ដោយ សេក បណ្ឌិត
2023.10.25
RFA
ស្ដាប់ ឬទាញយកសំឡេង
លោក ហ៊ុន សែន ក្នុងជំនួបរវាងគណបក្សកាន់អំណាច ជាមួយគណបក្សសម្ពន្ធភាពរបស់ខ្លួនចំនួន២៧ នៅទីស្នាក់ការកណ្ដាលគណបក្សប្រជាជនកម្ពុជា ឬវិមាន ៧មករា នៅថ្ងៃទី២៥ ខែតុលា ឆ្នាំ២០២៣។ រូប៖ ហ្វេសប៊ុកលោក ហ៊ុន សែន
លោក ហ៊ុន សែន ប្រធានគណបក្សប្រជាជនកម្ពុជា ប្រាប់ទៅគណបក្សសម្ព័ន្ធមិត្តរបស់ខ្លួនទាំង២៧ ថា ឱ្យត្រៀមខ្លួនកម្ចាត់អ្នកនយោបាយមួយក្រុម ដែលលោកចោទថា ជាក្រុមជ្រុលនិយម។ អ្នកវិភាគនយោបាយ និងមន្ត្រីបក្សប្រឆាំងថា សំដីរបស់ ហ៊ុន សែន ជាការបង្គាប់បញ្ជាលើគណបក្សសម្ព័ន្ធមិត្ត ដើម្បីបំបិទសំឡេងបក្សប្រឆាំងចេញពីកម្ពុជា។
ជំនួបរវាងគណបក្សកាន់អំណាច ជាមួយគណបក្សសម្ពន្ធភាពរបស់ខ្លួនចំនួន២៧ លោក ហ៊ុន សែន ដែលមានរយៈពេលជាងមួយម៉ោង គឺលោក ហ៊ុន សែន ត្រូវបានធ្វើឡើងនៅទីស្នាក់ការកណ្ដាលគណបក្សប្រជាជនកម្ពុជា ឬវិមាន៧មករា នៅថ្ងៃទី២៥ ខែតុលា។
ថ្លែងទៅកាន់តំណាងគណបក្សសម្ពន្ធភាពរបស់ខ្លួន លោក ហ៊ុន សែន លើកឡើងថា អ្នកនយោបាយមួយក្រុម ដែលលោកចោទប្រកាន់ថា ជាក្រុមជ្រុលនិយម ពួកគេមានផែនការផ្ដួលរំលំរដ្ឋាភិបាល និងបំផ្លាញសន្តិភាព។ លោក ហ៊ុន សែន ទាមទារឱ្យគណបក្សសម្ព័ន្ធទាំង ២៧គណបក្ស ត្រូវរួមគ្នាទប់ស្កាត់ និងកម្ចាត់ចោលក្រុមជ្រុលនិយមនេះចោល។ លោក ហ៊ុន សែន អះអាងថា ជំហរបែបនេះ គឺជាកិច្ចព្រមព្រៀងរបស់គណបក្សប្រជាជនកម្ពុជា ជាមួយគណបក្ស ដែលចងសម្ពន្ធភាព។ ទោះសាររបស់លោក ហ៊ុន សែន មានចរិតបង្គាប់បញ្ជាលើគណបក្សសម្ពន្ធភាពក្ដី ប៉ុន្តែ លោក ហ៊ុន សែន ថ្លែងការពារគណបក្សទាំង២៧ ថា គណបក្សទាំងនោះមិនមែនជាគណបក្សអាយ៉ងរបស់គណបក្សប្រជាជនកម្ពុជាឡើយ។
លោក ហ៊ុន សែន៖ «នេះជាទិដ្ឋភាពទាំងឡាយ ដែលខ្ញុំសុំបញ្ជាក់ថា យើងត្រូវរួមគ្នា ដើម្បីកម្ចាត់ចោលនូវនយោបាយជ្រុលនិយម ដូចដែលខ្ញុំធ្លាប់ដាក់ទិសដៅថា ត្រូវកម្ចាត់ចោលអង្គការចាត់តាំងនយោបាយ និងយោធាពួកខ្មែរក្រហម ខ្ញុំធ្វើបានសម្រេច។ ឥឡូវ ខ្ញុំចង់ប្រមូលអ្នកទាំងអស់គ្នាអត់ធ្វើកិច្ចការដ៏លំបាកទេ»។
