គណបក្ស​កាន់​អំណាច​​បើក​យុទ្ធនាការ​ឃោសនា​បោះឆ្នោត​ព្រឹទ្ធសភា និង​ទិញ​ទឹក​ចិត្ត​បក្ស​ប្រឆាំង

ដោយ ច័ន្ទ ដារ៉ូ
2024.02.10
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

គណបក្ស​កាន់​អំណាច​​បើក​យុទ្ធនាការ​ឃោសនា​បោះឆ្នោត​ព្រឹទ្ធសភា និង​ទិញ​ទឹក​ចិត្ត​បក្ស​ប្រឆាំង

ថ្ងៃយុទ្ធនាការឃោសនាបោះឆ្នោតព្រឹទ្ធសភា​ដំបូង របស់គណបក្សប្រជាជនកម្ពុជា ដឹកនាំដោយអនុប្រធានគណបក្ស លោក សាយ ឈុំ នៅថ្ងៃទី១០ កុម្ភៈ ២០២៤។ រូប៖ ហ្វេសប៊ុកគណបក្សប្រជាជនកម្ពុជា


គណបក្សកាន់អំណាច​បើក​យុទ្ធនាការ​ឃោសនាបោះឆ្នោត​ជ្រើសរើស​សមាជិក​ព្រឹទ្ធសភា​អាណត្តិ​ទី​៥​គគ្រឹកគគ្រេង​នៅ​ទូទាំង​ប្រទេស ស្របពេល​បក្ស​ប្រឆាំង​ចោទ​ថា អាជ្ញាធរ​បក្ស​កាន់អំណាច​ដើរ​អូស​ទាញ និង​ទិញ​ទឹកចិត្ត​សមាជិក​ក្រុមប្រឹក្សាឃុំ​សង្កាត់ ជា​អង្គ​បោះឆ្នោត​ដែល​នឹង​ធ្វើ​ឱ្យ​ប៉ះពាល់​ដល់​លទ្ធផល​ការ​បោះឆ្នោត​ជ្រើសតាំង​សមាជិក​ព្រឹទ្ធសភា​នៅ​ពេល​ខាងមុខ។

ការ​ឃោសនា​រក​សំឡេងឆ្នោត​របស់​គណបក្ស​នយោបាយ​សម្រាប់​ការ​បោះឆ្នោត​ជ្រើសរើស​សមាជិក​ព្រឹទ្ធសភា នីតិកាល​ទី​៥ ឆ្នាំ​២០២៤ បាន​ចាប់ផ្តើម​នៅ​ថ្ងៃទី​១០ ខែ​កុម្ភៈ។

គណបក្ស​ប្រជាជន​កម្ពុជា​បាន​ឃោសនា​នៅ​ភូមិភាគ​ទាំង​៨ ជាពិសេស​នៅ​រាជធានី​ភ្នំពេញ​រៀបចំ​កម្មវិធី​ជួបជុំ និង​ហែ​ក្បូន​ទ្រង់ទ្រាយ​ធំ​នៅ​តាម​ដងផ្លូវ​ដែល​មាន​យានជំនិះ និង​អ្នកចូលរួម​ប្រមាណ​១​ម៉ឺន​នាក់។

ប្រធាន​គណបក្ស​ប្រជាជន​កម្ពុជា​លោក ហ៊ុន សែន បាន​សរសេរ​លិខិត​ដោយ​លោក​លើកឡើង​ថា កម្ពុជា​កំពុង​រស់នៅ​ក្រោម​សន្តិភាព ការ​ឯកភាព​ជាតិ ហើយ​ឈាន​ទៅមុខ​លើ​មាគ៌ា​ប្រជាធិបតេយ្យ និង​ការ​អភិវឌ្ឍ។ លោក​អះអាង​ថា ការបោះឆ្នោត​ព្រឹទ្ធសភា​នេះ​គឺ​ស្របតាម​ឆន្ទៈ និង​បំណងប្រាថ្នា​របស់​ពលរដ្ឋ​ខ្មែរ ពីព្រោះ​អ្នក​តំណាងរាស្ត្រ និង​សមាជិក​ក្រុម​ប្រឹក្សាឃុំ​ជា​អង្គ​បោះឆ្នោត​កើត​ចេញ​ពី​ឆន្ទៈ​ពលរដ្ឋ​កន្លង​ទៅ។ លោក ហ៊ុន សែន អំពាវនាវ​ឱ្យ​អង្គ​បោះឆ្នោត​ទៅ​បោះឆ្នោត​ឱ្យ​គណបក្ស​ប្រជាជន​កម្ពុជា​ដើម្បី​ធានា​ជោគវាសនា​ជាតិ និង​ពលរដ្ឋ​ខ្មែរ។

ទោះ​យ៉ាងណា​លោក ហ៊ុន សែន អះអាង​បែបនេះ​ក្តី ប៉ុន្តែ​សហគមន៍​ជាតិ និង​អន្តរជាតិ​តែងតែ​រិះគន់​លទ្ធផល​នៃ​ការ​បោះឆ្នោត​ជាតិ​ជា​បន្តបន្ទាប់​ថា ប្រព្រឹត្តទៅ​មិន​សេរី ត្រឹមត្រូវ និង​យុត្តិធម៌​ដែល​មិន​ទាន់​ឆ្លុះបញ្ចាំង​អំពី​ឆន្ទៈ​ពិត​ប្រាកដ​របស់​ប្រជាពលរដ្ឋ​ខ្មែរ ពីព្រោះ​ស្ថាប័ន​បោះឆ្នោត​មិន​ឯករាជ្យ ហើយ​គណបក្សប្រឆាំង​តែង​រង​ការ​ធ្វើទុក្ខបុកម្នេញ និង​ត្រូវ​បាន​លោក ហ៊ុន សែន ផាត់​ចេញ​ពី​សង្វៀន​ប្រកួត​ចាប់​តាំង​ពី​ឆ្នាំ​២០១៨​មក។

យុទ្ធនាការ​រក​សំឡេងឆ្នោត​របស់​គណបក្ស​នយោបាយ​នេះ មាន​រយៈ​១៤​ថ្ងៃ គឺ​ចាប់​ផ្ដើម​ពី​ថ្ងៃ​ទី​១០​ដល់​ថ្ងៃទី​២៣ ខែ​កុម្ភៈ​។ ចំ​ណែ​ការបោះឆ្នោត​ព្រឹទ្ធសភា អាណត្តិ​ទី​៥ នឹង​ប្រព្រឹត្តិ​ទៅ​នៅ​ថ្ងៃទី​២៥ ខែកុម្ភៈ ដោយមាន​គណបក្ស​ចំនួន​៤​ចូលរួម គឺ​គណបក្ស​ប្រជាជន​កម្ពុជា គណបក្ស​ឆន្ទៈ​ខ្មែរ គណបក្ស​កម្លាំង​ជាតិ និង​គណបក្សហ៊្វុនស៊ិនប៉ិច​។ ច្បាប់​ស្ដីពី​ការ​បោះឆ្នោត​ជ្រើសតាំង​សមាជិក​ព្រឹទ្ធសភា​មាត្រា​១០ ចែង​ថា​អ្នកបោះឆ្នោត និង​អង្គ​បោះឆ្នោត​គឺជា​តំណាងរាស្ត្រ​ក្នុង​តំណែង និង​សមាជិក​ក្រុម​ប្រឹក្សា​ឃុំ​សង្កាត់​ទាំងអស់​ក្នុង​តំណែង។

នៅ​ថ្ងៃ​បើក​យុទ្ធនាការ​ឃោសនាបោះឆ្នោត​នេះ​ដែរ គណបក្ស​នយោបាយ​ដែល​ចូល​ឈរឈ្មោះ​បោះឆ្នោត​ព្រឹទ្ធសភា​ចំនួន​បី មិន​រៀបចំ​ពិធី​ជួបជុំ​ហាម​ជន និង​ហែ​ក្បូន​គគ្រឹកគគ្រេង​នៅ​តាម​ទី​សាធារណៈ​នោះ​ឡើយ ពីព្រោះ​ពួកគេ​រៀបចំ​ពិធី​ជួបជុំ​ផ្សព្វផ្សាយ​ពី​គោល​នយោបាយ និង​ពង្រឹង​ជំហរ​របស់​អង្គ​បោះឆ្នោត​នៅ​ក្នុង​មុខ​តំណែង។

