ដោយ ច័ន្ទ ដារ៉ូ
2024.05.13
RFA
ស្ដាប់ ឬទាញយកសំឡេង
ពលករខ្មែរនៅកូរ៉េខាងត្បូងធ្វើបាតុកម្មប្រឆាំងលទ្ធផលបោះឆ្នោតនៅកម្ពុជា កាលពីថ្ងៃទី២៣ ខែកក្កដា ឆ្នាំ២០២៣។ រូប៖ ពលករផ្ដល់ឱ្យ
ប្រជាពលរដ្ឋខ្មែរត្រៀមធ្វើបាតុកម្មទ្រង់ទ្រាយធំប្រឆាំងវត្តមានលោក ហ៊ុន ម៉ាណែត ដែលនឹងទៅទស្សនកិច្ចក្នុងប្រទេសកូរ៉េខាងត្បូងនៅសប្ដាហ៍ក្រោយ។ ពួកគេអះអាងថាគម្រោងបាតុកម្មនេះ ដើម្បីទាមទារឱ្យមេដឹកនាំរដ្ឋាភិបាលក្រុងភ្នំពេញដោះស្រាយបញ្ហាសង្គម ហើយងាកមកដើរតាមគន្លងប្រជាធិបតេយ្យ និងឈប់តាមយាយីដល់អ្នកដែលមាននិន្នាការផ្ទុយបន្តទៅទៀត។
ពលរដ្ឋខ្មែរភាគច្រើនជាយុវជនធ្វើការ និងរស់នៅប្រទេសកូរ៉េខាងត្បូងលើកឡើងថាមូលហេតុដែលពួកគេរៀបចំប្រមូលផ្ដុំគ្នាធ្វើបាតុកម្ម ដោយសារលោក ហ៊ុន ម៉ាណែត ដឹកនាំប្រទេសទៅរករបបផ្ដាច់ការមិនខុសពីឪពុកគឺលោក ហ៊ុន សែន ដែលរំលោភសិទ្ធិមនុស្ស បំផ្លាញប្រជាធិបតេយ្យ បិទសិទ្ធិសេរីភាព និងតែងធ្វើទុក្ខបុកម្នេញមកលើអ្នកមានមតិផ្ទុយពីរដ្ឋាភិបាល។
តំណាងបាតុករលោក ឃ្លោក លាភ ប្រាប់វិទ្យុអាស៊ីសេរីនៅថ្ងៃទី១២ ខែឧសភាថាបាតុកម្មប្រឆាំងវត្តមានលោក ហ៊ុន ម៉ាណែត នឹងរៀបចំនៅថ្ងៃអាទិត្យ ទី១៩ ខែឧសភា នៅទីលានជុងកាក់(Junghak) ក្នុងក្រុងសេអ៊ូល(Seoul)។ លោកបន្តថាបាតុកម្មនេះនឹងមានការសម្ដែងមតិ លើកបដាផ្សព្វផ្សាយនៅលើបណ្ដាញសង្គមដើម្បីបង្ហាញទៅសាធារណមតិជាតិនិងអន្តរជាតិឱ្យឃើញថាពលរដ្ឋខ្មែរនៅក្រៅប្រទេសដែលមានសិទ្ធិសេរីភាពសម្ដែងមតិមិនពេញចិត្តចំពោះទង្វើរំលោភសិទ្ធិមនុស្ស រឿងអយុត្តិធម៌ក្នុងសង្គមក្រោមការដឹកនាំរបស់លោក ហ៊ុន ម៉ាណែត កន្លងមកឡើយ។
លោក ឃ្លោក លាភ៖ «របបដឹកនាំនេះគឺផ្ដាច់ការ មិនមែនជារបបពលរដ្ឋជាធំទេ គឺសម្រេចទាំងពីរជាធំទាំងឪនិងកូនហ្នឹងឯង ដូច្នេះពលរដ្ឋគ្មានសិទ្ធិ អ្នកនយោបាយក៏គ្មានសិទ្ធិសេរីភាពកុំថាឡើយពលរដ្ឋទូទៅ។ យើងធ្វើបាតុកម្មនេះយើងទាមទារ ជំរុញឱ្យរដ្ឋាភិបាលរបស់លោក ហ៊ុន ម៉ាណែត ដោះស្រាយវិបត្តិសង្គម វិបត្តិនយោបាយ ហើយជាពិសេសគោលបំណងយើងចង់ឱ្យគណបក្សប្រជាជនដឹកនាំប្រទេសកម្ពុជាឱ្យមានភាពឯករាជ្យដោយកុំឱ្យលម្អៀងទៅកាន់ប្រទេសណាមួយ»។
គម្រោងបាតុកម្មរបស់ក្រុមយុវជននេះបន្ទាប់ពីពួកគេទទួលដំណឹងថានាយករដ្ឋមន្ត្រីលោក ហ៊ុន ម៉ាណែត នឹងទៅទស្សនកិច្ចនៅប្រទេសកូរ៉េខាងត្បូងចាប់ពីថ្ងៃទី១៥ ដល់ថ្ងៃទី២០ ខែឧសភានៅសប្ដាហ៍ក្រោយនេះ។
ប្រធានសមាគមការពារសិទ្ធិមនុស្សអាដហុក (Adhoc) លោកនី សុខា មានប្រសាសន៍ថាគម្រោងធ្វើបាតុកម្មរបស់ក្រុមយុវជនខ្មែរនៅប្រទេសកូរ៉េខាងត្បូងនេះជាសិទ្ធិសេរីភាពរបស់ប្រជាពលរដ្ឋស្របតាមច្បាប់នៅក្នុងសង្គមប្រជាធិបតេយ្យ ហើយក៏ជាឱកាសផ្ញើសារទៅរដ្ឋាភិបាលកម្ពុជាជួយដោះស្រាយសំណើ ឬកង្វល់ពួកគេដែរ ។ មន្ត្រីសិទ្ធិមនុស្សរូបនេះសង្កេតឃើញថាគោលបំណងអ្នកតវ៉ានៅក្រៅប្រទេសពេលនេះធ្វើឡើងស្របតាមការមើលឃើញរបស់សហគមន៍អន្តរជាតិដែលចង់ឃើញកម្ពុជាមានប្រជាធិបតេយ្យ ការគោរពសិទ្ធិមនុស្ស និងសុខសន្តិភាពពិតប្រាកដ។
លោក នី សុខា៖ «ក្នុងរដ្ឋធម្មនុញ្ញគឺប្រទេសកម្ពុជាអនុវត្តរបបនយោបាយប្រជាធិបតេយ្យសេរី ពលរដ្ឋមានសិទ្ធិសេរីភាពទាំងសេរីភាពខាងនយោបាយ ការបញ្ចេញមតិ ការជួបជុំសមាគម អង្គការមិនមែនរដ្ឋាភិបាល ឬក៏សេរីភាពផ្សេងៗទៀតជាច្រើនទាក់ទងរឿងសិទ្ធិមនុស្ស អ៊ីចឹងការទាមទារទាំងអស់ហ្នឹងមិនមែនអ្វីស្នើឱ្យរដ្ឋាភិបាលអនុវត្តគោលការណ៍មួយដែលខុសពីគោលការណ៍ច្បាប់នោះទេ គឺរដ្ឋាភិបាលត្រូវមានកាតព្វកិច្ចទៀតផងនៅក្នុងអនុវត្តនូវបញ្ហាបើកនូវលំហសេរីភាព លំហប្រជាធិបតេយ្យទាំងអស់ហ្នឹង»។
ចាប់តាំងពីឡើងកាន់អំណាចបន្តពីឪពុកមក លោក ហ៊ុន ម៉ាណែត ហាក់មិនបានយកចិត្តទុកដាក់ស្ដាប់ និងដោះស្រាយក្ដីកង្វល់របស់ប្រជាពលរដ្ឋខ្មែរទាំងក្នុងប្រទេសនិងក្រៅប្រទេស ដែលចង់ឃើញប្រទេសកម្ពុជា មានលទ្ធិប្រជាធិបតេយ្យ និងការគោរពសិទ្ធិមនុស្ស ព្រមទាំងដោះលែងអ្នកទោសនយោបាយនោះទេ។ ផ្ទុយទៅវិញក្រោមអំណាចដឹកនាំរបស់លោក ហ៊ុន ម៉ាណែត បានបង្កើនសកម្មភាពបង្ក្រាបឥតឈប់ឈរ ដោយមកដល់ពេលនេះអ្នករិះគន់ មេសហជីព និងអ្នកនយោបាយបក្សប្រឆាំងចំនួន២៨នាក់ត្រូវបានចាប់ដាក់គុក ដោយករណីទាំងនេះមិនទាន់រាប់បញ្ចូលអ្នកដែលចូលជាមួយបក្សកាន់អំណាចរាប់សិបនាក់ទៀត ប្ដូរនឹងការដោះលែងឱ្យនៅឃុំនៅឡើយ។
ក្រុមយុវជនរៀបចំបាតុកម្ម អំពាវនាវដល់ប្រជាពលរដ្ឋខ្មែរនៅប្រទេសកូរ៉េខាងត្បូងចូលរួមបាតុកម្មនៅថ្ងៃទី១៩ ខែឧសភា ដើម្បីបង្ហាញកម្លាំងសាមគ្គីរួមគ្នាទាមទារឱ្យរដ្ឋាភិបាលកម្ពុជាដោះស្រាយវិបត្តិសង្គម បញ្ឈប់ការយាយី និងការធ្វើទុក្ខបុកម្នេញមកលើអ្នកមានមតិផ្ទុយពីរដ្ឋាភិបាលដោយដោះលែងអ្នកមនសិការទាំងអស់ ហើយងាកមកដើរតាមគន្លងប្រជាធិបតេយ្យឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។