កម្ពុជា
18/02/2024 – 08:55
ដោយ៖ អ៊ឹង ប៊ុនថន
RFI
អ្នកនាំពាក្យក្រសួងការបរទេសកម្ពុជា នៅថ្ងៃទី១៧កុម្ភៈ បានចេញសេចក្តីថ្លែងការណ៍ជាភាសាអង់គ្លេសមួយដោយទាត់ចោលនូវការចុះផ្សាយអត្ថបទវិភាគរបស់សារព័ត៌មាន The Diplomat ដែលបានវិភាគថា សហរដ្ឋអាមេរិកអាចនឹងដាក់ទណ្ឌកម្មមកលើប្រទេសកម្ពុជា ដូចការដាក់ទណ្ឌកម្មទៅលើប្រទេសកូរ៉េខាងជើងដែលកាន់អំណាចផ្តាច់ការ។
កម្ពុជាទាត់ចោលការវិភាគថាអាមេរិកនឹងដាក់ទណ្ឌកម្មកម្ពុជាដូចកូរ៉េខាងជើង
នៅក្នុងអត្ថបទចេញផ្សាយនៅថ្ងៃទី១៦កុម្ភៈ សារព័ត៌មាន The Diplomat បានធ្វើការប្រៀបធៀបពីរបៀបដឹកនាំនៅកម្ពុជា និងកូរ៉េខាងជើង គឺជាឧទាហរណ៍នៃរបបផ្តាច់ការ ដែលប្តេជ្ញាផ្ទេរអំណាចតពូជ ដោយគ្មានប្រកួតប្រជែងអំណាចដោយបើកចំហសម្រាប់សាធារណៈជន។
សារព័ត៌មានដែលផ្តោតលើការវិភាគបែបនយោបាយមួយនេះ កត់សំគាល់ថា របបទាំងពីរនេះមានឆន្ទៈដូចគ្នាក្នុងការប្រើប្រាស់អំពើហិង្សាលើប្រជាជនរបស់ពួកគេ ដើម្បីធានាបាននូវការក្តោបក្តាប់អំណាចបន្ត។ ប៉ុន្តែការដឹកនាំរបៀបនេះ ត្រូវបានសារព័ត៌មាន The Diplomat ដែលដកស្រង់សំដីអ្នកជំនាញសេដ្ឋកិច្ចរបស់សហរដ្ឋអាមេរិកមកព្រមានថា ប្រទេសទាំងពីរនឹងទទួលបានប្រយោជន៍តិចតួចប៉ុណ្ណោះពីការធ្វើពាណិជ្ជកម្មសកល ហើយគ្មានហេតុផលណាមួយដើម្បីស្រមៃថាវានឹងផ្លាស់ប្តូរនាពេលអនាគតនោះទេ។

ក្នុងអត្ថបទវិភាគ The Diplomat បានលើកឧទាហរណ៍នៃការដាក់ទណ្ឌកម្មរបស់សហរដ្ឋអាមេរិកប្រឆាំងការរីកសាយភាយអាវុធនុយក្លេអ៊ែរបន្ថែមទៀតរបស់កូរ៉េខាងជើង ដែលកាន់អំណាចតពូជ ដោយមានការរំលោភសិទ្ធិមនុស្សធ្ងន់ធ្ងរ ក្រោមកណ្តាប់ដៃ លោក គីម ជុងអ៊ុន។ ជាមួយគ្នានោះ The Diplomat ក៏បានលើកឧទាហរណ៍ដែរ ករណីរដ្ឋាភិបាលក្រុងវ៉ាស៊ីនតោន ដាក់ទណ្ឌកម្មប្រឆាំងនឹងឧកញ៉ានៅកម្ពុជា ដូចជាលោក ទ្រី ភាព ទីប្រឹក្សាលោក ហ៊ុន សែន ដែលត្រូវបានសារព័ត៌មាននេះ បរិហារថា ជាអ្នករកស៊ីកាប់ឈើខុសច្បាប់ទ្រង់ទ្រាយធំ។
ដោយស្រង់សំដីលោក Steve Hanke អ្នកជំនាញសេដ្ឋកិច្ចនៅសាកលវិទ្យាល័យរបស់សហរដ្ឋអាមេរិក The Diplomat បានសរសេរថា «ការដាក់ទណ្ឌរបស់សហរដ្ឋអាមេរិកនឹងមិនលើកលែងសម្រាប់កូរ៉េខាងជើង ឬកម្ពុជានោះទេ បើមិនធ្វើដូច្នោះទេ នោះគឺជាការលើកទឹកចិត្តដល់ក្រុមម៉ាហ្វីយ៉ាឲ្យបន្តឧក្រិដ្ឋកម្មអន្តរជាតិ»។
ប្រតិកម្មនឹងការផ្សាយរបស់សារព័ត៌មាន The Diplomat អ្នកនាំពាក្យក្រសួងការបរទេសកម្ពុជា បានគូសបញ្ជាក់ថា កម្ពុជាមិនដូចកូរ៉េខាងជើងនោះឡើយ។ បើតាមលោក ជុំ សន្ទរី កម្ពុជាមានការបោះឆ្នោតជាទៀងទាត់តាំងពីឆ្នាំ១៩៩៣មក និងការបោះឆ្នោតចុងក្រោយនៅឆ្នាំ២០២៣ គឺមានគណបក្សចូលរួមរហូត១៨បក្ស។
មួយវិញទៀត បើតាមក្រសួងការបរទេសកម្ពុជា ទំនាក់ទំនងរវាងកម្ពុជា និងសហរដ្ឋអាមេរិក គឺនៅតែបន្តសហប្រតិបត្តិការលើផ្នែកជាច្រើនទាំងពាណិជ្ជកម្ម វប្បធម៌ សុខភាព និងការអប់រំជាដើម។
ទោះជាយ៉ាងណាមកទល់ពេលនេះសហរដ្ឋអាមេរិកនៅមិនទាន់សម្រេចថា នឹងផ្តល់ប្រព័ន្ធអនុគ្រោះ GSP ដល់កម្ពុជាឡើងវិញនៅឡើយទេ ខណៈប្រព័ន្ធនេះបានផុតកំណត់តាំងពីឆ្នាំ២០២០៕
អាមេរិកគេបានដាក់ទណ្ឌកម្ម(embargo)មកលើកម្មជារួចជាស្រាច់ហើយគ្រាន់តែគេមិនទាន់រឹតបន្តឹង។បើប្រៀបទៅនឹងការព្យួរកអាមេរិកបានពាកខ្សែចូលក្នុងកកម្មជាហើយតែគេមិនទាន់ធាក់កៅអីចេញពីជើង។ត្រង់នេះហើយទើបគ្មានក្រុមហ៊ុនធំៗមកពីប្រទេសប្រជាធិបតេយ្យមកកម្មជាឡើយ។