#រូបត្លុកនយោបាយ​៖ ប្រទេស​តូច​តែ​មាន​បេះដូង​ធំ៖ ដំណោះស្រាយ​ខុស​ប្លែក​គ្នា​រវាង​ពលរដ្ឋ​វៀតណាម​រស់នៅ​លើ​បឹង​ទន្លេសាប និង​អ្នក​បឹង​តាមោក

ដោយ វិទ្យុអាស៊ីសេរី
2024.01.28
RFA

#រូបត្លុកនយោបាយ​៖ ប្រទេស​តូច​តែ​មាន​បេះដូង​ធំ៖ ដំណោះស្រាយ​ខុស​ប្លែក​គ្នា​រវាង​ពលរដ្ឋ​វៀតណាម​រស់នៅ​លើ​បឹង​ទន្លេសាប និង​អ្នក​បឹង​តាមោក

តស់… ប្រកួត​គ្នា​ដាក់​ចំណងជើង​ឱ្យ​រូបត្លុក​នយោបាយ​មួយ​នេះ! រូប៖ RFA


ពាក្យ​ «ប្រទេស​តូច​តែ​មាន​បេះដូង​ធំ» ត្រូវ​រដ្ឋាភិបាល​កម្ពុជា​តាំងពី​សម័យ​នាយករដ្ឋមន្ត្រី​ឪ​ដល់​នាយករដ្ឋមន្ត្រី​កូន​យក​មក​អនុវត្ត​យ៉ាង​ខ្ជាប់ខ្ជួន​ដើម្បី​សម្ញែង​មុខមាត់​​នៅ​ចំពោះ​មុខ​បរទេស។ ក៏ប៉ុន្តែ ពាក្យ​នេះ​កម្រ​ត្រូវ​បាន​រដ្ឋាភិបាល​យក​មក​អនុវត្ត​សម្រាប់​ពលរដ្ឋ​ខ្មែរ​ខ្លួន​ឯង​ដែល​ជា​ម្ចាស់​ស្រុក។

ជាក់ស្តែង ភាព​ខុសប្លែក​គ្នា​នៃ​ការ​ផ្តល់​ដំណោះស្រាយ​ជា​ដី​សម្បទាន​សង្គមកិច្ច​ទំហំ​៤០ហិកតា​ដល់​ពលរដ្ឋ​វៀតណាម​ជិត​២ពាន់​គ្រួសារ​ដែល​រស់នៅ​លើ​ផ្ទះ​បណ្ដែត​ទឹក​នៅ​តំបន់​ទន្លេសាប​ក្នុង​ខេត្ត​កំពង់ឆ្នាំង​ឱ្យ​មក​រស់​នៅ​លើ​គោក និង​ចំណាត់ការ​បណ្ដេញ​ចេញ​ដោយ​បង្ខំ​មក​លើ​ពលរដ្ឋ​ខ្មែរ​ម្ចាស់​ស្រុក​នៅ​តំបន់​បឹង​តាមោក​ក្នុង​រាជធានី​ភ្នំពេញ។

កាលពី​ឆ្នាំ២០១៨ រដ្ឋាភិបាល​បាន​កាត់​ឆ្វៀល​ដី​លិចទឹក​ទំហំ​៤០​ហិកតារ​ក្នុង​ភូមិ​ដំបូក​កកោះ ឃុំ​ស្វាយជ្រុំ ស្រុក​រលាប្អៀរ ឋិត​នៅ​កៀក​បឹង​ទន្លេសាប ដើម្បី​រៀបចំ​ជា​ដី​សម្បទាន​សង្គមកិច្ច​ឱ្យ​ពលរដ្ឋ​វៀតណាម​ទាំងនោះ​​ឡើង​​មក​រស់​នៅ​លើ​គោក ក្រោម​ហេតុផល​ថា​ដើម្បី​កែ​លម្អ​សោភ័ណភាព និង​ការពារ​បរិស្ថាន​នៅ​លើ​ផ្ទៃ​បឹង​ទន្លេសាប។ លើស​ពី​នេះ​ទៀត អាជ្ញាធរ​ក៏​បាន​រៀបចំ​ផ្ដល់​ហេដ្ឋារចនាសម្ព័ន្ធ ប្រព័ន្ធ​ទឹក​ភ្លើង និង​មណ្ឌល​សុខភាព​ជូន​ពលរដ្ឋ​វៀតណាម​ដែល​ឡើង​គោក​ទាំងនោះ​ថែម​ទៀតផង។

ផ្ទុយទៅវិញ សម្រាប់​អ្នក​បឹងតាមោក​វិញ ពួកគេ​គ្មាន​វាសនា​ទទួល​បាន​សន្ដានចិត្ត​ពី​រដ្ឋាភិបាល​ខ្លួន​ឯង​យ៉ាង​ដូច្នេះ​ឡើយ។ ស្របពេល​ដែល​រដ្ឋាភិបាល​បន្ត​កាត់​ផ្ទៃបឹង​តាមោក​ជា​បន្តបន្ទាប់​ប្រគល់​ឱ្យ​ស្ថាប័ន​រដ្ឋ ក្រុមហ៊ុន និង​បុគ្គល​ឯកជន​ជា​អ្នកមាន​លុយ​មាន​អំណាច​ធ្វើជា​កម្មសិទ្ធិ​ស្របច្បាប់​ផ្ទាល់​ខ្លួន អ្នក​បឹង​តាមោក​២៥០​គ្រួសារ​ក្នុង​សង្កាត់​សំរោងត្បូង និង​ប្រមាណ ៨៨​គ្រួសារ​ក្នុង​សង្កាត់​គោករកា ខណ្ឌ​ព្រែកព្នៅ ​កំពុង​ក្លាយ​ជា​ជង​រងគ្រោះ​នៃ​ការបណ្តេញ​ចេញ​ដោយ​បង្ខំ ខណៈ​អាជ្ញាធរ​បន្ត​ចាក់​ដី​លុប​បឹង​នេះ។ ចាប់​តាំង​ពី​ឆ្នាំ២០២១ ដល់​ឆ្នាំ២០២៣ យ៉ាងហោច​ណាស់​អ្នក​បឹង​តាមោក​ចំនួន​១៨នាក់ កំពុង​រង​បណ្ដឹង​ពី​តុលាការ ខណៈ​មនុស្ស​មួយ​ចំនួន​ទៀត​បាន​រត់​គេច​ខ្លួន​ដោយសារ​ព្រួយបារម្ភ​ពី​បញ្ហា​សុវត្ថិភាព៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment