សិស្សសាលា​វិទ្យាល័យ​ក្នុង​ខេត្ត​សៀមរាប​ជក់បារី​អគ្គិសនី​នៅ​តាម​ហាង​កាហ្វេ​កើនឡើង​ច្រើន

ដោយ ហ៊ុំ ចំរើន
2024.06.08
RFA

សិស្សសាលា​វិទ្យាល័យ​ក្នុង​ខេត្ត​សៀមរាប​ជក់បារី​អគ្គិសនី​នៅ​តាម​ហាង​កាហ្វេ​កើនឡើង​ច្រើន

ទិដ្ឋភាព​សិស្សសាលា​ជក់បារី​អគ្គិសនី ក្នុង​ហាង​កាហ្វេ​មួយ​កន្លែង នៅ​ក្រុង​សៀមរាប កាលពី​ថ្ងៃទី ០៧ មិថុនា ២០២៤​។ រូប​៖ ពលរដ្ឋផ្ដល់ឱ្យ


សិស្ស​សាលារៀន​រដ្ឋ​និង​ឯកជន​មួយ​ចំនួន​ក្នុង​ក្រុង​សៀមរាប​ប្រើប្រាស់​បារី អគ្គិសនី​នៅ​តាម​ហាង​កាហ្វេ និង​ទី​សាធារណៈ​ដែល​រដ្ឋាភិបាល​នៅ​មិនទាន់​មាន​វិធានការ​ទប់ស្កាត់​ឱ្យ​ជាក់លាក់​នៅឡើយ​ទេ។ មន្ត្រី​សង្គម​ស៊ីវិល​សង្កេត​ឃើញ​ថា រដ្ឋាភិបាល​ហាក់​មើល​រំលង​ដោះស្រាយ​បញ្ហា​នេះ​បង្ក​ប៉ះពាល់​សុខភាព​សិស្សានុសិស្ស និង​គុណភាព​អប់រំ​រយៈពេល​វែង។

ភ្ញៀវ​ទេសចរ​ដែល​ធ្វើដំណើរ​ទៅ​កម្សាន្ត ក្នុង​តំបន់​ទេសចរ​ប្រវត្តិសាស្ត្រ​ខេត្តសៀមរាប​ហើយ​ហួស​ទៅ ទិញ​កាហ្វេ ក្នុង​ហាង​មួយ​ចំនួន​ក្នុង​ក្រុង​សៀមរាប គេ​អាច​នឹង​ប្រទះឃើញ​ក្មេង​ជំទង់​និង​សិស្សសាលា​មួយចំនួន តែងតែ​អង្គុយ​ជា​ក្រុមៗ ជក់បារី​អគ្គិសនី ឬ​ហៅថា បារី​អេឡិចត្រូនិច (E-cigarette)។

ក្រុម​ក្មេង​ស្ទាវ​ទាំងនោះ​អង្គុយ​បង្ហុយ​ផ្សេង​បារី​អគ្គិសនី តាម​តុ​កាហ្វេ​កាន់​ទូរស័ព្ទ​ដៃ​លេង​ហ្គេម​ស្ទើរ​ក្លាយជា​ទម្លាប់​ទៅ​ហើយ ក្នុង​ហាង​កាហ្វេ​។ កាយវិការ​ទាំងនេះ​ទំនងជា​ពួកគាត់​មួយចំនួន អាច​នឹង​គេច​ពី​សាលារៀន ហើយ​លួច​មក​អង្គុយ​សម្ងំ នៅ​តាម​ហាង​កាហ្វេ​ជាច្រើន​ម៉ោង ទើប​ត្រឡប់​ទៅ​ផ្ទះ​វិញ។

និស្សិត​សិក្សា​នៅ​សកល​វិទ្យាល័យ​មួយ​ក្នុង​ក្រុង​សៀមរាប កញ្ញា វិន សុតី សង្កេត​ឃើញ​ថា អត្រា​ក្មេង​រៀន​នៅ​វិទ្យាល័យ​ជក់បារី​អគ្គិសនី​កើនឡើង​ច្រើន នៅ​តាម​ទី​សាធារណៈ និង​តាម​ហាង​កាហ្វេ។ កញ្ញា​បារម្ភ​ថា ប្រសិនបើ​បញ្ហា​នេះ មិន​ត្រូវ​បាន​ដោះស្រាយ​ទេ​នឹង​បណ្តាល​ឲ្យ​ប៉ះពាល់​សុខភាព​មនុស្ស អាច​ឈាន​ដល់​ការ​បាត់​បង់ជីវិត ជះ​ឥទ្ធិពល​អវិជ្ជមាន​ដល់​វិស័យ​អប់រំ។

កញ្ញា វិន សុតី៖ «ក្មេងៗ​មួយចំនួន​គាត់​នៅតែ​ប្រព្រឹត្ត​ដដែល ជាពិសេស​នៅ​តាម​ហាង​កាហ្វេ​មួយចំនួន នៅ​តាម​សាលា​ក៏​គាត់​លួច​ជក់​ដែរ​។ គាត់​យក​តាម​កាបូប វា​ស្រួល​ទេ​អាហ្នឹង ដាក់​តាម​កាប៉ាវ​អាវ​ខោ​ក៏បាន​ដែរ​។ ភាគច្រើន​ជក់​អាហ្នឹង គាត់​រៀន​តាម​អនុវិទ្យាល័យ ឬ​ថ្នាក់​វិទ្យាល័យ»។

សិស្ស​រៀន​ថ្នាក់​ទី១១ នៃ​វិទ្យាល័យ ១០ មករា ខេត្ត​សៀមរាប ដែល​កំពុង​អង្គុយ​ជក់បារី​អគ្គិសនី​ក្នុង​កាហ្វេ​មួយ​កន្លែង ក្នុង​ក្រុង​សៀមរាប គឺ​កញ្ញា រីម ធីតា។ កញ្ញា​ប្រាប់​វិទ្យុ​អាស៊ីសេរី នៅ​ថ្ងៃទី៧ មិថុនា​ថា មូលហេតុ​ដែល​កញ្ញា​ជក់បារី ដោយសារ​មាន​អារម្មណ៍​ធុញថប់​ហើយ​នៅពេល​ស្រូប​ផ្សែង​បារី​ចូល​ធ្វើ​ឱ្យ​ធូរស្បើយ​ភាព​តានតឹង។

កញ្ញា រីម ធីតា៖ «ជក់​ម្តង​ហើយ បន្ទាប់​មក​ខ្ញុំ​ឈប់ ខ្ញុំ​មិនមែន​ជក់​ដល់​ថ្នាក់​ឈប់​អត់​បាន។ ខ្ញុំ​អត់​បាន​ជក់​ច្រើន​ទេ ខ្ញុំ​ជក់​តែម្តងៗ​ទេ»។

អ្នកលក់​កាហ្វេ​ក្នុង​ហាង​មួយ​កន្លែង ក្នុង​ក្រុង​សៀមរាប កញ្ញា ធីម សារ៉ាត់ ឱ្យ​ដឹង​ថា ម្ចាស់​ហាង​តែងតែ​ណែនាំ និង​ដាក់​បម្រាម​ហាម​មិន​ឱ្យ​ជក់បារី​អគ្គិសនី ក្នុង​ហាង​ក៏ប៉ុន្តែ​ពួកគាត់​តែងតែ​លួច​ជក់​ដោយ​លួចលាក់។

កញ្ញា​បន្ថែម​ថា មិន​ដែល​ឃើញ​អាជ្ញាធរ​មាន​សមត្ថកិច្ច​ចុះ​ហាមឃាត់ និង​អប់រំ​ណែនាំ​ពី​ផល​ប៉ះពាល់​សុខភាព នៅ​តាម​ហាង​កាហ្វេ និង​តាម​ទីប្រជុំជន​នោះ​ទេ ប្រការ​នេះ​ហើយ​ដែល​ធ្វើ​ឱ្យ​ក្មេងៗ​ជំទង់​មិន​ខ្លាច។

កញ្ញា ធីម សារ៉ាត់៖ «អត់​អាច​ហាមឃាត់​គាត់​បានទេ ពេលខ្លះ​យើង​ធ្វើការ​ខាងក្នុង គាត់​នៅ​ខាងក្រៅ​ប្រើ​។ មិនមែន​តែ​សិស្សសាលា​ទាំងអស់​ទេ អ្នកធ្វើការ​ក៏​គាត់​ប្រើ​ដែរ​។ អ្នកខ្លះ​គាត់​ប្រើ​ជាប្រចាំ»។

កន្លង​ទៅ ក្រសួង​សុខាភិបាល បាន​ប្រកាស​ហាមឃាត់​ពី​ការ​ប្រើប្រាស់ និង​ការ​ធ្វើ​អាជីវកម្ម​លក់​ចែកចាយ​បារី​អេឡិចត្រូនិក​និង​ចេញ​សេចក្តី​ប្រកាស​ណែនាំ​បន្ថែម ពី​គ្រោះថ្នាក់​នៃ​ការប្រើប្រាស់​បារី​នេះ (E-cigarette)​បន្ទាប់ពី​មានការ​កើនឡើង​នៃ​អ្នកប្រើប្រាស់ ជាពិសេស យុវជន​ក្មេងៗ និង​សិស្ស​នៅ​តាម​សាលារៀន​រដ្ឋ និង​ឯកជន។

ក្រសួង​អំពាវនាវ​ឱ្យ​យុវជន​និង​ពលរដ្ឋ​បញ្ឈប់​ការប្រើប្រាស់​បារី​អេឡិចត្រូនិច (E-cigarette) ជាបន្ទាន់។

គ្រូបង្រៀន​វិទ្យាល័យ ១០ មករា ថ្លែង​សុំ​មិន​បញ្ចេញ​ឈ្មោះ ព្រោះ​បារម្ភ​ពី​សុវត្ថិភាព​ប្រាប់​វិទ្យុ​អាស៊ីសេរី​ថា ថ្នាក់ដឹកនាំ​សាលា តែងតែ​ហាមឃាត់ និង​ដាក់​បម្រាម​មិន​ឱ្យ​សិស្ស​ប្រើប្រាស់​បារី​ប្រភេទ​នេះ ក្នុង​សាលារៀន​នោះ​ទេ។ លោក​ថា ក្រុមប្រឹក្សាវិន័យ​របស់​សាលា​តែងតែ​ឆែកឆេរ​មិន​អនុញ្ញាត​ឱ្យ​សិស្ស​លួច​យក​ឧបករណ៍​ប្រភេទ​នេះ​មក​ជក់​ក្នុង​បរិវេណ​សាលា​ជាដាច់ខាត។

វិទ្យុ​អាស៊ីសេរី​មិន​ទាន់​អាច​ទាក់ទង សុំ​ការ​បំភ្លឺ​រឿង​នេះ ពី​អ្នកនាំពាក្យ​ក្រសួង​អប់រំ​យុវជន​និង​កីឡា លោក កាន់ ពុទ្ធី បាន​នៅឡើយ​ទេ នៅ​ថ្ងៃទី៧ មិថុនា ដោយ​ទូរស័ព្ទ​ហៅ​ចូល​ច្រើនដង​តែ​គ្មាន​អ្នក​លើក​។ រីឯ​ស្នងការ​នគរបាល​ខេត្ត​សៀមរាប លោក តេង ច័ន្ទណាត និង​អភិបាល​ខេត្តសៀមរាប លោក ប្រាក់ សោភ័ណ ក៏​មិនទាន់​អាច​ទាក់ទង​សុំ​ការអធិប្បាយ​ជុំវិញ​បញ្ហា​នេះ​បាន​ដែរ។

ជុំវិញ​រឿង​នេះ ប្រធាន​សមាគម​គ្រូបង្រៀន​កម្ពុជា​ឯករាជ អ្នកស្រី អ៊ុក ឆាយ៉ាវី ស្នើ​ឱ្យ​រដ្ឋាភិបាល​ចាត់ទុក​វិធានការ​លើក​អ្នក​លក់​ដូរ​ឧបករណ៍​ជក់បារី​អគ្គិសនី និង​ពង្រីក​ការអប់រំ​ផ្សព្វផ្សាយ​តាម​សាលា​រដ្ឋ និង​ឯកជន។

អ្នកស្រី​បារម្ភ​ថា ប្រសិនបើ​រដ្ឋាភិបាល​នៅតែ​មិន​ចាប់អារម្មណ៍​ដោះស្រាយ​បញ្ហា​នេះ នឹង​បង្ក​ប៉ះពាល់​វិស័យ​អប់រំ​រយៈពេល​វែង និង​សុខភាព​មនុស្ស​កាន់តែ​ធ្ងន់ធ្ងរ​នៅពេល​អនាគត។

អ្នកស្រី អ៊ុក ឆាយាវី៖ «ហាក់បីដូចជា គ្រាន់តែ​ធ្វើ​លំៗ ខ្ញុំ​គិត​ថា យុវជន​ជំនាន់​ក្រោយ នឹង​ជួប​ហានិភ័យ​ខ្ពស់​។ សូម​រដ្ឋាភិបាល​ពិនិត្យមើល​មែនទែន​ទាំងអស់​នេះ យុវជន​សុទ្ធតែ​សសរទ្រូង​នៃ​ប្រទេស​ជាតិ​ហើយ»។

របាយការណ៍​ស្រាវជ្រាវ​ថ្មី របស់​អង្គការ​សុខភាព​ពិភពលោក (WTH) បង្ហាញ​ពី​លទ្ធផល​សិក្សា​លើ​ប្រេវ៉ាឡង់ (Prevalence) ជក់បារី​ចន្លោះ​ឆ្នាំ​២០០០​ដល់​ឆ្នាំ​២០៣០​ឱ្យ​ដឹង​ថា ការ​ជក់បារី​មាន​និន្នាការ​ថយ​ចុះ​ក្នុង​ប្រទេស​ចំនួន ១៥០ នៅ​លើ​ពិភពលោក ក៏ប៉ុន្តែ​ការ​ប្រើប្រាស់​បារី​អេឡិចត្រូនិក​បែរ​ជា​កើន​ឡើង​នៅ​ទូទាំង​ពិភពលោក។

របាយការណ៍​បន្ថែម​ថា ១០%​នៃ​ក្មេង​អាយុ​ពី​ចន្លោះ ១៣ ទៅ ១៥​ឆ្នាំ នៅ​លើ​ពិភពលោក​ជក់បារី​ប្រភេទ​ថ្មី​នេះ​ពោល​គឺ​មាន​ក្មេង​យ៉ាង​ហោច ៣៧​លាន​នាក់ ជា​អ្នក​ជក់បារី ក្នុង​នោះ ១២​លាន​នាក់​ប្រើ​ផលិតផល​បារី​អេឡិចត្រូនិច។

ជាមួយ​គ្នា​នេះ​ដែរ ក្នុង​មួយឆ្នាំៗ បារី​ឬ​ថ្នាំជក់ បាន​សម្លាប់​មនុស្ស​អស់​ជាង​៨​លាន​នាក់ ក្នុង​នោះ​ជាង​១​លាន បី​សែន​នាក់ ជា​អ្នក​ស្រូប​ផ្សែង​បារី​ពី​គេ​។ គេ​ត្រូវការ​ពេល​វេលា ៣០​ឆ្នាំ​ដើម្បី​ចាត់វិធានការ​ប្រឆាំង​នឹង​ថ្នាំជក់ និង​បារី ទើប​រក​ឃើញ​ចំនួន​មនុស្ស​ស្លាប់​ដោយសារ​បារី​មាន​ការ​ធ្លាក់​ចុះ។

អង្គការ​សុខភាព​ពិភពលោក​បន្ថែម​ថា តួលេខ​នេះ​ទាប​ជាង​ការពិត​ជាក់ស្តែង​ឆ្ងាយ​ណាស់ ព្រោះ​ជាង​៧០​ប្រទេស​មិនបាន​ផ្តល់​ទិន្នន័យ​អ្វី​ទាំងអស់។

អ្នកជំនាញ​ផ្នែក​សុខាភិបាល​ពន្យល់​ថា បារី​អេឡិចត្រូនិច (E-cigarette) មាន​ដាក់​សារធាតុ​គីមី និង​ជាតិ​នីកូទីន (Nicotine) នៅពេល​អ្នកប្រើប្រាស់ បឺត​ស្រូប​ជាតិ​ផ្សែង​ចូល​ទៅ​ក្នុង​រាងកាយ គឺ​វា​ចូល​ទៅ​ក្នុង​ខួរក្បាល​របស់​អ្នក​ជក់។ បញ្ហា​នេះ​វា​បង្ក​ឲ្យ​កើត​ជំងឺ​សួត​រ៉ាំរ៉ៃ ជំងឺ​ដាច់​សរសៃឈាម​ក្នុង​ខួរក្បាល (Strokes) និង​ជំងឺ​គាំងបេះដូង (Heart attacks) ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment