ដោយ សុជីវី
2023.08.08
RFA
ស្ដាប់ ឬទាញយកសំឡេង
ព្រះមហាក្សត្រព្រះបាទសម្ដេច នរោត្តម សីហមុនី រូប៖ ហ្វេសប៊ុករដ្ឋសភា
ព្រះមហាក្សត្រព្រះបាទសម្ដេច នរោត្តម សីហមុនី កោះហៅបេក្ខជនជាប់ឆ្នោតជាតំណាងរាស្ត្រទាំង១២៥រូប ត្រូវចូលប្រជុំសភាលើកដំបូងនៅថ្ងៃទី២១ ខែសីហាខាងមុខ។ អ្នកនាំពាក្យគណបក្សប្រជាជនកម្ពុជាអះអាងថា បេក្ខជនជាប់ឆ្នោតរបស់គណបក្សទាំង ១២០រូប បានត្រៀមខ្លួនរួចហើយ ក្នុងការចូលរួមកិច្ចប្រជុំដ៏មានសារសំខាន់នោះ។
ព្រះមហាក្សត្រចេញព្រះរាជសារត្រាស់បង្គាប់ឱ្យបេក្ខជនជាប់ឆ្នោតជាតំណាងរាស្ត្រ ទាំង ១២៥រូប មកពីគណបក្សប្រជាជនកម្ពុជា ចំនួន ១២០រូប និងមកពីគណបក្សហ៊្វុនស៊ិនប៉ិច ចំនួន ៥រូប ដើម្បីចូលរួមក្នុងសម័យប្រជុំដំបូងនៃរដ្ឋសភាអាណត្តិទី៧ នៅព្រឹកថ្ងៃចន្ទ ទី២១ ខែសីហា នៅវិមានរដ្ឋសភា ក្រុងភ្នំពេញ។ ព្រះរាជសារនេះចុះកាលពីថ្ងៃទី៥ ខែសីហា តែទើបត្រូវបានផ្សព្វផ្សាយដោយបេក្ខជនជាប់ឆ្នោតជាតំណាងរាស្ត្រ របស់គណបក្សប្រជាជនកម្ពុជា នៅថ្ងៃទី៨ ខែសីហា។
ទាក់ទងព្រះរាជសារត្រាស់បង្គាប់របស់ព្រះមហាក្សត្រពេលនេះ វិទ្យុអាស៊ីសេរីមិនអាចសុំការបញ្ជាក់បន្ថែម ពីអ្នកនាំពាក្យរដ្ឋសភា លោក ឡេង ប៉េងឡុង បានទេនៅថ្ងៃទី០៨ ខែសីហា។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន ឱ្យវិទ្យុអាស៊ីសេរីដឹងថា បេក្ខជនជាប់ឆ្នោតជាតំណាងរាស្ត្ររបស់គណបក្សកាន់អំណាចត្រៀមខ្លួន និងឯកសណ្ឋានរួចហើយ ដើម្បីចូលប្រជុំសភាតាមព្រះរាជសាររបស់ព្រះមហាក្សត្រ។ លោក សុខ ឥសាន ឱ្យដឹងទៀតថា តាមនីតិវិធី ថ្ងៃប្រជុំដំបូង នៅថ្ងៃទី២១ សីហា ខាងមុខនេះចាប់ផ្ដើមការដោយការមានព្រះបន្ទូលពីព្រះមហាក្សត្រ ក្រោយមកព្រឹទ្ធបុរសម្នាក់ក្នុងចំណោមបេក្ខជនជាប់ឆ្នោតជាតំណាងរាស្ត្រទាំង ១២៥រូបនោះ ដឹកនាំអង្គប្រជុំ និងការប្រកាសសុពលភាពសមាជិកសភាជាប់ឆ្នោតសម្រាប់អាណត្តិថ្មី។
លោកបន្តថា ក្រោយមកទៀត រដ្ឋសភារៀបចំបោះឆ្នោត ជ្រើសតាំងប្រធានរដ្ឋសភា អនុប្រធានទី១ និងអនុប្រធានទី២ នៃរដ្ឋសភា និងការបង្កើតគណៈកម្មការជំនាញទាំង ១០នៃរដ្ឋសភា។ លោកបន្តទៀត នៅល្ងាចថ្ងៃទី២១ សីហា សមាជិកសភាទាំង ១២៥រូប នឹងនាំគ្នាទៅស្បថនៅក្នុងព្រះបរមរាជវាំង។
លោក សុខ ឥសាន៖«គេត្រៀមពីចម្ងាយរួចហើយ ខោអាវក៏កាត់ហើយ ផាមួងហួលក៏ហើយអស់ហើយ ថ្ងៃទី២១ ខែសីហា មិនមែនជាព្រឹត្តិការណ៍ប្រវត្តិសាស្ត្រសម្រាប់តែគណបក្សប្រជាជនកម្ពុជា ដែលឈ្នះឆ្នោតទេ តែជាព្រឹត្តិការណ៍ប្រវត្តិសាស្ត្ររបស់ព្រះរាជាណាចក្រទាំងមូលតែម្ដងបាទ»។
