គណបក្ស​ភ្លើង​ទៀន​​ស្នើ​តុលាការ​ឱ្យ​ដោះ​លែង​មន្ត្រី​បក្ស​ភ្លើង​ទៀន​ពីរ​រូប​​​​​ដោយ​ឥត​លក្ខខណ្ឌ

ដោយ សេក បណ្ឌិត
2024.02.02
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

គណបក្ស​ភ្លើង​ទៀន​​ស្នើ​តុលាការ​ឱ្យ​ដោះ​លែង​មន្ត្រី​បក្ស​ភ្លើង​ទៀន​ពីរ​រូប​​​​​ដោយ​ឥត​លក្ខខណ្ឌ

(ឆ្វេង) លោក ម៉ា ចិន្តា អនុប្រធាន​គណៈកម្មាធិការ​ប្រតិបត្តិ​គណបក្ស​ភ្លើង​ទៀន​ខណ្ឌដូនពេញ​ និង​លោក ហាក់ កុសល ​​​លេខាធិការ​គណៈកម្មាធិការ​ប្រតិបត្តិ​គណបក្ស​ភ្លើង​ទៀន​ខណ្ឌ​ជ្រោយ​ចង្វារ ដែល​អាជ្ញាធរ​ចាប់​ កាល​ពី​ថ្ងៃ​ទី៣១ ខែមករា ឆ្នាំ២០២៤។ រូប៖ ហ្វេសប៊ុកគណបក្សភ្លើងទៀន


គណបក្ស​ភ្លើង​ទៀន​ស្នើ​ដល់​តុលាការ​ដោះ​លែង​មន្ត្រី និង​សកម្មជន​គណបក្ស​ភ្លើង​ទៀន​ឱ្យ​មាន​សេរីភាព​ឡើង​វិញ។ មន្ត្រី​សង្គម​ស៊ីវិល​ថា ការ​ចាប់​ខ្លួន​មន្រ្តី​គណបក្ស​ភ្លើង​ទៀន​ដោយ​មិន​មាន​ភស្តុតាង​ជាក់​លាក់​នោះ​​​​​ នឹង​ប៉ះពាល់​ដល់​ដំណើរ​ការ​បោះ​ឆ្នោត​​ព្រឹទ្ធសភា​នា​ពេល​ខាង​មុខ។

គណបក្ស​ភ្លើង​ទៀន​ចាត់​ទុក​ថា​ការ​ចាប់​ខ្លួន​មន្ត្រី​បក្ស​ភ្លើង​ទៀន​ពីរ​រូប​ចុង​​ក្រោយ ​រួម​មាន ​​​លេខាធិការ​គណៈកម្មាធិការ​ប្រតិបត្តិ​គណបក្ស​ភ្លើង​ទៀន​ខណ្ឌ​ជ្រោយ​ចង្វារ លោក ហាក់ កុសល និងអនុប្រធាន​គណៈកម្មាធិការ​ប្រតិបត្តិ​គណបក្ស​ភ្លើង​ទៀន​ខណ្ឌដូនពេញ​លោក ម៉ា ចិន្តា ពី​បទ​ក្លែង​បន្លំ​ និង​ប្រើប្រាស់​លិខិត​ក្លែង​ធ្វើ​ឡើង​ក្រោម​ហេតុ​ផល​នយោបាយ។

អគ្គលេខាធិការ​គណបក្ស​ភ្លើង​ទៀន លោក លី សុធារ៉ាយុត្តិ ឱ្យ​ដឹង​ថា​លោក ហាក់ កុសល និង​លោក ម៉ា ចិន្តា ត្រូវ​បាន​បញ្ជូន​ទៅ​ពន្ធនាគារ​ព្រៃ​ស កាល​ពី​ថ្ងៃ​ទី៣១ ខែ​មករា។ លោក លី សុធារ៉ាយុត្តិ អះអាង​ថា មន្ត្រី​បក្ស​ភ្លើង​ទៀន​ទាំង​ពីរ​រូប​នេះ​មិន​បាន​ប្រព្រឹត្ត​ខុស​ដូច​ការ​ចោទ​ប្រកាន់​នោះ​ទេ ហើយ​គណបក្ស​ភ្លើង​ទៀន​នឹង​ចាត់​តាំង​មេធាវី ដើម្បី​រក​យុត្តិធម៌​​ដល់​ពួកគាត់។

