មន្ត្រី​សង្គម​​ស៊ីវិល​ថា នៅ​តែ​​ប្រឈម​​ការ​គាបសង្កត់​​​ពី​​រដ្ឋាភិបាល​ មិន​​ដូច​​អ្វី​ដែល​​រដ្ឋមន្ត្រី​ក្រសួង​មហាផ្ទៃ ប្រាប់​​តំណាង​​យូអិន

ដោយ ម៉ៅ សុធានី
2023.01.21
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

មន្ត្រី​សង្គម​​ស៊ីវិល​ថា នៅ​តែ​​ប្រឈម​​ការ​គាបសង្កត់​​​ពី​​រដ្ឋាភិបាល​ មិន​​ដូច​​អ្វី​ដែល​​រដ្ឋមន្ត្រី​ក្រសួង​មហាផ្ទៃ ប្រាប់​​តំណាង​​យូអិន

​រដ្ឋមន្ត្រី​ក្រសួងមហាផ្ទៃ​ ​លោក ស ខេង ជួបពិភាក្សាជាមួយអ្នក​សម្របសម្រួល​ថ្មី​របស់​អង្គការសហប្រជាជាតិ​ (UN) ​ប្រចាំ​កម្ពុជា លោក ចូសេហ្វ ស្សយអ័រ (Joseph Scheuer) នៅក្រសួងមហាផ្ទៃ កាលពីថ្ងៃទី១៨ ខែមករា ឆ្នាំ២០២៣។ រូប៖ ហ្វេសប៊ុក Sar Kheng


មន្ត្រី​អង្គការ​សង្គម​ស៊ីវិល​​ក្រៅ​រដ្ឋាភិបាល​មួយ​​ចំនួនលើកឡើង​​ថា ពួកគេ​នៅ​តែ​​បន្ត​រង​ការ​​ធ្វើទុក្ខបុកម្នេញ និង​ការគាបសង្កត់​​ពី​​រដ្ឋាភិបាល មិន​ដូច​ការ​លើកឡើង​​របស់​​រដ្ឋមន្ត្រី​ក្រសួងមហាផ្ទៃ ប្រាប់​តំណាង​​អង្គការ​សហប្រជាជាតិ​ (UN) ​ប្រចាំ​កម្ពុជា​ឡើយ។ ពួកគាត់​បាន​ស្នើ​ឱ្យ​រដ្ឋាភិបាល គួរ​បើក​លំហ​សិទ្ធិ​សេរីភាព និង​ទទួលយក​ការរិះគន់​ក្នុង​ន័យ​ស្ថាបនា​របស់​អង្គការសង្គម​ស៊ីវិល ដើម្បី​ជំរុញ និង​ស្ដារ​ការ​គោរព​សិទ្ធិ​មនុស្ស​ឡើងវិញ ស្របតាម​គោលការណ៍​លទ្ធិប្រជាធិបតេយ្យ។

មន្ត្រី​សង្គម​ស៊ីវិល លើកឡើង​ថា អ្នកការពារ​សិទ្ធិមនុស្ស នៅតែ​ប្រឈម​នឹង​ការគាបសង្កត់ គំរាមកំហែង ក្នុង​ការ​បំពេញបេសកកម្ម​ការងារ មិន​ដូច​អ្វី​ដែល​រដ្ឋមន្ត្រី​ក្រសួងមហាផ្ទៃ ប្រាប់​តំណាង​អង្គការសហប្រជាជាតិ​ (UN) ប្រចាំ​កម្ពុជា​ឡើយ។

អ្នកនាំពាក្យ​សមាគម​ការពារ​សិទ្ធ​មនុស្ស​អាដហុក លោក ស៊ឹង សែនករុណា ប្រាប់​វិទ្យុ​អាស៊ីសេរី នៅ​ថ្ងៃទី២០ ខែមករា ថា មន្ត្រី​អង្គការសង្គម​ស៊ីវិល​មួយ​ចំនួន ដែល​បំពេញ​តួនាទី​ការពារ​សិទ្ធិមនុស្ស សិទ្ធិ​ដីធ្លី និង​បរិស្ថាន អ្នកដឹកនាំ​កម្មករ និង​ក្រុម​អ្នក​សារ​ព័ត​មាន នៅតែ​បន្ត​ទទួលរង​នូវ​ការ​គំរាមកំហែង ពី​រដ្ឋាភិបាល​ដោយ​ប្រើប្រាស់​ប្រព័ន្ធ​តុលា។ លោក​បន្ត​ថា អាជ្ញាធរ​បាន​ឃ្លាំមើល និង​ជ្រៀតជ្រែក​សកម្មភាព​ឬ​សិក្ខាសាលា​ទាំងឡាយ​ណា​ដែល​ទាក់ទង​នឹង​សិទ្ធិមនុស្ស ហើយ​សកម្មភាព​នេះ បាន​បង្ក​ការ​គំរាមកំហែង​ដល់​អ្នកចូលរួម​ផង​ដែរ៖ 

លោក ស៊ឹង សែនករុណា៖ «ជា​ពិសេស​សមត្ថកិច្ច​មួយ​ចំនួន នៅតែ​រឹតត្បិត ដាក់​មនុស្ស ឬ​ដាក់​សមត្ថកិច្ច​នឹង ទៅ​ឃ្លាំមើល ទៅ​ថតរូប​ថត​បញ្ជី​ឈ្មោះ ហើយ​ហៅ​អ្នក​ដែល​ចូលរួម​ទៅ​សាកសួរ​ជាដើម។ នេះ​ជា​រូបភាព​មួយ​បង្ហាញ​ពី​ការ​រឹតត្បិត ការ​គំរាមកំហែង​ពីសំណាក់​អាជ្ញាធរ ពីសំណាក់​សមត្ថកិច្ច​ទាំងអស់​នោះ​ហើយ។ ខាង​ក្រសួង​មហាផ្ទៃ​គួរ​ពិនិត្យបញ្ហា​នឹង​ឡើងវិញ»

ការ​លើកឡើង​របស់​អ្នកការពារ​សិទ្ធិមនុស្ស​រូប​នេះ គឺ​បន្ទាប់ពី​កិច្ចពិភាក្សា​រវាង​រដ្ឋមន្ត្រី​ក្រសួងមហាផ្ទៃ​ ​លោក ស ខេង និង​អ្នក​សម្របសម្រួល​ថ្មី​របស់​អង្គការសហប្រជាជាតិ​ (UN) ​ប្រចាំ​កម្ពុជា លោក ចូសេហ្វ ស្សយអ័រ (Joseph Scheuer)។ លោក ស ខេង លើកឡើង​ថា រដ្ឋាភិបាល​កម្ពុជា តែង​យកចិត្តទុកដាក់​ក្នុង​ការ​ផ្សារភ្ជាប់​កិច្ច​សន្ទនា​ជាមួយ​អង្គការសង្គម​ស៊ីវិល តាមរយៈ​យន្ត​ការ​ធ្វើការ​ជាមួយគ្នា។

ទោះ​យ៉ាងណា អង្គការសង្គម​ស៊ីវិល​នៅ​កម្ពុជា ជាពិសេស​ផ្នែក​សិទ្ធិមនុស្ស ដែល​ឈាន​មុខ​ក្នុង​ការ លាតត្រដាង​ពី​ការរំលោភ​សិទ្ធិមនុស្ស និង​ការ​ដើរថយក្រោយ​នៃ​លទ្ធិប្រជាធិបតេយ្យ តែងតែ​រង​ការចោទប្រកាន់​ពី​រដ្ឋាភិបាល និង​បាន​ផ្សា​ភ្ជាប់​អង្គការសង្គម​ស៊ីវិល​ទៅ​នឹង​រឿង​នយោបាយ ឬ​ជា “បដិវត្ត​ពណ៌”។ ទន្ទឹមគ្នា​នេះ​ដែរ ការ​ធ្វើទុក្ខបុកម្នេញ គំរាមកំហែង​លើ​អង្គការសង្គម​ស៊ីវិល​កើតឡើង​ជា​ហូរហែ។
ជាក់ស្ដែង​ថ្មីៗនេះ អគ្គស្នងការដ្ឋាន​នគរបាល​ជាតិ​បាន​កោះហៅ​ថ្នាក់​ដឹកនាំ​សំខាន់ៗ របស់​អង្គការសង្គម​ស៊ីវិល​ចំនួន ៤ នាក់ ទៅ​បំភ្លឺ ទាក់ទង​នឹង​ការ​បង្ហោះ និង​ចែកចាយ​វីដេអូ​ចម្រៀង​រ៉េប​ “ឈាម​បាតុករ” ដែល​ច្រៀង​ដោយ​យុវជន គា សុគន្ធ រៀបរាប់​ពី​ក្រុម​បាតុករ​ធ្វើបាតុកម្ម​លើ​ដង​ផ្លូវ ដើម្បី​តវ៉ា​ទាមទារ​ដំឡើង​ប្រាក់ខែ កាលពី​ឆ្នាំ២០១៤ ហើយ​ត្រូវ​បាន​សមត្ថកិច្ច​បាញ់ និង​វាយ​បង្ក្រាប​ដោយ​ហិង្សា។ ប្រធាន​អង្គការ​ទាំង៤ នាក់​នេះ រួម​មាន នាយក​ទទួលបន្ទុក​កិច្ចការ​ទូទៅ​នៃ​អង្គការ​លីកាដូ ​លោក អំ សំអាត នាយក​ប្រតិបត្តិ​នៃ​មជ្ឈមណ្ឌល​សម្ព័ន្ធ​ភាព​ការងារ និង​សិទ្ធិមនុស្ស ហៅ​កាត់​ថា សង់ត្រាល់ ​លោក មឿន តុលា ​ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ​ លោក វន់ ពៅ និង​ប្រធាន​សមាគម​សម្ព័ន្ធ​សហគមន៍​កសិករ​កម្ពុជា​ (CCFC) ​លោក ថេង សាវឿន។ អាជ្ញាធរ​បាន​ចោទ​ថា​បទ​ចម្រៀង​នេះ​មានខ្លឹមសារ​អុជអាល ញុះញង់ អាច​បង្ក​អសន្តិសុខ សណ្ដាប់ធ្នាប់​ដល់​សង្គម និង​បង្ខំ​ឱ្យ​ក្រុម​មន្ត្រី​សង្គម​ស៊ីវិល​លុប​វីដេអូ​ “ឈាម​បាតុករ” ​ចេញពី​បណ្ដាញ​សង្គម និង​គេហទំព័រ។ អង្គការសង្គម​ស៊ីវិល ចាត់​ទុក​ករណី​នេះ​ថា ជា​ការ​គំរាមកំហែង និង​បិទ​សិទ្ធិសេរីភាព​បញ្ចេញមតិ។

វិទ្យុ​អាស៊ីសេរី ​មិន​អាច​ទាក់ទង​អ្នកនាំពាក្យក្រសួងមហាផ្ទៃ លោក ខៀវ សុភ័គ និង​អ្នកនាំពាក្យ​គណៈកម្មាធិការ​សិទ្ធិមនុស្ស​រដ្ឋាភិបាល​កម្ពុជា លោក កត្តា អ៊ន ដើម្បី​សុំ​ការ​អត្ថាធិប្បាយ​បានទេ នៅ​ថ្ងៃទី២០ ខែមករា។

ជុំវិញ​រឿង​នេះ នាយក​ទទួលបន្ទុក​កិច្ចការ​ទូទៅ​នៃ​អង្គការ​លីកាដូ លោក អំ សំអាត មាន​ប្រសាសន៍​ថា រដ្ឋាភិបាល តែងតែ​ផ្សា​ភ្ជាប់​អង្គការសង្គម​ស៊ីវិល​ដែល​ធ្វើការ​លើក​កម្ពស់​សិទ្ធិមនុស្ស ទៅ​នឹង​រឿង​ន​យា​បាយ និង​ចាត់​ទុក​របាយការណ៍​ដែល​បង្ហាញ​ពី​ការរំលោភ​សិទ្ធិមនុស្ស ដែល​ជាប់​ពាក់ព័ន្ធ​នឹង​រដ្ឋាភិបាល​ថា​ ជា​បដិវត្ត​ពណ៌។ លោក​បញ្ជាក់​ថា បច្ចុប្បន្ន រដ្ឋាភិបាល​បាន​ដាក់​អង្គការ​មួយ​ចំនួន​បញ្ចូល​ទៅ​ក្នុង​បញ្ជី ស និង​ធ្វើការ​តាមដាន​រាល់​សកម្មភាព​របស់​អង្គការ​ទាំងនោះ៖

លោក អំ សំអាត៖ «អ៊ីចឹង​នៅ​ពេល​អង្គការ​ទាំង​អស់ហ្នឹង​គេ​ធ្វើការ​ដោយ​គោរព​ទៅតាម លក្ខន្តិក គោរព​ទៅតាម​រដ្ឋធម្មនុញ្ញ គោរព​ទៅ​តាមច្បាប់​ជាតិ និង​អន្តរជាតិ អាជ្ញាធរ​ហ្នឹង​គួរតែ​គាត់​ត្រូវតែ​យល់​ដឹង ហើយ​មាន​កិច្ច​សហ​ប្រតិបត្តិការ​ល្អ ហើយ​បើកទូលាយ​ឱ្យ​មាន​សកម្មភាព​ការងារ​របស់​អង្គការសង្គម​ស៊ីវិល​ហ្នឹង។ គឺ​គេ​បំពេញ​ការងារ​ទៅតាម​លក្ខន្តិក ទៅតាម​គោលការណ៍​របស់​គេ​ហើយ វា​អត់មាន​អ្វី​ត្រូវការ​រឹតត្បិត​ទៅលើ​សេរីភាព​ទាំង​អស់ហ្នឹង​ទេ»

អង្គការសង្គម​ស៊ីវិល ស្នើ​ឱ្យ​រដ្ឋាភិបាល គួរ​សហការ​ជាមួយ​អង្គការ​ស៊ីវិល​ដោយ​ស្មោះត្រង់ ដើម្បី​រួមគ្នា​លើកស្ទួយ​ប្រជាធិបតេយ្យ និង​ការ​គោរព​សិទ្ធិមនុស្ស​ឡើងវិញ ចៀសវាង​ទទួលរង​ការរិះគន់ និង​ទទួលរង​ទណ្ឌកម្ម​ពី​សហ​គម​អន្តរជាតិ​បន្ថែម​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment