ការតែងតាំង​កូនស្រី លោក នេត សាវឿន ជាទី​ប្រឹក្សា​លោក ហ៊ុន ម៉ាណែត រង​ការ​រិះគន់

ដោយ ទីន ហ្សាការីយ៉ា
2024.05.14
RFA

ការតែងតាំង​កូនស្រី លោក នេត សាវឿន ជាទី​ប្រឹក្សា​លោក ហ៊ុន ម៉ាណែត រង​ការ​រិះគន់

លោកនាយករដ្ឋមន្ត្រី ហ៊ុន ម៉ាណែត (ស្ដាំ) និង​លោក នេត សាវឿន ឧបនាយករដ្ឋមន្ត្រី។រូប៖ ហ្វេសប៊ុកលោក ហ៊ុន ម៉ាណែត


អ្នកវិភាគ និង​មន្ត្រី​បក្ស​ប្រឆាំង​រិះគន់​លើ​ការតែងតាំង​កូនស្រី​របស់​ឧបនាយករដ្ឋមន្ត្រី លោក នេត សាវឿន គឺ​អ្នកនាង នេត ធីតាច័ន្ទធីម៉ា ជាទី​ប្រឹក្សា​ផ្ទាល់​នាយករដ្ឋមន្ត្រី លោក ហ៊ុន ម៉ាណែត។ ពួកគេ ថា​ការតែងតាំង​នេះ​គឺ​ដើម្បី​ពង្រឹង​អំណាច និង​ផលប្រយោជន៍​ក្រុម​គ្រួសារ​ត្រកូល​ហ៊ុន។ប្រតិកម្ម​របស់​អ្នកវិភាគ និង​មន្ត្រី​បក្ស​ប្រឆាំង​នេះ ក្រោយពី​ទីប្រឹក្សា​ក្រសួង​ការបរទេស និង​សហប្រតិបត្តិការ​អន្តរជាតិ អ្នកនាង នេត ធីតាច័ន្ទធីម៉ា និង​ជា​កូនស្រី​របស់​ឧបនាយករដ្ឋមន្ត្រី នេត សាវឿន ជាទី​ប្រឹក្សា​ផ្ទាល់​នាយករដ្ឋមន្ត្រី លោក ហ៊ុន ម៉ាណែត មាន​ឋានៈ​ស្មើ​រដ្ឋលេខាធិការ។

អ្នកវិភាគ​នយោបាយ លោក គឹម សុខ លើកឡើង​ថា ការ​តែងតាំង​កូន​ឧបនាយករដ្ឋមន្ត្រី​នេះ​គឺជា​ការ​បង្ហាញ​គំរូ​ចាស់​របស់​ក្រុម​គ្រួសារ​ត្រកូល​ហ៊ុន​បាន​បញ្ចូល​កូនចៅ​របស់​ពួកគេ​ឱ្យធ្វើ​ការ​ក្នុង​ជួរ​ថ្នាក់ដឹកនាំ​រដ្ឋ ហើយ​ក្រោយមក​ពួកគេ​នឹង​បន្ត​បញ្ចូល​ទៅកាន់​ដំណែង​កំពូល​បន្តបន្ទាប់​ដើម្បី​ពង្រឹង​អំណាច​ក្រុម​គ្រួសារ​ត្រកូល​ហ៊ុន​។ លោក គឹម សុខ ថា បើ​ទោះជា​កូនចៅ​របស់​គ្រួសារ​ត្រកូល​ហ៊ុន​ទទួល​បាន​ការសិក្សា​ពី​បរទេស​ក៏ដោយ ប៉ុន្តែ​លោក​ថា​ជាក់ស្ដែង​ពួកគេ​មិន​មាន​សមត្ថភាព​ក្នុង​ការ​ដោះស្រាយ​អំពើពុករលួយ និង​អយុត្តិធម៌​នៅក្នុង​សង្គម​កម្ពុជា​បាន​ឡើយ។

លោក គឹម សុខ៖ «ពួកគេ​មាន​សញ្ញាប័ត្រ​មែន​ប៉ុន្តែ​អាច​គ្មាន​សមត្ថភាព ឬក៏​ពួកគេ​មាន​ទាំង​សញ្ញាប័ត្រ​មាន​ទាំង​សមត្ថភាព ប៉ុន្តែ​គ្មាន​ស្មារតី​បំពេញ​តួនាទី​ឱ្យ​បាន​ត្រឹមត្រូវ​ដើម្បី​ផលប្រយោជន៍​ជាតិ និង​ប្រជាពលរដ្ឋ ដូច្នេះ​ពួកគេ​ត្រូវ​បាន​តែងតាំង​ឱ្យទៅ​ជួយ​ពង្រឹង​អំណាច​ក្រុម​គ្រួសារ​ហ៊ុន និង​ប្រព្រឹត្ត​អំពើពុករលួយ​កាន់តែ​ធ្ងន់ធ្ងរ»។