បើតាមបញ្ជីរបស់ គ.ជ.ប បេក្ខជនជាប់ឆ្នោតជាតំណាងរាស្ត្រ ជាព្រឹទ្ធបុរស ដែលមានអាយុច្រើនជាងគឺលោក ហេង សំរិន លោកមានអាយុ ៨៩ឆ្នាំ។ ទោះយ៉ាងណា លោក សុខ ឥសាន បញ្ជាក់ថា លោក ហេង សំរិន មិនឈរឈ្មោះជាប្រធានរដ្ឋសភា ទៀតទេ ព្រោះលោក ហេង សំរិន បានប្រកាសក្នុងសន្និបាតរបស់គណៈកម្មាធិការកណ្ដាលគណបក្សប្រជាជនកម្ពុជា រួចហើយថា លោកមិនបន្តធ្វើជាប្រធានរដ្ឋសភាទៀតទេ សម្រាប់អាណត្តិថ្មីនេះ។ ទោះយ៉ាងណា លោក សុខ ឥសាន មិនទាន់បញ្ជាក់ថា ឥស្សរជនជាន់ខ្ពស់របស់គណបក្សប្រជាជនកម្ពុជា រូបណា នឹងឡើងអង្គុយកៅអីប្រធានរដ្ឋសភា ជំនួសលោក ហេង សំរិន នៅឡើយទេ។
ដោយឡែកចំពោះការបោះឆ្នោតរបស់រដ្ឋសភា ដើម្បីផ្ដល់សេចក្ដីទុកចិត្តដល់គណៈរដ្ឋមន្ត្រីថ្មី ដែលរដ្ឋាភិបាលនេះ គ្រោងដឹកនាំដោយកូនប្រុសរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត នឹងត្រូវធ្វើនៅព្រឹកថ្ងៃទី២២ ខែសីហា ហើយនៅរសៀលថ្ងៃដដែលនោះ គណៈរដ្ឋមន្ត្រីថ្មី ដែលទទួលបានការបោះឆ្នោតគាំទ្រពីរដ្ឋសភា នឹងនាំគ្នាទៅស្បថនៅក្នុងព្រះបរមរាជវាំង។ កាលពីថ្ងៃទី៧ ខែសីហា ព្រះមហាក្សត្រ បានត្រាស់បង្គាប់ឱ្យលោក ហ៊ុន ម៉ាណែត ដែលជានាយករដ្ឋមន្ត្រីថ្មី មានភារកិច្ចរៀបចំសមាសភាពរាជរដ្ឋាភិបាលថ្មី ដើម្បីសុំសេចក្ដីអនុម័តទុកចិត្តពីរដ្ឋសភា។
ទាក់ទងរឿងនេះ អ្នកសម្របសម្រួលផ្នែកអង្កេតរបស់អង្គការឃ្លាំមើលការបោះឆ្នោត ខុមហ្វែ្រល (COMFREL) លោក កន សាវាង្ស ដែលធ្វើការទាក់ទងការបោះឆ្នោត សង្កេតឃើញថា ព្រះរាជសាររបស់ព្រះមហាក្សត្រពេលនេះ គឺជានីតិវិធី ដើម្បីឱ្យបេក្ខជនជាប់ឆ្នោតជាតំណាងរាស្ត្រ ទទួលបានសុពលភាពជាសមាជិករដ្ឋសភា ជាផ្លូវការ។ លោកកត់សម្គាល់ ការអនុវត្តច្បាប់ថ្មីនៅពេលនេះ ធ្វើឱ្យពលរដ្ឋ ពិបាកតាមដានសភាពការណ៍ជាតិ ឬការជ្រើសរើសអ្នកដឹកនាំរបស់ស្ថាប័នកំពូលៗរបស់ជាតិ ត្បិតអីបើទោះជាបេក្ខជននាយករដ្ឋមន្ត្រី ត្រូវបានព្រះមហាក្សត្រត្រាស់បង្គាប់ រួចរាល់ហើយក្ដី តែបេក្ខជនប្រធានរដ្ឋសភា និងអនុប្រធានទី១ និងអនុប្រធានទី២ រដ្ឋសភា មិនទាន់ត្រូវបានបង្ហាញនៅឡើយ។
លោក កន សាវាង្ស៖ «សម្រាប់ខ្ញុំតាមដានដែរ ហើយមានលក្ខណៈខុសពីមុនបន្តិចបាទ ខ្ញុំពិបាកក្នុងការយល់ដែរ និយាយឱ្យមែនទែនទៅដោយសារច្បាប់នេះថ្មីការកែប្រែថ្មី អ៊ីចឹងទាំងបទពិសោធន៍ទាំងការបកស្រាយទាំងការអនុវត្តជាក់ស្ដែងនេះស្ថិតក្នុងការតាមដានទាំងគ្នាបាទ»។
