កម្ពុជា
30/03/2024 – 11:35
ដោយ៖ សេង បារាំង
RFI
លោក អ៊ុំ វីរៈរដ្ឋ មន្រ្តីបក្សកម្លាំងជាតិ ត្រូវសមត្ថកិច្ចចាប់ខ្លួននៅថ្ងៃនេះ
លោក អ៊ុំ វីរៈរដ្ឋ អតីតមន្រ្តីអតីតគណបក្សសង្រ្គោះជាតិ និងបច្ចុប្បន្នជាមន្រ្តីជាន់ខ្ពស់គណបក្សកម្លាំងជាតិប្រចាំខេត្តកំពង់ស្ពឺ ត្រូវបានសមត្ថកិច្ចចាប់ខ្លួន នៅថ្ងៃទី៣០ ខែមីនា ឆ្នាំ២០២៤នេះ។ តាមលោក ទិន សុចិត្រា ព្រះរាជអាជ្ញារងនៃអយ្យការអមសាលាដំបូងខេត្តកំពង់ស្ពឺ ការចាប់ខ្លួនមន្ត្រីបក្សប្រឆាំងរូបនេះ ធ្វើឡើងតាមសាលក្រមរបស់តុលាការខេត្តកំពង់ស្ពឺ ក្រោមបទចោទប្រកាន់រួមគំនិតក្បត់។ ប៉ុន្តែព្រះរាជអាជ្ញារងរូបនេះ មិនបានបញ្ជាក់ថា រួមគំនិតក្បត់ លើរឿងអ្វីនោះទេ ដោយអះអាងថាលោកនៅមិនទាន់បានមើលសំណុំរឿងនេះ។
គួររំលឹកថា កន្លងមកមានមន្រ្តីអតីតគណបក្សសង្រ្គោះជាតិជាច្រើនរូប ត្រូវបានសមត្ថកិច្ចចាប់ខ្លួនជាបន្តបន្ទាប់ពីបទ «រួមគំនិតក្បត់» ក្រោយប្រកាសគាំទ្រមាតុភូមិនិវត្តន៍ ០៩ វិច្ឆិកា ឆ្នាំ២០១៩ របស់លោក សម រង្ស៊ី ប្រធានអតីតគណបក្សសង្រ្គោះជាតិ។ មកទល់នឹងពេលនេះ មានមន្រ្តីអតីតគណបក្សសង្រ្គោះជាតិខ្លះនៅជាប់ឃុំក្នុងពន្ធនាគារនៅឡើយ និងមានខ្លះទៀតត្រូវបានតុលាការសម្រេចដោះលែងក្រោយពីពួកគេសុំទោស និងចូលរួមជីវភាពនយោបាយជាមួយគណបក្សប្រជាជន៕