គណបក្សនយោបាយចំនួន២៧ ដែលចងសម្ពន្ធភាពជាមួយគណបក្សប្រជាជនកម្ពុជា គណបក្សពន្លឺថ្មី គណបក្សសញ្ជាតិកម្ពុជា គណបក្សរស្មីខេមរា គណបក្សសំបុកឃ្មុំសង្គមប្រជាធិបតេយ្យ គណបក្សកសិករ គណបក្សស្ត្រី ដើម្បីស្ត្រី គណបក្សយុវជនកម្ពុជា និងគណបក្សខ្មែរតែមួយជាដើម។ គណបក្សទាំង២៧ នេះ បានព្រមព្រៀងជាមួយគណបក្សប្រជាជនកម្ពុជាចំនួន ៨ចំណុច មានដូចជា ពង្រឹងកិច្ចសហប្រតិបត្តិការស្មើភាព ស្មើសិទ្ធិ ការពាររដ្ឋធម្មនុញ្ញ និងរបបរាជានិយម ការពារឯករាជ្យ អធិបតេយ្យ បូរណភាពទឹកដី និងសហការគ្នាទប់ស្កាត់ និងកម្ចាត់ចោលនយោបាយជ្រុលនិយមជាដើម។
ជុំវិញរឿងនេះដែរ មន្ត្រីជាន់ខ្ពស់គណបក្សសង្គ្រោះជាតិប្រចាំខេត្តកំពង់ឆ្នាំង ដែលកំពុងភៀសខ្លួននៅប្រទេសថៃ លោក ដួង ចន្ត្រា យល់ថា សម្ព័ន្ធភាពរបស់គណបក្សកាន់អំណាចនៅពេលនេះគ្រាន់តែជាសម្ពន្ធភាពក្លែងក្លាយដើម្បីបន្លំភ្នែកពលរដ្ឋប៉ុណ្ណោះ។ មន្ត្រីជាន់ខ្ពស់គណបក្សប្រឆាំងរូបនេះលើកឡើងទៀតថា សារព្រមានរបស់លោក ហ៊ុន សែន ទំនងចង់សំដៅលើមេដឹកនាំនយោបាយ និងសកម្មជនគណបក្សសង្គ្រោះជាតិ និងសកម្មជនគណបក្សភ្លើងទៀន។ លោកថា លោក ហ៊ុន សែន នៅតែព្យាយាមតាមកម្ចាត់ ឫសគល់គណបក្សប្រឆាំង ដើម្បីរក្សាអំណាចរបស់គណបក្សប្រជាជនកម្ពុជា។
លោក ដួង ចន្ត្រា៖«អ្នកដែលមានសកម្មភាពសម្រាប់ចូលរួមការបោះឆ្នោតពិតប្រាកដមានតែគណបក្សសង្គ្រោះជាតិ ហើយនិងសកម្មជនគណបក្សភ្លើងទៀនតែប៉ុណ្ណោះ ដែលជាកម្លាំងពិតរបស់ប្រជាពលរដ្ឋក្នុងការផ្លាស់ប្ដូររដ្ឋាភិបាលនេះ អ៊ីចឹងហើយបានជាលោក ហ៊ុន សែន គាត់នៅតែតាមកម្ចាត់ឫសគល់អ្នក ដែលប្រជាធិបតេយ្យនិយម ក៏ដូច សម រង្ស៊ី និយមនេះឯងនេះ»។