ក្នុងដំណើរការនៃការផ្ទេរតំណែងនាយករដ្ឋមន្ត្រី ពីលោក ហ៊ុន សែន ទៅលោក ហ៊ុន ម៉ាណែត ពេលនេះ លោក ហ៊ុន សែន បានបញ្ជាឱ្យកែរដ្ឋធម្មនុញ្ញ ដោយការតែងតាំងបេក្ខជននាយករដ្ឋមន្ត្រីរបស់គណបក្សឈ្នះឆ្នោត មិនចាំបាច់ឆ្លងកាត់ ការផ្ដល់ទំនុកចិត្តពីរដ្ឋសភាដូចមុនទៀត គឺគណបក្សឈ្នះឆ្នោតមានសិទ្ធិស្នើឈ្មោះបេក្ខជននាយករដ្ឋមន្ត្រី ទៅព្រះមហាក្សត្រ មុនកិច្ចប្រជុំដំបូងរបស់រដ្ឋសភា ចំណែករដ្ឋសភា គឺត្រឹមបោះឆ្នោតផ្ដល់ទំនុកចិត្តតាមក្រោយប៉ុណ្ណោះ។
អ្នកវិភាគនយោបាយ លោក គឹម សុខ យល់ថា ព្រះរាជសារ របស់ព្រះមហាក្សត្រ គឺព្រះអង្គត្រូវធ្វើតាមសំណើរបស់លោក ហ៊ុន សែន ជាអ្នករៀបចំចាត់ចែងស្នើទៅព្រះអង្គ។ អ្នកវិភាគ រូបនេះយល់ថា បើទោះជាពេលនេះ ដំណើរការផ្ទេរតំណែង ទៅឱ្យលោក ហ៊ុន ម៉ាណែត កំពុងដំណើរការគ្មានការរំខានក្ដី ប៉ុន្តែ ពេលខាងមុខនេះ រដ្ឋាភិបាលថ្មីរបស់លោក ហ៊ុន ម៉ាណែត ក៏ត្រូវប្រឈមនឹងវិបត្តិសង្គម និងទណ្ឌកម្មពីសហគមន៍អន្តរជាតិផងដែរ។
លោក គឹម សុខ៖ «ទាំងវិបត្តិនយោបាយ វិបត្តិសេដ្ឋកិច្ចពាណិជ្ជកម្ម វិបត្តិអត់ការងាររបស់ប្រជាពលរដ្ឋ វិបត្តិនៃភាពក្រីក្ររបស់ប្រជាពលរដ្ឋវិបត្តិសុខាភិបាល វិបត្តិអប់រំ ពីព្រោះរដ្ឋក៏មានវិបត្តិហិរញ្ញវត្ថុគឺ អត់លុយដោយសារតែអ្នកវិនិយោគចូលប្រទេសកម្ពុជា ក៏កាន់តែខើច ហើយអ្នកកំពុងក៏នឹងដើរចេញដូច្នេះគំនរវិបត្តិច្រើនណាស់ធ្លាក់ដល់វិបត្តិសង្គមតែម្ដង»។
គិតមកដល់ពេលនេះ ក្រុមប្រទេសលោកសេរីមិនទាន់ចេញសារអបអរគណបក្សប្រជាជនកម្ពុជា ដែលឈ្នះឆ្នោតដោយគ្មានគូប្រកួតប្រជែងគឺគណបក្សភ្លើងទៀន ចូលរួមនៅឡើយទេ ផ្ទុយទៅវិញ សហរដ្ឋអាមេរិក និងសហភាពអឺរ៉ុប ប្រកាសថា ពួកគេនឹងមានវិធានការលើរដ្ឋាភិបាលថ្មីរបស់គណបក្សប្រជាជនកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
shame on you your majesty ,you really the king dump of KAMPOUCHEA . for me I rather being a dishwasher instate of being a dump king
SIHAKMONEY is not the king of Cambodia instated he is only KING GARUE that all . who is the real king right now >>> HAS…HAS…HA…… HUN NAL call HUN SEN next name CHHOUP SAMLAP is the real king right now … after all HUN SEN is the GOD KING in this KINGDUMP of CAMBODIA