ដោយ ច័ន្ទ ដារ៉ូ
2023.11.14
RFA
ស្ដាប់ ឬទាញយកសំឡេង
លោក តូច ថឹង មន្ត្រីបក្សភ្លើងទៀនប្រចាំខេត្តកំពង់ចាម ពេលនគរបាលនាំមកស្ដាប់ការប្រកាសសាលដីការបស់តុលាការកំពូល កាលពីថ្ងៃទី១០ ខែវិច្ឆិកា ឆ្នាំ២០២៣ ដែលប្រធានក្រុមប្រឹក្សាជំនុំជម្រះ លោក យូរ ប៊ុនឡេង បដិសេធបណ្ដឹងស្នើសុំនៅក្រៅឃុំបណ្ដោះអាសន្ន។ Photo: RFA
គ្រួសារជនជាប់ឃុំថា លោក តូច ថឹង មន្ត្រីបក្សភ្លើងទៀន កំពុងរងសម្ពាធផ្លូវចិត្តជាខ្លាំងក្រោយពេលអាជ្ញាធរផ្ទេរទៅឃុំនៅពន្ធនាគារដាច់ស្រយាលឆ្ងាយពីគ្រួសារ និងមិត្តភ័ក្ដិ។ គ្រួសារ និងមន្ត្រីសិទ្ធិមនុស្សស្នើដល់អាជ្ញាធរពាក់ព័ន្ធឱ្យពិចារណាក្នុងការផ្ទេរលោក តូច ថឹង មកពន្ធនាគារនៅភ្នំពេញវិញ ដើម្បីជៀសពីការរិះគន់នានា ថា ករណីនេះជាប់ពាក់ព័ន្ធការធ្វើទុក្ខបុកម្នេញ ឬរើសអើងផ្នែកនយោបាយលើអ្នក ដែលមាននិន្នាការផ្ទុយរដ្ឋាភិបាល។
គ្រួសារបារម្ភពីស្ថានភាពសុខភាព និងស្មារតីរបស់លោក តូច ថឹង ដែលមានវ័យចំណាស់ និងមានជំងឺប្រចាំកាយថា អាចដុនដាបជាងពេលជាប់ឃុំនៅក្នុងពន្ធនាគារព្រៃស ពីព្រោះការផ្ទេរទៅពន្ធនាគារឆ្ងាយបានបង្កការលំបាកដល់ពួកគេក្នុងការធ្វើដំណើរទៅសួរសុខទុក្ខ និងការផ្គត់ផ្គង់ចំណីអាហារមិនបានគ្រប់គ្រាន់ដូចពីមុនជាដើម។
ប្រពន្ធរបស់មន្ត្រីបក្សភ្លើងទៀនប្រចាំខេត្តកំពង់ចាម លោក តូច ថឹង គឺលោកស្រី សុ វណ្ណា ប្រាប់វិទ្យុអាស៊ីសេរីនៅថ្ងៃទី១៣ ខែវិច្ឆិកាក្រោយចេញពីជួបប្តីថា លោកស្រីបានចំណាយពេល ២ថ្ងៃធ្វើដំណើរពីភ្នំពេញ និងចំណាយសោហ៊ុយជាច្រើន ដើម្បីមកសួរសុខទុក្ខ ផ្ញើថ្នាំពេទ្យ ម្ហូបអាហារ និងសម្ភារៈមួយចំនួនទៀត ជូនប្ដីនៅពន្ធនាគារជាប់ជើងភ្នំក្រវាញ។ ប៉ុន្តែលោកស្រីឱ្យដឹងថា អ្វីដែលគ្រួសារលោកស្រីខ្លោចចិត្តនោះគឺ លោក តូច ថឹង ក្នុងសំលៀកបំពាក់អ្នកទោសរងសម្ពាធផ្លូវចិត្តរហូតយំនៅមុខលោកស្រីរៀបរាប់អំពីទុក្ខលំបាក ជាពិសេស គាត់ខកចិត្តចំពោះអាជ្ញាធរបញ្ជូនទៅឃុំឃាំងនៅពន្ធនាគារក្នុងតំបន់ព្រៃភ្នំឆ្ងាយពីប្រពន្ធកូន។
លោកស្រី សុ វណ្ណា៖ «គាត់ជាមនុស្សរឹងមាំ តែខ្ញុំឃើញគាត់ស្រក់ទឹកភ្នែក គេបញ្ជូនគាត់មកហ្នឹងអត់ដឹងខ្លួនមុនទេ និយាយទៅខ្ញុំដឹងថាគាត់ខូចចិត្តហើយយកគេទៅឆ្ងាយធ្វើឱ្យប្រពន្ធកូនវេទនាពិបាករក។ គាត់នៅហ្នឹងក៏ពិបាកដូចថាគេបញ្ជូនគាត់ទៅនៅតែម្នាក់ឯង បើមានពីរនាក់អីទៅវាធូរបន្តិច នេះគាត់អត់ស្គាល់គេតែម្ដង គាត់ជាប់ឃុំណាមួយគាត់ពិបាកចិត្ត និងពិបាកនឹងក្មេងៗ ជក់បារីជាដើម»។
លោកស្រី សុ វណ្ណា ស្នើដល់អគ្គនាយកដ្ឋានពន្ធនាគារឱ្យអនុញ្ញាតឱ្យប្ដីលោកស្រីចេញទៅពិនិត្យព្យាបាលជំងឺភ្នែកតាមការណាត់របស់គ្រូពេទ្យជំនាញនៅមន្ទីរពេទ្យខាងក្រៅ នៅថ្ងៃទី២០ ខែវិច្ឆិកាខាងមុខនេះ រួមទាំងផ្ទេរគាត់មកពន្ធនាគារព្រៃសវិញផងដែរ។
វិទ្យុអាស៊ីសេរីមិនអាចទាក់ទងអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ដើម្បីឆ្លើយតបជុំវិញរឿងនេះបានទេ នៅថ្ងៃទី១៣ ខែវិច្ឆិកា។
មន្ត្រីនៃអគ្គនាយកដ្ឋានពន្ធនាគារ កាលពីព្រឹកថ្ងៃទី១០ ខែវិច្ឆិកា បានវាយខ្នោះរុញ លោក តូច ថឹង បញ្ចូលក្នុងឡានដឹកទៅឃុំខ្លួននៅមណ្ឌលអប់រំកែប្រែ (ម៤) ក្នុងស្រុកភ្នំក្រវាញ ខេត្តពោធិ៍សាត់ បន្ទាប់ពីប្រធានក្រុមប្រឹក្សាជំនុំជម្រះនៃតុលាការកំពូល លោក យូរ ប៊ុនឡេង បដិសេធបណ្ដឹងស្នើសុំនៅក្រៅឃុំបណ្ដោះអាសន្ន។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា សង្កេតឃើញថា សកម្មជនគណបក្សប្រឆាំងជាប់ឃុំមួយចំនួនតែងតែរងនូវអំពើអយុត្តិធម៌ និងការដាក់សម្ពាធផ្លូវចិត្តជាបន្តបន្ទាប់។ លោកបន្តថា ការផ្ទេរសកម្មជនទាំងនោះទៅឃុំខ្លួននៅពន្ធនាគារឆ្ងាយពីគ្រួសារ ដោយមិនសមហេតុផល បាននាំឱ្យមហាជនរិះគន់ថា ជាការធ្វើទុក្ខបុកម្នេញផ្នែកនយោបាយបន្ថែមទៀត ដែលអាជ្ញាធរគួរតែពិចារណារឿងនេះឡើងវិញ។
លោក ស៊ឹង សែនករុណា៖ «យើងខ្ញុំឃើញថាស្ថានភាពនយោបាយនៅក្នុងប្រទេស ដែលរងការរិះគន់ពីសហគមន៍អន្តរជាតិទទូចឱ្យមានការបើកនូវលំហសិទ្ធិនយោបាយទាំងសកម្មជននយោបាយ និងគណបក្សប្រកួតប្រជែងក្តីហ្នឹងយើងគួរបើកឱកាសឱ្យពួកគេបានអនុវត្តនូវសិទ្ធិសេរីភាព ប្រកួតប្រជែងដោយសេរីត្រឹមត្រូវ និងស្មើភាពជាដើមដោយកុំឱ្យពួកគេរងសម្ពាធនានា ជាដើមបាទ»។
លោក តូច ថឹង អាយុ ៧៥ឆ្នាំ មានដើមកំណើតខ្មែរក្រោម និងជាអតីតសមាជិកក្រុមការងារគណបក្សសង្គ្រោះជាតិប្រចាំខេត្តកំពង់ចាមកាលពីឆ្នាំ២០១៧ ហើយ បច្ចុប្បន្នលោកជាប្រធានគណៈកម្មាធិការប្រតិបត្តិគណបក្សភ្លើងទៀនប្រចាំខេត្ត កំពង់ចាម ដដែល។ អាជ្ញាធរក្រុងភ្នំពេញបានចាប់ខ្លួនលោក រួមជាមួយមន្ត្រីបក្សភ្លើងទៀនពីររូបផ្សេងទៀត គឺ លោក ខឿន វីរ៉ាត់ និងអ្នកស្រី នូ សុទ្ធារី កាលពីថ្ងៃទី២៤ ខែមីនា ក្រោយតុលាការក្រុងភ្នំពេញកាត់ទោសពួកគេ ឱ្យជាប់ពន្ធនាគារ ២ឆ្នាំពីបទក្លែងបន្លំឯកសារក្នុងការបង្កើតគណបក្សបេះដូងជាតិកាលពីឆ្នាំ២០២១។ ការចាប់ខ្លួននេះ គឺ ៦ម៉ោងមុនពេលតុលាការក្រុងភ្នំពេញកាត់ទោសលោក សៀម ភ្លុក ឱ្យជាប់ពន្ធនាគារ ២ឆ្នាំ ៦ខែក្នុងបទចោទដូចគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។