ទាក់ទងសារនយោបាយរបស់លោក ហ៊ុន សែន ថាតាមកម្ចាត់អ្នកនយោបាយជ្រុលនិយមនេះ បើទោះជាលោក ហ៊ុន សែន មិនបញ្ចេញឈ្មោះអ្នកនយោបាយរូបណាក្ដី ប៉ុន្តែ មនុស្សដែលលោក ហ៊ុន សែន ទំនងចង់សំដៅគ្មានអ្នកណាក្រៅពីលោក សម រង្ស៊ី ប្រធានស្ដីទីគណបក្សសង្គ្រោះជាតិ និងបក្ខពួកឡើយ។ ត្បិតមេដឹកនាំគណបក្សកាន់អំណាចរូបនេះ នៅតែចោទប្រកាន់ថា ចលនា ៩វិច្ឆិកា របស់លោក សម រង្ស៊ី គឺជាទម្រង់នៃការផ្ដួលរំលំរដ្ឋាភិបាល បំផ្លាញសន្តិភាព ហើយតុលាការកំពុងកាត់ក្ដីលើសំណុំរឿងនេះនៅឡើយ។
អ្នកវិភាគនយោបាយ លោក គឹម សុខ យល់ថា សាររបស់លោក ហ៊ុន សែន នៅពេលនេះជាការបញ្ជាក់ថា គណបក្សទាំង២៧ មិនមានតម្លៃស្មើមុខជាមួយគណបក្សប្រជាជនកម្ពុជា តែគណបក្សទាំងនោះគ្រាន់តែរង់ចាំធ្វើតាមបញ្ជារបស់លោក ហ៊ុន សែន ឬរបស់គណបក្សកាន់អំណាចប៉ុណ្ណោះ។ លោកបន្តទៀតថា ក្រោយចុះព្រមព្រៀងសម្ពន្ធភាពរួចហើយ គណបក្សទាំង២៧នេះ អាចនឹងចាប់ផ្ដើមធ្វើសកម្មភាពអុកឡុកក្រុមគណបក្សភ្លើងទៀន ឬសម្ព័ន្ធមិត្តរបស់គណបក្សភ្លើងទៀន។
លោក គឹម សុខ៖«គេ (គណបក្សទាំង២៧) ត្រូវបម្រើនូវល្បិចកលរបស់លោក ហ៊ុន សែន អត់មានអ្វីធ្វើក្រៅពីលោក ហ៊ុន សែន ចង្អុលថា តទល់នឹងសម្ព័ន្ធអ្នកប្រជាធិបតេយ្យបែបណា គឺតទល់បែបហ្នឹងត្រូវធ្វើបាតុកម្មតទល់ ធ្វើបាតុកម្មតទល់ ត្រូវនាំគ្នាតទល់នឹងសម្ព័ន្ធអ្នកប្រជាធិបតេយ្យណាបែបណា គឺតទល់បែបហ្នឹង ត្រូវនាំគ្នាទៅបង្ហាញសកម្មភាពដល់មុខទីស្នាក់ការនៃសម្ព័ន្ធអ្នកប្រជាធិបតេយ្យគឺគេធ្វើសកម្មភាពបែបហ្នឹង ហ៊ុន សែន ឱ្យប្ដឹង គឺត្រូវតែប្ដឹងទៅតុលាការ»។
លោក ហ៊ុន សែន បានប្រកាសទទួលយកការសុំចងសម្ពន្ធភាពពីគណបក្សក្រៅរដ្ឋាភិបាលជិត៣០ កាលថ្ងៃទី១១ ខែតុលា បើទោះជាគណបក្សមានតែឈ្មោះតែហាក់មិនឃើញធ្វើសកម្មភាពនយោបាយក្ដី ហើយគណបក្សខ្លះមានត្រឹមតែឈ្មោះ តែមិនបានចូលរួមការបោះឆ្នោតក៏មាន។ សម្ពន្ធភាពរបស់គណបក្សកាន់អំណាចនៅពេលនេះ ក្រោយពេលបក្សភ្លើងទៀន ដែលជាគណបក្សប្រឆាំងចុងក្រោយនៅកម្ពុជា បានប្រកាសជាផ្លូវការចងសម្ពន្ធភាពជាមួយគណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។