ពលរដ្ឋ​ក្រីក្រ​នៅ​ខេត្ត​ព្រះវិហារ​នៅ​តែ​ទទូច​ឲ្យ​អាជ្ញាធរ​ពាក់ព័ន្ធ​ជួយ​កាត់​ឆ្វៀល​ដី​ឲ្យ​ពួកគាត់​បាន​អាស្រ័យផល

ដោយ មាន ឫទ្ធិ
2024.07.09
RFA

ពលរដ្ឋ​ក្រីក្រ​នៅ​ខេត្ត​ព្រះវិហារ​នៅ​តែ​ទទូច​ឲ្យ​អាជ្ញាធរ​ពាក់ព័ន្ធ​ជួយ​កាត់​ឆ្វៀល​ដី​ឲ្យ​ពួកគាត់​បាន​អាស្រ័យផល

អភិបាលខេត្ត​ព្រះវិហារ លោក គីម រិទ្ធី។ រូប៖ ហ្វេសប៊ុកលោក គីម រិទ្ធី


ប្រជាពលរដ្ឋ​ក្រីក្រ​ រស់​នៅ​ស្រុក​គូលែន ខេត្ត​ព្រះវិហារ ជាង​២០០​គ្រួសារ ទទូច​ឲ្យ​អាជ្ញាធរ​ពាក់ព័ន្ធ​ជួយ​រក​ដំណោះស្រាយ និង​ជួយ​កាត់​ឆ្វៀល​ដី​ឲ្យ​ពួកគាត់​បាន​អាស្រ័យផល សម្រាប់​ចិញ្ចឹម​ជីវិត​ទៅ​ថ្ងៃ​មុខ។ សង្គម​ស៊ី​វិល ចង់​ឃើញ​អាជ្ញាធរ​ដោះស្រាយ​កង្វល់​របស់​ពលរដ្ឋ​ដោយ​សន្តិវិធី។

ប្រជាពលរដ្ឋ​ក្រីក្រ ជាង​២០០គ្រួសារ ដែល​កំពុង​ប្រឈម​នឹង​អាជ្ញាធរ​ខេត្ត​ចុះ​បណ្ដេញ​ចេញ និង​កម្ទេច​ផ្ទះ​សម្បែង​ចោល រស់​នៅ​ឃុំ​គូលែនជើង ស្រុក​គូលែន ខេត្ត​ព្រះវិហារ ទទូច​ឲ្យ​អាជ្ញាធរ​បញ្ឈប់​គម្រោង​រុះ​រើ​ផ្ទះ​សម្បែង  ហើយ​ងាក​មក​រក​ដំណោះស្រាយ​ដោយ​កាត់​ឆ្វៀល​ដី​ឲ្យ​ប្រជាពលរដ្ឋ​ទុក​គ្រាន់​ចិញ្ចឹម​ជីវិត​ទៅ​ថ្ងៃ​ខាង​មុខ។

ប្រជាពលរដ្ឋ​រស់​នៅ​ឃុំ​គូលែនជើង លោកស្រី បុន សុផាន្នី ប្រាប់​វិទ្យុ​អាស៊ីសេរី នៅ​ថ្ងៃ​ទី៧ ខែ​កក្កដា​ថា ប្រជាពលរដ្ឋ​ជាង​២០០​គ្រួសារ​នៅ​ព្រួយបារម្ភ​ខ្លាច អាជ្ញាធរ​ចុះ​រុះ​រើ​ផ្ទះ​សម្បែង និង​បណ្ដេញ​ចេញ​ទាំង​បង្ខំ។ ពួកគាត់​នៅ​តែ​ទទូច​ទៅ​អាជ្ញាធរ​ពាក់ព័ន្ធ​ជួយ​សម្រួល​ដោះស្រាយ​ឲ្យ​ប្រជាពលរដ្ឋ និង​កាត់​ឆ្វៀល​ដី​ដែល​ពលរដ្ឋ​កំពុង​អាស្រ័យផល​ទាំង​នោះ​ឲ្យ​ទៅ​ពួកគាត់ ហើយ​ពួកគាត់​នឹង​មិន​ទន្ទ្រាន​ដី​ព្រៃ​របស់​រដ្ឋ​នោះ​ទេ។ លោក​ស្រី​បន្ថែម​ថា ពលរដ្ឋ​ទាំង​នោះ សុំ​ត្រឹម​ដី​ដែល​ពួកគាត់​អាស្រ័យផល​បច្ចុប្បន្ន​តែ​ប៉ុណ្ណោះ លើស​ពី​នោះ​ពួកគេ​មិន​ទាមទារ​អ្វី​ឡើយ។

លោកស្រី បុន សុផាន្នី៖ «គ្រាន់​តែ​គេ​មក​ធ្វើ​បច្ចុប្បន្ន​ភាព​ឲ្យ​យើង​គេ​មិន​បាន​ដេញ​ដូច​លើក​មុន​នោះ​ទេ មិន​ដឹង​ថា​គេ​ចុះ​យក​ឯកសារ​វិភាគ​ឬ​ធ្វើ​យ៉ាង​ម៉េច​ខ្ញុំ​មិន​ដឹង​ដែរ។ សុំ​តែ​ដី​លំនៅឋាន និង​ដី​អាស្រ័យផល​សព្វ​ថ្ងៃ​ប៉ុណ្ណឹង​បាន​ហើយ មិន​ចង់​បាន​អ្វី​ទៀត​ទេ គាត់​មិន​មាន​ទៅ​សុំ​រុករាន​ដី​ព្រៃ​រុករាន​ថ្មី​គឺ​អត់​ទេ សុំ​ដី​ដែល​គាត់​បាន​ធ្វើ ផ្ទះ​សាងសង់​ហើយ​កុំ​ឲ្យ​គេ​រើ​តែ​ប៉ុណ្ណឹង​ឯង»។

ពលរដ្ឋ​លើក​ឡើង​ទៀត​ថា រយៈ​ពេល​បី​ថ្ងៃ​មក​ហើយ ឃើញ​មាន​អាជ្ញាធរ​ចុះ​ស្រង់​ឈ្មោះ​របស់​ប្រជាពលរដ្ឋ ប៉ុន្តែ​ពួកគេ​មិន​ទាន់​ដឹង​ថា​អាជ្ញាធរ​ទាំង​នោះ​ចុះ​ស្រង់​ឈ្មោះ​ដើម្បី​អ្វី​នោះ​ទេ។

ជុំ​វិញ​រឿង​នេះ វិទ្យុ​អាស៊ីសេរី មិន​អាច​ទាក់ទង​អភិបាល​រង​ខេត្ត​ព្រះវិហារ ណុប វុធ្ធី ដើម្បី​សុំ​ការ​បំភ្លឺ​បាន​ទេ ។ ប៉ុន្តែ​កាល​ពី​ថ្ងៃ​ទី២ ខែ​មិថុនា សមត្ថកិច្ច​ចម្រុះ​ខេត្ត​ព្រះវិហារ បាន​ដាក់​ឱសានវាទ​ឲ្យ​ប្រជាពលរដ្ឋ​រស់​នៅ​ឃុំ​គូលែនជើង ស្រុក​គូលែន ខេត្ត​ព្រះវិហារ ត្រូវ​រុះរើ​ផ្ទះ​សម្បែង ​និង​ចាកចេញ​ពី​ភូមិ ត្រឹម​ថ្ងៃ​ទី​១៨ ខែ​មិថុនា ជាកំហិត ប្រសិនបើ​ប្រជាពលរដ្ឋ​មិន​ព្រម​ចាកចេញ និង​ហ៊ាន​ចេញ​តវ៉ា អាជ្ញាធរ​ខេត្ត​នេះ​នឹង​ចាត់​វិធានការ​ក្ដៅ​ជាក់​ជា​មិន​ខាន។ រហូត​មក​ដល់​ពេល​នេះ អាជ្ញាធរ​ខេត្ត​ព្រះវិហារ​មិន​ទាន់​ចាត់​វិធានការ​ក្ដៅ​ទៅ​លើ​ប្រជាពលរដ្ឋ​ជាង​២០០​គ្រួសារ​នោះ​ទេ។

ទាក់ទិន​នឹង​បញ្ហា​នេះ អនុប្រធាន​ផ្នែក​សិទ្ធិមនុស្ស ដីធ្លី និង​ធនធានធម្មជាតិ​នៃ​សមាគម​ការពារ​សិទ្ធិមនុស្ស​អាដហុក (Adhoc) លោក យិន ម៉េងលី មាន​ប្រសាសន៍​ថា ប្រសិនបើ​ប្រជាពលរដ្ឋ​​រស់នៅ​តំបន់​នោះ​ច្រើន​ឆ្នាំ​ហើយ រដ្ឋាភិបាល​គួរ​ផ្ដល់​ដីសម្បទាន​សង្គមកិច្ច​ដល់​ប្រជាពលរដ្ឋ​ក្រីក្រ​ពិតប្រាកដ។

លោក យិន ម៉េងលី៖ «សុំ​ឲ្យ​រដ្ឋាភិបាល​កាត់​បន្ថយ​ដី​សម្បទាន​សេដ្ឋកិច្ច​ដែល​អាច​ធ្វើ​ទៅ​បាន ដើម្បី​ទុក​ដី​ទាំង​អស់​នោះ​ឲ្យ​ប្រជាពលរដ្ឋ​ក្រីក្រ​ពិត​ប្រាកដ ប្រជាពលរដ្ឋ​ដែល​គាត់​រក​គ្រោះ​មិន​ប្រាកដ​ឲ្យ​គាត់​មាន លទ្ធភាព​ដើម្បី​បង្កបង្កើន​ផល​ចិញ្ចឹម​ជីវភាព​គ្រួសារ​របស់​ពួកគាត់​ទៅ ដើម្បី​កាត់​បន្ថយ​ការ​ចំណាក់​ស្រុក»។

ពលរដ្ឋ​បាន​តាំង​ទីលំនៅ និង​អាស្រ័យផល​នៅ​តំបន់​នោះ​ចាប់​តាំង​ពី​ឆ្នាំ​១៩៩៩ មក ។ ពលរដ្ឋ​អះអាង​ថា ប្រសិនបើ​អាជ្ញាធរ​ខេត្ត​មួយ​នេះ​មិន​ព្រម​ដោះស្រាយ​ឲ្យ​ពួកគេ​នោះ​ទេ ពួកគេ​នឹង​នាំ​គ្នា​ឡើង​ទៅ​រាជធានី​ភ្នំ​ពេញ ដើម្បី​ស្នើ​ឲ្យ​រដ្ឋាភិបាល ជួយ​អន្តរាគមន៍ និង​ស្វែង​រក​ដំណោះស្រាយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment