សិង្ហបុរី​កាត់ទោស​ជនជាតិ​​ចិន​សញ្ជាតិ​ខ្មែរ​ដាក់​គុក ១៣ខែ រឿង​លាង​លុយ​កខ្វក់​ជាង​២ពាន់​លាន​ដុល្លារ

ដោយ មាន ឫទ្ធិ
2024.04.03
RFA

សិង្ហបុរី​កាត់ទោស​ជនជាតិ​​ចិន​សញ្ជាតិ​ខ្មែរ​ដាក់​គុក ១៣ខែ រឿង​លាង​លុយ​កខ្វក់​ជាង​២ពាន់​លាន​ដុល្លារ

ឯកសារ​ពាក់ព័ន្ធរបស់ជនសង្ស័យ​ដែលត្រូវអាជ្ញាធរប្រទេស​សិង្ហបុរី ចាប់ខ្លួនពីបទក្លែង​បន្លំ និង​លាង​លុយកខ្វក់ កាលពីថ្ងៃទី១៥ សីហា ២០២៣។ Photo Courtesy of Singapore Police Force’s Facebook Page


តុលាការ​សិង្ហបុរី នៅ​ថ្ងៃទី២ ខែមេសា កាត់​ទោស​ជនជាតិ​ចិន​សញ្ជាតិ​ខ្មែរ​ម្នាក់ ឱ្យ​ជាប់​គុក ១៣ខែ ពាក់ព័ន្ធ​នឹង​សំណុំ​រឿង​លាង​លុយ​កខ្វក់​ដ៏​សម្បើម​មិន​ធ្លាប់​មាន​នៅ​ក្នុង​តំបន់​អាស៊ីអាគ្នេយ៍ ដែល​មាន​តម្លៃ​ជា​ទឹកប្រាក់​រហូត​ដល់​ទៅ​ជាង ២​ពាន់​លាន​ដុល្លារ។


បុគ្គល​រូប​នោះ ឈ្មោះ ស៊ូ វិនឈាំង (Su Wenqiang) អាយុ ៣២​ឆ្នាំ ជា​ជន​សង្ស័យ​ម្នាក់​ក្នុង​ចំណោម​ជនសង្ស័យ ១០នាក់ ក្នុង​សំណុំ​រឿង​លាង​លុយ​កខ្វក់​ដ៏​សម្បើម​នេះ។

សារព័ត៌មាន​សិង្ហបុរី CNA រាយការណ៍​នៅ​ថ្ងៃទី០២ ខែ​មេសា ថា ជន​ល្មើស​រូប​នេះ ប្រឈម​នឹង​បទ​ចោទ​ចំនួន ១១​ករណី ពាក់ព័ន្ធ​នឹង​ការ​ក្លែង​បន្លំ និង​លាង​លុយ​កខ្វក់​ដែល​ជា​ចំណូល​បាន​មក​​ពី​ការ​ប្រព្រឹត្ត​បទ​ឧក្រិដ្ឋ។ នគរបាល​សិង្ហបុរី រឹបអូស​បាន​លុយ​សរុប​ជាង ៤​លាន​ដុល្លារ ពី​ជនល្មើស​រូប​នេះ ក្នុង​នោះ​មាន​​លុយ​ក្នុង​កុង​ធនាគារ រថយន្ត​ទំនើប​ម៉ាក Mercedes Benz ស្រា និង​គ្រឿង​អលង្ការ​ប្រណីតៗ​ជាច្រើន​ទៀត។ លោក ស៊ូ វិនឈាំង ទទួល​បាន​លុយ​ទាំង​នេះ​ពី​អាជីវកម្ម​បនល្បែង​អនឡាញ​ខុសច្បាប់​ដែល​លោក​រក​ស៊ី​ជាមួយ​ក្រុម​ឧក្រិដ្ឋជន​ដទៃទៀត​ដើម្បី​ផ្តល់​សេវាកម្ម​ល្បែង​អនឡាញ​ខុសច្បាប់​ដល់​ពលរដ្ឋ​​ក្នុង​ប្រទេស​ចិន។

កាលពី​ថ្ងៃទី១៥ ខែ​សីហា ឆ្នាំ២០២៣ នគរបាល​សិង្ហបុរី បាន​ចាប់ខ្លួន​ជនជាតិ​ចិន ១០នាក់​ពាក់ព័ន្ធ​នឹង​សំណុំ​រឿង​លាង​លុយ​កខ្វក់​ដ៏​សម្បើម​នេះ។ ក្នុង​ចំណោម​ពួកគេ​ទាំង ១០នាក់​នេះ ៩​នាក់​ទទួល​បាន​សញ្ជាតិ​ខ្មែរ​ក្នុង​រយៈពេល​៥ឆ្នាំ​ចុង​ក្រោយ។ ពួកគេ​មួយ​ចំនួន​ក៏​កាន់​លិខិត​ឆ្លងដែន​ប្រទេស​ស៊ីប (Cyprus) តួគី (Turky) និង​លិខិត​ដែន​ប្រទេស​ដទៃ​ទៀត​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment