ដោយ ជីវិតា
2024.05.14
RFA
ស្រី្តជនជាតិដើមភាគតិច អ្នកស្រី រស់ រៀម លុតជង្គង់សំពះអង្វរកម្មកររបស់អ្នកស្រី កែវ លក្ខិណា ឱ្យឈប់ឈូសឆាយដីចម្ការពួកគាត់ កាលពីអំឡុងខែមិថុនា ២០២១។ រូប៖ ពលរដ្ឋផ្តល់ឱ្យជនជាតិដើមភាគតិច អ្នកស្រី រស់ រៀម លុតជង្គង់សំពះអង្វរកម្មកររបស់អ្នកស្រី កែវ លក្ខិណា ឱ្យឈប់ឈូសឆាយដីចម្ការពួកគាត់ កាលពីអំឡុងខែមិថុនា ២០២១។ រូប៖ ពលរដ្ឋផ្តល់ឱ្យ
អាជ្ញាធរខេត្តព្រះវិហារបន្តពន្យារពេលមិនដោះស្រាយវិវាទដីធ្លីករណីបុគ្គលមានអំណាចស្និទ្ធនឹងគណបក្សប្រជាជនកម្ពុជា រំលោភយកដីស្រែចម្ការរបស់ជនជាតិដើមភាគតិចកួយ ៣៣គ្រួសារអស់ទាំងស្រុង។
ជនជាតិដើមកួយទាំងនេះរស់នៅខេត្តកំពង់ធំដែលមានដីស្រែចម្ការក្នុងខេត្តព្រះវិហារ នៅតែប្រឈមវិបត្តិខ្វះដីធ្វើស្រែឆ្នាំនេះបន្តទៀត ដែលអាចធ្វើឱ្យពួកគាត់ខ្វះខាតស្បៀងចិញ្ចឹមជីវិត។
ភ្លៀងកក់ខែធ្លាក់មកជាបន្តបន្ទាប់ក្នុងខែឧសភានេះ ជាសញ្ញាមួយបង្ហាញថា រដូវធ្វើស្រែចូលមកដល់ហើយ ប៉ុន្តែវាបែរជាធ្វើឱ្យជនជាតិដើមភាគតិចកួយមួយចំនួនស្រក់ទឹកភ្នែក ដោយសារនៅតែស្តាយស្រណោះដីស្រែចម្ការកេរឪពុកម្ដាយ និងដីចម្ការវិលជុំទំហំជាង ៧០ហិកតារ ត្រូវបុគ្គលមានលុយមានអំណាចរំលោភយកអស់ទាំងស្រុងនៅរយៈពេល ៤ ឆ្នាំកន្លងទៅនេះ។
ជនជាតិដើមភាគតិចកួយទាំងនោះ រស់នៅភូមិតាឡែក ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ជាប់ព្រំដែនខេត្តព្រះវិហារ។
តំណាងពលរដ្ឋ លោកស្រី ងួន ហៀង ប្រាប់វិទ្យុអាស៊ីសេរី នៅថ្ងៃទី១៣ ឧសភា ថា មកទល់ពេលនេះជាង ៤ ឆ្នាំហើយ ដែលអ្នកភូមិទន្ទឹងរង់ចាំដំណោះស្រាយវិវាទដីធ្លី ពីសំណាក់អាជ្ញាធរខេត្ត និងអាជ្ញាធរថ្នាក់ជាតិ តែគ្មានបានផលឡើយ។ រីឯភាគីម្ខាងទៀត ជាអ្នកមានឥទ្ធិពល គឺអ្នកស្រី កែវ លក្ខិណា ដែលជាភរិយាឧកញ៉ា ហាក់ ប៊ុនថា (បច្ចុប្បន្នឧកញ៉ារូបនេះបានស្លាប់ហើយ) ដែលរំលោភយកដីអ្នកភូមិ នៅតែបន្តអាស្រ័យផល និងកាន់កាប់ លើដីក្នុងនោះដដែលៗតាំងពីឆ្នាំ២០២០។
លោកស្រី ងួន ហៀង៖ «ជនជាតិដើមភាគតិចពួកខ្ញុំអយុត្តិធម៌ អត់មានដីព្រៃសម្រាប់អាស្រ័យផល អត់មានការពារធ្វើ ទៅស៊ីឈ្នួលគេរាល់ថ្ងៃ ហើយជំពាក់ធនាគារ ពិបាកមែនទែន អត់មានដំណោះស្រាយជូនពលរដ្ឋពួកខ្ញុំ»។
ស្ត្រីដដែលបន្ថែមថា គ្រួសារលោកស្រី មានដីស្រែចម្ការ ៦ ហិកតារ ដែលជាដីកេរឪពុកម្ដាយ ត្រូវកម្មករ របស់អ្នកស្រី កែវ លក្ខិណា ឈូសឆាយបំផ្លាញរំលោភយកទាំងស្រុងជាង ៤ ឆ្នាំមកហើយ។ រីឯដីចម្ការវិលជុំដែលជាតំបន់ប្រតិបត្តិប្រពៃណីវប្បធម៌ជនជាតិដើមកួយបន្សល់ចុងក្រោយក៏ត្រូវអ្នកមានអំណាចរូបនេះរំលោភយកទាំងស្រុងដែរ។
វិទ្យុអាស៊ីសេរីមិនទាន់អាចទាក់ទងអ្នកស្រី កែវ លក្ខិណា ដើម្បីសុំការបំភ្លឺរឿងនេះបាននៅឡើយទេ នៅថ្ងៃទី ១៣ ឧសភា ។ ចំណែកអភិបាលខេត្តព្រះវិហារ លោក គីម រិទ្ធី និងអ្នកនាំពាក្យសាលាខេត្តនេះលោក យង់ គឹមហឿង ក៏មិនអាចសុំការបំភ្លឺបានដែរ នៅថ្ងៃដដែលនេះ។
ចំណែកមេឃុំរមណី លោក ឃុត រី បដិសេធមិនបំភ្លឺរឿងនេះទេ ដោយលោកថា ហួសពីភារកិច្ចអាជ្ញាធរឃុំហើយ។ តែយ៉ាងណាលោកថា កន្លងទៅលោកបានលើកយកបញ្ហានេះ ថ្លែងក្នុងកិច្ចប្រជុំ ដើម្បីស្នើឱ្យថ្នាក់លើជួយអន្តរាគមន៍ ដោះស្រាយដែរ។
លោក ឃុត រី៖ «ខ្ញុំបានឡើងទៅប្រជុំនៅខេត្តមន្ទីរដែនដី លោកអភិបាលស្រុកថ្លែងថា អត់អីទេឥលូវដីធ្លីហ្នឹង ស្ងាត់ស្ងៀមអស់ហើយ»។
ជុំវិញរឿងនេះ នាយកប្រតិបត្តិអង្គការពន្លកខ្មែរ លោក ប៉ឹក សោភ័ណ បន្តទទូចឱ្យរដ្ឋាភិបាលពន្លឿនកាត់ឆ្វៀលដីនៅតំបន់នោះ ជូនជនជាតិដើមភាគតិចដើម្បីផ្តល់លទ្ធភាពឱ្យពួកគាត់មានដីស្រែចម្ការ បង្កបង្កើនផលចិញ្ចឹមជីវិត។
លោក ប៉ឹក សោភ័ណ៖ «រដ្ឋាភិបាលបើគាត់បានដឹងទំនាស់ដីធ្លីនេះ គួរតែដោះស្រាយឱ្យពួកគាត់ទៅបាទ ព្រោះដីហ្នឹងមិនមែនធំធេងណា រហូតដល់រាប់ពាន់ហិកតារដូចការផ្តល់ឱ្យក្រុមហ៊ុនទេ។ ដូច្នេះបើគាត់កាត់ឆ្វៀល តាមអ្វីពលរដ្ឋស្នើសុំត្រូវការទៅ ហើយដីហ្នឹងក៏ជាដីប្រពៃណីរបស់ពួកគាត់ដែរ»។
តំណាងជនជាតិដើមភាគតិច លោកស្រី ងួន ហៀង បន្ថែមថា មកទល់ ពេលនេះ កុមារជិត ១០នាក់បានបោះបង់ការសិក្សា ហើយងាកមកធ្វើជាកម្មករកៅស៊ូឱ្យក្រុមហ៊ុនឯកជន ដោយសារតែជម្លោះដីធ្លីនេះ។ រីឯអ្នកភូមិ ១៥គ្រួសារបានបង្ខំចិត្តធ្វើចំណាកស្រុក ទៅធ្វើការនៅប្រទេសថៃ និងខ្លះទៀតទៅធ្វើការនៅរាជធានីភ្នំពេញ ដើម្បីរកប្រាក់ដោះបំណុល ដោយទុកកូនៗផ្ញើនឹងបងប្អូន។ពលរដ្ឋអះអាងថា អ្នកស្រី កែវ លក្ខិណា បានរំលោភយកទឹកត្រពាំង ទីទួលបុរាណ ទឹកអូរធម្មជាតិ ព្រៃរបោះជម្រកសត្វព្រៃ ដីចម្ការវិលជុំ និងដីកសិកម្មរបស់អ្នកភូមិ ហើយបច្ចុប្បន្នដីតំបន់នោះត្រូវបានស្ត្រីរូបនេះ គ្រប់គ្រងស្ទើរទាំងស្រុងជិត ៤ ឆ្នាំមកហើយ ។ រីឯដើមឈើធំៗ រាប់រយដើម ដុះនៅតំបន់ទួលបុរាណ ក៏ត្រូវបានអ្នកមានអំណាចរូបនេះបំផ្លាញអស់ទាំងស្រុងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។