing field and up to day . I think Cambodia will be no more killer after this ugly animal gone hell . it can be over because HUN SEN the KBOTH CHEATH un educated evil already got the thief Vietcong al over the country . 2023 is this the end of this un educated evil monster

Leave a Reply

Submit Comment