ដោយ វិទ្យុអាស៊ីសេរី
2023.11.13
RFA

តោះ… ប្រកួតប្រជែង​គ្នា​ដាក់​ចំណងជើង​ឱ្យ​រូបត្លុក​នយោបាយ​មួយ​នេះ! រូប៖ RFA

ពេល​ឡើង​កាន់​តំណែង​បន្ត​ពី​ឪពុក​បាន​មួយ​ខែ លោក​នាយករដ្ឋមន្ត្រី ហ៊ុន ម៉ាណែត អួត​ប្រាប់​កម្មករ​រាប់​ម៉ឺន​នាក់ នៅ​ខេត្ត​កំពង់ស្ពឺ និង​ខេត្តតាកែវ កាល​ពី​ថ្ងៃ​ទី១៩ ខែកញ្ញា​ថា លោក​បាន​ខំ​ដើរ​ទាក់​ម៉ូយ ឬ​ទាក់ទាញ​អ្នក​វិនិយោគ​ឱ្យ​មក​រកស៊ី​នៅ​ស្រុក​ខ្មែរ ព្រម​ទាំង​ផ្សព្វផ្សាយ​អំពី​វិស័យ​ទេសចរណ៍ ហើយ​ចុះ​កិច្ច​ព្រមព្រៀង​បង្កើន​ជើង​ហោះហើរ​ជា​ដើម។

ក្នុង​ពេល​លោក​អួត​នោះ ជាក់ស្ដែង សេដ្ឋកិច្ច​កម្ពុជា​កំពុង​ធ្លាក់​ចុះ​ខ្លាំង។ អាជីវករ​មួយចំនួន ត្អូញត្អែរ​ថា រក​ប្រាក់​ចំណូល​មិន​បាន​ដូច​មុន។ ពលរដ្ឋ​នៅ​ភ្នំពេញ​ជា​ច្រើន​ដាក់​លក់​ផ្ទះសម្បែង និង​ដីធ្លី ដើម្បី​យក​ប្រាក់​សង​បំណុល​ធនាគារ។ នៅ​ខេត្តសៀមរាប កន្លែង​ផ្តល់​សេវាកម្ម​ភ្ញៀវ​ទេសចរ​រាប់​រយ​កន្លែង ដូចជា ភោជនីយដ្ឋាន ផ្ទះ​សំណាក់ សណ្ឋាគារ ផ្សារ កន្លែង​លក់​វត្ថុ​អនុស្សាវរីយ៍ ដែល​ធ្លាប់​តែ​មមាញឹក បាន​បិទទ្វារ ហើយ​បង្ខំ​ចិត្ត​បញ្ឈប់​បុគ្គលិក​ជា​ច្រើន​រយ​នាក់​ជា​បន្ត​បន្ទាប់។

សេដ្ឋកិច្ច​ធ្លាក់​ចុះ ការ​នាំ​ចេញ​សំលៀកបំពាក់ និង​ស្បែកជើង បាត់​ប្រព័ន្ធ​អនុគ្រោះ​ពន្ធ EBA សហភាព​អឺរ៉ុប ២០ភាគ​រយ រីឯ​សហរដ្ឋ​អាម៉េរិក ក៏​មិន​ទាន់​បន្ត​ប្រព័ន្ធ​អនុគ្រោះ​ពន្ធ (GSP) របស់​ខ្លួន។ លោក ហ៊ុន ម៉ាណែត ធ្លាប់​អួត​សរសើរ​គោល​នយោបាយ​ឪពុក​របស់​លោក​ថា បាន​យក​ចិត្ត​ទុក​ដាក់​ជួយ​ដល់​កម្មករ ហើយ​លោក​ប្ដេជ្ញា​អនុវត្ត​បន្ត​ទៀត។ ដើម្បី​ទប់ទល់​ទំនិញ​ឡើង​ថ្លៃ កម្មករ​ទាមទារ​ដំឡើង​ប្រាក់​ឈ្នួល​អប្បបរមា​ចំនួន ២១៥ដុល្លារ​ក្នុង​មួយ​ខែ ប៉ុន្តែ​ទីបំផុត រដ្ឋាភិបាល​លោក ហ៊ុន ម៉ាណែត ដំឡើង​បាន​ត្រឹម​តែ ២០៤ដុល្លារ​ប៉ុណ្ណោះ។

ក្នុង​ពេល​ថ្មីៗ នេះ អង្គការ​សង់ត្រាល់ រក​ឃើញ​រោងចក្រ​មួយ​ចំនួន​បាន​កាត់​បន្ថយ​បុគ្គលិក​កម្មករ​ចន្លោះ​ពី ២០ ទៅ ៣០ភាគ​រយ​នៅ​ឆ្នាំ​នេះ ហើយ​កម្មករ​មួយ​ចំនួន​ធំ​បាត់​ប្រាក់​ចំណូល ចន្លោះ​ពី ២៥ ទៅ ៣០ភាគ​រយ បើ​ប្រៀបធៀប​ក្នុង​ឆ្នាំ២០២២។ ករណី​នេះ បាន​បង្ខំ​កម្មករ​ឱ្យ​កាត់​បន្ថយ​របប​អាហារ​ហូប​ចុក​ប្រចាំ​ថ្ងៃ និង​រង​សម្ពាធ​វិបត្តិ​ផ្លូវ​ចិត្ត​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។