ដោយ ខាន់ លក្ខិណា
2024.02.28
RFA
ស្ដាប់ ឬទាញយកសំឡេង
អតីតអគ្គសេនាធិការរង នៃកងរាជអាវុធហត្ថផ្ទៃប្រទេស អ្នកស្រី ជា រដ្ឋា និងជាទីប្រឹក្សាប្រធានគណបក្សប្រជាជនកម្ពុជា។ រូប៖ ហ្វេសប៊ុកលោក អ៊ុំ សំអាន
ប្រធានគណបក្សកាន់អំណាចលោក ហ៊ុន សែន ចេញលិខិតតែងតាំងទណ្ឌិតជាទីប្រឹក្សាផ្ទាល់របស់លោក។ ក្នុងលិខិតរបស់គណបក្សប្រជាជនកម្ពុជា ចុះហត្ថលេខាដោយលោក ហ៊ុន សែន ថ្ងៃទី២៣ កុម្ភៈ ឆ្នាំ២០២៤ តែងតាំងអ្នកស្រី ជា រដ្ឋា ជាទីប្រឹក្សារបស់លោក ហ៊ុន សែន ប្រធានគណបក្សប្រជាជនកម្ពុជា។ តើអ្នកស្រី ជា រដ្ឋា ជានរណា និងមានប្រវត្តិជាប់ទោសឧក្រិដ្ឋបែបណា?
អ្នកស្រី ជា រដ្ឋា គឺជាអតីតអគ្គសេនាធិការរង នៃកងរាជអាវុធហត្ថផ្ទៃប្រទេស។ អ្នកស្រី និងក្រុមបក្ខពួកចំនួន ៥នាក់ទៀត ត្រូវបានសាលាឧទ្ធរណ៍កាត់ទោស កាលពីខែវិច្ឆិកា ឆ្នាំ២០០៩ ឱ្យជាប់ពន្ធនាគាររយៈពេលពីចន្លោះ ១៥ឆ្នាំ ទៅដល់ ១៨ឆ្នាំផ្សេងៗគ្នា ចំពោះការវាយប្រហារទឹកអាស៊ីតទៅលើអ្នកស្រី យ៉ា សុខនីម ដែលជាម្ដាយមីងរបស់អ្នកនាង អ៊ិន សុខលីដា កាលពីខែឧសភា ឆ្នាំ២០០៨ កន្លងទៅ។ បន្ទាប់មកនៅដើមតុលា ឆ្នាំ២០១០ តុលាការកំពូលបានចេញសេចក្ដីសម្រេចតម្កល់សាលដីការបស់សាលាឧទ្ធរណ៍ទុកជាបានការ។
នៅពេលនោះ អ្នកស្រី ជា រដ្ឋា ត្រូវបានសាលាឧទ្ធរណ៍រកឃើញថា ជាអ្នកបញ្ជាការវាយប្រហារទឹកអាស៊ីតលើជនរងគ្រោះអ្នកស្រី យ៉ា សុខនីម បន្ទាប់ពីដៃគូស្នេហារបស់គាត់ គឺកញ្ញា អ៊ិន សុខលីដា ត្រូវជាក្មួយស្រីរបស់ជនរងគ្រោះបានបែកចិត្តចេញពីគាត់។ បន្ទាប់ពីកើតមានរឿងនេះ អ្នកនាង អ៊ិន សុខលីដា និងក្រុមគ្រួសាររបស់នាងចំនួន ១៧នាក់ បានទៅស្នាក់នៅប្រទេសម៉ាឡេស៊ី ដើម្បីស្វែងរកសិទ្ធិជ្រកកោននយោបាយនៅប្រទេសទី៣ ដោយមានការភ័យខ្លាចពីសុវត្ថិភាព។
អ្នកនាង អ៊ិន សុខលីដា នៅគ្រានោះ គឺជាតារាសម្ដែងនិងជាអតីតបវរកញ្ញាទេសចរណ៍កម្ពុជា។អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងប្រាប់វិទ្យុអាស៊ីសេរី នៅថ្ងៃទី២៧ កុម្ភៈ ថា ការតែងតាំងអ្នកស្រី ជា រដ្ឋា នេះ ជារឿងឯកជន។
លោក សុខ ឥសាន៖ «ការពិតមិនយ៉ាងម៉េចទេ។ ឥឡូវអាស៊ីសេរីលែងអ្នកផ្សាយព័ត៌មានទៅជាស៊ើបអង្កេត រឿងគេរឿងឯង ពុករលួយមិនពុករលួយអី របៀបចារកម្មផង ស៊ើបអង្កេតផង លែងធ្វើជាប្រព័ន្ធផ្សព្វផ្សាយហើយ។ អ៊ីចឹងខ្ញុំអត់មានអីឆ្លើយទេណាស់ ពីព្រោះវាពាក់ព័ន្ធនឹងឯកជនភាពរបស់គេ»។
សារព័ត៌មានហ្វ្រេសញូវ (Fresh News) ដែលគាំទ្ររដ្ឋាភិបាលចុះផ្សាយកាលពីថ្ងៃទី២៦ កុម្ភៈថា ក្រៅពីមានតួនាទីជាទីប្រឹក្សារបស់ប្រធានគណបក្សប្រជាជនកម្ពុជា លោក ហ៊ុន សែន នោះ អ្នកស្រី ជា រដ្ឋា ក៏មានតួនាទីជាទីប្រឹក្សារដ្ឋាភិបាលផងដែរ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត ប្រាប់វិទ្យុអាស៊ីសេរីនៅថ្ងៃទី២៧ កុម្ភៈ ថា ការតែងតាំងជាទីប្រឹក្សាក្នុងគណបក្ស គឺជាសិទ្ធិរបស់គណបក្ស ប៉ុន្តែអាចមានការរិះគន់ខ្លះ ប្រសិនបើបុគ្គលដែលត្រូវបានតែងតាំងនោះ មានប្រវត្តិអតីតកាល ដែលធ្លាប់មានបញ្ហាត្រូវបានតុលាការកាត់ឱ្យមានទោស។
យ៉ាងណាលោកពន្យល់ថា ការតែងតាំងបុគ្គលណាម្នាក់ ជាទីប្រឹក្សារដ្ឋាភិបាលវិញ ត្រូវមានការពិនិត្យឱ្យបានដិតដល់លើបុគ្គលនោះដែរ គឺគួរតែជាបុគ្គលដែលមានស្នាដៃជួយរដ្ឋាភិបាល ជួយប្រទេសជាតិ និងជាបុគ្គលដែលគួរឱ្យគោរព។
លោក អំ សំអាត៖ «ក៏ប៉ុន្តែបើសិនជាបុគ្គលដែលគាត់ធ្លាប់មានបណ្ដឹងជាប់កាត់ទោសដោយតុលាការអីជាដើមហ្នឹង អាហ្នឹងទាល់តែមានការស្ដារនីតិសម្បទាឡើងវិញ ដែលអាចទទួលនូវការតែងតាំង។ ទោះយ៉ាងណា យើងឃើញថា បើសិនជាមានបុគ្គលដែលធ្លាប់មានការកាត់ទោសពីតុលាការអីហើយ ជាទំនៀមទម្លាក់យើងឃើញថា មានមតិខ្លះតែមានការរិះគន់»។
នៅឆ្នាំ២០០៨ ក្រោយហេតុការណ៍នោះកើតឡើង ជនល្មើសអ្នកស្រី ជា រដ្ឋា ត្រូវបានរដ្ឋាភិបាលកម្ពុជាបកស័ក្ដ និងមុខតំណែងអតីតអគ្គសេនាធិការរង នៃកងរាជអាវុធហត្ថផ្ទៃប្រទេស ហើយអាជ្ញាធរនគរបាលកម្ពុជា និងមន្ត្រីនគរបាលរបស់អាំងទែប៉ូល (Interpol) បានតាមចាប់អ្នកស្រី ជា រដ្ឋា ពីបទឧក្រិដ្ឋកម្មប្រឆាំងជីវិតនិងសុខភាព។ នៅគ្រានោះ ពីកន្លែងលាក់ខ្លួននៅក្នុងប្រទេស អ្នកស្រី ជា រដ្ឋា បានប្រាប់សារព័ត៌មានថា អ្នកស្រីមិនបានប្រព្រឹត្តិកំហុសដូចការចោទប្រកាន់នោះទេ។
យ៉ាងណាក៏ដោយចុះ បើទោះជាតុលាការជាន់ខ្ពស់ទាំងពីរថ្នាក់រកឃើញថា អ្នកស្រី ជា រដ្ឋា មានកំហុស ហើយផ្ដន្ទាទោសឱ្យជាប់គុក១៨ឆ្នាំក៏ដោយ ក៏គេមិនឃើញអ្នកស្រី ជា រដ្ឋា ត្រូវបានចាប់ខ្លួន និងជាប់ពន្ធនាគារមួយថ្ងៃសោះដែរ។ ប៉ុន្តែ អ្វីដែលធ្វើឱ្យសាធារណជនភ្ញាក់ផ្អើលកាន់តែខ្លាំង និងស្លុតចិត្តនោះ គឺទណ្ឌិតឧក្រិដ្ឋជនរូបនេះ ត្រូវបានលោក ហ៊ុន សែន តែងតាំងជាទីប្រឹក្សាផ្ទាល់របស់លោក និងរបស់រដ្ឋាភិបាលទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ពូជចោរត្រូវតែយកចោរគ្នាវាមកធ្វើការជាមួយគ្នាហើយទើបវាបានសុខ! សំដីអាតាចាស់ឥសានដូបអាចម៍ក្នុងកន្ឋោរ!