ពលរដ្ឋ និង​យុវជន​មួយ​ចំនួន នៅ​ខេត្តបាត់ដំបង​បួស​ជា​ព្រះសង្ឃ និង​ដូនជី រយៈ​ពេល​ខ្លី ដើម្បី​អប់រំ​ផ្លូវ​ចិត្ត

ដោយ សុ ជីវី
2024.05.22
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

ពលរដ្ឋ និង​យុវជន​មួយ​ចំនួន នៅ​ខេត្តបាត់ដំបង​បួស​ជា​ព្រះសង្ឃ និង​ដូនជី រយៈ​ពេល​ខ្លី ដើម្បី​អប់រំ​ផ្លូវ​ចិត្ត

កុមារា ក្នុង​ចំណោម​បុរស​ស្ត្រីមាន​វ័យ ចន្លោះពី ៨ ដល់ ៦០ឆ្នាំ បួស​ជា​ព្រះសង្ឃ​នៅ​វត្ត សុរិយារាម ក្នុង​ស្រុក​មោងឫស្សី ខេត្តបាត់ដំបង ក្នុង​អំឡុង​បុណ្យ​វិសាខបូជា នៅ​ថ្ងៃ​ទី២៣ ខែឧសភា ឆ្នាំ២០២៤។ រូប៖ ពីពលរដ្ឋ


ជា​ធម្មតា​នៅ​មុន ឬ​អំឡុង​ពេល​បុណ្យ​វិសាខ​បូជា គេ​សង្កេត​ឃើញ មាន​ពុទ្ធបរិស័ទ​ខ្លះ នាំ​គ្នា​ត្រៀម​ទៅ​វត្ត ដើម្បី​ធ្វើ​បុណ្យទាន។ រីឯ​ពលរដ្ឋ​ខ្លះ​ទៀត បាន​ស្ម័គ្រ​ចិត្ត​បួស​ជា​ព្រះសង្ឃ និង​ដូនជី ក្នុង​សំណាក់​ព្រះពុទ្ធ​សាសនា ដើម្បី​រៀន​សូត្រ​ព្រះធម៌​របស់​ព្រះពុទ្ធ និង​អប់រំ​ចិត្ត ដោយ​ពួក​គាត់​យល់​ថា ព្រះធម៌ គឺ​ជា​ថ្នាំ​ព្យាបាល​បញ្ហា​ផ្លូវ​ចិត្ត​ដ៏​ល្អ។

ជាក់ស្ដែង ព្រះសង្ឃ​គង់​នៅ​វត្ត «សុរិយារាម» ក្នុង​ស្រុក​មោងឫស្សី ខេត្តបាត់ដំបង តែងតែ​បំបួស​កុលបុត្រ កុលធីតា​ខ្មែរ រាប់​រយ​នាក់​ជា​រៀងរាល់​ឆ្នាំ នៅ​ក្នុង​ឱកាស​បុណ្យ​វិសាខ​បូជា។ ការបំបួសនេះ គឺ ដើម្បី​ផ្សារ​ភ្ជាប់ ការ​អប់រំ​តាម​គន្លង​ព្រះធម៌​របស់​ព្រះពុទ្ធ ស្រប​ពេល​ដែល​បុណ្យ​វិសាខ​បូជា​នេះ ត្រូវ​បាន​ពុទ្ធបរិស័ទ នៅ​ជុំវិញ​ពិភពលោក​ប្រារព្ធ​ធ្វើ​ឡើង​ជា​រៀងរាល់​ឆ្នាំ ដើម្បី​រំលឹក​ដល់​ថ្ងៃ ដែល​ព្រះពុទ្ធ​ទ្រង់​ប្រសូត ត្រាស់​ដឹង និង​បរិនិព្វាន។


