ដោយ ច័ន្ទ ដារ៉ូ
2024.06.21
RFA
ស្ដាប់ ឬទាញយកសំឡេង
ប្រធានព្រឹទ្ធសភា លោក ហ៊ុន សែន ថ្លែងកាលពីថ្ងៃទី២៤ ឧសភា ២០២៤។ រូប៖ ហ្វេសប៊ុកលោក ហ៊ុន សែន
អ្នកឃ្លាំមើល និងមន្ត្រីបក្សប្រឆាំងរិះគន់ប្រព័ន្ធតុលាការថា អនុវត្តច្បាប់លម្អៀងដោយមិនបើកការស៊ើបអង្កេតរឿងលោក ហ៊ុន សែន នៅពីក្រោយខ្នងនៃហិង្សាលើសកម្មជនបក្សប្រឆាំងកន្លងមក។ ពួកគេចាត់ទុកការអនុវត្តច្បាប់ស្តង់ដារពីរបែបនេះធ្វើឱ្យអំពើហិង្សា និងការគំរាមកំហែងបន្តកើតឡើងនៅក្នុងសង្គម ពីព្រោះជនប្រព្រឹត្តមិនត្រូវបានចាត់ការតាមនីតិវិធីច្បាប់។ ការលើកឡើងនេះបន្ទាប់ពីលោក ហ៊ុន សែន បញ្ជាឱ្យមន្ត្រីបក្សកាន់អំណាចកម្ទេចកម្លាំងគណបក្សប្រឆាំងនៅតាមមូលដ្ឋានតាមសារសំឡេងបែកធ្លាយនៅលើបណ្តាញសង្គមកាលពីពេលថ្មីៗនេះ។
មន្ត្រីបក្សប្រឆាំង និងអ្នកឃ្លាំមើលចាត់ទុកសារសំឡេងរបស់ លោក ហ៊ុន សែន ដែលបញ្ជាឱ្យដៃជើងគំរាមកំហែង និងប្រើហិង្សាលើសមាជិកបក្សជំទាស់កាលពីពេលថ្មីៗនេះដោយនាំឱ្យមានទង្វើជាក់ស្តែងទៀតនោះគឺជាភស្តុតាងដ៏សំខាន់បង្ហាញថាលោករំលោភបំពានទាំងគោលការណ៍ច្បាប់ សិទ្ធិពលរដ្ឋ និងនយោបាយធ្ងន់ធ្ងរដែលតុលាការត្រូវចាត់ការតាមនីតិវិធី។
ប្រធានគណបក្សសង្គ្រោះជាតិប្រចាំរាជធានីភ្នំពេញលោក ម៉ន ផល្លា ថ្លែងថា ការណ៍ដែលស្ថាប័នតុលាការមិនឯករាជ្យ ដោយបណ្តោយឱ្យលោក ហ៊ុន សែន នៅក្រៅសំណាញ់ច្បាប់គឺបង្ហាញកាន់តែច្បាស់ពីប្រព័ន្ធយុត្តិធម៌នៅកម្ពុជាស្ថិតក្រោមឥទ្ធិពលនយោបាយ។ លោកបញ្ជាក់ថាបញ្ហានេះនឹងធ្វើឱ្យសង្គមបែកបាក់ ពលរដ្ឋលែងមានជំនឿលើប្រព័ន្ធច្បាប់ ហើយជនប្រព្រឹត្តនឹងបន្តប្រើអំណាចដើរគំរាមកំហែង បង្កហិង្សាលើអ្នកដទៃលែងដឹងខុសត្រូវតទៅទៀត។
លោក ម៉ន ផល្លា៖ « តុលាការនៃរបបក្រុងភ្នំពេញបច្ចុប្បន្នគឺមិនឯករាជ្យទេ កិច្ចការទាំងអស់ធ្វើទៅតាមបញ្ជារបស់លោក ហ៊ុន សែន និងលោក ហ៊ុន ម៉ាណែត។ អ៊ីចឹងខ្ញុំយល់ថាអនាគតកម្ពុជា របបដឹកនាំដោយឪកូននេះគឺធ្វើឱ្យកម្ពុជាយើងមានអំពើអសីលធម៌កើតឡើងក្នុងសង្គមកាន់តែកើនឡើងថែមទៀត»។
ប្រតិកម្មនេះធ្វើឡើងបន្ទាប់ពីមានសារសំឡេងមួយនៅលើបណ្ដាញសង្គមដែលគេអះអាងថាជាសាររបស់លោក ហ៊ុន សែន មេបក្សកាន់អំណាចបញ្ជាឱ្យក្រុមការងារពិសេសរបស់លោកអនុវត្តផែនការកម្ទេចកម្លាំងគណបក្សប្រឆាំងនៅតាមមូលដ្ឋាន ដើម្បីកុំឲ្យមានលទ្ធភាពកសាងកម្លាំងសម្រាប់ចូលរួមការបោះឆ្នោតឃុំ-សង្កាត់ឆ្នាំ២០២៧។ សារសំឡេងបែកធ្លាយរយៈពេលជាង១០នាទីដែលត្រូវបានអ្នកប្រើប្រាស់បណ្ដាញសង្គមហ្វេសប៊ុក(Facebook)ចែកចាយព្រោងព្រាតនោះ លោក ហ៊ុន សែន ដាក់បទបញ្ជាឲ្យមន្ត្រីបក្សរបស់លោកនិងក្រុមអតីតសកម្មជនបក្សប្រឆាំងដែលលោកទិញទឹកចិត្តបានត្រូវចុះទៅមូលដ្ឋាន ឬហៅថា យកសត្វលលកទៅទាក់លលក និងងើបមួយវាយមួយ ដើម្បីកម្ទេចកម្លាំងគណបក្សប្រឆាំង កុំឲ្យនៅទើសមុខទើសមាត់លោកតទៅទៀត។
លោក ហ៊ុន សែន៖ «បំផ្លាញកម្លាំងពួកប្រឆាំងកុំមានកម្លាំងសម្រាប់ប្រើ បើអែប្រឆាំងងើបមួយវាយមួយ ហើយចូលមួយទាញមួយ ហើយទាញមួយឱ្យអ្នកហ្នឹងទៅទាញបន្តទៀត គឺថាតាមវិធីយកលលកទាក់លលក កុំយកដំរីទៅទាក់កូនខ្លា ឬយកដំរីទាក់លលក យកនាគរាជទៅលលកអត់ត្រូវទេ អ៊ីចឹងសូមយកចិត្តទុកដាក់ធ្វើកិច្ចការងារហ្នឹងឱ្យបានល្អបំផុត សង្ឃឹមថាឯកឧត្តម លោកជំទាវធ្វើកិច្ចការងារនេះដោយម៉ត់ចត់ ហើយនៅមានយន្តការមួយចំនួនជំនាញខាងរកមុខសញ្ញាសម្រាប់វាយតែម្តង មុខសញ្ញាណារឹងចូលវាយតែម្តង អូសទាញបើមិនមកគឺថាបំផ្លាញជើងក្រោមចោលតែម្តង »។
អ្នកឃ្លាំមើលចាត់ទុកសារសំឡេងនេះគឺជាការគំរាមកំហែង និងជាការរំលោភច្បាប់ធ្ងន់ធ្ងរ ពីព្រោះកម្ពុជាជាប្រទេសប្រកាន់ប្រជាធិបតេយ្យ សេរី ពហុបក្សដែលធានាថាពលរដ្ឋគ្រប់រូប មានសិទ្ធិសេរីភាពធ្វើនយោបាយដោយគ្មានការគំរាមកំហែង និងការបង្ខិតបង្ខំ។
ជុំវិញរឿងនេះ អ្នកឃ្លាំមើលការរំលោភសិទ្ធិមនុស្ស និងបញ្ហាសង្គមលោក ស៊ឹង សែនករុណា លើកឡើងថាគោលការណ៍ច្បាប់គឺអ្នកដែលផ្ដួចផ្ដើមគំនិត និងអ្នកធ្វើសកម្មភាពនាំឱ្យកើតអំពើហិង្សា ឬការគំរាមកំហែងជាដើម តុលាការ និងនគរបាលយុត្តិធម៌ត្រូវធ្វើការស្រាវជ្រាវ និងចាប់អ្នកប្រព្រឹត្តដើម្បីបង្ហាញពីការអនុវត្តច្បាប់ និងទប់ស្កាត់កុំអំពើទាំងនោះកុំឱ្យកើតឡើងសាជាថ្មី។ ប៉ុន្តែលោកមើលឃើញថា ស្ថាប័នទាំងនេះមិនហ៊ានបើកការស៊ើបអង្កេតជុំវិញសារសំឡេងដែលគេសង្ស័យពាក់ព័ន្ធមេដឹកនាំបក្សកាន់អំណាចដែលជះឥទ្ធិពលមិនល្អដល់សង្គមដែលធ្វើឱ្យអំពើល្មើសនោះបន្តកើតឡើងឥតឈប់ឈរ។
លោក ស៊ឹង សែនករុណា៖ «កម្ពុជាមានច្បាប់អត់យកទៅអនុវត្តទៅលើជនដែលប្រព្រឹត្តនូវបទល្មើស អ៊ីចឹងសួរថាច្បាប់បង្កើតឡើងមកដើម្បីន័យអ្វីទៅ ដើម្បីយកទៅបម្រើបុគ្គលដែលប្រព្រឹត្តល្មើសច្បាប់ អ៊ីចឹងសួរថាតើវាមានយុត្តិធម៌ទេ គឺអត់មានយុត្តិធម៌ អ៊ីចឹងបញ្ហាប្រព័ន្ធតុលាការនៅកម្ពុជាមិនអាចឱ្យយើងឃើញថាហ៊ានចាត់វិធានការទៅលើអ្នកមានអំណាច មានឥទ្ធិពលអ្វីទេ អ៊ីចឹងបានជាកន្លងមកយើងចង់ឱ្យសហគមន៍អន្តរជាតិសូមពិនិត្យមើលឱ្យមែនទែនអំពីឥរិយាបថ និងអំពើដែលថ្នាក់ដឹកនាំនយោបាយកម្ពុជាប្រព្រឹត្តមកលើប្រជាពលរដ្ឋនោះ »។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងយុត្តិធម៌លោក ជិន ម៉ាលីន និងប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា ដើម្បីឆ្លើយតបរឿងនេះបានទេនៅថ្ងៃទី២១ ខែមិថុនា។
ទោះយ៉ាងណាសារនេះមិនជាលើកទីមួយទេដែលលោក ហ៊ុន សែន ញុះញង់ឱ្យមានអំពើហិង្សា ប្រើពាក្យអសុរោះ ជេរប្រមាថ និងរើសអើងនៅក្នុងសង្គម។ កាលពីថ្ងៃទី៩ ខែមករា ឆ្នាំ២០២៣ គឺនៅមុនការបោះឆ្នោតជ្រើសតាំងតំណាងរាស្ត្រ អាណត្តិទី៧ កន្លងទៅ លោក ហ៊ុន សែន បានគំរាមឱ្យក្រុមបក្សជំទាស់ជ្រើសរើសរវាងប្រព័ន្ធផ្លូវច្បាប់ និងដំបង ហើយលោកប្រកាសប្រមូលផ្តុំសមាជិកគណបក្សប្រជាជនកម្ពុជាទៅតវ៉ា និងវាយទាត់ធាក់ ព្រមទាំងបញ្ជូនក្មេងទំនើងទៅផ្ទះពួកគេផងដែរ។
ក្រោយពេលលោក ហ៊ុន សែន បង្គាប់បញ្ហាមកមន្រ្តីបក្សកាន់អំណាចអនុវត្តផែនការភ្លាមៗ ដោយបង្ហោះសារនៅលើបណ្ដាញសង្គមពីសមាសភាពសកម្មជនបក្សជំទាស់នៅតាមមូលដ្ឋានចូលចុះចូលជាមួយគណបក្សប្រជាជនកម្ពុជា។
ចំណែកសកម្មជនគណបក្សប្រឆាំងដែលរក្សាជំហររឹងមាំ ឬមិនលក់ឧត្តមគិតវិញត្រូវរងការធ្វើទុក្ខបុកម្នេញឥតស្រាកស្រាន្តតាមរយៈប្រព័ន្ធតុលាការចោទប្រកាន់ និងចាប់ខ្លួនដាក់ពន្ធនាគារ ហើយអ្នកខ្លះត្រូវរត់គេចខ្លួនទៅកន្លែងមានសុវត្ថិភាព អ្នកខ្លះទៀតជនត្រូវជនមិនស្គាល់មុខវាយដុំបង្កហិង្សាបណ្តាលឲ្យរបួសធ្ងន់ធ្ងរ។ ជាងនេះទៅទៀត ជនរងគ្រោះទាំងនោះមិនត្រឹមតែ មិនទទួលបានយុត្តិធម៌នោះទេ តែថែមទាំងត្រូវបានជនល្មើសលួចវាយប្រហារផ្ទួនៗ ហើយត្រូវបានអាជ្ញាធររបស់លោក ហ៊ុន សែន ចាប់ឃុំខ្លួនដាក់ក្នុងពន្ធនាគារទៀតផង។
អ្នកតាមដានស្ថានការណ៍សង្គម និងនយោបាយព្រួយបារម្ភជាខ្លាំងចំពោះអំពើហិង្សាលើសកម្មជនសង្គម និងសកម្មជននយោបាយជាញឹកញាប់ បន្ទាប់ពីមេដឹកនាំបក្សកាន់អំណាចគឺលោក ហ៊ុន សែន បញ្ជាឱ្យប្រើហិង្សាវាយដុំលើអ្នកដែលមាននិន្នាការផ្ទុយបន្តបន្ទាប់មកនេះ។ ពួកគេចាត់ទុក ករណីទាំងនេះថាជាការរំលោភច្បាប់ និងធ្វើទុក្ខបុកម្នេញលើអ្នកនយោបាយ ដែលត្រូវយកមកផ្ដន្ទាទោសលើអ្នកប្រព្រឹត្ត និងអ្នកបញ្ជានៅក្រោយខ្នងដើម្បីធានាឱ្យសង្គមមានយុត្តិធម៌ និងការប្រកួតប្រជែងដោយស្មើភាពគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។