ដោយ ម៉ៅ សុធានី
2023.09.15
RFA
លោក នីណាក់ ដែលកំពុងសម្រាកព្យាបាលនៅមន្ទីរពេទ្យ មានសភាពធូរស្បើយច្រើន នៅថ្ងៃទី១៥ ខែកញ្ញា ឆ្នាំ២០២៣។ រូប៖ ហ្វេសប៊ុក iMan-KH
អ្នកជំនាញកសិកម្ម លោក នី ណាក់ ដែលត្រូវជនមិនស្គាល់មុខមួយក្រុមព្រួតវាយឱ្យរបួសក្បាលធ្ងន់ធ្ងរ ប្រកាសចុះចូលបម្រើរដ្ឋាភិបាលរបស់លោក ហ៊ុន ម៉ាណែត ប្រសិនបើសមត្ថកិច្ចរកឃើញជនល្មើសមកផ្ដន្ទាទោសតាមច្បាប់។
លោក នីណាក់ ដែលកំពុងសម្រាកព្យាបាលនៅមន្ទីរពេទ្យ បានសរសេរក្នុងទំព័រហ្វេសប៊ុករបស់លោក ឈ្មោះ (IMan-KH) កាលពីថ្ងៃយប់អធ្រាត្រ កាលពីថ្ងៃទី១៥ ខែកញ្ញា ដោយមានភ្ជាប់រូបថតមួយសន្លឹករបស់លោក ថតជាមួយលោកនាយករដ្ឋមន្ត្រី ហ៊ុន ម៉ាណែត ថា លោកមាន ក្ដីសង្ឃឹមតែមួយគត់ ចំពោះយុត្តិធម៌ នៃអំពើហិង្សា គឺសូមលោក ហ៊ុន ម៉ាណែត ជួយពន្លឿនដល់ការស៊ើបអង្កេតរបស់សមត្ថកិច្ច ដើម្បីរកមុខអ្នកពាក់ព័ន្ធ និងអ្នកដៃដល់មកដាក់ទោស។ លោក នី ណាក់ បន្តថា បើលោក ហ៊ុន ម៉ាណែត ជួយបាន លោក នឹងប្រកាសចុះចូលបម្រើរាជរដ្ឋាភិបាល ក្រោយពេលយុត្តិធម៌កើតមាន។
វិទ្យុអាស៊ីសេរីព្យាយាមទូរស័ព្ទទៅប្រពន្ធលោក នី ណាក់ គឺលោកស្រី សុខ ស៊ីណែត ជាច្រើនដង ដើម្បីសាកសួរព័ត៌មានបន្ថែមថា តើខាងសមត្ថកិច្ចមានតម្រុយអំពីការស្វែងរកក្រុមជនល្មើស ដែលបានព្រួតគ្នាវាយលោកនឹងដំបងដែក កាលពីថ្ងៃទី១២ ខែកញ្ញាកន្លងមកនេះដែរឬទេ។ សមត្ថកិច្ចបានទទួលបានបណ្ដឹងលោក នី ណាក់ ហើយ ប៉ុន្តែបដិសេធមិនផ្តល់វីដេអូ អំពីកាមេរ៉ាសុវត្ថិភាព ដោយលោកយកលេសថា រូបភាពកាមេរ៉ាមិនច្បាស់។
ប្រពន្ធលោក នី ណាក់ គឺលោកស្រី សុខ ស៊ីណែត ក៏បានសរសេរសារយ៉ាងខ្លីថា ស្ថានភាពប្តី នៅព្រឹកថ្ងៃទី១៥ ខែកញ្ញា មានសភាពល្អប្រសើរកាលពីមួយថ្ងៃមុន ដែលនៅតែធ្ងន់ធ្ងរ វិលមុខ ក្អួត នៅពេលធ្វើការផ្លាស់ប្ដូរឥរិយាបថ បន្តិចបន្តួច។ លោក ស្រី អរគុណបងប្អូន និងក្រុមគ្រូពេទ្យ ដែលបានខ្នះខ្នែងសង្គ្រោះអាយុជីវិតរបស់លោក នី ណាក់ យ៉ាងយកចិត្តទុកដាក់។
លោកស្រី សុខ ស៊ីណែត ធ្លាប់បានប្រាប់វិទ្យុអាស៊ីសេរីថា នៅរសៀលនៅថ្ងៃទី១២ ខែកញ្ញា មានជនមិនស្គាល់មុខបានជិះម៉ូតូបុកម៉ូតូប្តីលោកស្រីពីក្រោយនៅពេលលោកស្រី និងប្ដីធ្វើដំណើរចេញពីម្ដុំវត្តចំពុះក្អែកសំដៅទៅផ្ទះ។ ក្រោយម៉ូតូដួលមនុស្សប្រុសមួយក្រុម ស្លៀកពាក់ខ្មៅ មានពាក់មួកឃ្លុបបិទមុខជិត ដៃកាន់ដំបងដែកសម្រុកវាយសន្ធាប់លើក្បាល លោក នី ណាក់ ឱ្យបែកក្បាលជាច្រើនកន្លែង ឈាមស្រោចខ្លួន និងសន្លប់នៅនឹងកន្លែង។
លោកស្រីសង្ស័យថា ការវាយធ្វើបាបប៉ុនប៉ងសម្លាប់ លោក នីណាក់ នៅពេលនេះពាក់ព័ន្ធនឹងលោកបន្តនិយាយ ពីបញ្ហាសង្គមនៅលើបណ្ដាញសង្គមហ្វេសប៊ុក ព្រោះគ្រួសាររបស់លោកស្រីពុំមានទំនាស់ ឬគំនុំជាមួយនរណាឡើយ។
គិតមកដល់ពេលនេះមានសកម្មជនសង្គម និងនយោបាយ មិនតិចជាង ៥០នាក់ទេ ដែលរងការលួចវាយប្រហារ ភាគច្រើនជាការប៉ុនប៉ងវាយសម្លាប់ ដោយប្រើដំបងដែកវាយសន្ធាប់ទៅលើក្បាលជនរងគ្រោះ នៅក្រោមការដឹកនាំរបស់អតីតនាយករដ្ឋមន្ត្រី លោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
សម្ដី នីណាក់ គួរឲ្យចាប់អារម្មណ៍! នេះគឺជាពាក្យប្រស្នារបស់ខ្មែរពោលថា(អង្គុយខ្ពស់ជាងឈរនរណាមិនរកឆ្កែ)។ រកឲ្យឃើញ ប្អូន ម៉ាណែត កុំឲ្យមហាជនខ្មែរនៅសង្ស័យលើរបបពុករលួយរបស់ប្អូន។