កម្ពុជា និងចិន ប្តេជ្ញារួមគ្នាប្រឆាំងព័ត៌មានក្លែងក្លាយ

កម្ពុជា
09/06/2024 – 07:22
ដោយ៖ អ៊ឹង ប៊ុនថន
RFI

តំណាង​ប្រព័ន្ធ​ផ្សព្វ​ផ្សាយ​កម្ពុជា និង​ប្រព័ន្ធ​ផ្សព្វ​ផ្សាយនៃ​ប្រទេស​ចិន បាន​ប្តេជ្ញា​ចិត្ត​រួមគ្នា​ក្នុង​ការ​ប្រ​យុទ្ធប្រ​ឆាំង​នឹង​ព័ត៌មាន​ក្លែង​ក្លាយ​គ្រប់​ទម្រង់ ដើម្បី​ចូល​រួម​ថែ​រក្សា​ឲ្យ​បាន​នូវ​សុខ​សន្តិភាព ការ​អភិវឌ្ឍ និង​ការ​ពារចំណង​មិត្ត​ភាព​ដែក​ថែប​នៃ​ប្រទេស​ទាំង​ពីរ​។​ នេះ​បើតាម​ការ​ចុះផ្សាយ​របស់​ទី​ភ្នាក់​ងារ​សារ​ព័ត៌​មាន​កម្ពុជា ​(AKP)​ នៅថ្ងៃ​ទី៩​ខែ​មិថុនា​។ ​ការប្តេជ្ញា​ចិត្ត​នេះ​ធ្វើឡើង​នៅ​អំឡុង​ពេល​នៃ​ជំនួប​រវាង​រដ្ឋមន្ត្រី​ក្រសួង​ព័ត៌​មាន​កម្ពុជា ​និង​ប្រធាន​ផ្នែក​ឃោសនា​ការ​នៃ​គណៈកម្មា​ធិការ​គណ​បក្ស​កុម្មុយ​និស្តចិន​ខេត្ត​យូណាន​ កាល​ពី​ថ្ងៃទី​៧ ខែ​មិថុនា ឆ្នាំ២០២៤។

កម្ពុជា និងចិន ប្តេជ្ញារួមគ្នាប្រឆាំងព័ត៌មានក្លែងក្លាយ
កម្ពុជា និងចិន ប្តេជ្ញារួមគ្នាប្រឆាំងព័ត៌មានក្លែងក្លាយ © AKP

បើតាមរដ្ឋមន្ត្រីក្រសួងព័ត៌មាន លោក នេត្រ ភក្ត្រា ព័ត៌មានក្លែងក្លាយដែលត្រូវបាន និងកំពុងបង្កើតឡើងនិងចរាចរណ៍ក្នុងបណ្តាញទំនាក់ទំនងសង្គម និងបង្កផលប៉ះពាល់អវិជ្ជមានដល់សង្គម ដោយសារងាយស្រួលបង្កើត និងងាយស្រួលផ្សព្វផ្សាយ។​

នៅក្នុងពេលបើកសម្ពោធកម្មវិធីសំឡេងបេតិកភណ្ឌ «ដើរកម្សាន្តនៅយូណាន ទៅទស្សនានៅអង្គរ» លោក នេត្រ ភក្ត្រា បានស្នើដល់ប្រព័ន្ធផ្សព្វផ្សាយរដ្ឋ និងឯកជននៃប្រទេសទាំងពីរចូលរួមសហការគ្នាប្រឆាំងព័ត៌មានក្លែងក្លាយ។ លោកចាត់ទុកថា ក្នុងសម័យឌីជីថលនេះ ព័ត៌មានក្លែងក្លាយជាច្រើនត្រូវបានបង្កើតឡើង និងផ្សព្វផ្សាយលើបណ្តាញទំនាក់ទំនងសង្គមបង្កបដោយរបៀបវារៈទុច្ចរិត បង្កើតឱ្យមានការយល់ច្រឡំ និងមានទិសដៅបំផ្លិចបំផ្លាញកិច្ចខិតខំប្រឹងប្រែងរបស់កម្ពុជា និងចិន លើការផ្សព្វផ្សាយពីសក្តានុពលទេសចរណ៍ ការវិនិយោគ និងសកម្មភាពមនុស្សធម៌ផ្សេងៗ។​

សូមបញ្ជាក់ថា ក្រសួងព័ត៌មានបានបង្កើតគណៈកម្មាធិការប្រឆាំងព័ត៌មានក្លែងក្លាយដោយមានការចូលរួមពីក្រសួងស្ថាប័នពាក់ព័ន្ធ។ ជាលទ្ធផល ក្នុងឆ្នាំ២០២៣ កន្លងទៅនេះ ព័ត៌មានក្លែងក្លាយជាង៣​​​ពាន់ត្រូវបានកត់ត្រា ហើយករណីខ្លះត្រូវបានចាត់វិធានការតាមនីតិវិធីច្បាប់។

លោក នេត្រ ភក្ត្រា អំពាវនាវដល់ពលរដ្ឋកម្ពុជា និងចិន កុំជឿលើការផ្សព្វផ្សាយព័ត៌មានមិនពិតនៅលើបណ្តាញទំនាក់ទំនងសង្គមដែលគ្មានប្រភពពិតប្រាកដ និងត្រូវជឿជាក់លើការផ្សព្វផ្សាយព័ត៌មានវិជ្ជាជីវៈនៃប្រព័ន្ធផ្សព្វផ្សាយផ្លូវការ។ លោកបានប្រាប់ភាគីចិនថាក្រសួងព័ត៌មានគ្រោងនឹងដឹកនាំធ្វើយុទ្ធនាការប្រឆាំងព័ត៌មានក្លែងក្លាយនាពេលខាងមុខ និងមានបំណងពង្រីកយុទ្ធនាការប្រឆាំងព័ត៌មានក្លែងក្លាយនេះ ក្នុងក្របខណ្ឌទូលំទូលាយ។

បើតាមទីភ្នាក់ងារ​សារព័ត៌មាន​កម្ពុជា AKP លោកស្រីជឹង យៀន សមាជិកអចិន្ត្រៃយ៍និងជាប្រធានផ្នែកឃោសនាការនៃគណៈកម្មាធិការគណបក្សកុម្មុយនិស្តចិនខេត្តយូណាន គាំទ្រចំពោះគំនិតផ្តួចផ្តើមរបស់​រដ្ឋមន្ត្រីក្រសួងព័ត៌មានកម្ពុជា និងសន្យាសហការ ជាមួយកម្ពុជាលើកិច្ចការនេះ៕

What Next?

Recent Articles

Leave a Reply

Submit Comment