ដោយ មាន ឫទ្ធិ
2024.02.29
RFA

ឧកញ៉ាទាំង៤រូបដែលមានរឿងអាស្រូវបន្តក្លាយជាសមាជិកព្រឹទ្ធសភា (ពីឆ្វេង) លោក លី យ៉ុងផាត់ លោក ម៉ុង ឫទ្ធី លោក កុក អាន និងលោក សុខ គង់។ Photo Courtesy
ក្រោយការបោះឆ្នោតជ្រើសតាំងសមាជិកព្រឹទ្ធសភាថ្ងៃអាទិត្យ ទី២៥ ខែកុម្ភៈ តើឧកញ៉ាសម្បូរដោយរឿងរ៉ាវអាស្រូវណាខ្លះដែលស្និទ្ធនឹងលោក ហ៊ុន សែន អាចបន្តទទួលបានតំណែងសមាជិកព្រឹទ្ធសភារបស់គណបក្សប្រជាជនកម្ពុជា?
កៅអីព្រឹទ្ធសភាត្រូវគេមើលឃើញថា គឺជាតំណែងដែលគណបក្សប្រជាជនកម្ពុជាដឹកនាំដោយឪនាយករដ្ឋមន្ត្រី លោក ហ៊ុន សែន ទុកប្រើប្រាស់សម្រាប់ទិញទឹកចិត្តសូកក្រុមឈ្មួញរកស៊ីគ្រាក់ៗនៅកម្ពុជា ជាថ្នូរនឹងការផ្គត់ផ្គង់ហិរញ្ញវត្ថុរបស់ពួកគេដល់គណបក្ស។
លទ្ធផលបណ្ដោះអាសន្ននៃការបោះឆ្នោតជ្រើសតាំងសមាជិកព្រឹទ្ធសភាកាលពីថ្ងៃអាទិត្យ ទី២៥ ខែកុម្ភៈ បង្ហាញថា គណបក្សកាន់អំណាចបានរបូតអស់ ៣អាសនៈ ទៅគណបក្សប្រឆាំង ក្នុងចំណោមអាសនៈព្រឹទ្ធសភាដែលត្រូវដណ្ដើមយកសរុបចំនួន៥៨។
យ៉ាងហោចណាស់ មានអាសនៈព្រឹទ្ធសភាចំនួន៤ អាចត្រូវបានគណបក្សកាន់អំណាចបម្រុងទុកឱ្យក្រុមឧកញ៉ាល្បីឈ្មោះខាងរកស៊ីទុច្ចរិត ខុសច្បាប់ និងរំលោភសិទ្ធិមនុស្សធ្ងន់ធ្ងរនៅកម្ពុជា ក្រោមប្រព័ន្ធ«ឯងជួយអញ អញជួយឯង»។ ឧកញ៉ាដែលអាចបន្តជាប់ឈ្មោះជាសមាជិកព្រឹទ្ធសភារបស់បក្សប្រជាជនកម្ពុជាទាំងនោះ រួមមាន៖
ទី១៖ លោក លី យ៉ុងផាត់ កើតឆ្នាំ១៩៥៨ ឈរជាបេក្ខជនពេញសិទ្ធិ លេខរៀងទី៤ ប្រចាំភូមិភាគទី៧។ មានរហស្សនាមថាជា «ស្តេចកោះកុង» លោកមានឈ្មោះដើម ផាត់ ស៊ុផាផា (Phat Suphapha) មានសញ្ជាតិខ្មែរ-ថៃ។ លោកបង្កើនទ្រព្យសម្បត្តិរបស់លោកផ្តើមចេញពីការរកស៊ីរត់ពន្ធបារី បើកបនល្បែងស៊ីសងកាស៊ីណូ និងរមណីយដ្ឋាន។ លោកជាម្ចាស់ក្រុមហ៊ុនចែកចាយបារីថ្នាំជក់ឈ្មោះ Hero King ជាអភិបាលក្រុមហ៊ុនឧស្សាហកម្មស្ករកោះកុង (Koh Kong Sugar Industry Co., Ltd.) និងក្រុមហ៊ុនចម្ការអំពៅកោះកុង (Koh Kong Sugar Plantation Co., Ltd.) ដែលជាប់កំណត់ត្រាថាជាអាជីវកម្ម «ស្ករឈាម» ដោយសារពាក់ព័ន្ធនឹងអំពើច្បាមយកដីធ្លី ដុតផលដំណាំ និងបណ្តេញពលរដ្ឋខ្មែរក្រីក្រចេញពីផ្ទះសម្បែងដោយបង្ខំ។ លោកក៏ជាម្ចាស់ក្រុមហ៊ុនទូរទស្សន៍ក្នុងស្រុក PNN និងអាជីវកម្មជាច្រើនទៀត ជ្រកក្រោមយីហោសម្ព័ន្ធក្រុមហ៊ុន L.Y.P Group។
ទី២៖ លោក ម៉ុង ឫទ្ធី កើតឆ្នាំ១៩៥៤ ឈរជាបេក្ខជនពេញសិទ្ធិលេខរៀងទី៥ ប្រចាំភូមិភាគទី៧។ មានរហស្សនាមជា «អ្នកចាត់ចែងរកលុយឱ្យលោក ហ៊ុន សែន» (Hun Sen’s Money Man) លោកល្បីឈ្មោះអាក្រក់ជាប់ចោទពីរឿងរត់ពន្ធកញ្ឆាប្រមាណ៧តោនបង្កប់ខាងក្រោមបន្ទះកៅស៊ូក្រែបបម្រុងដឹកទៅកំពង់ផែក្រុងព្រះសីហនុ កាលពីឆ្នាំ១៩៩៧។ កាលនោះ លោក ហ៊ុន សែន ដែលជានាយករដ្ឋមន្ត្រីទី២ បានចេញមុខកាងការពារលោកមិនឱ្យនរណាប៉ះពាល់បានឡើយ។ លោក ម៉ុង ឫទ្ធី ជាម្ចាស់សម្ព័ន្ធក្រុមហ៊ុន ម៉ុង ឫទ្ធី គ្រុប ដែលវិនិយោគលើវិស័យជាច្រើន ដូចជា សំណង់ក្មេងវត្ត សាងសង់សាលារៀននៅទូទាំងប្រទេសដាក់ឈ្មោះលោក ហ៊ុន សែន កំពង់ផែឯកជន កសិឧស្សាហកម្ម ដំណាំដូងប្រេង កៅស៊ូ ផ្លែឈើ ចិញ្ចឹមជ្រូក គោ ក្របី សម្រាប់នាំចេញជាដើម។ លោកធ្លាប់ទទួលបានដីសម្បទានសេដ្ឋកិច្ចពីរដ្ឋាភិបាលជាច្រើនម៉ឺនហិកតារដើម្បីដាំដូងប្រេងនៅខេត្តព្រះសីហនុ។ ក្នុងនោះ លោកក៏ធ្លាប់ពាក់ព័ន្ធនឹងករណីបណ្តេញប្រជាពលរដ្ឋដោយបង្ខំផងដែរ។
ទី៣៖ លោក កុក អាន កើតឆ្នាំ១៩៥៤ ឈរជាបេក្ខជនពេញសិទ្ធិ លេខរៀងទី៤ ប្រចាំភូមិភាគទី៥។ មានរហស្សនាមថាជា «បិតាបនល្បែងស៊ីសង» លោកមានឈ្មោះដើមថា ភូ កុកអាន ជាកូនកាត់ចិន បច្ចុប្បន្នជាម្ចាស់សម្ព័ន្ធក្រុមហ៊ុន អានកូ គ្រុប (ANCO GROUP)។ លោករកស៊ីខាងឧស្សាហកម្មនេសាទត្រី បារី ថ្នាំជក់ កាលពីទសវត្សទី៩០ ហើយក្រោយមកបានពង្រីកមុខរបរខាងល្បែងស៊ីសង ក្លាយជាម្ចាស់កាស៊ីណូឈ្មោះ Crown Resorts នៅក្រុងប៉ោយប៉ែត ព្រំដែនកម្ពុជា-ថៃ នៅខេត្តប៉ៃលិន នៅក្រុងជ្រៃធំ ខេត្តកណ្តាល និងក្រុងបាវិត ខេត្តស្វាយរៀង ជាប់ព្រំដែនកម្ពុជា-វៀតណាម។ សារព័ត៌មាន អាល់ ហ្សាហ្ស៊ីរ៉ា (Al Jazeera) កាលពីឆ្នាំ២០២២ បានលាតត្រដាងថា សួនឧស្សាហកម្ម Crown Industrial Park របស់លោក កុក អាន នៅក្រុងព្រះសីហនុ គឺជាកន្លែងប្រព្រឹត្តអំពើឆបោកតាមអនឡាញបែបទាសករសម័យទំនើប និងការធ្វើទារុណកម្មមនុស្សដ៏គួរឱ្យខ្លាចរអា។ ក្រុមហ៊ុនរបស់មហាសេដ្ឋីរូបនេះ ក៏ធ្លាប់រងនូវការចោទប្រកាន់ពីការច្បាមយកដីធ្លីរបស់ពលរដ្ឋនៅបុរីកាំកូ ក្រុងភ្នំពេញ និងបង្កឱ្យមានទឹកជន់លិចលង់ផ្ទះសម្បែងរបស់អ្នកស្រុកនៅឃុំទួលពង្រ ស្រុកម៉ាឡៃ ខេត្តបន្ទាយមានជ័យ ដោយសារក្រុមហ៊ុនសង់អាងទឹកក្នុងតំបន់នោះ។ លោកក៏ធ្លាប់មានរឿងរ៉ាវអាស្រូវជាច្រើនទៀតទាក់ទងនឹងការដណ្តើមកាន់កាប់សាកលវិទ្យាល័យភ្នំពេញអន្តរជាតិ (PPIU) និងការប្តឹងផ្តល់នៅធនាគារ Union Commercial Bank។ លោក កុក អាន ក៏ជាអ្នកជួយចេញលុយ ៥០លានដុល្លារដែលរដ្ឋាភិបាលលោក ហ៊ុន សែន សងឱ្យរដ្ឋាភិបាលថៃ ចំពោះការខូចខាតនានាបណ្ដាលមកពីកុបកម្មដុតស្ថានទូត និងអគារក្រុមហ៊ុនថៃកាលពីដើមឆ្នាំ២០០៣ផងដែរ។
ទី៤៖ លោក សុខ គង់ កើតឆ្នាំ១៩៥៦ ឈរជាបេក្ខជនបម្រុង លេខរៀងទី១ ប្រចាំភូមិភាគទី៤។ មានរហ័សនាមថា «Mr. Sokimex» លោកគឺជាម្ចាស់ក្រុមហ៊ុនលក់សាំង សូគីម៉ិច ល្បីឈ្មោះអាក្រក់ខាងរត់ពន្ធសាំង ប្រេងកាត កៅស៊ូ សម្ភារៈយោធា ស្បៀង និងថ្នាំសង្កូវសម្រាប់យោធា និងកិបកេងចំណូលបានពីការលក់សំបុត្រឱ្យភ្ញៀវទេសចរបរទេសចូលទស្សនាតំបន់អង្គរ។ លោកគឺជាម្ចាស់សណ្ឋាគារយីហោ សុខា អូតែល និងទទួលបានសិទ្ធិវិនិយោគខ្វះតម្លាភាពនៅតាមតំបន់ជាច្រើនពិសេសនៅតំបន់រមណីយដ្ឋានភ្នំបូកគោ។ បច្ចុប្បន្ន មហាសេដ្ឋីរូបនេះ ក្ដោបក្ដាប់មុខជំនួញជាច្រើនក្រោមស្លាកសម្ព័ន្ធក្រុមហ៊ុន សូគីម៉ិច អ៊ិនវេសមេន គ្រុប ដែលរកស៊ីចែកចាយផលិតផលប្រេងឥន្ធនៈ ហ្គាស កៅស៊ូក្រាលថ្នល់ កាត់ដេរ សណ្ឋាគារ អចលនទ្រព្យ និងមន្ទីរពេទ្យជាដើម។ ក្រៅពីតំបន់អង្គរ ក្រុមហ៊ុនរបស់ឧកញ៉ារូបនេះ ក៏ធ្លាប់ស្វះស្វែងរកសិទ្ធិចាត់ចែងកេរដំណែលសម្បត្តិវប្បធម៌ប្រាសាទបុរាណខ្មែរ ដូចជានៅប្រាសាទសម្បូរព្រៃគុក ប្រាសាទព្រះវិហារ និងតំបន់ឧទ្យានជាតិព្រះមុនីវង្ស បូកគោ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។