អតីត​តំណាងរាស្ត្រ​គណបក្ស​សង្គ្រោះ​ជាតិ លោក ម៉ែន សុថាវរិន្ទ្រ ថា​ការតែងតាំង​បក្ខពួក និង​ក្រុម គ្រួសារ​មិនមែន​ជា​រឿង​ថ្មី​ទេ​ក្រោម​ការដឹកនាំ​របស់​គណ​បក្ស​ប្រជាជន​កម្ពុជា ហើយ​លោក​យល់​ថា​ក្រោម​ការដឹកនាំ​របស់ លោក ហ៊ុន ម៉ាណែត គឺ​ដូចគ្នា​នឹង​ការដឹកនាំ​របស់​ឪពុក​លោក​ដោយ​មិនបាន​ផ្ដល់ឱកាស​ឱ្យ​មន្ត្រី​ផ្សេងទៀត​ដែល​មាន​សមត្ថភាព​ទទួល​បាន​តួនាទី​កំពូលៗ។

លោក ម៉ែន សុថាវរិន្ទ្រ៖ «ជា​ប្រព័ន្ធៗ​ហើយ​ព្រោះ​គណបក្ស​ប្រជាជន​គាត់​ធ្វើ​តែ​អ៊ីចឹង គាត់​ដាក់​តែ​បក្ខ​ពួកគាត់ គ្នា​របស់​គាត់ អត់ឱ្យ​ឱកាស​ទៅកាន់​គណបក្ស​ប្រជាជន​ដែល​ជា​អ្នកចេះដឹង​ពិតប្រាកដ គាត់​ដាក់​តែ​បក្ខ​ពួកគាត់ គ្នា​គាត់ បងប្អូន​គាត់ កូនចៅ​គាត់»។

និស្សិត​ផ្នែក​ច្បាប់ កញ្ញា រៀម ស្រីពេជ្ររតនា លើកឡើង​ថា ការតែងតាំង​នេះ​ក៏​អាច​បង្ហាញ​ពី​បក្ខពួក​និយម ឬ​ការតែងតាំង​តាមរយៈ​សែស្រឡាយ​អ្នក​មាន​អំណាច​ដែល​នាំឱ្យ​យុវជន​ផ្សេងទៀត​ដែល​មាន​សមត្ថ​ភាព​មិន​អាច​ទទួល​បាន​ឱកាស​ក្លាយជា​អ្នកដឹកនាំ​បាន។

កញ្ញា រៀម ស្រីពេជ្ររតនា៖ «នៅ​ពេលដែល​រឿង​ទាំងអស់​ហ្នឹង​កើតឡើង​ដោយ​មនុស្ស​មួយ​ក្រុម​សម្រេច​ទៅ​លើ​អនាគត​ប្រទេស ប្រជាពលរដ្ឋ​គ្មាន​អី​ក្រៅពី​ទឹកភ្នែក យំ​ស្រែក​ទេ អ៊ីចឹង​នៅ​ពេល​ដែល​មាន​មនុស្ស​មួយ​ក្រុម​ហ្នឹង​កាន់កាប់​អំណាច​សម្រេច​គ្រប់យ៉ាង ហើយ​មាន​ប្រជាពលរដ្ឋ​ដែល​គាត់​អាច​ដឹង និយាយ​នូវ​ពាក្យពិត ក្រោក​ឡើង​តស៊ូ​បែរជា​ត្រូវ​រងគ្រោះ»។

វិទ្យុ​អាស៊ីសេរី​មិនទាន់​អាច​សុំ​ការ​ឆ្លើយ​តប​រឿង​នេះ​ពី​ប្រធាន​ក្រុម​អ្នកនាំពាក្យ​រដ្ឋាភិបាល លោក ប៉ែន បូណា និង​អ្នកនាំពាក្យ​នាយករដ្ឋមន្ត្រី លោក មាស សោភ័ណ្ឌ បាន​ទេ នៅ​ថ្ងៃ​ទី១៤ ខែ​ឧសភា។

ទោះជា​យ៉ាងណា លោកនាយក​រដ្ឋមន្ត្រី ហ៊ុន ម៉ាណែត ថ្លែង​កាល​ពី​ថ្ងៃ​ទី១ កញ្ញា ថា លោក​នឹង​កែទម្រង់​ការ​តែងតាំង​ជាទី​ប្រឹក្សា និង​ជំនួយការ​តាមរយៈ​ការផ្លាស់ប្ដូរ​មន្ត្រី​ដែល​មាន​ឋានៈ​តួនាទី​នៅក្នុង​ស្ថាប័នរដ្ឋ​រួចហើយ គឺ​មិន​ទទួល​បាន​ឋានៈ​ខ្ពស់ៗ ដូចជា ឋានៈ​ស្មើ​អគ្គនាយក ឬ​រហូត​ដល់​រដ្ឋមន្ត្រី ទៀត​នោះ​ទេ។

ទាក់ទិន​បញ្ហា​នេះ​សមាគម​សម្ព័ន្ធ​និស្សិត​បញ្ញវន្ត​ខ្មែរ​ចេញ​សេចក្ដីថ្លែងការណ៍​បង្ហាញ​ពី​ក្ដី​បារម្ភ​ចំពោះ​ការ​តែងតាំង​មន្ត្រីជាន់ខ្ពស់​ដែល​មាន​ឋានៈ​ស្មើ​អគ្គនាយក​រហូតដល់​ឧបនាយករដ្ឋមន្ត្រី​មាន​ចំនួន​ជាង​៣​ពាន់ (៣.២២៨)​នាក់ គិត​ត្រឹម​ថ្ងៃទី​១ ខែ​កញ្ញា ឆ្នាំ​២០២៣។

អ្នកនាង នេត ធីតាច័ន្ទធីម៉ា គឺជា​កូនស្រី​របស់​លោក នេ​ត សាវឿន អតីត​អគ្គស្នងការ​នគរបាល​ជាតិ និង​បច្ចុប្បន្ន​ជា​ឧបនាយករដ្ឋមន្ត្រី​ជួយ​ការងារ​នាយករដ្ឋមន្ត្រី​ផ្នែក​សន្តិសុខ ហើយក៏​ជា​នាយករដ្ឋមន្ត្រី​ស្តីទី​នៅ​ពេល​អវត្តមាន​នាយករដ្ឋមន្ត្រី​នៅក្នុង​ប្រទេស​។ លោក នេត សាវឿន គឺជា​ប្តី​របស់​អ្នកស្រី ហ៊ុន គឹមឡេង កូនស្រី​របស់​លោក ហ៊ុន ណេង និង​ត្រូវជា​ក្មួយ​របស់​ប្រធាន​ព្រឹទ្ធសភា​លោក ហ៊ុន សែន និង​ក៏​ត្រូវជា​បងស្រី​ជីដូនមួយ​របស់​លោក ហ៊ុន ម៉ាណែត។

កន្លង​មក ពលរដ្ឋ​រិះគន់​ការតែងតាំង​បុគ្គល​មួយចំនួន​តាមរយៈ​សែស្រឡាយ និង​ជា​បក្ខពួក​និយម​រួម​ទាំង​បុគ្គល​ធ្លាប់​មាន​ប្រវត្តិ​ប្រព្រឹត្ត​ឧក្រិដ្ឋកម្ម​ផង​ដែរ​។ ជាក់ស្ដែង​អតីត​អគ្គសេនាធិការ​រង នៃ​កងរាជអាវុធហត្ថ​លើ​ផ្ទៃ​ប្រទេស អ្នកស្រី ជា រដ្ឋា ដែល​ត្រូវ​បាន​តុលាការ​កាត់ទោស​ឧក្រិដ្ឋ​ឱ្យ​ជាប់គុក ១៨​ឆ្នាំ កាលពី ឆ្នាំ​២០០៩ ករណី​វាយប្រហារ​ដោយ​ទឹក​អាស៊ីត លើ​ម្ដាយមីង​របស់​អតីត​បវរកញ្ញា ទេសចរណ៍ និង​ជា​តារា​សម្ដែង​អ្នកនាង អ៊ិន សុលីដា ត្រូវ​បាន​តែងតាំង​ទីប្រឹក្សា​ក្នុង​រដ្ឋាភិបាល​លោក ហ៊ុន ម៉ាណែត។ រីឯ ឧក្រិដ្ឋជន​ជួញដូរ​មនុស្ស​គឺ លោក ចេន ហ្ស៊ី (Chen Zhi) ត្រូវ​បាន​តែងតាំង​ជាទី​ប្រឹក្សា​ប្រធាន​ព្រឹទ្ធសភា លោក ហ៊ុន សែន ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment