ដោយ ទីន ហ្សាការីយ៉ា
2023.11.17
RFA
រូបភាពដែលអង្គការចលនាមាតាធម្មជាតិធ្វើឡើងបង្ហាញពីក្រុមហ៊ុន វ៉នម៉រ លីមីតធីត (ONE MORE Ltd.) របស់ឧកញ៉ា ជឹង សុគន្ធាវី ទទួលបានសិទ្ធិវិនិយោគតំបន់ការពារព្រៃឈើ។ រូប៖ Mother Nature Cambodia
ក្រុមយុវជនមាតាធម្មជាតិបានផ្សាយវីដេអូថ្មីមួយទៀត ស្នើឱ្យរដ្ឋាភិបាលបញ្ឈប់កាត់ឆ្វៀលដីឧទ្យានជាតិក្នុងប្រទេសកម្ពុជា ទៅឱ្យក្រុមហ៊ុនឯកជន។
សំណើនេះធ្វើឡើង ក្រោយពីរដ្ឋាភិបាល បានកាត់ឆ្វៀលដីឧទ្យានជាតិកែប ដែលសំបូរដោយព្រៃក្រាស់ឃ្មឹក ទំហំ ២៩ ហិកតារបន្ថែមទៀត ទៅឱ្យក្រុមហ៊ុនឯកជនអភិវឌ្ឍ។
ក្រុមយុវជនស្រឡាញ់បរិស្ថានចាត់ទុក ការផ្តល់សិទ្ធិអភិវឌ្ឍន៍ក្នុងតំបន់ឧទ្យានជាតិ ឱ្យក្រុមហ៊ុនឯកជន គឺជាកំហុសដ៏ធំរបស់រដ្ឋាភិបាល បំផ្លាញសម្បត្តិជាតិ ដោយមិនខ្វល់ពីការរិះគន់ និងការសំណូមពរទាំងឡាយ របស់ពលរដ្ឋដែលចង់ទុកតំបន់ឧទ្យានជាតិឱ្យគង់វង្ស។
សកម្មជនចលនាមាតាធម្មជាតិ (Mother Nature Cambodia) កាលពីថ្ងៃទី១៥ វិច្ឆិកា បានផ្សាយវីដេអូជាង ៣នាទី រៀបរាប់ពីតំបន់អភិរក្សមួយចំនួន ដែលរដ្ឋាភិបាលបានកាត់ឆ្វៀលវិនិយោគឱ្យក្រុមហ៊ុនឯកជន រួមមាន ឧទ្យានជាតិគិរីរម្យ ដែនជម្រកសត្វព្រៃកែវសីមា និង ដែនជម្រកសត្វព្រៃភ្នំឱរ៉ាល់ ហើយចុងក្រោយនេះ បន្តកាត់ឆ្វៀលឧទ្យានជាតិកែបទំហំ ២៩ ហិកតារបន្ថែមទៀត ក្នុងចំណោមផ្ទៃដីសរុបទំហំ ៥ ពាន់ហិកតារ (៥.០០០) ទៅឱ្យក្រុមហ៊ុន វ៉នម៉រ លីមីតធីត (ONE MORE Ltd.) របស់ឧកញ៉ា ជឹង សុគន្ធាវី។
ក្រុមយុវជនអះអាងថា ក្នុងឆ្នាំ២០២២ ប៉ុណ្ណោះ ម្ចាស់កម្មសិទ្ធិក្រុមហ៊ុននេះ គឺអ្នកស្រី ជឹង សុគន្ធាវី ទទួលបានដីព្រៃអភិរក្សចំនួន ៤ តំបន់ផ្សេងៗគ្នា ជាកន្លែងដែលសំបូរធនធានធម្មជាតិ ដែលការពារដោយព្រះរាជក្រឹត្យ មានផ្ទៃដីសរុបជិត ១ពាន់ហិកតារ។
សមាជិកក្រុមចលនាមាតាធម្មជាតិ កញ្ញា ធួន ស្រីពៅ ដែលបានចុះស្រាវជ្រាវរឿងនេះ ចោទសួរក្នុងវីដេអូថា តើមានមូលហេតុអ្វីខ្លះ នៅពីក្រោយក្រុមហ៊ុននេះ ទើបឧកញ៉ា ជឹង សុគន្ធាវី ទទួលបានដីព្រៃអភិរក្ស ដ៏ច្រើនសន្ធឹកសន្ធាប់បែបនេះ?
កញ្ញាអះអាងថា ក្រុមយុវជននឹងបន្តនិយាយបញ្ហាទាំងនេះ រហូតទាល់តែរដ្ឋាភិបាលដោះស្រាយ។
កញ្ញា ធួន ស្រីពៅ៖ «ទោះបីជាមានការឆ្លើយតប មិនទទួលខុសត្រូវពីសំណាក់ក្រសួង និងការចោទប្រកាន់មកលើពួកយើងយ៉ាងណាក៏ដោយ ផ្ទុយទៅវិញ បែរជាមានសេចក្តីប្រកាសព័ត៌មាន របស់ក្រសួងបរិស្ថាន ដែលបានលើកឡើងថា រាល់សកម្មភាពនិយាយពីបញ្ហាធនធានធម្មជាតិ គឺជារឿងប្រាសចាកពីច្បាប់ ហើយយុវជនត្រូវទទួលខុសត្រូវតាមច្បាប់។ ពួកយើងជាពលរដ្ឋ ចូលរួមយ៉ាងសកម្មបង់ពន្ធជូនរដ្ឋ ដូច្នេះរដ្ឋត្រូវបកស្រាយ មិនមែនលើកឡើងថា សកម្មភាពទាំងនេះ ខុសច្បាប់នោះទេ»។
សកម្មជនចលនាមាតាធម្មជាតិ ប្រកាសពហិការមិនប្រើប្រាស់ផលិតផលទាំងអស់ របស់ក្រុមហ៊ុន វ៉នម៉រ (ONE MORE Ltd.) រួមមាន ទឹកសុទ្ធ វីតាល់ (Vital) និង មីជាតិស៊ុបមាន់ ជាដើម ដរាបណាក្រុមហ៊ុននេះ មិនត្រូវបានរដ្ឋាភិបាលដកសិទ្ធិអភិវឌ្ឍន៍សម្បត្តិធនធានធម្មជាតិនោះទេ។
ការពហិការនេះ មានន័យថា ក្រុមយុវជនមិនផ្តល់ចំណូលដល់បុគ្គលណា និងក្រុមហ៊ុនណាមួយ បំផ្លាញធនធានធម្មជាតិ និងជម្រកសត្វព្រៃនៅកម្ពុជាឡើយ។
កញ្ញា ធួន ស្រីពៅ ប្រាប់វិទ្យុអាស៊ីសេរីថា ដីព្រៃក្នុងតំបន់ឧទ្យានជាតិ គឺជាទ្រព្យសម្បត្តិរួមរបស់ពលរដ្ឋខ្មែរទាំងអស់ និងជាកេរមរតកដូនតា មិនគួរមានការទិញលក់ដូរតាមអំពើចិត្ត ទៅឱ្យបុគ្គលដែលមានរឿងអាស្រូវបំផ្លាញធនធានធម្មជាតិនោះទេ៖
កញ្ញា ធួន ស្រីពៅ៖ «មើលឃើញថា សកម្មភាពគាត់កំពុងធ្វើ (រដ្ឋាភិបាល) មានន័យថា យកសម្បត្តិធនធានធម្មជាតិរបស់ដូនតាខ្មែរ យកជួល ទិញលក់ដូរ យ៉ាងអនាធិបតេយ្យ ហាក់អត់ខ្វល់ពីពលរដ្ឋ»។
វិទ្យុអាស៊ីសេរីមិនអាចសុំការបកស្រាយរឿងនេះ ពីរដ្ឋមន្ត្រីក្រសួងបរិស្ថាន លោក អ៊ាង សុផល្លែត និងអ្នកនាំពាក្យនាយករដ្ឋមន្ត្រី លោក មាស សុភ័ណ្ឌ បាននៅឡើយទេ នៅថ្ងៃទី១៦ វិច្ឆិកា ដោយទូរស័ព្ទចូលច្រើនដង តែគ្មានអ្នកលើក។
រីឯម្ចាស់ក្រុមហ៊ុនវ៉នម៉រ អ្នកស្រី ជឹង សុគន្ធាវី ក៏មិនទាន់អាចសុំការបំភ្លឺបានដែរ នៅថ្ងៃដដែលនេះ។
ជុំវិញរឿងនេះ មន្ត្រីពង្រឹងសិទ្ធិអំណាចសហគមន៍មូលដ្ឋាន នៃសមាគមការពារសិទ្ធិមនុស្សអាដហុក (Adhoc) លោក ប៉ែន ប៉ុណ្ណារ៍ យល់ថា ការលើកឡើង របស់ក្រុមយុវជនជារឿងត្រឹមត្រូវតាមរដ្ឋធម្មនុញ្ញ ហើយរដ្ឋាភិបាលគួរតែពិនិត្យ និងដោះស្រាយឱ្យបានត្រឹមត្រូវ ជាពិសេសត្រូវផ្អាកការវិនិយោគដីព្រៃក្នុងតំបន់អភិរក្សទាំងអស់ ដើម្បីស្តារធនធានធម្មជាតិឡើងវិញ។
លោក ប៉ែន ប៉ុណ្ណារ៍៖ «តំបន់ធនធានធម្មជាតិ ព្រៃឈើជាទ្រព្យសាធារណៈរបស់រដ្ឋដែលកូនខ្មែរត្រូវតាមដាន ឃ្លាំមើល ហើយនឹងប្រតិកម្ម នៅពេលមានបាត់បង់ច្រើន ប៉ះពាល់បម្រែបម្រួលអាកាសធាតុជាដើម។ មានការបាត់បង់ច្រើនហើយកន្លែងមក យើងទាមទារពិនិត្យស្រាវជ្រាវ តំបន់ព្រៃឈើ និងតំបន់ធនធានធម្មជាតិផ្សេងៗទៀត»។
ឧទ្យានជាតិកែប បានចុះបញ្ជីជាតំបន់អភិរក្សដោយព្រះរាជក្រឹត របស់ព្រះបាទសម្តេចព្រះនរោត្តមសីហនុ ព្រះបរមរតនកោដ្ឋ កាលពីឆ្នាំ១៩៩៣ មានផ្ទៃដីសរុប ៥ពាន់ហិកតារ។
ឧទ្យានជាតិនេះ នៅជាប់មាត់សមុទ្រ ជាតំបន់សំបូរធនធានធម្មជាតិជម្រកសត្វព្រៃ បក្សាបក្សីជីវសាស្ត្រចម្រុះសមុទ្រ និង សោភ័ណភាពស្រស់បំព្រង ទាញប្រយោជន៍ពីទេសភាពបម្រើវិស័យទេសចរក្នុងតំបន់ ហ៊ុមព័ទ្ធដោយព្រៃភ្នំខ្ពង់រាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។