គណបក្ស​កម្លាំងជាតិ​ចេញ​លិខិត​អំពាវនាវ​ចំពោះ​អង្គ​បោះឆ្នោត​ឱ្យ​បោះឆ្នោត​ជូន​គណបក្ស​កម្លាំង​ជាតិ គឺជា​ការប្រើប្រាស់​សិទ្ធិ​សេរីភាព​ស្របច្បាប់ ជា​សម្ងាត់ ឈរ​លើ​ឧត្តមគតិ មនសិការ​ជាតិ​ផ្ទាល់ខ្លួន ស្របតាម​បំណងប្រាថ្នា​របស់​ពលរដ្ឋ​ម្ចាស់​ឆ្នោត ដើម្បី​ស្រោចស្រង់​លទ្ធិ​ប្រជាធិបតេយ្យ​ឡើង​វិញ រួមគ្នា​ការពារ​សេរីភាព យុត្តិធម៌​សង្គម និង​បូរណភាព​ទឹកដី​កម្ពុជា។

ទីប្រឹក្សា​គណបក្ស​កម្លាំង​ជាតិ​លោក រ៉ុង ឈុន ប្រាប់​វិទ្យុ​អាស៊ីសេរី​ថា គណបក្ស​កម្លាំង​ជាតិ​កំពុង​រៀបចំ​កម្មវិធី​ជួប​ប្រជុំ​នៅ​តាម​មូលដ្ឋាន​ដោយ​ធ្វើ​សកម្មភាព​ឃោសនា​តែ​ពីរ​ភូមិ​គឺ​មណ្ឌល​៧ និង​មណ្ឌល​៨ ចំណែក​មណ្ឌល១ ដល់ ៦ ទុក​ឱ្យ​បក្ស​គណបក្ស​ភ្លើងទៀន​ដើម្បី​កុំ​បែក​សំឡេងឆ្នោត​ដែល​ពលរដ្ឋ​បោះឆ្នោត​ឱ្យ​អ្នក​ប្រជាធិបតេយ្យ​កាល​ពី​ឆ្នាំ​២០២២។

លោក រ៉ុង ឈុន៖ «ការ​បោះឆ្នោត​នៅ​ថ្ងៃទី​១៥ ខែ​កុម្ភៈ​ជា​ការ​បោះឆ្នោត​អសកល ដូច្នេះ​យើង​គ្រាន់តែ​ដើរ​តាម​គោលដៅ ហើយ​សារសំខាន់​បោះឆ្នោត​ឱ្យ​គណបក្ស​កម្លាំង​ជាតិ​ដើម្បី​ស្តារ​ឡើងវិញ​នូវ​ការ​គោរព​សិទ្ធិមនុស្ស យើង​ដឹង​ហើយ​ថា គណបក្ស​កម្លាំងជាតិ​ជា​បក្ស​មួយ​យកចិត្តទុកដាក់​ពី​សុខទុក្ខ​របស់​ពលរដ្ឋ​ខ្មែរ»។

ដោយឡែក​បេក្ខជន​ព្រឹទ្ធសភា​របស់​គណបក្ស​ឆន្ទៈ​ខ្មែរ ក៏បាន​រៀបចំ​កម្មវិធី​ជួប​ប្រជុំ​ឃោសនា​រក​សំឡេងឆ្នោត​ជាមួយ​អង្គ​បោះឆ្នោត​មកពី​គណបក្ស​ភ្លើងទៀន​នៅ​ភូមិភាគ​ចំនួន​៤ នៅ​ថ្ងៃ​ទី១ នៃ​យុទ្ធនា​ការឃោសនា​នេះ​ដែរ។

វិទ្យុ​អាស៊ីសេរី​មិន​អាច​ទាក់ទង​ប្រធាន​គណបក្ស​ឆន្ទៈ​ខ្មែរ​លោក សុក ហាច ដើម្បី​សាកសួរ​បន្ថែម​បាន​ទេ​នៅ​ថ្ងៃទី​១០ ខែកុម្ភៈ​។

ប៉ុន្តែ​គណបក្ស​ភ្លើងទៀន​ដែល​មាន​អង្គ​បោះឆ្នោត​ជា​ក្រុមប្រឹក្សាឃុំ​ជាង​២​ពាន់​នាក់ បាន​ចេញ​សេចក្តី​ថ្លែងការណ៍​កាលពី​ថ្ងៃទី​៩ ខែកុម្ភៈ​ថា អាជ្ញាធរ​មូលដ្ឋាន​នៅ​រាជធានី ខេត្ត​មួយចំនួន​បាន​ជួប​លួងលោម​បញ្ចុះបញ្ចូល​ឱ្យ​អង្គ​បោះឆ្នោត​របស់​គណបក្ស​ភ្លើងទៀន​បោះឆ្នោ​តឱ្យ​គណបក្ស​ដទៃ​ដើម្បី​ជា​ថ្នូរ​នឹង​ទទួល​បាន​ថវិកា​មួយ​ចំនួន​។ គណបក្ស​នេះ​ចាត់ទុក​ទង្វើ​ទាំងនេះ​ថា ជា​ការ​រំលោភច្បាប់ និង​ធ្វើ​ឱ្យ​ប៉ះពាល់​ដល់​លទ្ធផល​បោះឆ្នោត​ព្រឹទ្ធសភា​ខាងមុខ​។ គណបក្ស​ភ្លើងទៀន​អំពាវនាវ​ដល់​អាជ្ញាធរ​មូលដ្ឋាន​គ្រប់​លំដាប់​ថ្នាក់​បញ្ឈប់​សកម្មភាព​បំភិតបំភ័យ និង​លួងលោម​ទិញ​ទឹកចិត្ត​អង្គ​បោះឆ្នោត ហើយ​ស្នើ​គណៈកម្មាធិការ​ជាតិ​រៀបចំ​ការ​បោះឆ្នោត​ត្រូវ​ចាត់​វិធានការ​ចំពោះ​សកម្មភាព​មិន​ប្រក្រតី​គ្រប់​ទម្រង់​មក​លើ​អង្គ​បោះឆ្នោត។

ជុំវិញ​រឿង​នេះ អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត​លោក ហង្ស ពុទ្ធា ប្រាប់​វិទ្យុ​អាស៊ីសេរី​ថា ថ្ងៃ​ដំបូង​នៃ​ការ​ឃោស​បោះឆ្នោត​ព្រឹទ្ធសភា​បាន​ប្រព្រឹត្តទៅ​ធានា​នូវ​សន្តិសុខ សុវត្ថិភាព សណ្តាប់​ធ្នាប់​ល្អ ដោយ​គណបក្ស​នយោបាយ​បាន​ចេញ​ធ្វើ​សកម្មភាព​តាម​លទ្ធភាព និង​រូបភាព​ផ្សេងគ្នា​នៅ​តាម​ភូមិភាគ​នីមួយៗ រួមមាន​ការ​ហែ​ក្បួន ការ​ចែក​ខិត្តប័ណ្ណ ចាក់​មេក្រូ និង​ចូលរួម​ពី​អ្នកគាំទ្រ​ជាដើម​។ ចំណែក​ករណី​បក្ស​ភ្លើងទៀន​ថា អាជ្ញាធរ​ដើរ​អូសទាញ​ឬ​ទិញ​ទឹកចិត្ត​ក្រុម ប្រឹក្សាឃុំ​សង្កាត់​ឱ្យ​បោះឆ្នោត​ជូន​គណបក្ស​ណាមួយ​វិញ លោក​ណែនាំ​ឱ្យ​គណបក្ស​ភ្លើងទៀន​ដាក់​ភស្តុតាង និង​ហេតុផល​ច្បាស់លាស់​ប្តឹង​មក គ​.​ជ​.​ប ដើម្បី​ពិនិត្យ​ដោះស្រាយ​តាម​នីតិវិធី។

