ខ្មែរកម្ពុជាក្រោមអំពាវនាវឲ្យប្រើយុទ្ធនាការឆ្ពោះទៅកាន់កម្ពុជាក្រោម

កម្ពុជា
09/06/2024 – 13:24
ដោយ៖ ម៉ុន ចាន់
RFI

នៅព្រឹកថ្ងៃទី៩ ខែមិថុនានេះ សមាគមខ្មែរកម្ពុជាក្រោមបានរំឮកខួប៧៥ឆ្នាំ ដែល​បារាំង​ផ្ទេរទឹកដីកម្ពុជាក្រោម​របស់ខ្មែរទៅឲ្យរដ្ឋអំណាច​វៀតណាម​គ្រប់​គ្រង​មកដល់​សព្វថ្ងៃនេះ។  ពិធីផ្លូវការ​នេះធ្វើឡើងនៅ វត្តសាមគ្គីរង្សី រាជធានីភ្នំពេញ នៅក្រោម​វត្តមានឧត្តមទីប្រឹក្សាព្រះ​មហាក្សត្រ គឺលោក សឺន ស៊ប៊ែរ្តិ៍។

ខ្មែរកម្ពុជាក្រោមអំពាវនាវឲ្យប្រើយុទ្ធនាការឆ្ពោះទៅកាន់កម្ពុជាក្រោម


 បើតាមសុន្ទកថា ការប្រារព្ធពិធីនេះ ដើម្បីបង្ហាញនូវបំណងចង់ឱ្យ ខ្មែរគ្រប់រូបបានប្រើ យុទ្ធនាការដំណោះស្រាយឆ្ពោះទៅកាន់ទឹកដីខ្មែរកម្ពុជាក្រោមឲ្យបានមួយដង​ក្នុង​មួយ​ឆាក​ជីវិត។

យុទ្ធនាការនេះសំដៅទៅដល់ អ្នកដែលមានដើមកំណើតនៅកម្ពុជាក្រោម ហើយសព្វថ្ងៃពួកគេរស់នៅឯក្រៅប្រទេសក្ដី និងនៅកម្ពុជាក្តី ដែលហៅថា “មាតុភូមិនិវត្តន៍” ។ រីឯ ជនរួមជាតិដែលមិនបានកើតនៅកម្ពុជាក្រោម ដូចជា អ្នកនៅកម្ពុជា ឬនៅក្រៅ​ប្រទេស ហៅថា  “ធម្មយាត្រាទៅកាន់កម្ពុជាក្រោម”  និង ជនរួមជាតិខ្មែរ ឬជនបរទេស ហៅថា “ដំណើរទស្សនាចរទៅកាន់កម្ពុជាក្រោម” ដើម្បី​ចុះទៅធ្វើទស្សនកិច្ចសិក្សាស្រាវជ្រាវ ឬទេសចរ ។

ជាការគត់សម្គាល់នៅក្នុងពិធីរំឮកខួប៧៥ឆ្នាំនេះ គឺមានការចេញសាររំឭកអំពីអនុស្សាវរីយ៍ដ៏គួរឲ្យសោកស្ដាយ ពីសំណាក់ព្រះបរមរាជវាំង ព្រះសង្ឃ ប្រជារាស្ដ្រទាំងក្នុង និងក្រៅប្រទេសដោយព្រមៗគ្នា តាមរយៈបណ្ដាសង្គម ។ សកម្មភាពនេះជាការស្ដែងចេញនូវឆន្ទៈដ៏មុះមុតប្រាប់ដល់ពិភពលោកថា ព្រះសង្ឃ និងប្រជារាស្ដ្រខ្មែរមានការឈឺចាប់យ៉ាងខ្លាំង ហើយចងចាំជានិច្ច មិនអាចបំភ្លេចបានចំពោះទង្វើឃុបឃិតគ្នាដ៏អយុត្តិធម៌រវាង បារាំង-វៀតណាម ដើម្បីផ្លាស់ប្ដូរវេនគ្នាយកទឹកដីកម្ពុជាក្រោមមកត្រួតត្រាបន្ត។ នេះជាការគូសបញ្ជាក់​នៅ​ក្នុង​សេចក្តីថ្លែងការណ៍។

សូមរំលឹកជូនថា នៅថ្ងៃទី៥ ខែមិថុនា ឆ្នាំ១៩៤៨ បារាំងបានប្រកាសសេចក្តីថ្លែងការណ៍រួមមួយជាផ្លូវការ ដែលបានចុះហត្ថលេខា កាលពីចុងឆ្នាំ១៩៤៧ រវាងលោក បូឡាអែរត៍ និង ស្តេច បាវ ដាយ ដោយសេចក្តីថ្លែងការណ៍នោះ បានទទួលស្គាល់ឯករាជ្យរបស់វៀតណាម ប៉ុន្តែដោយមានលក្ខខណ្ឌ វៀតណាមត្រូវតែគោរពសិទ្ធិ ផលប្រយោជន៍បារាំង ។ ប៉ុន្តែនៅថ្ងៃទី១៨ ខែ ឆ្នាំដដែលនោះ សម្តេច ព្រះនរោត្តម សីហនុ បានធ្វើការតវ៉ាតាមរយៈព្រះរាជសារមួយជូនចំពោះបារាំង ដោយព្រះអង្គបានចាត់ទុកសេចក្តីថ្លែងការណ៍នោះជាមោឃៈ។

ខ្មែរកម្ពុជាក្រោមអំពាវនាវឲ្យប្រើយុទ្ធនាការឆ្ពោះទៅកាន់កម្ពុជាក្រោម
ខ្មែរកម្ពុជាក្រោមអំពាវនាវឲ្យប្រើយុទ្ធនាការឆ្ពោះទៅកាន់កម្ពុជាក្រោម © ឈា ប៊ុណ្ណារិទ្ធ

តែនៅ​ថ្ងៃទី៤ ខែ​មិថុនា​ឆ្នាំ​១៩៤៩ អាណានិគមបារាំង បានផ្ទេរសិទ្ធិគ្រប់​គ្រង​ខេត្ត​សរុប​ចំនួន​២១​នៅកម្ពុជាក្រោម ទៅ​ឲ្យ​វៀតណាម​គ្រប់គ្រងមកដល់​សព្វថ្ងៃ។

បើតាម​សមាគម​ខ្មែរកម្ពុជា​ក្រោម ជនជាតិដើម​ខ្មែរក្រោម បាន​តស៊ូ និង​ធ្វើ​ពលីកម្ម​គ្រប់​បែបយ៉ាង​ដើម្បី​បុព្វហេតុ​ការពារ​ទឹកដី វប្បធម៌ និង​ជំនឿ​សាសនា​របស់​ខ្លួន នៅ​ដែនដី​កម្ពុជា​ក្រោម បើ​ទោះ​បី​ជា​មានការ​គាប​សង្កត់​ពី​សំណាក់​អាជ្ញាធរ​វៀតណាម​បែប​ណា​ក្តី ខណៈអង្គការ​សហប្រជាជាតិ​តែងតែ​ប្រាប់ឲ្យ​វៀតណាមគោរសិទ្ធិ​ពលរដ្ឋ​ខ្មែរ​ជាជនជាតិដើម៕

What Next?

Recent Articles

Leave a Reply

Submit Comment