កម្ពុជា
22/01/2023 – 08:40
ដោយ៖ ជួប នរក្សា
RFI

ខួប​១៩ឆ្នាំនៃការបាញ់សម្លាប់លើមេដឹកនាំសហជីព លោក ជា វិជ្ជា © Internetដោយ៖ជួប នរក្សា១២ នាទី

២២ មករា ២០០៤​-២២ មករា ២០២៣​ គឺ​ជា​ខួប​១៩​ឆ្នាំ​នៃ​ការ​បាញ់​សម្លាប់​លើ​មេ​ដឹក​នាំ​សហជីព​ លោក​ ជា វិជ្ជា ​កណ្តាល​ក្រុង​ភ្នំពេញ។​ នៅ​ក្នុង​ឆ្នាំ​នេះ ​បណ្តា​សហជីព​ អង្គការ​សង្គម​ស៊ីវិល ​និង​គណបក្ស​នយោបាយ​ បាន​ប្រជុំ​គ្នា​ដាក់​កម្រង​ផ្កា​គោរព​វិញ្ញាណក្ខន្ធ​លោក ​ជា វិជ្ជា​ និង​ទទូច​ឲ្យ​អាជ្ញាធរ​បើក​ការ​ស៊ើប​អង្កេត​ឲ្យ​ម៉ត់ចត់​ ដើម្បី​វែក​មុខ​ឃាតករ​ពិត​ប្រាកដ​ ដែល​ពួក​គេ​ទន្ទឹង​យុត្តិធម៌​មក​១៩ឆ្នាំ។​

អស់ពេល១៩ឆ្នាំមកហើយ ដែលឃាតករ និងអ្នកស្ថិតនៅពីក្រោយខ្នងនៃការបាញ់សម្លាប់ លោក ជា វិជ្ជា នៅមិនទាន់បានវែកមុខ និងចាប់ខ្លួនយកមកផ្តន្ទាទោសតាមច្បាប់នៅឡើយ បើទោះបីជាតុលាការកំពូលធ្លាប់បានវិនិច្ឆ័យសេចក្តីសម្រេចបង្គាប់ឲ្យព្រះរាជអាជ្ញាបើកការស៊ើបអង្កេត។ នេះបើតាមសេចក្តីថ្លែងការណ៍របស់សហព័ន្ធសហជីពសេរីកម្មករនៃព្រះរាជាណាចក្រកម្ពុជា នៅថ្ងៃអាទិត្យនេះ។ សម្រាប់បណ្តាក្រុមសហជីព គឺបានត្រឹមតែទន្ទឹងរង់ចាំពន្លឺយុត្តិធម៌ អស់ពេល១៩ឆ្នាំមកហើយប៉ុណ្ណោះ។

បើតាមសេចក្តីថ្លែងការណ៍ គឺការណ៍ដែលអាជ្ញាធរមិនអាចវែកមុខឃាតករអស់ពេល១៩ឆ្នាំមកនេះ បានធ្វើឲ្យមជ្ឈដ្ឋានអ្នកស្រលាញ់សេរីភព និងយុត្តិធម៌ បានដាក់ការសង្ស័យ និងចោទប្រកាន់អាជ្ញាធរថា​ គ្មានសមត្ថភាព និងគ្មានឆន្ទៈពិតប្រាកដក្នុងការស្វែងរកឃាតករ និងអ្នកនៅពីក្រោយខ្នងនៃការសម្លាប់លោក ជា វិជ្ជា។ តាមសហជីព បញ្ហានេះបានឆ្លុះបញ្ចាំងថា ប្រព័ន្ធយុត្តិធម៌កម្ពុជា មានភាពទន់ខ្សោយយ៉ាងខ្លាំងបំផុត។

នៅចំពោះមុខនៃការទន្ទឹងយុត្តិធម៌មកអស់១៩ឆ្នាំ ក្រុមបណ្តាសហជីព និងអង្គការសង្គមស៊ីវិល បានទទូចជាថ្មីឲ្យរដ្ឋាភិបាល​កម្ពុជា ចាត់វិធានការស៊ើបអង្កេតរកមុខឃាតករពិតប្រាកដ និងអ្នកបញ្ជាពីក្រោយខ្នង យកមកផ្តន្ទាទោសតាមច្បាប់ ដើម្បីផ្តល់យុត្តិធម៌ដល់ក្រុមគ្រួសារ សាច់ញាតិជនរងគ្រោះ និងឈានទៅលុបបំបាត់វប្បធម៌និរទណ្ឌភាព និងពង្រឹងយុត្តិធម៌សង្គមកម្ពុជា។

លោក ជា វិជ្ជា អតីត​ប្រធាន​សហជីព​សេរីកម្មករ​នៃ​ព្រះ​រាជាណាចក្រ​កម្ពុជា ដែល​មាន​និន្នាការ​ប្រឆាំង​នឹង​រដ្ឋាភិបាល ត្រូវ​ឃាតករ​បាញ់​សម្លាប់ នៅ​ខាង​មុខ​តូប​លក់​កាសែត​មួយ ក្បែរ​របង​វត្ត​លង្ការ​។ ក្រោយ​ឃាតកម្ម​ដ៏​កក្រើក​នេះ អាជ្ញាធរ​ក្រុង​ភ្នំពេញ​បាន​បើក​ការ​ស៊ើប​អង្កេត និង​ឈាន​ទៅ​ចាប់​ខ្លួន​បុរស​២​នាក់ ឈ្មោះ ប៊ន សំណាង និង​សុខ សំអឿន​។

ក៏​ប៉ុន្តែ​ក្រុម​អង្គការ​សង្គមស៊ីវិល សហគមន៍​អន្ដរជាតិ មេ​ដឹក​នាំ​សហជីព​នានា រួម​ទាំង​ក្រុម​គ្រួសារ​លោក ជា វិជ្ជា ផង​នោះ បាន​ហៅ​ការ​ចាប់​ខ្លួន​អ្នក​ទាំង​ពីរ​ថា ជា​ការ​ចាប់​ខ្លួន​ឃាតករ​សិប្បនិម្មិត និង​ទាមទារ​ឱ្យ​អាជ្ញាធរ​ដោះ​លែង​ពួក​គេ​។

នៅ​ទី​បំផុត ប៊ន សំណាង និង​សុខ សំអឿន ត្រូវ​បាន​ដោះ​លែង​ឱ្យ​មាន​សេរីភាព កាល​ពី​ខែ​កញ្ញា ឆ្នាំ​២០១៣​។ មកដល់ពេលនេះ ការ​ស្វែង​រក​ឃាតករ​ពិត​ប្រាកដ នៅ​តែ​ជា​ការ​ទាមទារ​ដ៏​ទទូច​ពី​សំណាក់​ក្រុម​គ្រួសារ​លោក ជា វិជ្ជា និង​ក្រុម​សង្គម​ស៊ីវិល​ដដែល ដោយពួកគេបានឲ្យពាក្យមួយឃ្លាថា «១៩ឆ្នាំ រង់ចាំពន្លឺយុត្តិធម៌»៕