លោក ហង្ស ពុទ្ធា៖ «ការ​ដាក់​ពាក្យ​បណ្តឹង​គឺ គ​.​ជ​.​ប មិនទាន់​ទទួល​បាន​ពាក្យ​បណ្តឹង​ណាមួយ​ទេ អ៊ីចឹង​អ្នក​ប្តឹង​ត្រូវ​មាន​ភាព​ច្បាស់លាស់​ផង​ដែរ ហើយ​ការ​លើកឡើង​ផ្សេង​ត្រូវ​មាន​ភស្តុតាង ហេតុផល​ច្បាស់លាស់​ដើម្បី​បញ្ជាក់​ថា យើង​ចូលរួម​ក្នុង​វិស័យ​បោះឆ្នោត​ប្រកប​ដោយ​តម្លាភាព មិនមែន​ញុះញង់ ឬ​ធ្វើ​ឱ្យ​ប៉ះពាល់​ដល់​សណ្ដាប់ធ្នាប់​របស់​សង្គម​បាទ»។

យ៉ាងណាក្តី នាយក​ប្រតិបត្តិ​អង្គការ​ឃ្លាំមើល​ការបោះឆ្នោត​នៅ​កម្ពុជា​ហៅ​កាត់​ថា និចហ្វិច (Nicfec) លោក សំ គន្ធាមី មាន​ប្រសាសន៍​ថា អង្គ​បោះឆ្នោត​ជា​ទិសដៅ​សំខាន់​របស់​គណបក្ស​នយោបាយ​ក្នុង​ឃោសនា​រក​សំឡេង​គាំទ្រ​សម្រាប់​ការបោះឆ្នោត​ព្រឹទ្ធសភា​ខាងមុខ​។ ប៉ុន្តែ​លោក​ថា បើ​សិន​សមាជិក​គណបក្សនយោបាយ​ណា​ធ្វើ​សកម្មភាព​អូសទាញ​ក្រោម​រូបភាព​ទិញដូរ គំរាមកំហែង ឬ​បំភិតបំភ័យ​ដើម្បី​បង្ខំ​ឱ្យ​ក្រុម​ប្រឹក្សាឃុំ​សង្កាត់​ណា​ម្នាក់​បោះឆ្នោត​ឱ្យ​នោះ​ជា​ទង្វើ​ខុស​ច្បាប់។

លោក សំ គន្ធាមី៖ «អ្នកទិញ​សន្លឹកឆ្នោត​គឺ​ខុសច្បាប់ និង​អង្គ​បោះឆ្នោត​ត្រូវ​មាន​ឆន្ទៈ ពីព្រោះ​គាត់​មិនមែន​ជា​ប្រជាពលរដ្ឋ​ទេ គាត់​ជា​ក្រុមប្រឹក្សា​ស្រាប់​ហើយ​គឺ​គាត់​ត្រូវ​មាន​ឆន្ទៈ​ច្បាស់​លាស់»។

ការបោះឆ្នោត​ព្រឹទ្ធសភា​នៅ​ថ្ងៃទី​២៥ ខែ​កុម្ភៈ ខាងមុខ​នេះ​មាន​អង្គ​បោះឆ្នោត​ជិត ១​ម៉ឺន ២​ពាន់​នាក់​(១១.៧៤៧) ក្នុង​នោះ​តំណាងរាស្ត្រ​ក្នុង​តំណែង​ចំនួន​១២៥​នាក់ និង​សមាជិក​ក្រុម​ប្រឹក្សា​ឃុំ សង្កាត់ ក្នុង​តំណែង​ចំនួន​ជាង ១​ម៉ឺន ១​ពាន់ (១១.៦២២)​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment