ដោយ ម៉ៅ សុធានី
2023.02.10
RFA
សកម្មភាពលក់ដូររបស់អាជីវករនៅផ្សារឆ្នាំង ក្នុងក្រុងកំពង់ឆ្នាំង កាលពីថ្ងៃទី១១ មីនា ឆ្នាំ២០១៦។ RFA File
ធនាគារអភិវឌ្ឍអាស៊ី (ADB) បានចុះកិច្ចសន្យាផ្តល់ប្រាក់កម្ចី ចំនួន១០លានដុល្លារ ដល់ធនាគារប្រៃសណីយ៍កម្ពុជា (CP Bank) សំរាប់កម្មវិធីមីក្រូហិរញ្ញវត្ថុដើម្បីជួយស្តារសហគ្រាសធុនតូចនិងមធ្យមឡើងវិញ ក្រោយពីជំងឺរាតត្បាតកូវីដ១៩ ហើយដែល៥០% នៃអ្នកខ្ចីប្រាក់ គឺជាស្ត្រី។
គេហទំព័រធនាគារអភិវឌ្ឍអាស៊ី ដែលបានដកស្រង់សំដីអនុប្រធានធនាគារ អ្នកស្រី អាស្សហុក ឡាវ៉ាសា (Ashok Lavasa) ឲ្យដឹងថា ការធ្វើឲ្យប្រសើរឡើងនៃលទ្ធភាពទទួលបានប្រាក់កម្ចី មានអត្ថប្រយោជន៍មិនត្រឹមតែកំណើនសេដ្ឋកិច្ចរបស់ពួកគេនោះទេ គឺថែមទាំងជួយបង្កើនការងារបន្ថែម និងការស្តារសេដ្ឋកិច្ចឡើងវិញឲ្យបានទំលំទូលាយផងដែរ។ បន្ថែមពីនេះ គម្រោងផ្តល់ប្រាក់កម្ចីនេះ នឹងជួយគាំទ្រដល់អាជីវកម្មរបស់ពួកគេ ដើម្បីអាចចូលរួមប្រកួតប្រជែងក្នុងបណ្ដាញផលិតកម្មក្នុងស្រុក និងអន្តរជាតិ។
ធនាគារប្រៃសណីយ៍កម្ពុជា នឹងផ្តល់អាទិភាព ដល់ការអភិវឌ្ឍន៍ហិរញ្ញប្បទាន សំរាប់សហគ្រាសធុនតូចនិងមធ្យមទាំងនោះ ដែលត្រូវការដើមទុន និងការវិនិយោគរបស់ពួកគេ។ ធនាគារប្រៃសណីយ៍កម្ពុជា (CP Bank) គឺជាធនាគារដែលមានបណ្ដាញសាខាធំលំដាប់ទី៥ នៅប្រទេសកម្ពុជា ដោយបានផ្តល់ប្រាក់កម្ចីសំរាប់សហគ្រាសធុនតូច និងមធ្យម (MSMEs) ដល់អតិថិជន ប្រមាណជិត៣០ម៉ឺននាក់ (២៥៨.៦០០) នៅទីក្រុងនិងនៅតំបន់ជនបទ។
ចាប់តាំងពីឆ្នាំ១៩៩២មក ធនាគារអភិវឌ្ឍអាស៊ី (ADB) បានផ្តល់ប្រាក់កម្ចីដល់រដ្ឋាភិបាលកម្ពុជា និងវិស័យឯកជន ជិត ៥ពាន់លានដុល្លារ (4.7 Billion)។ ប្រាក់កម្ចីដល់រដ្ឋាភិបាល គឺប្រើប្រាស់ សំរាប់ វិស័យកសិកម្ម ប្រព័ន្ធធារាសាស្ត្រ ហិរញ្ញវត្ថុ ការដឹកជញ្ជូន ថាមពល និងការផ្គត់ផ្គង់ទឹកស្អាត និងអនាម័យ។
ជំងឺរាតត្បាតកូវីដ-១៩ បណ្តាលឱ្យពលរដ្ឋកម្ពុជា ធ្លាក់ចូលភាពក្រីក្រ ភាពគ្មានការងារធ្វើ និងវិសមភាពសង្គម កាន់តែកើនឡើងខ្លាំងថែមទៀត។
របាយការណ៍របស់ធនាគារពិភពលោកចេញផ្សាយកាលពីថ្ងៃទី២៨ ខែវិច្ឆិកា ឆ្នាំ២០២២ បង្ហាញថា នៅក្នុងរយៈពេល១០ឆ្នាំចាប់ពីឆ្នាំ២០០៩ ដល់ ២០១៩ អត្រាភាពក្រីក្ររបស់កម្ពុជាបានធ្លាក់ចុះពីកម្រិតជិត ៣៤% (៣៣,៨) មកនៅត្រឹមជិត ១៨% (១៧,៨) ដោយជួយឱ្យពលរដ្ឋជិត ២លាននាក់បានរួចផុតពីភាពក្រីក្រ។ ប៉ុន្តែ ចាប់តាំងពីឆ្នាំ២០២០មក ប្រជាជនប្រមាណជាងកន្លះលាននាក់ បានធ្លាក់ចូលនៅក្រោមកម្រិតប្រាក់ចំណូលនៃភាពក្រីក្រវិញ គឺប្រមាណជាង ១ម៉ឺនរៀល ឬ២,៧ ដុល្លារក្នុងមួយថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។