ដោយ ច័ន្ទ ដារ៉ូ
2024.03.31
RFA
ស្ដាប់ ឬទាញយកសំឡេង
អគ្គហេរញ្ញិករបស់គណបក្សកម្លាំងជាតិលោក អ៊ំ វីរៈរដ្ឋ និងភរិយា។ រូប៖ គណនីហ្វេសប៊ុក (Facebook) របស់លោក អ៊ំ វីរៈរដ្ឋ
ប្រពន្ធមន្ត្រីគណបក្សប្រឆាំងច្រានចោលចំពោះតុលាការខេត្តកំពង់ស្ពឺ ដែលបានលើកយកសំណុំរឿងចាស់ដើម្បីផ្ដន្ទាទោសឱ្យប្ដីជាប់គុក៧ឆ្នាំដោយអយុត្តិធម៌ និងស្នើតុលាការដោះលែងប្ដីឱ្យមកជួបជុំក្រុមគ្រួសារឡើងវិញ។ ការលើកឡើងនេះ បន្ទាប់ពីតុលាការខេត្តកំពង់ស្ពឺ បានផ្ដន្ទាទោស និងចាប់ខ្លួនមន្ត្រីគណបក្សប្រឆាំង៣នាក់ ក្នុងសំណុំរឿងរួមគំនិតក្បត់ពាក់ព័ន្ធការគាំទ្រមាតុភូមិនិវត្តន៍របស់លោក សម រង្ស៊ី កាលពីឆ្នាំ២០១៩។ មន្ត្រីសិទ្ធិមនុស្សព្រួយបារម្ភអំពីការរឹតត្បិតសិទ្ធិសេរីភាពផ្នែកនយោបាយដែលនាំឱ្យកម្ពុជាខាតបង់ផលប្រយោជន៍ធំ។
គ្រួសារមន្ត្រីគណបក្សប្រឆាំងចាត់ទុកការសម្រេចរបស់តុលាការខេត្តកំពង់ស្ពឺ ក្នុងសំណុំរួមគំនិតក្បត់នោះ ថាជារឿងមិនត្រឹមត្រូវ និងមិនអាចទទួលយកបានឡើយ។
ប្រពន្ធរបស់មន្ត្រីគណបក្សកម្លាំងជាតិលោក អ៊ំ វីរៈរដ្ឋ គឺលោកស្រី រ៉ានី រស្មី ប្រាប់វិទ្យុអាស៊ីសេរីនៅថ្ងៃទី៣១ ខែមីនា ក្រោយពេលជួបប្ដីនៅពន្ធនាគារខេត្តកំពង់ស្ពឺថា លោកស្រីខ្លោចចិត្តពេលឃើញប្ដីស្លៀកពាក់ខោអាវអ្នកទោសប្រាប់ឱ្យលោកស្រីរឹងមាំទៅមុខ។ យ៉ាងណាលោកស្រីខកចិត្តចំពោះតុលាការខេត្តកំពង់ស្ពឺដែលផ្ដន្ទាទោស និងចាប់ខ្លួនប្ដីដាក់ពន្ធនាគារនេះ ពីព្រោះគាត់ជាមនុស្សស្លូតត្រង់ចេះជួយអ្នកទាន់ខ្សោយ មានបេះដូងស្រឡាញ់ជាតិ ស្រឡាញ់ទឹកដី ដោយពុំបានប្រព្រឹត្តខុសច្បាប់អ្វីឡើយ។ លោកស្រីស្នើដល់តុលាការដោះលែងប្ដីដើម្បីវិលត្រឡប់ជួបជុំប្រពន្ធកូនវិញ ស្របពេលលោក អ៊ំ វីរៈរដ្ឋ កំពុងមានជំងឺលើសឈាមត្រូវការមើលថែពីគ្រួសារជាចាំបាច់។
លោកស្រី រ៉ានី រស្មី៖ «សុខទុក្ខរបស់គាត់អត់ល្អទេ គាត់ឱ្យខ្ញុំរឹងមាំមើលថែកូនឱ្យបានល្អ គាត់ស្លេកស្លាំង ហើយភ្នែកគាត់ក្រហមខ្លាំង គាត់អត់បានដេកទល់ភ្លឺដោយអត់បានលេបថ្នាំតាំងពីម្សិលមិញ។ ចាប់ខ្លួនគាត់នេះអយុត្តិធម៌ខ្លាំងណាស់ ប្ដីរបស់ខ្ញុំគឺនរណាក៏ដឹងក៏ស្គាល់ដែរថាគាត់មានទឹកចិត្តល្អបរិសុទ្ធ ខ្ញុំជាប្រពន្ធអត់ចង់ឃើញប្ដីត្រូវគេឃុំធ្វើបាបអ៊ីចឹងទេ ខ្ញុំស្នើសុំឱ្យគាត់ទៅផ្ទះវិញ យប់មិញបាត់ប្ដីឈឹង»។
សមត្ថកិច្ចនៃស្នងការដ្ឋាននគរបាលខេត្តកំពង់ស្ពឺបានចាប់ឃាត់ខ្លួនបេក្ខជនព្រឹទ្ធសភាលេខរៀងទី១នៅភូមិភាគ៧ និងជាអគ្គហេរញ្ញិករបស់គណបក្សកម្លាំងជាតិគឺលោក អ៊ំ វីរៈរដ្ឋ ក្នុងពេលលោកធ្វើដំណើរចេញពីកន្លែងដាក់កម្រងផ្ការំលឹកខួបនៃព្រឹត្តិការណ៍គប់គ្រាប់បែកលើក្រុមបាតុករអហិង្សានៅមុខរដ្ឋសភាចាស់កាលពីថ្ងៃទី៣០ មីនា។
ការចាប់ខ្លួនលោក អ៊ំ វីរៈរដ្ឋ រួមជាមួយសមាជិកបក្សជំទាស់ពីរនាក់ផ្សេងទៀតរួមមានអ្នកស្រី គុណ ម៉ាច និងលោក ឯក បេន កាលពីដើមខែមីនា គឺបន្ទាប់ពីសាលាដំបូងខេត្តកំពង់ស្ពឺកាលពីថ្ងៃទី២៧ ខែកុម្ភៈ បានចេញសាលក្រមកំបាំងមុខផ្ដន្ទាទោសពួកគេពីបទ «រួមគំនិតក្បត់» ទាក់ទងការគាំទ្រដំណើរមាតុភូមិនិវត្តន៍របស់លោក សម រង្ស៊ី កាលពីឆ្នាំ២០១៩ និងត្រូវដាក់ពន្ធនាគារក្នុងម្នាក់ៗ រយៈពេល៧ឆ្នាំ ហើយតុលាការក៏បង្គាប់ឱ្យសមត្ថកិច្ចចាប់ខ្លួនពួកគេយកមកអនុវត្តទោស។
ឆ្លើយតបរឿងនេះ តុលាការខេត្តកំពង់ស្ពឺនៅថ្ងៃនៅថ្ងៃ៣១ ខែមីនា បានចេញសេចក្ដីប្រកាសព័ត៌មានដោយអះអាងថា ការចាប់និងឃុំខ្លួនសមាជិកបក្សប្រឆាំងរួមមានអ្នកស្រី គុណ ម៉ាច លោក ឯក បេន និងលោក អ៊ំ វីរៈរដ្ឋ ជាការអនុវត្តច្បាប់ ពីព្រោះពួកគេត្រូវបានតុលាការផ្ដន្ទាទោសឱ្យជាប់ពន្ធនាគារ៧ឆ្នាំពីបទ «រួមគំនិតក្បត់» ប្រព្រឹត្តក្នុងបណ្ដាញសង្គមហ្វេសប៊ុក (Facebook) និងនៅក្នុងក្រុមទំនាក់ទំនងសង្គម(Messenger) ឈ្មោះ «កំពង់ស្ពឺប្រជាធិបតេយ្យ»។
សេចក្ដីប្រកាសព័ត៌មានដដែលបញ្ជាក់ថា ជនជាប់ចោទទាំងបីនាក់នោះបានស្នើសុំប្ដឹងជំទាស់នឹងសាលក្រមរបស់តុលាការខេត្តកំពង់ស្ពឺ ហើយត្រូវឃុំពួកគេនៅពន្ធនាគារខេត្តដើម្បីរង់ចាំជំនុំជម្រះជាថ្មីតាមនីតិវិធី។
ផ្ទុយពីការអះអាងរបស់តុលាការនេះ គណបក្សប្រឆាំង និងក្រុមអង្គការសិទ្ធិមនុស្សជាតិនិងអន្តរជាតិមើលឃើញថា ការចោទប្រកាន់ ការចាប់ឃុំខ្លួនមេដឹកនាំ និងសកម្មជននយោបាយនោះធ្វើឡើងក្រោមហេតុផលនយោបាយ និងគ្មានមូលដ្ឋានច្បាប់ ពោលគឺរដ្ឋាភិបាលរបស់បក្សកាន់អំណាចតែងតែយកប្រព័ន្ធតុលាការធ្វើជាអាវុធដើម្បីគំរាមកំហែង និងបង្ក្រាបលើសំឡេងប្រឆាំង ចំណែកអ្នកដែលចុះចូលជាមួយបក្សកាន់អំណាចវិញត្រូវបានតុលាការដោះលែងឱ្យមានសេរីភាពជាបន្តបន្ទាប់។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ(LICADO) លោក អំ សំអាត កត់សម្គាល់ឃើញថាករណីចាប់ខ្លួន និងចោទប្រកាន់លើសកម្មជនគណបក្សប្រឆាំងតែងតែកើតឡើងនៅពេលជិតមានការបោះឆ្នោត ដែលធ្វើឱ្យសហគមន៍ជាតិ និងអន្តរជាតិរិះគន់អំពីការធ្លាក់ចុះនៃស្ថានភាពនយោបាយកាន់តែអាប់អួនៅកម្ពុជា ហើយពួកគេទាមទារដល់រដ្ឋាភិបាលស្ដារប្រជាធិបតេយ្យ ការគោរពសិទ្ធិមនុស្ស ជាពិសេសសិទ្ធិនយោបាយដើម្បីតម្កល់ផលប្រយោជន៍ជាតិរួម។
លោក អំ សំអាត៖ «យើងជាអង្គការសង្គមស៊ីវិលដែលធ្វើការផ្នែកទាំងអស់ហ្នឹងមិនចង់ឃើញកម្ពុជាមានបរិយាកាសនយោបាយអាប់អួ ឬមានការរិះគន់សហគមន៍អន្តរជាតិទេ នៅពេលដែលមានការបោះឆ្នោតម្តងៗ យើងចង់ឃើញស្ថានភាពនយោបាយនៅមុនការបោះឆ្នោតមានបរិយាកាសល្អ យើងនៅតែទទូចសូមឱ្យអ្នកនយោបាយទាំងអស់តម្កល់នូវឧត្ដមប្រយោជន៍ជាតិ និងពលរដ្ឋជាធំ »។
គណបក្សកម្លាំងជាតិកាលពីថ្ងៃទី៣០ ខែមីនាបានចេញសេចក្ដីថ្លែងការណ៍សោកស្ដាយចំពោះការចាប់ខ្លួនលោក អ៊ំ វីរៈរដ្ឋ និងចាត់ទុកថានេះជារូបភាពគំរាមកំហែង និងបំភិតបំភ័យផ្នែកនយោបាយថ្មីបន្ថែមទៀតលើគណបក្សកម្លាំងជាតិ ពីព្រោះការចាប់ខ្លួនលោក អ៊ំ វីរៈរដ្ឋ នៅពេលនេះ គឺវាពាក់ព័ន្ធនឹងសំណុំរឿងចាស់កាលពីឆ្នាំ២០១៩ ដែលករណីនេះត្រូវបានអតីតនាយករដ្ឋមន្ត្រី លោក ហ៊ុន សែន ធ្លាប់បានប្រកាសលើកលែងការចោទប្រកាន់ជាផ្លូវការរួចហើយកាលពីថ្ងៃទី១៤ ខែវិច្ឆិកា ឆ្នាំ២០១៩។
គណបក្សកម្លាំងជាតិអំពាវនាវដល់តុលាការខេត្តកំពង់ស្ពឺទម្លាក់ការចោទប្រកាន់និងដោះលែងសមាជិកបក្សនេះឱ្យមានសេរីភាពឡើងវិញដោយឥតលក្ខខណ្ឌដើម្បីបើកលំហសិទ្ធិសេរីភាពផ្នែកនយោបាយ និងការចូលរួមចំណែកលើកកម្ពស់ដំណើរការលទ្ធិប្រជាធិបតេយ្យនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។