ព្រះចៅ​អធិការ​វត្តសុរិយារាម ព្រះតេជព្រះគុណ ទុយ សុឃីម ប្រាប់​វិទ្យុ​អាស៊ី​សេរី​ថា ការ​រៀបចំ​ពិធី​បំបួស​កុលបុត្រ កុលធីតា​ខ្មែរ​នៅ​វត្ត​អារាម​របស់​ព្រះអង្គ រហូត​មក​ដល់​ពេល​នេះ បាន ៨លើក​មក​ហើយ ចាប់តាំងពីឆ្នាំ២០១៦។ នៅ​ឆ្នាំ​នេះ មាន​យុវជន និង​យុវតី​ជិត ២០០នាក់ បាន​ស្ម័គ្រ​ចិត្ត​មក​បួស​ជា​ព្រះសង្ឃ និង​ដូនជី រយៈ​ពេល​មួយ​សប្ដាហ៍។ ព្រះអង្គ មាន​ថេរ​ដីកា​ថា ការ​បំបួស​នេះ ដើម្បី​អប់រំ​ផ្នែក​ផ្លូវ​ចិត្ត និង​ក្រម​សីលធម៌ ដល់​យុវជន​ជា​សំខាន់។

ព្រះតេជព្រះគុណ ទុយ សុឃីម៖ «ការ​ធ្វើ​នេះ គោល​បំណង​គឺ បញ្ជ្រាប​ព្រះពុទ្ធសាសនា​ចូល​ទៅ​ស្រទាប់​យុវវ័យ ដោយសារ​តែ​បច្ចុប្បន្ន​នេះ នៅ​ក្នុង​ប្រទេស​កម្ពុជា​យើង ឃើញ​ថា ព្រះពុទ្ធសាសនា ជ្រាប​ទៅ​លើ​វ័យ​ចាស់ៗ។ អ៊ីចឹង បង្កើត​បុណ្យ​បំបួស​នេះ​ឡើង បាន​ប្រយោជន៍​ពីរ។ ទី១ យើង​អាច​ជួយ​សម្រួល​ដល់​ប្រជាពលរដ្ឋ ដែល​ពួក​គាត់ មាន​ជីវភាព​ក្រីក្រ ដែល​គ្មាន​លទ្ធភាព​បួស គាត់​មាន​ឱកាស​បួស គឺ​នៅ​ទី​នេះ​ចេញ​ឱ្យ​ទាំង​អស់។ ទី២ យើង​អាច​ផ្សារ​ភ្ជាប់​រវាង​ព្រះសង្ឃ និង​យុវវ័យ​បាន​ល្អ។ អ្វី​ដែល​សំខាន់​នោះ​គឺ យើង​កែ​ស្រទាប់​យុវវ័យ​យើង​ឱ្យ​មាន​សីលធម៌ គុណធម៌ និង​កតញ្ញូ»

ពិធី​បំបួស​ព្រះសង្ឃ និង​ដូនជី នេះ​មាន​រយៈ​ពេល ៨ថ្ងៃ​ចាប់​ពី​ថ្ងៃ​ទី១៤ ដល់​ទី២៤ ខែឧសភា។ រីឯ ព្រះសង្ឃ និង​ដូនជី គេ​ឃើញ​មាន​ភាគ​ច្រើន​ជា​យុវជន និង​ក្មេងៗ សុទ្ធសឹងតែ ជា​សិស្សានុសិស្ស កំពុង​សិក្សា​នៅ​ថ្នាក់​បឋមសិក្សា រហូត​ដល់​សាកលវិទ្យាល័យ។ ចំណែក​មនុស្ស​វ័យ​ចំណាស់ មាន​តិចតួច​ប៉ុណ្ណោះ។

ព្រះតេជព្រះគុណ សឿម ពៅ ជា​ព្រះសង្ឃ​ទើបតែ​បួស​ថ្មី៖ «អាត្មា​ស្រឡាញ់​ព្រះពុទ្ធសាសនា ក៏​មក​បួស។ តែ​មក​បួស​នេះ ក៏​អត់​បាន​យូរ​ទេ បួស​បាន ៨ថ្ងៃ ដើម្បី​ថ្ងៃ​ពិសាខបូជា។ បួស​នេះ គឺ​ដើម្បី​លា​បំណន់។ តាម​អាត្មា​យល់​ថា ពេល​ណា​យើង​ធ្វើ​បុណ្យ​ទៅ ក្រែងលោ​យើង​ជាតិ​ក្រោយ អនាគត យើង​បាន​សេចក្ដី​សុខ និង​រុងរឿង​ថ្ងៃ​ក្រោយ​រហូត។»

ព្រះតេជព្រះគុណ សឿម ពៅ ធ្លាប់​មាន​ក្ដី​ស្រមៃ​ចង់​បួស​ជា​ព្រះសង្ឃ​ជា​ច្រើន​លើក​មក​ហើយ ប៉ុន្តែ ពុំ​ដែល​បាន​សម្រេច។ ដោយឡែក នៅ​ឆ្នាំ​នេះ ព្រះអង្គ​មាន​ព្រះជន្ម ៥៧ឆ្នាំ ទើបតែ​មាន​ឱកាស​មក​បួស ដើម្បី​រៀន​សូត្រ​ពី​ព្រះពុទ្ធសាសនា។

រីឯ​យុវតី​ម្នាក់​ទៀត កញ្ញា គង់ ស្រីណេ លើក​ឡើង​ថា ការ​បួស​ជា​ដូនជី រក្សាសីល តាម​ប្រពៃណី ព្រះពុទ្ធសាសនា គឺ ដើម្បី​តប​គុណ​ដល់​ឪពុក​ម្ដាយ និង​អប់រំ​ផ្លូវ​ចិត្ត។ កញ្ញា​បន្ត​ថា នៅ​ពេល​បាន​បួស​ជា​ដូនជី ធ្វើ​ឱ្យ​អារម្មណ៍​ស្ងប់ ពុំ​សូវ​គិត​ច្រើន ព្រោះ​បាន​ធ្វើ​សមាធិ។

កញ្ញា គង់ ស្រីណេ ពៅ យុវតី​បួស​ជា​ដូនជី៖ «សម្រេច​មក​បួស ដើម្បី​សង​គុណ​ដល់​អ្នក​ទាំង​ពីរ ហើយ​អ្វី​ដែល​កូន​បាន​ធ្វើ​កន្លង​មក ដែល​ពាក្យ​មិន​ល្អ​មក​លើ​ឪពុក​ម្ដាយ។ កូន​សុំ​មក​លាង​បាប ក៏​បួស​ជូន​ម្ដាយ និង​ឪពុក។ ចំណែក​ការ​មក​បួស​នេះ ក៏​ចង់​ឱ្យ​ចិត្ត​ស្ងប់ ព្រោះ​បាន​ដំណឹង​ថា កាល​ណា​យើង​បាន​មក​បួស​ជា​ដូនជី គឺ​ព្រះសង្ឃ​បាន​បង្រៀន​គ្រប់​យ៉ាង​ឱ្យ​ចិត្ត​របស់​យើង​ស្ងប់​បាន ហើយ​អ្វី​ដែល​យើង​គិត​អត់​ដល់ ព្រះសង្ឃ​អាច​ឱ្យ​យោបល់​យើង​បាន ដូចជា​ការ​សមាធិ​ជា​ដើម»

វត្តអារាម​មួយ​ចំនួន នៅ​ក្នុង​ប្រទេស​កម្ពុជា បាន​រៀបចំ​ពិធី​បំបួស ប្រជាពលរដ្ឋ ជា​ពិសេស ក្នុង​​​​​​​​​​​​​​​​​​​​​​​​​​​​​​​​​​​​​​​​​​​ពិធីបុណ្យ ព្រះពុទ្ធសាសនា ធំៗ ដូច​ជា ពិធី​បុណ្យ​មាឃបូជា វិសាខបូជា និង​អាសាឍបូជា (អាសាឡ្ហបូជា) ជា​ដើម។ ពលរដ្ឋ​ទាំង​នោះ ភាគ​ច្រើន មាន​វ័យ ចន្លោះ ពី៨ឆ្នាំ ដល់៦០ឆ្នាំ។ ពលរដ្ឋ​ភាគ​ច្រើន​លើក​ឡើង​ថា ពួក​គាត់​ឆ្លៀត​ពេល​ចូល​បួស​រយៈ​ពេល​ខ្លី​នេះ គឺ​ដើម្បី​សិក្សា​ពាក្យ​ធម៌ ដែល​ជា​ពាក្យ​ប្រៀន​ប្រដៅ​របស់​ព្រះពុទ្ធ និង ដើម្បី​អប់រំ​ផ្លូវ​ចិត្ត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment