ដោយ ខាន់ លក្ខិណា
2024.01.08
RFA
ស្ដាប់ ឬទាញយកសំឡេង
លោក ហ៊ុន សែន ប្រធានគណបក្សប្រជាជនកម្ពុជា ថ្លែងក្នុងពិធីរំលឺកខួបទី៤៥ នៃថ្ងៃ៧ មករា កាលពីថ្ងៃទី៧ ខែមករា ឆ្នាំ២០២៤។ រូប៖ ហ្វេសប៊ុកលោក ហ៊ុន សែន
ប្រធានគណបក្សប្រជាជនកម្ពុជាលោក ហ៊ុន សែន បានថ្លែងថា លោកនិងគណបក្សសម្ព័ន្ធភាពចំនួន ២៧ផ្សេងទៀត នឹងសហការគ្នាកម្ចាត់ នយោបាយ ដែលលោកហៅថា ជ្រុលនិយមឱ្យផុតពីកម្ពុជា។ មន្ត្រីបក្សប្រឆាំង លើកឡើងថា មិនដឹងមានអ្នកជ្រុលនិយមនៅកម្ពុជាឯណាទេ។
ក្នុងទិវារំឭកខួប លើកទី ៤៥ ឆ្នាំ នៃទិវា ៧ មករា ឆ្នាំ២០២៤ លោក ហ៊ុន សែន បានលើកឡើងថា ការកម្ចាត់នយោបាយជ្រុលនិយម នឹងរួមគ្នាធ្វើដោយគណបក្សសម្ព័ន្ធភាពរបស់គណបក្សប្រជាជនកម្ពុជា ដោយអនុវត្តតាមកិច្ចព្រមព្រៀង ដែលបានធ្វើរួចហើយ។
លោក ហ៊ុន សែន៖ «នឹងរួមគ្នាកម្ចាត់នយោបាយជ្រុលនិយមឱ្យចេញផុតពីកម្ពុជាតាមរយៈការអនុវត្តកិច្ចព្រមព្រៀងអំពីកិច្ចសហប្រតិបត្តិការសម្ព័ន្ធភាពរវាងបណ្ដាលគណបក្សនយោបាយដែលគណបក្សប្រជាជនកម្ពុជាបានចុះហត្ថលេខាជាមួយគណបក្ស ២៧ផ្សេងទៀត កាលពីថ្ងៃទី២៧ តុលា ឆ្នាំ២០២៣»។
នេះមិនមែនជាលើកទី១ទេ ដែលអតីតនាយករដ្ឋមន្ត្រីរូបនេះ ថ្លែងព្រមានកម្ចាត់ ក្រុមអ្នកនយោបាយ ដែលលោកចោទ ថាជ្រុលនិយម។ ប៉ុន្តែគឺជាសារព្រមាន លើកទី១ ដែលលោកបានបញ្ជាក់ ថាជាការប្រឹងកម្ចាត់នយោបាយ ជ្រុលនិយម ដោយមាន គណបក្សសម្ព័ន្ធភាព២៧ផ្សេងទៀត ចូលរួមសហការ ជាមួយគណបក្សប្រជាជន កម្ពុជាដែរ ដែលជាយុទ្ធនាការមិនធ្លាប់មានជាផ្លូវការពីមុនមក។
គេមិនដឹងច្បាស់ទេថា ក្រុមបុគ្គលប្រភេទណា ដែលលោក ហ៊ុន សែន កំណត់ថា ជាអ្នកនយោបាយជ្រុលនិយម។ ប៉ុន្តែនៅថ្ងៃទី៧ មករា នេះ លោកបានចំអកដាក់អ្នកទាំងឡាយណា ដែលប្រឆាំងថ្ងៃ៧មករា និងទិវាសន្តិភាព២៩ ធ្នូ របស់រដ្ឋាភិបាលគណបក្សប្រជាជនកម្ពុជានៃកូនប្រុសរបស់លោក សូមឱ្យអ្នកទាំងនោះទៅប្រថុយ នឹងគ្រោះថ្នាក់នៅចម្ការមីន ដែលនៅសេសសល់។
អនុប្រធានគណបក្សភ្លើងទៀន លោក សុន ឆ័យ ប្រាប់វិទ្យុអាស៊ីសេរីនៅថ្ងៃទី៧ មករា ដោយលើកចម្ងល់ថា នៅកម្ពុជាមិនដឹងមានក្រុមជ្រុលនិយមនៅឯណាទេ ព្រោះគ្រប់គណបក្សនយោបាយ សុទ្ធតែប្រតិបត្តិការងារដោយគោរពតាមច្បាប់។
លោកបន្ថែមថា កម្ពុជាជាប្រទេសដែលរដ្ឋធម្មនុញ្ញចែងអំពីប្រជាធិបតេយ្យសេរី ពហុបក្ស ដូច្នេះ មិនគួរណា មានគណបក្សសម្ព័ន្ធភាពរណបគណបក្សកាន់អំណាចឡើយ ហើយគណបក្សទាំងនោះ គួរតែអាចបំពេញការងាររបស់ខ្លួនដោយសេរី។
លោក សុន ឆ័យ សង្ឃឹមថា មន្ត្រីនយោបាយនៅមូលដ្ឋានឃុំ-សង្កាត់ អាចបំពេញការងារដោយគ្មានការរំខាន បន្ទាប់ពីមានការព្រមានរបស់លោក ហ៊ុន សែន បែបនេះ។
លោក សុន ឆ័យ៖ «ក្នុងនាមជាគណបក្សក្រៅរដ្ឋាភិបាល យើងតែងរងគំរាមពាក្យសម្ដីបែបនេះ តែយើងមិនដឹង តើការគំរាមហ្នឹងឆ្ពោះទៅក្រុមណាជនណាមួយទេក៏ប៉ុន្តែជារឿងដែលកើតមានចំពោះយើងដែលជាអ្នកនយោបាយក្នុងបក្សក្រៅរដ្ឋាភិបាល។ ដូច្នេះ ខ្ញុំយល់ថា មិនគួរធ្វើបទអត្ថាធិប្បាយអីច្រើនក្រៅពីបន្តការងាររបស់យើងដែលជាយន្តការមួយស្របរដ្ឋធម្មនុញ្ញ»។
អ្នកសម្របសម្រួលកម្មវិធីអង្កេត និងតស៊ូមតិ នៃអង្គការខុមហ្វ្រែល (Comfrel) លោក កន សាវាង្ស បានលើកឡើងថា ក្នុងសង្គមប្រជាធិបតេយ្យ សេរី ពហុបក្ស ការត្រួតពិនិត្យគ្នាទៅវិញទៅមក ជាការចាំបាច់ ហើយគណបក្សក្រៅរដ្ឋាភិបាល គឺជាកញ្ចក់ឆ្លុះបញ្ចាំងសង្គម ដែលមានតួនាទីលើកមតិរិះគន់ ដោយមិនត្រូវរងនយោបាយកម្ចាត់ចោលណាមួយឡើយ។
លោកបន្ថែមថា មិនគួរមានចេតនាបំបាត់គណបក្សនយោបាយក្រៅរដ្ឋាភិបាលទេ ហើយគួរមានការអត់ឱនខ្ពស់ផ្នែកនយោបាយ ដើម្បីជំរុញឱ្យលទ្ធិប្រជាធិបតេយ្យ មានភាពជឿនលឿន។
លោក កន សាវាង្ស៖ «លើកឡើងឱ្យមានការរិះគន់និងការស្ថាបនា ហើយមានការប្រកួតប្រជែងគ្នាផ្នែកនយោបាយ គេអត់អាច ទៅសម្លាប់នយោបាយគណបក្សមួយ និងគណបក្សមួយទៀតទេ។ អ៊ីចឹងជាគោលការណ៍លទ្ធិប្រជាធិបតេយ្យគឺគេស្ថាបនាគ្នា»។
គ្រប់ពេលមានការចោទប្រកាន់គូប្រជែងនយោបាយថា ជ្រុលនិយម ហើយត្រូវកម្ចាត់តាមផ្លូវតុលាការជាដើម តែងតែធ្វើឱ្យស្ថានការណ៍នយោបាយកម្ពុជា កាន់តែច្របូកច្របល់ និងស្រអាប់ប្រជាធិបតេយ្យ។
លោក កឹម សុខា ដែលត្រូវបានចោទជ្រុលហួសហេតុ ថា ជាជនក្បត់ជាតិ ក៏នាំទៅដល់ការរំលាយ គណបក្សសង្គ្រោះជាតិ កាលពីឆ្នាំ២០១៧ និងធ្វើឱ្យកម្ពុជាជួបវិបត្តិនយោបាយដល់បច្ចុប្បន្ន។
លោក សម រង្ស៊ី ជារឿយៗ ត្រូវលោក ហ៊ុន សែន ចោទប្រកាន់ថា ជាជនជ្រុលនិយម និងជាឧទ្ទាមក្រៅច្បាប់ ហើយជាបន្តបន្ទាប់ គណបក្សដែលមានសំឡេង សមល្មមក្នុងការប្រកួតប្រជែង ដូចជាគណបក្សភ្លើងទៀនជាដើម ក៏ត្រូវលោក ហ៊ុន សែន ចោទភ្ជាប់នឹងលោក សម រង្ស៊ី និងអុកឡុកមិនឱ្យគណបក្សនេះ ចូលរួមបោះឆ្នោតតំណាងរាស្ត្រកាលពីឆ្នាំ២០២៣ រួមទាំងខ្ទប់មិនឱ្យចូលបោះឆ្នោត ព្រឹទ្ធសភាខាងមុខនេះផង។ ករណីនេះកាន់តែធ្វើឱ្យប្រជាធិបតេយ្យនៅកម្ពុជា អាប់អួរយ៉ាងខ្លាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។