លោក លី សុធារ៉ាយុត្តិ អំពាវនាវ​ដល់​អាជ្ញាធរ​​ដោះលែង​ លោក ហាក់ កុសល ​លោក ម៉ា ចិន្តា និង​មន្ត្រី​គណបក្ស​ភ្លើង​ទៀន​ផ្សេង​ទៀត​​ ​​​ដើម្បី​​ឱ្យ​បរិយាកាស​នយោបាយ​ មុន​ការ​​បោះឆ្នោត​ជ្រើស​តាំង​សមាជិក​ព្រឹទ្ធសភា​​​​​មាន​ភាព​ល្អ​ប្រសើរ​ឡើង​វិញ។

អាជ្ញាធរ​បាន​ព័ទ្ធ​ចាប់ខ្លួន លោក ហាក់ កុសល នៅ​តាម​ដង​ផ្លូវជាតិ​លេខ៦ ក្នុង​ខណ្ឌ​ជ្រោយ​ចង្វារ​រាជធានី​ភ្នំពេញ ខណៈ​ដែល​រូប​លោក​កំពុង​បើកបរ​ម៉ូតូ​ដឹក​ប្រពន្ធ។ ចំណែក​ លោក ម៉ា ចិន្តា ក៏​ត្រូវ​បាន​អាជ្ញាធរ​ចាប់​ខ្លួន​ដោយ​មិន​ដឹង​មូលហេតុ​ដែរ​ក្នុង​ថ្ងៃ​ដដែល។

វិទ្យុ​អាស៊ី​សេរី​មិន​អាច​សុំ​ឆ្លើយ​តប​ជុំវិញ​រឿង​នេះ​ពី ក្រុម​គ្រួសារ​មន្ត្រី​បក្ស​ភ្លើង​ទៀន លោក ហាក់ កុសល និង​លោក ម៉ា ចិន្តា បាន​ទេ នៅ​ថ្ងៃ​ទី២ ខែកុម្ភៈ។ វិទ្យុ​អាស៊ី​សេរី​ក៏​មិន​អាច​សុំ​ការ​ឆ្លើយតប​រឿង​នេះ​ពី​អ្នក​នាំ​ពាក្យ​អយ្យការ​អម​សាលា​​​ដំបូង​រាជធានី​ភ្នំពេញ​ លោក លោក​ ប្លង់​ សុផល​ បាន​ទេ​ នៅ​ថ្ងៃ​ដដែល​នេះ។

បើ​តាម​ដីកា​បង្គាប់​ឱ្យ​នាំ​ខ្លួន​ដែល​ចេញ​ដោយ​ចៅក្រម​​ស៊ើបសួរ​សាលា​ដំបូង​រាជធានី​ភ្នំពេញ លោក ឃី សុខវួច កាល​ពី​ថ្ងៃ​ទី៣១ ខែ​មករា​ កន្លង​ទៅ​ បង្ហាញ​ថា លោក ហាក់ កុសល និង​លោក ម៉ា ចិន្តា ត្រូវ​បាន​ចោទ​ប្រកាន់​ពី​​បទ​ក្លែងបន្លំ និង​បទ​ប្រើប្រាស់​លិខិត​ក្លែង​តាម​មាត្រា៦២៦ មាត្រា៦២៧ និង​មាត្រា៦២៨ នៃ​ក្រមព្រហ្មទណ្ឌ ដែល​បាន​ប្រព្រឹត្ត​កាល​ពី​​ខែ​វិច្ឆិកា​ ឆ្នាំ​២០២៣​ ។ ដីកា​ដដែល​អះអាង​ថា​លោក ហាក់ កុសល និង​លោក ម៉ា ចិន្តា​ បាន​ប្រព្រឹត្ត​បទ​ល្មើស​ជា​មួយ​ លោក ខឹម ចាន់វណ្ណៈ។

លោក ខឹម ចាន់វណ្ណៈ គឺ​ជា​ប្រធាន​ស្ដីទី​គណបក្ស​ភ្លើង​ទៀន​រាជ​ធានី​ភ្នំពេញ ដែល​ត្រូវ​បាន​សមត្ថកិច្ច​ក្រុង​ភ្នំពេញ​ បាន​សម្រុក​ចូល​ផ្ទះ និង​ឃាត់ខ្លួន​ទាំង​កំរោល​នៅ​ផ្ទះ​របស់​លោក កាល​ពី​រសៀល​ថ្ងៃ​ទី១៥ ខែ​មករា។

ប្រធាន​សមាគម​ការពារ​សិទ្ធិ​មនុស្ស​អាដហុក (Adhoc) លោក នី សុខា លើក​ឡើង​ថា ការ​ចាប់​ខ្លួន​មន្ត្រី​បក្ស​ភ្លើង​ទៀន​ពាក់​ព័ន្ធ​នឹង​ការ​បន្លំ​ឯកសារ​ជា​បន្ត​បន្ទាប់​នៅ​មាន​មន្ទិល​សង្ស័យ​ជា​ច្រើន ដោយ​សារ​ធ្វើ​ឡើង​នៅ​កៀក​ថ្ងៃ នៃ​ការ​បោះ​ឆ្នោត​ព្រឹទ្ធ​សភា។ លោក នី សុខា កត់​សម្គាល់​ថា ថ្មីៗ នេះ​ក៏​មាន​​ការ​គំរាម​កំហែង​ជា​ច្រើន​ករណី​មក​លើ​មន្ត្រី​គណបក្ស​ភ្លើង​ទៀន​នៅ​តាម​បណ្ដា​រាជធានី​ខេត្ត​ផង​ដែរ។

លោក លោក នី សុខា៖ «ក្នុង​មួយ​រយៈ​កាល​នេះ​ឃើញ​មាន​ការ​ឃើញ​មាន​ការ​ចាប់​ជា​បន្តបន្ទាប់​ទៅ​លើ​អ្នក​ដែល​ជា​តំណាង​ដែល​មាន​សិទ្ធិ​ក្នុង​ការ​ចូល​រួម​បោះឆ្នោត​ នេះ​ចង់​មិន​ចង់​វា​បង្ហាញ​អំពី​​​ការ​ធ្វើ​ឱ្យ​ប៉ះពាល់​ទៅ​ដល់​ស្មារតី​អ្នក​បោះ​ឆ្នោត​​ដែល​តួ​អង្គ​បោះ​ឆ្នោត​ដែល​គាត់​មាន​សិទ្ធិ​​ក្នុង​ការ​ចូល​រួម​បោះ​ឆ្នោត​​ព្រឹទ្ធសភា​នេះ អ៊ីចឹង​ធ្វើ​ឱ្យ​បរិយាកាស​នយោបាយ​ព្រឹទ្ធសភា​​ដែល​យើង​ប្រកួត​ប្រជែង​ ទោះ​បី​ជា​អ​សកល​ក៏​ដោយ​វា​អាច​ជះ​ឥទ្ធិពល​មិន​ល្អ​ទៅ​ដល់​ដំណើរ​ការ​នៃ​ការ​បោះឆ្នោត»។

គិត​មក​ដល់​ពេល​នេះ​ថ្នាក់​ដឹកនាំ និង​សកម្មជន​គណបក្ស​ភ្លើង​ទៀន​ប្រមាណ ១២នាក់​ត្រូវ​បាន​តុលាការ​ចោទប្រកាន់​ដាក់​ពន្ធនាគារ​ដូចៗ គ្នា ពី​បទ​ក្លែង​ឯកសារ​រៀបចំ​បញ្ជី​បេក្ខជន​ឈរ​ឈ្មោះ​ក្រុម​ប្រឹក្សាឃុំ​សង្កាត់ កាល​ពី​ឆ្នាំ​២០២២។ ប៉ុន្តែ​អ្នកខ្លះ​ត្រូវ​បាន​តុលាការ​ដោះលែង​មក​វិញ បន្ទាប់​ពី​ពួកគេ​បង្ខំចិត្ត​ប្រកាស​ចុះចូល​ជាមួយ​គណបក្ស​កាន់អំណាច​ដើម្បី​ជា​ថ្នូរ​ទទួល​បាន​សេរីភាព​មក​វិញ។

អង្គការ​ឃ្លាំមើល​សិទ្ធិ​មនុស្ស​អន្តរជាតិ (Human Rights Watch) បាន​ចេញ​របាយការណ៍​ពិភព​លោក​ប្រចាំ​ឆ្នាំ២០២៤ ដោយ​លើក​ឡើង​ថា​លោក ហ៊ុន ម៉ាណែត ឡើង​កាន់​អំណាច​រយៈ​ពេល ៤ខែ​មក​នេះ ស្ថានភាព​សិទ្ធិ​មនុស្ស​ និង​ប្រជាធិបតេយ្យ​នៅ​តែ​យ៉ាប់​យឺន​នៅ​ឡើយ។ អង្គការ​នេះ​បញ្ជាក់​ថា​រដ្ឋាភិបាល​កម្ពុជា​នៅ​តែ​ប្រើប្រាស់​ប្រព័ន្ធ​តុលាការ​យាយី​លើ​អ្នក​រិះគន់ រារាំង​គណបក្ស​ភ្លើង​ទៀន​មិន​ឱ្យ​ចូលរួម​ការ​បោះឆ្នោត រឹតត្បិត​ប្រព័ន្ធ​ផ្សព្វផ្សាយ​ឯករាជ្យ និង​ប្រើ​អំពើ​ហិង្សា​ចាប់ចង​អ្នក​រិះគន់​ឥត​ស្រាកស្រាន្ត​ជា​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment